TUNDE kosimbu, omanu voluali luosi va siata oku kuatisiwa lovolandu Embimbiliya a siata oku sandekiwa Vutala Wondavululi. Pole, Utala Wondavululi u kuete upopi wa leluka kelimi Liongelesi, wa fetika oku sandekiwa kosãi Yevambi Linene, yunyamo wo 2011. Owo wa lombolola ndoco: “Utala waco Wondavululi, u ka sandekiwa vokuenda kunyamo umosi. Kuenje, nda omanu va kuatisiwa lawo, u ka amamako oku sandekiwa.”

Tu kuete esanju lioku sapula okuti, tua nõlapo oku amamako oku sandeka Utala waco Wondavululi. Noke, u ka sandekiwavo kelimi lio Fransesi, Lioputu, kuenda lio Espanyole.

Omanu valua va kasi Kombuelo yo Pasifiku noke yoku tambula Utala Wondavululi wa leluka kelimi Liongelesi, va popia hati: “Cilo, vamanji va pondola oku kuata elomboloko liovipama Viutala waco Wondavululi.” Ukanda ukuavo wa popia ndoco: “Otembo tua enda oku pesila koku konomuisa olondaka via tatama, cilo, tu yi pesila koku sandiliya elomboloko liovinimbu Viembimbiliya via tukuiwa, loku solokola ndomo tu vi kapako.”

Ukãi umue wa lilongisila kosikola ya velapo ko Estados Unidos wa popia hati: “Nda pita 18 kanyamo kosikola ya velapo loku vangula kuenda oku soneha elimi limue lia tatama. Kuenje, nda fetika oku vangula lonjila yimue okuti, ka calelukile omanu oku kuata elomboloko liaco. Noke, nda limbuka okuti, ndi sukila oku pongolola ovisimĩlo kuenda oku vangula kuange.” Omo okuti cilo wa linga Ombangi ya Yehova, wa popiavo hati: “Utala Wondavululi wa sandekiwa vupopi wa leluka, wa siata oku ndi kuatisa calua. Upopi waco wecelela oku vangula lonjila yimue ya leluka.”

 Manji umue wo kofeka yo Inglaterra okuti wa papatisiwa kunyamo wo 1972, wa soneha eci catiamẽla Kutala Wondavululi u kuete upopi wa leluka. Eye wa popia hati: “Eci nda u tanga onjanja yatete, ca kala ndu okuti Yehova wa tumala ponele yange loku ndi kuata kapepe, kuenda tua kala oku tangela kumosi ovipama viaco. Ca kala nda isia o tangela ulandu umue omõla waye osimbu ka va pekelele handi.”

Manji umue ukãi ko Betele yo Estados Unidos okuti tunde eci a papatisiwa pa pita ale 40 kanyamo, wa popia hati, Utala waco Wondavululi, u kasi oku u kuatisa oku vokiya elomboloko liaye. Okakasia ka sangiwa Vutala Wondavululi 15 Yenyenye Linene, wo 2011 losapi hati, “Olondaka Vimue Via Lomboluiwa,” ka tukula olondaka ‘elende linene liolombangi,’ vi sangiwa kelivulu lia Va Heveru 12:1 okuti via lomboluiwa vupopi wa leluka ndoco: “Kuli afendeli valua va Yehova okuti, lomue o tẽla oku va tenda.” Eye wa popia hati: “Elomboluilo liaco, lia ndi kuatisa oku kuata elomboloko liocinimbu caco.” Noke, wa lombololavo eci catiamẽla kohongele yi lingiwa kesulilo liosemana poku popia hati: “Etambululo omãla va eca lekuatiso Liutala Wondavululi u kuete upopi wa leluka, lia litepa leli va enda oku eca Vutala Wondavululi wosimbu. Cilo, omanu vosi veya kohongele, va siata oku kuata elomboloko liatambululo a eciwa lomãla.”

Manji ukuavo o kasi ko Betele wa soneha ndoco: “Nda siata oku sanjukila oku yevelela atambululo a eciwa lomãla kolohongele. Utala Wondavululi u kuete upopi wa leluka, wa siata oku va kuatisa oku eca atambululo asuapo. Omo liaco, atambululo avo, a siata oku pamisa ekolelo liange.”

 Manji umue ukãi wa papatisiwa kunyamo wo 1984, wa eca olopandu omo Liutala waco Wondavululi poku popia hati: “Ulandu waco u kasi ndu okuti, ame va u ndi sonehela. Ca leluka oku kuata elomboloko liovipama ndi tanga. Cilo, nda kolela okuti, ndi pondola oku eca atambululo velilongiso Liutala Wondavululi.”

Manji umue ukãi okuti omõla waye ulume o kuete anyamo epanduvali wa popia hati: “Nda enda oku kava calua poku pongiya kumue lomõla wange Utala Wondavululi, omo lioku u lomboluila ovinimbu vialepa. Utala Wondavululi u kuete upopi wa leluka wa kuatisa ndati manji yaco? Eye wa soneha ndoco: “Nda komoha calua omo okuti cilo, omõla wetu o pondola oku tanga ovinimbu vimue, kuenda o kuata lonjanga elomboloko liaco. Omo okuti ovipama viaco vi kuete ovinimbu vimbumbulu, ka kuete ohele yoku vi tanga. Cilo, ka sukila vali ekuatiso liange, poku pongiya atambululo a ka eca kolohongele, kuenda o kuama lutate ocipama cosi celilongiso.”

Manji ukuavo ukãi okuti omõla waye o kuete anyamo ecea, wa soneha ndoco: “Poku pongiya ocipama celilongiso, tua enda oku u kuatise oco a tambulule volondaka viaye muẽle. Pole, cilo ka sukila vali ekuatiso lietu. Omo liaco, ka tua siatele vali oku pesela otembo yalua oco omõla wetu a kuate elomboloko liovipama. Omo okuti kosimbu ka ca lelukile oku kuata elomboloko liaco, cilo, wa siata oku eca atambulo kelilongiso Liutala Wondavululi.”

Omãla valua va siata oku popia vati, Utala Wondavululi u kuete upopi wa leluka, wa pangiyiwila oku va kuatisa. Umalẽhe umue o tukuiwa hati Rebecca, o kuete ekũi lavali kanyamo, wa pinga hati: “Amamiko oku tu tumisa Utala Wondavululi wokaliye! Kuenje, wa amisako hati: “Ndi sole calua onepa losapi hati: ‘Olondaka Vimue Via Lomboluiwa.’ Momo ya siata oku kuatisa omãla.”

Kamõla umue o kuete anyamo epanduvali o tukuiwa hati, Nicolette wa popiavo hati: “Utala waco Wondavululi, wa siata oku ndi kuatisa oku kuata elomboloko liovina ndi tanga. Cilo, ndi pondola oku eca atambululo volondaka viange muẽle.” Kamõla ukuavo o kuete anyamo ecea, o tukuiwa hati Emma, wa popiavo hati: “Utala waco Wondavululi wa siata oku ndi kuatisa kumue lamanjange o kuete anyamo epandu. Momo tua siata oku kuata elomboloko lia suapo liovina tu tanga! Tu eca olopandu omo lieliangiliyo liaco!”

Omanu valua va siata oku kuatisiwa Lutala waco Wondavululi, momo, u kuete olondaka via leluka kuenda ovinimbu vimbumbulu. Omo liaco, u ka amamako oku sandekiwa kumosi Lutala Wondavululi u kasi oku sandekiwa tunde kunyamo wo 1879.