Ovisonehua vi tu sapuila hati: ‘Vutima womunu mu tunda ovisimĩlo vĩvi, umondi, uvasi, ukahonga, umunu, uvangi wuhembi, kuenda etonãi.’ (Mat. 15:19) Utima wetu wocindekaise u pondola oku tu vetiya oku linga ovina ka vi litava locipango ca Suku. Noke yoku liyaka lovitangi oco lika tu limbuka okuti, tua kuama onjila ka ya sungulukile. Nye ci tu kuatisa oku limbuka ovisimĩlo viutima wetu osimbu ka tua kuamele onjila ka ya sungulukile?

Tanga Embimbiliya oloneke viosi kuenda sokolola ovina wa lilongisa.

Upostolo Paulu wa soneha ndoco: “Ondaka ya Suku yi kasi lomuenyo, haiyo yi kuete unene, kuenda ya tua enene, okuti, osipata ya tua nelembali yi sule. Ondaka yaco yi toma toke yi tepa omuenyo lolondunge.” Embimbiliya li tu kuatisa oku limbuka “ovisimĩlo lolonjongole viutima” wetu. (Va Hev. 4:12, NW) Oku pokola kolonumbi vi sangiwa Vembimbiliya ci tu kuatisa oku limbuka ovisimĩlo viutima wetu. Omo liaco, oku tanga Embimbiliya eteke leteke loku sokolola ovina tua lilongisa, ci tu kuatisa oku kũlĩha ovisimĩlo via Yehova!

Oku tava kalungulo Embimbiliya loku kapako olonumbi viaco, ci tu kuatisa oku ‘situlula ovisimĩlo viutima wetu’. (Va Rom. 9:1) Ovisimĩlo viutima wetu vi pondola oku tu vetiya oku lisandela esunga. Vembimbiliya mu sangiwa ovolandu alua  ‘elungulo’ a pondola oku tu kuatisa. (1 Va Kor. 10:11) Tua lilongisa okuti, ovolandu aco a pondola oku tu kuatisa oku yuvula oku nõla onjila ka ya sungulukile. Omo liaco, nye tu sukila oku linga?

Likutilila ku Yehova oco a ku kuatise oku limbuka ovisimĩlo viutima wove.

Yehova ‘wa siata oku kũlĩhĩsa ovisimĩlo viutima wetu.’ (1 Asa. 29:17) Embimbiliya li lekisa okuti ‘Yehova Suku wa velapo okuti utima wetu u sule, kuenda wa kũlĩha ovina viosi.’ (1 Yoa. 3:20) Ka tu pondola oku kemba Yehova. Nda tua situlula ovisimĩlo lolonjongole vietu poku likutilila ku Yehova, eye o tu kuatisa oku limbuka ovisimĩlo viutima wetu. Omo liaco, tu sukila oku pinga ku Yehova oco ‘a tu ĩhe utima wa yela.’ (Osa. 51:10) Ohutililo ombanjaile yimue yi tu kuatisa oku situlula ovisimĩlo viutima wetu.

Yevelela lutate kolohongele.

Oku yevelela lutate osimbu tu kasi kolohongele, ci tu kuatisa oku limbuka ovisimĩlo viutima wetu. Oku endaenda kolohongele, ci tu kuatisa oku kuata elomboloko liasuapo Liembimbiliya, ndaño okuti pamue ka tu tambula asapulo okaliye. Nda tua ci linga, ci tu kuatisa oku limbuka ovisimĩlo viutima wetu. Atambululo vamanji va siata oku eca kolohongele, a pondola oku tu kuatisa. (Olosap. 27:17) Oku yuvula oku linga ukamba lavamanji kolohongele, ci pondola oku tu honguisa. Nda ka tua lavuluile, tu vetiyiwa oku pitisa kovaso ovisimĩlo vietu muẽle.’ (Olosap. 18:1) Omo liaco, tu sukila oku lipula ndoco: Ndi kuete hẽ ocituwa coku endaenda kolohongele oco ndi kuatisiwe lovipama viaco?—Va Hev. 10:24, 25.

Omo okuti utima wetu weyuka elimbi, u pondola oku tu vetiya oku linga ovina vialua ka via sungulukile. Tu konomuisi olonepa vikuãla ndeci: Oku sandiliya ovokuasi, ovina vi koluisa, oku nõla akamba, kuenda ovina tu linga kolomapalo.

Poku Sanda Ovokuasi.

Ca sunguluka oku tẽlisa olonjongole vietu. Pole, Yesu wa eca elungulo liatiamẽla koku sakalala calua loku sanda ovokuasi. Volusapo lumue Yesu ata, o tu laleka oku kũlĩhĩsa ulandu ulume umue wa kala ohuasi okuti, wa solekele ovina vialua. Omo okuti ka kuatele onjo yoku soleka ovikulia ongula vovapia, wa teya olosila viaye oco a tunge vinene. Kuenje wa sima ndoco: ‘Ndi teya olosila viange oco ndi tunge vikuavo vinene okuti, omo ndi soleka okulia kuange kuosi lovikuata viange. Noke ndi popia ndoco: ‘Otima, o kuete ovina vialua wa soleka anyamo a lua, livala, lia, nyua, kuenda sanjuka.’ Pole, ulume waco ka ivalukile okuti pamue o fa koñolosi yeteke liaco.—Luka 12:16-20.

Omo okuti tu panda koku kuka, pamue tu sakalala calua loku sandiliya ovokuasi a ka tu kuatisa noke yoku kuka, kuenje ka tu kuata otembo yoku endaenda kolohongele kuenda oku tẽlisa ovikele vikuavo. Ka tu sukila hẽ oku yuvula ovisimĩlo viaco? Eci tua kala amalẽhe, pamue tua limbukile okuti, oku litumbika kupange wakundi votembo yosi, ci  kuete esilivio lia velapo. Anga hẽ tua liwekapo upange wakundi votembo yosi oco tu sandiliye ovokuasi a ka tu kuatisa kovaso yoloneke? Ka tu sukila hẽ oku likolisilako cilo, oco tu kale olohuasi kovaso a Suku? Helie wa kũlĩha nda hẽla tu fa?

Tu sukila oku lavulula poku nyua ovina vi koluisa.

Elivulu Liolosapo 23:20, li popia hati: “Ku ka kale pokati koloholua.” Nda omunu o sole calua oku nyua ovina vi koluisa, pamue o lisandela esunga lioku nyua olonjanja viosi. Citava okuti, o popia ndoco, si nyuila oku kolua, pole, ndi yongola lika oku sanjuisa utima. Nda tu yongola oku nyua ovina vi koluisa locimaho coku sanjuisa utima, tu sukila oku kũlĩhĩsa ovisimĩlo vietu.

Poku nõla akamba.

Ka tu pondola oku yuvula omanu vana ka va fendela Yehova, momo tua siata oku lisanga lavo kosikola, kupange woku sanda eteku, kuenda kupange woku kunda. Pole, tu sukila oku lavulula poku linga ukamba lomanu vaco. Anga hẽ tu li sandela esunga loku popia hati, akamba vaco va kuete ovituwa viwa? Embimbiliya li tu lungula hati: “Ko ka kembiwi. Akamba vãvi va nyõla ovituwa viwa.” (1 Va Kor. 15:33) Ocili okuti o fela yalĩha yi pondola oku lihĩsa ovava a yela. Cimuamue haico ci pita letu okuti, nda tu linga ukamba lomanu ka va kuete ovituwa viwa, tu nyõla ekolelo lietu kuenje, tu vetiyiwa oku kuama ovisimĩlo violuali kovina vimue ndeci: Koku wala, koku vangula, kuenda kovituwa viavo.

Ovina tu linga kolomapalo.

Omo okuti, ovoloño a livokiya calua, pamue tu vetiyiwa oku linga ovitalukilo vina okuti Akristão va sukila oku viyuvula. Paulu wa lungula hati, tu sukila ‘oku yuvula oku vangula ovina via vĩha. (Va Efe. 5:3) Nye tu sukila oku linga nda tu vetiyiwa oku yevelela ovisikilo ka via sungulukile, ale oku linga ocina cimue ca vĩha. Pamue tu li sandela esunga liokuti, vosi yetu tu sukila oku linga ovina vi tu nenela esanju, kuenda omunu o kuete elianjo lioku nõla omapalo a yongola oku linga. Pole, tu sukila oku pokola kelungulo lia Paulu wa popia hati, ka tu ka eceleli oku tala ale oku yevelela ovina via vĩha.

Nda tu kuete ocituwa coku lisandela esunga eci tu linga ovina ka via sungulukile, tu sukila oku linga apongoloko. (Va Efe. 4:22-24) Tu konomuisi ovolandu avali.

Omo okuti manji Miguel * ka tiamisilile vali utima waye kovokuasi wa popia hati: “Ame kumue lukãi wange kuenda omõla wetu, tu kasi vofeka yimue okuti omanu va velisapo calua oku kuata ovina viokaliye. Omo liaco, nda litumbikile koku sandiliya ovina viaco loku sima okuti, si yapuisiwa lovokuasi. Noke, nda limbuka okuti oku tiamisila utima kovokuasi ci vokiya onjongole yoku landa ovina viokaliye. Omo liaco, nda li kutilila ku Yehova catiamẽla kovisimĩlo viutima wange. Kuenje, ndo sapuila okuti, ame kumue lepata liange, tu yongola oku pitisa kovaso upange waye. Noke, tua nõlapo oku leluisa omuenyo wetu, kuenje tua ilukila kocikanjo cimue ka kuli akundi valua. Omo liaco, tua litumbika kupange wakundi votembo yosi. Cilo tua limbuka okuti, esanju liocili, ka li tundi koku kuata ovina vialua.”

Ulandu wa manji Lee u lekisa ndomo a tẽla oku siapo akamba vãvi. Eye wa popia hati: “Kupange wange woku sanda eteku, nda siata oku kuata ukamba lomanu va tunda kolofeka vikuavo. Nda kũlĩhĩle okuti, oku linga ukamba lomanu vaco, ci ndi vetiya oku nyua calua ovina vi koluisa pole, nda amamako lukamba waco. Omo okuti ndaenda oku kolua, noke nda fetika oku livetela evelo omo liocitangi caco. Kuenje, nda kũlĩhĩsa lutate eci ndi sukila oku linga. Elungulo Liembimbiliya kuenda ekuatiso liakulu vekongelo, lia ndi kuatisa oku limbuka okuti, nda kuata ukamba lomanu ka va fendela Yehova. Omo liaco, cilo ndi kasi oku linga olomĩlu vimue lekuatiso liotelefone, kuenda nda tepulula ukamba lomanu vaco.”

Tu sukila oku kala vakuacili kuenda oku kũlĩhĩsa ovisimĩlo viutima wetu. Tu sukilavo oku pinga ekuatiso ku Yehova vohutililo, momo eye wa ‘kũlĩha ovina viosi vi kasi vutima wetu.’ (Osa. 44:21) Yehova wa tu ĩhavo Embimbiliya li kasi ndolumuilo, oco li tu kuatise. (Tia. 1:22-25) Tua siatavo oku tambula alungulo valivulu etu kuenda kolohongele! Nda tua pokola kalungulo aco, ci tu kuatisa oku lava utima wetu okuti tu endela vonjila ya sunguluka.