Yesu wa popele hati, onembele ya Yehova ya laikele oku nyõliwa. Ocitumasuku caco, ca tẽlisiwa kunyamo wa 70 K.K., eci olohoka via va Roma via songuiwa la Tito via nyõla o Yerusalãi. (Mat. 24:2) Noke ombiali Juliano, wa sokiya oku tumbulula onembele.

Juliano wa tukuiwile okuti eye ombiali ya sulako kuviali wa va Roma okuti wa kala ukuetavo. Eye wa kala ocimumba ca Constantino o Grande okuti, wa longisiwa ovina vialua viatiamẽla ketavo. Pole, kunyamo wo 361 K.K., eci a fetika oku viala, wa siapo elongiso liaco kuenda ovina viuhembi via enda oku longisiwa vetavo liaco koloneke viaye. Alivulu a lombolola ulandu waye, a lekisa okuti wa kala “Onanguluke.”

Noke, Juliano weya oku suvuka Akristão. Momo, eci a kuata anyamo epandu, wa mola ndomo a songui vetavo va ponda isiaye kumue lepata liaye. Omanu vamue vakuakulombolola ovolandu atiamẽla ketavo va lekisa okuti, Juliano wa vetiya va Yudea oku tumbulula onembele yavo oco va tave kelongiso liokuti, Yesu wa kala uprofeto wesanda. a

Ndaño ovolandu a lekisa okuti, Juliano wa yonguile oku tumbulula onembele, pole, ka kuli uvangi u lekisa okuti, wa tumbulula onembele yaco. Momo nda wa kuatele onjongole yaco, nda ka tatekele upange waco. Juliano wa pondiwa eci ka tẽlisile handi anyamo avali komangu yusoma kuenje ka tẽlisile ovisimĩlo viaye.