1, 2. Esumũlũho lipi tu kuete omo lioku kala Olombangi Via Yehova? Nye o yevite vutima omo lioku kuata esumũlũho liaco?

 OMANU vamue va siata oku sima okuti, oku linga upange umue u likasi, esumũlũho limue lia velapo. Vakuavo va siata oku tambula onima omo lioku kuatisa koku tumbika ombembua pokati kovitundo vivali vi kasi oku liyaka. Pole, tu kuete esumũlũho lia velapo lioku tumiwa la Suku, kupange woku kuatisa omanu oco va kuate ukamba Laye!

² Omo okuti Tulombangi Via Yehova, tu kuete esumũlũho limue lilikasi. Omo lioku pokola kocihandeleko ca Suku leci ca Yesu, tua siata oku vetiya omanu oco ‘va lisunguluise la Yehova.’ (2 Va Kor. 5:20) Yehova wa tu ĩha upange woku kuatisa omanu oco va kuate ukamba laye. Omo liaco, olohuluwa viomanu va sangiwa kueci ci pitahãla 235 kolofeka, va linga akamba va Suku, kuenda va kuete elavoko liomuenyo ko pui. (Tito 2:11) Ombili yetu kupange woku kunda, yi tu vetiya oku eca elaleko komanu liokuti, ‘wosi o yongola ovava omuenyo, o pondola oku a tambula ocali.’ (Esit. 22:17) Omo okuti tua tambula ocikele cimue ci kuete esilivilo lia velapo, kuenda tu lekisa ombili kupange waco, tu tukuiwa tuti, ‘tuakuambili kovilinga viwa.’ (Tito 2:14) Omo liaco, tu konomuisi ndomo ombili yetu kovilinga viwa yi tu vetiya oku kuatisa omanu oku kuata ukamba la Yehova. Tu ci linga poku kunda olondaka viwa.

3. “Ombili ya Yehova” yi tu vetiya oku linga nye?

³ Elivulu lia Isaya 9:7, li tu sapuila hati, Omõla wa Suku okuti eye Osoma, o ka lingila omanu ovina viwa. Olio li popia hati: “Ombili ya Yehova Ukualohoka yi ci linga.” Olondaka evi vi lekisa okuti, Yehova o yongola oku popela omanu. Ongangu ya Yehova yoku lekisa ombili, yi tu vetiyavo oku lekisa esanju kuenda ombili kupange woku kunda tua tambula Kokuaye. Ombili tu lekisa poku kuatisa omanu oco va kũlĩhe Yehova Suku yi situlula ombili Yehova a kuete. Omo okuti tulondingupange via Yehova, tua siata hẽ oku likolisilako  oku kundila omanu olondaka viwa nda ekalo lietu li tu ecelela?—1 Va Kor. 3:9.

4. Ongangu yipi yoku pandikisa kupange woku kunda Yesu a tu sila?

⁴ Tu konomuisivo ombili Yesu a lekisa. Eye wa tu sila ongangu yiwa yoku lekisa ombili loku pandikisa kupange woku kunda. Ndaño wa liyaka lelambalalo, pole, wa amamako oku lekisa ombili kupange woku kunda, toke kesulilo liomuenyo waye palo posi. (Yoa. 18:36, 37) Osimbu Yesu a kala oku lavoka oku pondiwa, wa likolisilako oku kuatisa omanu oku kũlĩha Yehova.

5. Ombili Yesu a lekisa ya likuata ndati lolusapo luaye luatiamẽla kuti ukuyu?

⁵ Kunyamo wa 32 K.K, Yesu wata olusapo luatiamẽla kulume umue wa kuata uti wakuyu vocumbo caye cayuva okuti vokuenda kuanyamo atatu ka wamĩle apako. Ulume waco wa sapuila ukuakutata ocumbo hati, uti waco u sesamẽla oku tetiwa, pole, ukuakutata ocumbo wa pinga hati, u kapiwe otulumu oco tu tale nda wima apako. (Tanga Luka 13:6-9.) Eci Yesu a popia olondaka evi, kua kala lika etendelo litito liolondonge via litumbikile koku kunda olondaka viwa. Pole, olusapo lua Yesu lu lekisa okuti eye wa yonguile oku talavaya calua osimbu ka file. Omo liaco, vokuenda kuolosãi epandu wa lekisa ombili poku kundila ko Yudea kuenda ko Perea. Osimbu Yesu ka file handi, wa lila omo liomanu valua ‘va yeva kesapulo olondonge via va kundila, pole, ka va tavele.’—Mat. 13:15; Luka 19:41.

6. Momo lie tu sukilila oku vokiya ombili yetu kupange woku kunda?

⁶ Omo okuti tu kasi kotembo ya sulako, ka tu sukila hẽ oku vokiya ombili yetu kupange woku kunda? (Tanga Daniele 2:41-45.) Tu kuete esumũlũho lioku kala Olombangi Via Yehova! Voluali luosi, etu lika tu kasi oku sapuila omanu ndomo ovitangi viosi vi ka tetuluiwa. Ulume umue usonehi wovikanda viasapulo wa linga epulilo limue okuti ka ca lelukile oku li tambulula. Eye wa pula ndoco: “Momo lie omanu vawa va talela ohali?” Lekuatiso Liembimbiliya, tu kuete ocikele coku tambulula vana va tu yevelela. (Va Rom. 12:11) Esumũlũho li tunda ku Suku, li tu vetiya oku kuatisa omanu oku kũlĩha Suku, loku lekisa ocisola kokuaye.

7, 8. Elikolisilo lietu li sivaya ndati Yehova?

⁷ Ndomo Paulu a ci popia, olonjanja vimue citava okuti ‘ka tu pekela, kuenda tu kala onjala,’ omo liupange woku kunda. (2 Va Kor. 6:5) Olondaka evi vi tu ivaluisa ndomo akundi votembo yosi va siata oku likolisilako oku pitisa kovaso upange woku kunda, osimbu va sandiliya olombongo vioku landa ovina va sukila. Kũlĩhĩsa ndomo vamanji olomisionaliu ‘va siata oku lieca olumue’ kupange woku kundila omanu kolofeka vikuavo. (Va Fil. 2:17) Nye ci popiwa catiamẽla kakulu vekongelo okuti pamue ka vali, ale ka va pekela omo lioku tata olomeme via Yehova? Tu kuetevo vamanji va kuka, kuenda vana va vela okuti, va siata oku likolisilako oku endaenda kolohongele, kuenda kupange woku kunda. Tu sanjuka calua eci tu mola ndomo afendeli va Yehova va siata oku likolisilako oku tẽlisa ovikele viavo. Alikolisilo aco, a pondola oku kuatisa omanu oku limbuka okuti, upange wetu woku kunda u kuete esilivilo.

⁸ Esapulo limue lia sandekiwa Vukanda wasapulo u tukuiwa hati, Boston Target, kofeka yo Reino Unido, ulume umue okuti Hambangiko ya Yehova wa popia hati: “Omanu ka va kasi oku ekolelo vali ketavo. . . . Nye asongui vatavo va kasi oku linga oloneke viosi? Ovo ka va kuãi ongangu ya Kristu yoku sandiliya omanu. . . . Olombangi Via Yehova ovio lika via siata oku sandiliya omanu, kuenda vi kasi oku kunda olondaka viwa.”  Ndaño okuti omanu voluali ka va yongola oku kuatisa vakuavo, pole, elikolisilo lietu lioku va kuatisa, li eca esivayo ku Yehova Suku.—Va Rom. 12:1.

9. Nye ci tu vetiya oku amamako lombili yetu kupange woku kunda?

⁹ Nye tu sukila oku linga, nda tua limbuka okuti ombili yetu kupange woku kunda yi kasi oku tepuluka? Oku sokolola ovina Yehova a kasi oku linga lekuatiso liupange woku kunda, ci tu kuatisa calua. (Tanga Va Roma 10:13-15.) Oco omanu va popeliwe, va sukila oku kolela ku Suku, kuenda konduko yaye. Pole, va ci linga lika nda tua va kundila. Oku ivaluka ovina viaco, ci tu vetiya oku vokiya ombili yetu kovilinga viwa, kuenda oku loñoloha kupange woku kunda olondaka viwa Viusoma.

10. Momo lie tu popela tuti ovituwa viwa vi kuatisa omanu oku kũlĩha Yehova?

¹⁰ Ombili tu lekisa kupange woku kunda hayoko lika yi vetiya omanu oku kũlĩha Suku. Pole, ocina cikuavo ci vetiya omanu oku tava ku Suku, ovituwa viwa tu lekisa. Paulu poku tukula esilivilo liovituwa vietu wa popia hati: “Ka tu ka kokeli ocilondokua vakuetu, oco upange wetu ka u ka vetiwile evelo.” (2 Va Kor. 6:3, NW) Tu sukila oku vangula ovina vi imbila uvangi alongiso a Yehova Suku, oco tu kuatise omanu oku u fendela. (Tito 2:10) Olonjanja vimue, tua siata oku yeva ovolandu a lekisa okuti, omanu vamue va fetika oku lilongisa Embimbiliya eci va limbuka ndomo tu kuãi ovituwa via Kristu.

11. Momo lie tu sukilila oku likutilila lutate catiamẽla kovituwa vietu?

¹¹ Ndaño okuti ovituwa vietu viwa vi vetiya omanu oku lilongisa Embimbiliya, pole, nda tua lekisa ovituwa vĩvi, ci va tateka oku kũlĩha Yehova. Cikale okuti tu kasi kupange, konjo, ale kosikola, tu sukila oku lavulula oco ka tu ka linge cimue ci tateka omanu oku tava kesapulo tu va kundila. Nda tua linga ekandu ocipango, tu kuata ­ovitangi. (Va Hev. 10:26, 27) Elungulo eli, li tu kuatisa oku likutilila lutate catiamẽla kovituwa vietu,  oco tu limbuke nda vi vetiya omanu ale sio. Omo okuti omanu voluali va tiamisila lika utima kovina ka via sungulukile, ca leluka oku ‘limbuka ava va kasi oku vumba Suku, kuenda vana ka va kasi oku u vumba.’ (Mal. 3:18) Omo liaco, ovituwa vietu viwa vi kuete esilivilo koku kuatisa omanu oco va linge akamba va Suku.

12-14. Epandi tu lekisa poku liyaka lelambalalo, li kuatisa ndati omanu tu kundila? Tukula ulandu umue.

¹² Paulu poku sonehela va Korindo, wa lekisa okuti, wa talisiwa ohali, wa tipuiwa, kuenda wa kapiwile vokayike. (Tanga 2 Va Korindo 6:4, 5.) Eci tu pita lovitangi vi seteka ekolelo lietu, epandi tu lekisa, li pondola oku kuatisa omanu oku tava kesapulo tu va kundila. Kũlĩhĩsa ulandu owu: Vokuenda kuanyamo a pita, ovanyãli va seteka oku mãlako Olombangi Via Yehova Vongola. Manji umue lukãi waye, kuenda eci ci soka 30 komanu okuti va kuatele ocituwa coku endaenda kolohongele, va kuatiwa. Noke, ovanyãli vaco va vilikiya omanu vo vimbo, oco va tale ndomo vamanji va kala oku tipuiwa toke eci va tundisiwa osonde. Akãi kumue lomãla va tipuiwavo. Ovanyãli vaco va ci lingila oco omanu ka va ka tave kovina Olombangi Via Yehova vi longisa. Pole, noke liekangiso liaco, omanu valua vo vimbo liaco, va pinga Kolombangi Via Yehova oco vi ende kolonjo viavo oku va longisa Embimbiliya! Omo liaco, vamanji va amamako lupange woku kunda, kuenda va kuata asumũlũho, momo omanu valua veya oku linga Olombangi Via Yehova.

¹³ Ulandu wa tukuiwa ndeti u lekisa ndomo epokolo lietu kolonumbi Viembimbiliya li vetiya omanu oku tava kesapulo tu va kundila. Tu komõha calua poku limbuka ulandu u lekisa ndomo omanu valua veya oku tava ku Suku, omo liutõi Petulu kumue lovapostolo vakuavo va lekisa eci va pita velambalalo. (Ovil. 5:17-29) Omo liaco, nda tua lekisa utõi eci tu lambalaliwa, ci kuatisa akamba vetu kosikola, kupange, ale vepata, oku tava oku lilongisa Embimbiliya.

¹⁴ Kuli vamanji valua va siata oku lambalaliwa. Kofeka yo Armenia, kuli eci ci soka 40 kafendeli va Yehova va kasi vokayike omo lioku likala oku enda kuyaki. Vakuavo va lavoka oku kapiwa vokayike kovaso yoloneke. Kofeka yo Eritrea, kuli 55 Kolombangi Via Yehova vi kasi vokayike okuti, vamue pokati kavo va kuete eci ci pitahãla 60 kanyamo. Kofeka yo Korea, kuli eci ci soka 700 Kolombangi Via Yehova vi kasi vokayike, omo liekolelo liavo. Pa pita ale 60 kanyamo tunde eci ocitangi caco ca fetika. Omo liaco, volohutililo vietu tu kongelimo vamanji va kasi oku lambalaliwa kolofeka vialua omo lioku sivaya Yehova, kuenda tu kuatisi vana va sole esunga, oco va tave kefendelo liocili.—Osa. 76:8-10.

15. Lombolola ulandu u lekisa ndomo oku kala ukuacili ci vetiya omanu oku lilongisa Embimbiliya.

¹⁵ Omo okuti tua siata oku popia ocili, ovituwa vietu vi vetiya omanu oku tava kesapulo tu va kundila. (Tanga 2 Va Korindo 6:4, 7.) Kũlĩhĩsa ulandu owu: “Manji umue ukãi, osimbu a kala oku feta opasasi vokalela, ekamba liaye lio sapuila hati, omo okuti ku endi ocipãla, ku sukila oku feta. Pole, manji wo sapuila hati, ndaño okuti si lingi ungende walua, ndi sukila oku feta. Eci ekamba liaco lia loka vokalela, ulume wa kala oku endisa okalela, wa pula manji hati: ‘Ove hẽ Umbangi ya Yehova?’ Manji wo tambulula hati, ‘oco.’ Noke manji wo pulisa hati: ‘Momo lie wa ndi lingila epulilo eli?’ Ulume waco wo tambulula hati: ‘Nda yeva eci wa kala oku sapela lekamba liove catiamẽla koku feta opasasi vokalela, kuenda nda kũlĩha okuti, Olombangi Via Yehova ovio lika via siata oku lekisa epokolo, kuenda vakuacili kovina viosi.’ Noke yolosãi vimue, eci manji a kala kohongele, ulume umue wa amẽla ponẽle yaye, kuenje, wo pulisa hati: ‘Onjivaluka?’ Eteke limue eci wa endela vokalela nda kala oku endisa, ame nda ku pulisile noke yoku sapela lekamba liove catiamẽla koku feta opasasi.  Kuenje, ocituwa cove ciwa, ca ndi vetiya oku lilongisa Embimbiliya Lolombangi Via Yehova.’” Omo liaco, eci omanu va limbuka ocituwa cetu coku kala vakuacili, ci va vetiya oku tava kolondaka viwa tu va kundila.

16. Momo lie epandi, ocisola kuenda ohenda vi vetiyila ovitima viomanu? Tukula ulandu umue.

¹⁶ Tu pondolavo oku vetiya omanu oku linga ukamba la Yehova poku lekisa ovituwa ndeci, epandi, ocisola kuenda ohenda. Eci omanu va limbuka ovituwa vietu viwa, ci va vetiya oku lilongisa catiamẽla ku Yehova, kocipango caye, kuenda kafendeli vaye. Akristão vocili va siata oku lekisa ovituwa via litepa levi via vana va lilekisa ndu okuti va kasi oku fendela Suku, pole, vakuambambe. Asongui vamue vatavo esanda, va linga olohuasi omo lioku nyana olombongo viomanu. Kuenje, va landa lavio olonjo, akãlu, oku linga ovongende, kuenda va tunga lavio olonjo vi kuete ovipapafela oco mu kale olombua. Ndaño va popia vati olondonge via Kristu, pole, ka va yongola ‘oku eca ocali’ ovina viavo. (Mat. 10:8) Omo liaco, va sokisiwa lovitunda vĩvi via kala ko Isareli okuti, via enda oku longisa omanu locimãho ‘coku fetiwa,’ kuenda via enda oku longisa ovina ka vi sangiwa Vembimbiliya. (Mika 3:11) Ovituwa viavo viombambe, ka vi vetiya omanu oku kuata ukamba la Suku.

17, 18. (a) Tu eca ndati esivayo ku Yehova poku lekisa ovituwa ndevi viaye? (b) Momo lie wa nõlelapo oku kala ukuambili kovilinga viwa?

¹⁷ Omanu va tava lika oku kala akamba va Yehova, eci va limbuka okuti, ovina tu va longisa viocili kuenda tu tata ciwa vana tu lisungue lavo. Vepuluvi limue eci ukundi umue wotembo yosi a kala oku kundila konjo lanjo, ukãi umue wa kuka haye ocimbumba wo teta kondaka. Ukãi waco wa popia hati, eci ukundi a totola kepito, wa kala oku semulũla ondiyelo vokusinya. Kuenje, manji wo sapuila hati: “Ku ka linge upange waco likaliove.” Noke, manji wa kapa ondiyelo yikuavo vokusinya, kuenje wa tiukila. Eci omõla wukãi waco a limbuka ekuatiso manji a eca ku inaye, wa komõha calua, kuenje, wo sandiliya oco a ece olopandu kokuaye. Omo liaco, omõla wa tava oku lilongisa Embimbiliya.

¹⁸ Momo lie wa nõlelapo oku kala u kuambili kovilinga viwa? Momo, wa kũlĩha okuti, eci olekisa ombili kupange woku kunda, loku linga ovina vi likuata locipango ca Yehova Suku, ceca esivayo kokuaye, kuenda ci kuatisa omanu oku popeliwa. (Tanga 1 Va Korindo 10:31-33.) Omo okuti tu sole Suku kuenda omanu, tu sukila oku lekisa ombili lovituwa viwa kupange woku kunda. (Mat. 22:37-39) Nda tua lekisa ombili kovilinga viwa, tu kuata esanju. Omo liaco, tu lavoka o tembo eci omanu vosi va ka sanjukila oku fendela Ululiki wetu Yehova, loku eca esivayo kokuaye.