Votatu komẽle, 5 Yenyenye Linene yunyamo wo 2012, ko Betele yo Estados Unidos kuenda yo Kanada, kua lingiwa esapulo liokuti, ketendelo Liosungu Yolombangi Via Yehova kua vokiyiwa manji Mark Sanderson. Eye wa fetika oku talavaya locimunga caco keteke 1 kosãi Yenyenye Linene yunyamo wo 2012.

Manji Sanderson wa kulila volupale luo San Diego, ko Kalifornia, kofeka yo Estados Unidos. Olonjali viaye Olombangi Via Yehova, kuenda wa papatisiwa keteke 9 kosãi ya Kayovo wo 1975. Eye wa fetika upange wakundi votembo yosi keteke 1 kosãi Yenyenye Linene kunyamo wo 1983, volupale luo Saskatchewan, ko Kanada. Kosãi ya Cembanima yunyamo wo 1990, wa pindisiwa kocisoko cakũi epanduvali Kosikola Yoku pindisa Olondingupange (okuti cilo yi tukuiwa hati, Osikola Yoku Pindisa Vamanji alume ka va kuelele) ya lingiwila ko Estados Unidos. Kosãi ya Kupupu yunyamo wo 1991, manji Sanderson wa fetika upange wakundi valikasi volupale luo Newfoundland, ko Kanada. Noke yoku nyula akongelo vokuenda kuotembo yimue, kosãi ya Kayovo yunyamo wo 1997 wa lalekiwa oku ka talavaya ko Betele yo Kanada. Kosãi ya Kuvala yunyamo wo 2.000, wa tumiwa ko Betele yo Estados Unidos, kuna a talavaya Voseketa yoku Yuvula Oku Sakuiwa Losonde, kuenda noke wa talavaya Voseketa Yupange.

Kosãi Yenyenye Linene yo 2008, Manji Sanderson wa pindisiwa Kosikola Yolomitavaso vio Betele. Kuenje, wa tambula ocikele coku tiamẽla Kocisoko Cakulu vo Betele, kofeka yo Filipina. Kosãi Yenyenye Linene yo 2010, wa lalekiwa oku tiukila ko Estados Unidos oco a kuatise Voseketa Yosungu Yolombangi Via Yehova.