Ku tava hẽ okuti Yesu eye Ulongisi wa velapo wa kala palo posi? Citava okuti wa setekele ale oku kuama olonjila via litepa vioku longisa kuaye, kuenda ndomo a linga apulilo lovindekaise. O tava hẽ okuti Yesu wa enda oku kuama etepiso li kasi pokati kovina poku longisa kuaye?

Omanu valua poku sapela, va siata oku kuama etepiso li kasi pokati kovina. Citava okuti o lingavo etepiso liaco ndaño ku ci limbuka lonjanga. O pondola oku popia ndoco: “Eye wa popia hati, apako amue apia, pole, akuavo ka a pile.” Ale o popia ndoco: “Eye wa kala omõla umue wonjuka, kuenda wa kuatele osõi, pole, cilo wa lianja lomanu.”

Oco o tẽlise ocimãho caco, tete o sukila oku lekisa ocisimĩlo cimue, noke o linga etepiso li kasi pokati kovina poku tukula olondaka vimue ndeci: Pole, omo liaco, handi vali. O pondolavo oku linga etepiso li kasi pokati kovina poku vokiyako olondaka vikuavo. Nda wa kuama onjila yaco poku sapela lomanu, ci va kuatisa oku kuata elomboloko liovina wa popia.

Ndaño okuti kalimi amue ka citava oku linga etepiso li kasi pokati kovina poku sapela, pole, tu pondola oku limbuka esilivilo liaco. Momo lie? Momo, tu pondola oku sanga atepiso alua Vembimbiliya. Yesu wa enda oku linga etepiso li kasi pokati kovina poku sapela lomanu. Eye wa popia ndoco: ‘Omanu va mĩha ondiyelo, kuenje ka va yi kapi vemehi liomesa, pole, va yi tumbika komesa.’ ‘Sieyilile oku imũla ovihandeleko, pole, ndeyilila oku vi tẽlisa.’ ‘Wa yevi eci ca popiwa citi: Ku ka pekelise. Pole, mopia lene siti, u wa vanja kukãi, noke u livela vutima waye, wa pekela ale laye.’ ‘Wa yevi eci ca popiwa citi: Iso liso, eyo leyo.’ ‘Omo liaco, mopia lene siti: Ko ka tamalãli londingaĩvi, pole, nda umue wa ku veta ocikusi ketama liondio, u pongoluila ketama liepĩli.’—Mat. 5:15, 17, 27, 28, 38, 39.

Vembimbiliya mu sangiwavo alivulu akuavo a linga etepiso li kasi pokati kovina. Alivulu aco a pondola oku ku kuatisa oku kuata elomboloko liondaka yimue o yongola oku situlula. Nda ove unjali, kũlĩhĩsa etepiso li kasi pokati kolondaka Viembimbiliya li popia hati: “Ene alonjali, ko ka wenguli onyeño yomãla vene, pole, va longisi loku va pindisa lovilongua via Yehova.” (Va Efe. 6:4, NW ) Olondaka upostolo Paulu a soneha vi lekisa okuti, olonjali vi sukila oku pindisa omãla lovilongua via Yehova, oco va kuate olondunge kovina viosi va linga. Pole, ocinimbu caco ci kuete etepiso li lekisa okuti, ‘olonjali vi sukila oku yuvula oku wengula onyeño yomãla vavo, pole, vi va longise loku va pindisa lovilongua via Yehova.’

Vocipama caco Paulu wa popiavo hati: “Ka tu kasi oku yaka lomanu vakuetimba liositu, kuenda osonde, pole, tu yaka lovoviali, lovonene, lolombiali violuali lulo luowelema, kuenda olohoka violondele viokilu.” (Va Efe. 6:12, NW) Etepiso lia lingiwa ndeti, li tu kuatisa oku limbuka okuti, tu kuete uyaki umue ka wa lelukile. Momo ka tu kasi oku liyaka lomanu, pole, tu liyaka lolohoka violondele viokilu.

Velivulu lia Va Efeso, o pondola oku sangamo ovipama vialua Viembimbiliya Paulu a tukula okuti, wa linga etepiso li kasi pokati kovina volonepa vialua. Oku sokolola ovina viaco, ci tu kuatisa oku kuata elomboloko lia suapo liovina Paulu a popia, oco tu limbuke eci tu sukila oku linga.

O pondola oku sanjukila oku kuata elomboloko lietepiso li kasi pokati kovina Paulu a tukula kocipama 4 kuenda 5 kelivulu lia Va Efeso. Osimbu o tanga atepiso aco, sokolola ekalo liomuenyo wove, kuenda li pula ndoco: ‘Ovituwa vipi ndi kuete? Ocituwa cipi ndi lekisa poku liyaka locitangi cimue? Nye vakuetu va sima catiamẽla kekalo liange?’ Nda, ketepiso li kasi pokati kovina vakuene va linga catiamẽla kokuove va limbuka okuti o kuete ocituwa cimue ka ca sungulukile, likolisilako oku linga apongoloko. Omo liaco, ecelela oku kuatisiwa letepiso li kasi pokati kovina.

Vefendelo liene liepata, o pondola oku kongelamo etepiso li kasi pokati kovina. Catete, vakuepata vosi va pondola oku tanga ovinimbu vimue Viembimbiliya vi kuete etepiso li kasi pokati kovina. Noke, umue pokati kavo, o pondola oku tukula etepiso liatete li sangiwa vocinimbu ca tangiwa. Kuenje, ecelela okuti, vamue vakuepata, va seteka oku ivaluka onepa yavali yetepiso li kasi pokati kovina via tukuiwa vocinimbu caco. Nda wa ci linga, ci kuatisa epata oku kuata esanju poku limbuka ndomo o tẽla oku kapako onepa yavali yetepiso lia tukuiwa vocinimbu Cembimbiliya. Oku konomuisa etepiso li kasi pokati kovina, ci kuatisa amalẽhe lakulu oku lekisa ovituwa viwa vepata, kuenda kovina vikuavo.

Nda wa kapako esilivilo lietepiso li kasi pokati kovina, ci ku kuatisa oku limbuka atepiso a sangiwa Vembimbiliya. Nda wa ci linga, o limbuka okuti, ci ku kuatisa kupange woku kunda. Momo, o pondola oku sapela lomunu umue ndoco: “Omanu valua va siata oku popia vati, omunu o kuete ocilelembia ka ci fi. Pole, ndi yongola oku ku lekisa eci Embimbiliya li popia catiamẽla kondaka eyi.” Ale o pondola oku u pulisa ndoco: “Omanu vimbo lilo va tava kelongiso liokuti, Suku la Yesu vamuamue. Pole, nye Embimbiliya li popia catiamẽla kondaka eyi? Kovina vipi o tava?”

Vembimbiliya mu sangiwa atepiso atiamẽla kovina okuti, a pondola oku tu kuatisa oku endela vonjila ya Yehova Suku. Omo liaco, tu pondola oku longisa omanu Embimbiliya lekuatiso lietepiso li kasi pokati kovina.