1. Nye omanu va siata oku sima catiamẽla koku kala upika okuti, ca litepa lapika va tukuiwa kelivulu lia Va Roma 12:11?

 OMANU valua va siata oku sima okuti, upika, omunu umue o sukila oku laviwa, kuenda oku talisiwa ohali la cime caye. Pole, ca litepa loku kala upika wa Suku. Embimbiliya li lekisa okuti, Ukristão o pondola oku nõla oku kala upika wa Cime caye. Omo liaco, eci upostolo Paulu a vetiya Akristão vo kocita catete oco va linge ‘apika va Yehova,’ wa va sapuila hati, va sukilile oku vumba lika eye, omo liocisola vo kuatela. (Va Rom. 12:11) Voku kala upika mua kongela nye? Tu yuvula ndati oku kala apika va Satana kuenda apika voluali luaye? Onima yipi apika va Yehova va lavoka oku tambula?

2. (a) Momo lie upika wo ko Isareli a sukilile oku nõla oku amamako kupange waye? (b) Oku tombola ketũi liupika lociketelo, ca kuatele elomboloko lie?

² Ocihandeleko Yehova Suku a ecele ku va Isareli, ci tu kuatisa oku kũlĩha ovina tu sukila oku linga oco tu kale apika vaye. Kosimbu, upika wosi ukuepata lia va Heveru, wa enda oku yovuiwa lika noke yoku tẽlisa anyamo epanduvali kupange wa cime caye. (Etu. 21:2) Pole, nda upika umue o kuetele ocisola cime caye, kuenda o yongola oku amamako oku kala kupange waye, Yehova wa enda oku linga eliangiliyo limue. Noke, upika waco o tualiwa toke puvelo, ale pocikuli cepito lionjo, kuenje cime caye u tombola ketũi lociketelo. (Etu. 21:5, 6) Elinga liaco li kuete elomboloko limue. Momo kelimi lio Heveru, oku lekisa epokolo ku tiamisiwila koku yevelela. Omo liaco, nda upika umue wa tombuiwa ketũi liaye, ci lekisa okuti, o yongola oku amamako oku pokola ku cime caye. Cimuamue haico ci pita lelitumbiko lietu, eci tu lieca ku Yehova oco tu lekise onjongole yoku amamako oku pokola kokuaye, omo liocisola tu u kuetele.

3. Nye ci tu vetiya oku litumbika ku Yehova Suku?

³ Eci tu lieca ku Yehova oco tu papatisiwe, ci lekisa okuti, tua nõlapo oku u vumba, kuenda tu yongola oku kala apika vaye.  Poku litumbika kokuaye, tu likuminya oku lekisa epokolo, kuenda oku linga ovina viosi a ­yongola. Lomue o tu kisika oku linga upange waco. Amalẽhe eci va papatisiwa, ovo muẽle va nõlapo oku litumbika ku Yehova, pole, ka va ci lingila oco va sanjuise olonjali viavo. Ocisola tu kuetele Cime cetu Yehova, oco ci tu vetiya oku litumbika kokuaye. Upostolo Yoano wa popia hati: ‘Oku sola Suku ku lomboloka oku pokola kovihandeleko viaye.’—1 Yoa. 5:3.

4. Nye tu sukila oku linga oco tu kale “apika vesunga”?

⁴ Tu eca olopandu ku Yehova omo a tu ĩha epuluvi lioku kala apika vaye! Ekolelo lietu kocisembi ca Kristu, li tu kuatisa oku yuvula oku kala apika vekandu. Ndaño okuti ka tua lipuile, pole, tua nõlapo oku pokola ku Yehova kuenda ku Yesu. Upostolo Paulu wa popia hati: ‘Limbuki okuti kekandu wa fi, pole, omuenyo vu kasi lawo vu Kristu Yesu, watiamẽla ku Suku.’ Noke wa amisako hati: “Ka wa kũlĩhĩli hẽ okuti, nda wa litumbiki ku umue ha vu lingi apika va pokola, wapika vaye, ci kale oku litumbika kekandu li tuala kolofa, ale oku litumbika kepokolo li loña kesunga? Pole, tu pandula ku Suku, omo ene wa kali apika vekandu, pole, cilo wa lingi vakuakupokola kovilongua wa likuminyi, lepokolo li tunda kovitima viene. Omo okuti wa yovuiwi kekandu, wa lingi apika vesunga.” (Va Rom. 6:11, 16-18, NW) Ivaluka okuti, Paulu wa tukula ‘epokolo li tunda kutima.’ Omo liaco, elitumbiko lietu ku Yehova lia ecelela okuti, tu linga “apika vesunga.”

5. Uyaki upi tu kuete, kuenda momo lie?

⁵ Omo okuti tua litumbika ku Yehova, tu sukila oku yula ovina vivali. Paulu wa liyakavo lovina viaco. Catete, eye wa popia hati: ‘Vokati kange muẽle ndi sanjukila ovihandeleko via Suku, puãi vovimatamata vietimba liange, ndetemo ovihandeleko vikuavo vi liyaka lovihandeleko vi kasi vutima wange. Kuenje, nda pandekiwa lovihandeleko viaco viekandu, vina vi kasi vovimatamata vietimba liange.’ (Va Rom. 7:22, 23) Omo okuti ka tua lipuile, tua siata oku liyaka loloñeyi vĩvi vietimba. Upostolo Petulu o tu lungula hati: “Kali ndomanu va lianja, pole, elianjo liene ka li ko wĩhi omoko yoku linga ekandu. Puãi lingi apika va Suku.”—1 Pet. 2:16, NW.

6, 7. Nye Satana a siata oku linga oco a vetiye omanu oku tiamisila utima kovina violuali?

⁶ Cavali, tu kasi oku liyaka loluali lulo lua vialiwa lolondele. Omo okuti Satana eye ombiali yoluali lulo, o sandiliya onjila yoku tepa ukamba wetu la Yehova kuenda la Yesu. Satana o yongola okuti, tu kala apika vaye, kuenda tu panga onepa koluali luaye. (Tanga Va Efeso 6:11, 12.) Eye o ci linga poku tu vetiya oku sima okuti, voluali lulo, muli ovina vi kuete esilivilo lia velapo. Upostolo Yoano wa lungula hati: “Ko ka soli oluali pamue ovina vi kasi voluali. Nda omunu o sole oluali, ocisola ca Isia ka ci kasi vutima waye. Momo ovina viosi vi kasi voluali, okuti oñeyi yetimba, loñeyi yovaso, kuenda oku litunula lovina viomuenyo, ka via tundile ku Isia, te koluali.”—1 Yoa. 2:15, 16, NW.

⁷ Omanu vosi voluali, va yongola oku kuata ovokuasi. Satana o vetiya omanu oco va tave okuti, olombongo vi nena esanju liocili. Omo okuti voluali mu sangiwa olovenda vinene, vakualomĩlu va siata oku vetiya omanu oco va lande ovina vialua, kuenda oku tiamisila utima kovitalukilo.  Kuli ovisoko vimue vi vetiya omanu oku linga ovongende kovitumãlo vimue via posoka vi sangiwa voluali okuti, asongui vaco ka va kapeleko olonumbi via Yehova. Tua siata oku vetiyiwa oku pongolola ekalo liomuenyo wetu, oco tu kuame ovituwa violuali.

8, 9. Ovina vipi via siata oku kapa kohele omuenyo womanu, kuenda momo lie?

⁸ Petulu poku sonehela Akristão vo kocita catete va kuatele ovisimĩlo ndevi violuali, wa va lungula hati: “Kokuavo, oku linga ukahonga kutanya, ci va nenela esanju. Kovipito viavo va kasi latime kuenda atota. Va sanjukila ovina viosi va linyõla lavio. Momo, oku lipanda lolondaka violonambelo, va yonja loloñeyi vietimba, kuenda va yonja lumbondo vana va yongola oku litepa la vakuakandu. Ndaño va likuminya elianjo, pole, ovo muẽle apika vevĩho. Momo wosi o yuliwa lomunu umue o linga upika waye.”—2 Pet. 2:13, 18, 19, NW.

⁹ Oku ‘tẽlisa oloñeyi viovaso,’ ka ku kuatisa omunu oku kuata elianjo. Pole, o linga upika woluali lulo okuti, Satana Eliapu eye cime caco. (1 Yoa. 5:19) Oku kala upika wovokuasi, ci kapa kohele omuenyo womunu, kuenda ka ci leluka oku tunda vonjanjo yaco.

10, 11. Omanu vapi Satana a siata oku yapuisa calua koloneke vilo? Elilongiso lio kosikola ya velapo lia siata ndati oku kokela ovitangi kamalẽhe Akristão?

¹⁰ Koloneke vilo, Satana wa siatavo oku yapuisa omanu vana ka va kuete ukũlĩhĩso walua ndeci a linga Vocumbo Cedene. Eye wa siata oku yapuisa calua amalẽhe. Satana o sumua calua eci a mola amalẽhe lakulu va nõlapo oku kala apika va Yehova. Eye o yongola okuti, omanu vana va litumbika ku Yehova, va liwekapo oku lekisa epokolo.

¹¹ Tu konomuisi ulandu wupika una o tava oku tombuiwa ketũi liaye lociketelo. Ndaño okuti poku tombola etũi liaye o yeva evalo, pole, noke evalo liaco li pita, kuenje, o kuata ondimbukiso yoku nõlapo oku kala upika. Ka ca lelukile kamalẽhe oku nõlapo onjila ya litepa leyi yomanu vakuavo. Satana wa siata oku vetiya omanu oku sima okuti, oku kuata ekemãlo voluali, oyo onjila ya velapo yi nena esanju komuenyo. Pole, Akristão va sukila oku kapako esilivilo lioku pamisa ukamba wavo la Yehova. Yesu wa popia hati: “Vakuosuke wovutima va sumũlũha, momo usoma wokilu wavo.” (Mat. 5:3) Akristão va litumbika ku Yehova Suku,  va linga ocipango caye, pole, ka va lingi ocipango ca Satana. Ovo va sanjukila ovihandeleko via Yehova, kuenda va vi sokolola utanya luteke. (Tanga Osamo 1:1-3.) Koloneke vilo, omanu valua va litumbika kelilongiso lio kosikola ya velapo, ka va kuete otembo yalua yoku fendela Yehova, kuenda oku sokolola ovina viatiamẽla kokuaye.

12. Ovitangi vipi amalẽhe vamue va siata oku liyaka lavio poku nõla onjila va yongola oku kuama?

¹² Oku tiamisila utima kovina violuali, ci nena ovitangi kupika wa Yehova Suku. Vukanda Paulu a sonehela va Korindo wa pula hati: “Eci wa kovongiwa wa kala hẽ upika?” Noke wa va lungula hati: ‘Ka ci ka ku sakalaise. Puãi nda ci tava oku yovoka, sanda epuluvi lioku ci linga.’ (1 Va Kor. 7:21) Oku yuvula oku kala upika woluali ci kuete esilivilo. Koloneke vilo, kolofeka vialua kuli ocihandeleko cokuti, amalẽhe va sukila oku lilongisa toke vokuenda kuanyamo amue. Noke, va nõlapo nda va amamako oku lilongisa ale sio. Oku lilongisa calua kosikola oco omunu a kuate ekemãlo lioluali lulo, ci tateka oku kala ukundi wotembo yosi.—Tanga 1 Va Korindo 7:23.

13. Elilongiso lipi li pondola oku eca onima ya velapo kafendeli va Yehova?

¹³ Paulu wa lungula Akristão va Kolosai hati: “Lunguki sanga umue o nyõla etavo liene lovilongua viesanda liaño. Va sole oku tõlisa ño ovisila viomanu loviholo violuali, vina ka via tundile ku Kristu.” (Va Kol. 2:8) Alongisi valua va siata oku vetiya omanu oku tiamisila utima koku lilongisa calua ‘ovilongua viesanda kuenda oviholo viomanu.’ Elilongiso liaco pamue ka li kuatisa olondonge oku loñoloha oco vi lipongiye ciwa poku liyaka lovitangi viomuenyo weteke leteke. Pole, lia litepa leli li tunda ku Yehova okuti li kuatisa afendeli vaye oku loñoloha kovopange amue oco va kuate omuenyo umue wa leluka okuti, wecelela oku linga ocipango caye. Ovo va pokola kelungulo Paulu a eca ku Timoteo hati: ‘Komunu wa sanjukila oku vumba Suku kuli onima ya piãla. Nda tu kuete okulia leci tu lisikilĩla, tu sanjuka laco.’ (1 Tim. 6:6, 8) Afendeli va Yehova ka va velisapo ekemãlo li tunda kelilongiso lio kosikola ya velapo, pole, va velisapo ‘ovikanda viuvangi’ vi va kuatisa oku pesila otembo yalua kupange woku kunda.—Tanga 2 Va Korindo 3:1-3.

14. Ndomo ca sonehiwa kelivulu lia Va Filipoi 3:8, Paulu wa tendele ndati esumũlũho lioku kala upika wa Suku kuenda wa Kristu?

 ¹⁴ Tu konomuisi ulandu watiamẽla kupostolo Paulu. Eye wa longisiwile la Gamaliele Ovihandeleko via va Yudea. Elilongiso a tambula, li sokisiwa lelilongiso lio kosikola ya velapo lio koloneke vilo. Pole, Paulu wa tendele ndati elilongiso liaco lesumũlũho lioku kala upika wa Suku kuenda wa Kristu? Eye wa soneha ndoco: “Ndi tenda ovina viosi ndu okuti, ka vi kuete esilivilo omo lioku kũlĩha Kristu Yesu, Ñala yange.” (Va Fil. 3:8) Ulandu wa Paulu u pondola oku kuatisa amalẽhe kuenda olonjali oku nõla lolondunge catiamẽla kelilongiso lio kosikola. (Tala alitalatu.)

15, 16. Epindiso lipi lia siata oku eciwa vocisoko ca Yehova, kuenda li kuete ocimaho cipi?

¹⁵ Elilongiso lia velapo vovisoko vialua violuali li lomboloka nye? Omanu va tangela kolosikola viaco ka va siatele hẽ oku tomba ovihandeleko vi eciwa lolombiali viaco? (Va Efe. 2:2) Pole, ocisoko ca Yehova ca siata oku eca elilongiso lia velapo okuti, li nena ombembua vekongelo Liakristão vocili. Omo liaco, omunu lomunu pokati ketu, wa siata oku kuatisiwa Losikola Yupange Wakristão yi lingiwa olosemana viosi. Kulivo epindiso likuavo vamanji va pondola oku tambula ndeci: Osikola Yembimbiliya ya Vamanji Alume ka va Kuelele, kuenda Osikola Yembimbiliya ya Vamanji va Kuele. Olosikola viaco, vi tu kuatisa oku pokola ku Yehova okuti, eye Cime cetu wa velapo.

¹⁶ Tu pondola oku konomuisa ovina via longa lekuatiso lielivulu lio Índice das Publicações da Torre de Vigia, kuenda o Watchtower Library (okuti, Alivulu aco a Sangiwa Vokombutador.) Ocimaho coku pindisiwa Lembimbiliya, oku fendela Yehova. Momo li tu longisa ndomo tu pondola oku kuatisa omanu oku pamisa ukamba wavo la Yehova Suku. (2 Va Kor. 5:20) Nda tua ci linga, omanu vaco va pondolavo oku kuatisa vakuavo.—2 Tim. 2:2.

17. Nda tua nõla elilongiso li tunda ku Yehova asumũlũho api tu tambula?

¹⁷ Volusapo lua Yesu luatiamẽla kolokondu, apika vavali va tukuiwa volusapo waco, va vetiyiwa oku tẽlisa upange wa cime cavo. Upange waco wa va nenela esanju kuenda wa sanjuisavo cime cavo. Omo okuti cime cavo wa va kolelele, wa va tuma oku linga upange walua. (Tanga Mateo 25:21, 23.) Nda tua nõlapo oku kuama elilongiso li tunda ku Yehova tu kuata esanju. Tu kũlĩhĩsi ulandu wa manji Michael okuti wa kala ondonge yimue ya loñolohele calua kosikola. Omo liaco, alongisi vo kosikola va sapela laye ovina viatiamẽla kelilongiso lio kosikola ya velapo. Pole, va komõha calua, momo ka tavele oku nõla elilongiso lio kosikola ya velapo. Momo wa nõlapo epindiso limue okuti liu kuatisa oku sanga ovina a sukila oco amameko kupange wakundi votembo yosi. Anga hẽ wa livela omo lioku nõlapo onjila yaco? Eye wa popia hati: “Epindiso nda tambula vekongelo, lia ndi kuatisa oku kala ukundi wotembo yosi. Kuenje, cilo nda linga ukulu wekongelo. Asumũlũho ndi kuete kuenda ovikele vikuavo, via velapo okuti, olombongo nda laikele oku tambula vi sule. Ndi kuete esanju lialua omo lioku yuvula oku nõlapo elilongiso lio kosikola ya velapo.”

18. Momo lie oku nõla elilongiso li tunda ku Yehova ci kuetele esilivilo?

¹⁸ Elongiso li tunda ku Yehova li tu kuatisa oku linga ocipango caye, oco tu linge apika vaye. Elongiso liaco, li tu ĩha elavoko ‘lioku yovuiwa kupika wenyõleho, oco tu mole eyovo liulamba womãla va Suku.’ (Va Rom. 8:21) Vocipama cilo, tua lilongisa ndomo tu pondola oku lekisa ocisola ku Yehova, Cime cetu wokilu.—Etu. 21:5.