Eci akundi vavali votembo yosi va lalekiwa oku iñila vonjo yimue kofeka yo Kenia, va komõha calua eci va mola ulume umue ocilema wa pekela vula. Eye o kuete ovolu kuenda ovoko vambumbulu. Osimbu va kala oku sapela laye catiamẽla kohuminyo ya Suku yi popia hati: ‘Ocilema ci ka somboka ndosonge,’ ulume waco wa kuata esanju lialua.—Isa. 35:6.

Cilo Onesmus o kuete eci ci pitahãla 30 kanyamo. Eci vamanji vo nyula, va limbuka okuti o kuete uveyi wociteyateya, kuenda akepa aye aleñela calua. Omo okuti ka kuli ovihemba vi sakula uvei waco, eye wa simĩle okuti evalo liaco li ka amamako, kuenda o kala otembo yosi komangu yalola.

Noke wa tava oku lilongisa Embimbiliya. Pole, inaye ka tavele okuti o fetika oku endaenda kolohongele, momo wa simĩle okuti o ka li lemeha, kuenje ci vokiya evalo liaye. Omo liaco vamanji va linga esokiyo lioku ngalavala ovipama viohongele loku vi eca kokuaye, oco a vi yevelele konjo. Noke yoku lilongisa Embimbiliya vokuenda kuolosãi vitãlo, wa nõlapo oku endaenda kolohongele ndaño okuti wa kapele kohele omuenyo waye.

Anga hẽ olohongele via vokiya evalo lia Onesmus? Sio ka via vokiyile. Momo wa popia hati: “Oku endaenda kolohongele, kua tepulula evalo liange.” Eye wa limbuka okuti, elilongiso Liembimbiliya lio kuatisa oku kuata esanju omo lielavoko liwa a kuete kovaso yoloneke. Eci ina ya Onesmus a limbuka apongoloko a linga, wa kuata esanju lialua, kuenje wa fetikavo oku lilongisa Embimbiliya. Omo liaco, wa popia hati: “Oku vumba Suku ku kasi ndovihemba kokuange.”

Ka pa pitile otembo yalua, kuenje Onesmus wa linga ohundi. Noke, weya oku papatisiwa, kuenje cilo wa linga oñuatisi yekongelo. Ndaño okuti ovoko aye lovolu ka o kuatisa oku linga upange, pole, wa siata oku likolisilako oku linga upange wa Yehova. Eye wa yonguile oku kala ukundi wa sokamo pole, wa kuata ohele. Momo lie? Momo wa kũlĩhĩle okuti, o sukila oku sandiliya manji umue oco o kuatise oku sindika omangu yaye yalola. Eci a sapela la vamanji catiamẽla kocitangi caye, ovo va likuminya oku u kuatisa. Kuenje, wa linga ukundi wa sokamo.

Noke manji Onesmus, weya oku kuata esakalalo likuavo omo lionjongole yoku kala ukundi wotembo yosi. Eteke limue eci a tanga ocinimbu cimue Cembimbiliya ceteke leteke, co kuatisa oku tẽlisa onjongole yaye. Ocinimbu caco, copiwa kelivulu Liosamo 34:8, ku popia hati: “Seteki oco vu limbuke okuti Yehova ukuahenda.” Noke yoku sokolola kocinimbu caco, wa nõlapo oku kala ukundi wotembo yosi. Cilo, wa siata oku kunda oloneke vikuãla vokuenda kuosemana, kuenda o longisa olondonge vialua vi kasi oku kuata ukũlĩhĩso wa Yehova. Kunyamo wo 2010, wa pindisiwa Kosikola Yakundi Votembo Yosi. Omo liaco, o kuete esanju lialua momo umue pokati kavamanji va endele onjanja yatete konjo yavo oku u kundila, wa kala ulongisi waye kosikola yaco!

Cilo, olonjali via manji Onesmus ka vi sakalala vali laye, momo vamanji va siata oku u kuatisa oloneke viosi. Omo liaco, manji Onesmus eca olopandu omo liasumũlũho a siata oku tambula cilo, kuenda o lavoka akuavo voluali luokaliye, eci ku ka tẽlisiwa ohuminyo Yembimbiliya yokuti: ‘Layimue onungi yi ka popia hati: Ndi vela.’—Isa. 33:24.