1, 2. Koloneke vilo, ovina vipi via siata oku sumuisa calua omanu? (Tala elitalatu kefetikilo liocipama cilo.)

 KOLONEKE vilo, oku linga ovina vi nena esumuo, kuenda oku kemba, via siata calua pokati komanu, pole, ovina viaco ka vi tu komohisa. Embimbiliya li tu sapuila okuti, Satana Eliapu ombiali yo luali lulo, wa siata oku vetiya omanu oco va linge ovina ka via sungulukile. (1 Tim. 2:14; 1 Yoa. 5:19) Omo okuti, esulilo lioluali lulo li kasi ocipepi, Satana o kasi oku amamako oku yapuisa omanu, momo wa kũlĩha okuti ‘oloneke vio kambelako vitito.’ (Esit. 12:12) Tua kũlĩha okuti Satana wa siata oku yapuisa omanu valua, ca piãla enene afendeli va Yehova, oco va liwekepo oku lekisa epokolo.

² Kuli asapulo alua uhembi atiamẽla Kolombangi Via Yehova, kuenda kefendelo liavo okuti, a siata oku sandekiwa vovikanda viasapulo, vo televisãu, kuenda vo Internet. Omo liaco, omanu vamue, va siata oku vetiyiwa oku tava kovohembi aco.

3. Nye ci pondola oku tu kuatisa oku yuvula ovina vi tu sumuisa?

³ Oco tu yuvule ovohembi a Satana, tu sukila oku pokola kolonumbi vi sangiwa vondaka ya Suku, momo ‘yi tu kuatisa oku pengulula ovina.’ (2 Tim. 3:16) Omo liaco, tu sukila oku kapako olondaka upostolo Paulu a sonehela vamanji vamue vo ko Tesalonike va kala kocita catete okuti va yapuisiwa omo lioku tava kovina viuhembi. Eye wa va lungula oco va yuvule oku ‘li tatamisa pokati.’ (2 Va Tes. 2:1, 2) Ovina vipi tu pondola oku lilongisa kelungulo lia Paulu, kuenda tu kapako ndati elungulo liaco poku liyaka lovitangi?

4. Elungulo lipi Akristão vo ko Tesalonike va tambuile liatiamẽla koku iya ‘kueteke lia Yehova’? Koloneke vilo tu kapako ndati elungulo liaco?

⁴ Vukanda watete Paulu a sonehela Akristão va kala vekongelo lio ko Tesalonike, wa va lomboluila eci catiamẽla kokuiya ‘kueteke lia Yehova.’ Eye ka yonguile okuti, vamanji va kala vowelema, kuenda ka va lavulula. Omo liaco, wa va vetiya hati: Omo okuti vosi yene “vumãla vocinyi,” ko ka pekeli, pole, lavululi loku lisuluvika kovina ka via sungulukile.’ (Tanga 1 Va Tesalonike 5:1-6.) Koloneke vilo, tu lavoka oku nyõliwa kuo Bavulono Yinene okuti, oyo ocisoko catavo esanda. Enyõleho liaco, li ka kala ondimbukiso yoku iya kueteke linene lia Yehova. Tua sanjuka calua omo lioku kuata elomboloko liasuapo liatiamẽla kocipango ca Yehova. Olonumbi tua siata oku tambula kolohongele, vi tu kuatisa oku amamako oku lavulula. Oku kapako olonumbi viaco tu tambula olonjanja viosi, ci tu kuatisa oku pamisa ekolelo lietu ku Suku, kuenda oku amamako oku kala ‘vefendelo liocili.’—Va Rom. 12:1.

5, 6. (a) Ovina vipi Paulu a tukula vukanda wavali a sonehela Akristão vo ko Tesalonike? (b) Ovina vipi Yesu a ka linga, kuenda apulilo api tu sukila oku linga?

⁵ Upostolo Paulu, noke yoku tuma ukanda waye watete Kakristão vo ko Tesalonike, wa tumavo ukanda wavali. Vukanda waco wa lombolola eci catiamẽla koku iya kuohali ya piãla eci Yesu a ka kundula omanu vana ‘ka va kũlĩhĩle Suku, kuenda vana ka va pokola kolondaka viwa.’ (2 Va Tes. 1:6-8) Vocipama cavali, cukanda Paulu a sonehela vamanji vana va sakalalele calua omo lieteke lia Yehova, wa va vetiya oco ka va ka yokoke momo eteke liaco lia laikele oku iya. (Tanga 2 Va Tesalonike 2:1, 2.) Akristão vo kocita catete, ka va kuatele elomboloko lia suapo liatiamẽla koku tẽlisiwa kuocipango ca Yehova. Omo liaco, Paulu wa soneha eci catiamẽla kocitumasuku poku va sapuila hati: “Omo okuti ka tu kuete ukũlĩhĩso wa suapo, ka tu imbi owanji wa suapo wovaprofeto. Pole, eci tu kuata ukũlĩhĩso wa suapo, lomue o kala vali latatahãi.” (1 Va Kor. 13:9, 10, NW) Pole, oco va pamise ekolelo liavo, va sukilile oku pokola kalungulo a Yehova a eciwa lupostolo Paulu, Petulu kuenda Akristão vakuavo olombuavekua va kala kotembo yaco.

⁶ Oco upostolo Paulu a kuatise Akristão vaco oku pamisa ekolelo liavo, wa popia hati, osimbu eteke lia Yehova ka lieyile, ku keya unanguluke, kuenje, ‘omanu ka va ka pokola kovihandeleko viaye.’ a Eci eteke lia Yehova liya, Yesu o ka ‘nyõla’ vana ka va pokola kolonumbi via Isiaye. Paulu wa lombolola esunga lieci Yehova a ka nyõlela omanu vaco, momo ‘ka va lekisile ocisola kondaka yocili.’ (2 Va Tes. 2:3, 8-10)  Omo liaco, tu sukila oku lipula ndoco: ‘Nye ndi sukila oku linga oco ndi lekise ocisola cocili ku Yehova? Ndi kuete hẽ ocituwa coku tanga alivulu osi a siata oku eciwa kafendeli va Yehova lekuatiso liocisoko caye’?

7, 8. (a) Ovitangi vipi Akristão vo kocita catete va liyaka lavio? (b) Koloneke vilo ovitangi vipi Akristão vocili va siata oku liyaka lavio?

⁷ Akristão vocili, ka va yapuisiwa lika lalongiso a tunda kolonanguluke. Paulu wa sonehela Timoteo hati: ‘Oku sola olombongo oluo olumbombo luevĩho.’ Noke wa amisako hati: Vamue poku sanda calua olombongo va yapuka vekolelo, kuenje va kuata ovitangi vialua.’ (1 Tim. 6:10) “Ovilinga vietimba,” vi pondolavo oku tu yapuisa.—Va Gal. 5:19-21.

⁸ O Pondola oku limbuka esunga lieci Paulu a vetiyila Akristão vo ko Tesalonike catiamẽla komanu vana va tukuiwa vati, “alongisi vesanda.” Pokati komanu vaco a tukula, pa kala vamue ‘va vangula ovina ka via sungulukile loku koka oloñame okuti vi va kuama.’ (2 Va Kor. 11:4, 13; Ovil. 20:30) Noke Yesu wa pandiya Akristão va kala ko Efeso, momo ka ecelele okuti, ‘omanu va linga ovina ka via sungulukile’ va kala vekongelo. Akristão va kala ko Efeso, va kũlĩhĩle okuti, omanu vaco va kala alongisi vesanda. (Esit. 2:2) Omo liaco, vukanda wavali Paulu a sonehela Akristão vo ko Tesalonike, wa va lungula hati: ‘A vamanji, tu vu handeleka vonduko ya Ñala Yesu Kristu okuti, vu litepa la vamanji vana okuti vakuambuanja.’ Eye wa tukula Akristão vana ‘ka va yongola oku linga upange.’ (2 Va Tes. 3:6, 10) Omo okuti, va yuvuile omanu vakuambuanja vekongelo, va sukililevo oku yuvula alongiso a tunda kolonanguluke! Koloneke vilo, tu sukilavo oku yuvula oku kuata ukamba lomanu vana va lekisa ovituwa ndevi omanu vamue va lekisa kosimbu.—Olosap. 13:20.

9. Nye tu sukila oku linga nda omanu vamue va seteka oku tu yapuisa lovina ka vi sangiwa Vembimbiliya, ale va popia lãvi akulu vekongelo?

⁹ Omo okuti ohali ya piãla ndopo yi fetika, kuenda tu kasi kesulilo lioluali lulo lua vĩha, alungulo a eciwa kocita catete a kuete esilivilo koloneke vilo. Ocili okuti, ka tu yongola oku tambula ocali ca Suku ndocina cimue ka ci kuete esilivilo, kuenda ka tu yongola oku pumba elavoko lietu lioku kuata omuenyo ko pui. (2 Va Kor. 6:1) Nda omanu vamue va siata oku enda kolohongele va seteka oku tu yapuisa lolondaka vimue ka vi sangiwa Vembimbiliya, ale va popia lãvi akulu vekongelo, tu sukila oku yuvula oku kuata ukamba lavo. —2 Va Tes. 3:13-15.

10. Alongiso api Akristão vo ko Tesalonike va sukilile oku kuama?

¹⁰ Upostolo Paulu, wa vetiya vamanji va kala vekongelo lio ko Tesalonike oco va amameko ‘oku kakatela kovina va lilongisa’ kuenda oku vi kapako. (Tanga 2 Va Tesalonike 2:15.) ‘Ovina’ vipi va longisiwa? Va longisiwa ovina viatiamẽla ku Yesu, kuenda olonumbi via Suku vi sangiwa Vembimbiliya. Paulu wa tukula ­ovina a ­lilongisa ku Yesu, kuenda olonumbi ­Viembimbiliya a tambula ku Suku oco a vi longise komanu.  Paulu poku lombolola olonumbi a tambuile ku Yesu, wa ivaluisa vamanji va kala vekongelo lio ko Korindo poku va sonehẽla ndoco: ‘Kovina viosi vu linga njivaluki, kuenda kakateli kovina ndo longisi.’ (1 Va Kor. 11:2) Alongiso aco, a enda oku tunda Vembimbiliya kuenda a koleliwa.

11. Ovina vipi vi pondola oku yapuisa omanu?

¹¹ Eci Paulu a sonehela vamanji vo ko Heveru, wa tukula ovina vivali Akristão va sukilile oku linga oco va pamise ekolelo liavo, kuenda oku amamako oku kuata ukamba la Yehova. (Tanga Va Heveru 2:1; 3:12.) Eye wa tukula eci catiamẽla koku ‘yapuisiwa’ kuenda ‘oku tepa’ ukamba wetu la Yehova. Ulandu waco u sokisiwa lowato umue u kasi kohulo yolui okuti, ka ca lelukile oku limbuka ndomo u fetika oku iñila vovava. Citava okuti omunu o nãla owato u kasi kongongo, oco wiñile vovava. Ovindekaise via tukuiwa ndeti, vi lekisa ndomo omunu a pondola oku yapuisiwa, kuenda oku nyõla ukamba waye la Yehova.

12. Koloneke vilo, nye ci pondola oku nyõla ukamba wetu la Yehova?

¹² Akristão vamue va kala ko Tesalonike, va ecelela oku nyõla ukamba wavo la Yehova. Nye ci popiwa catiamẽla koloneke vilo? Citava okuti, tu pesila otembo yetu kovopange eteke leteke, kovitalukilo, koku tanga asapulo votelefone, loku tumisa atambululo, ale oku linga olomapalo vikuavo. Oku tiamisila utima kovina viaco, ci tateka Ukristão oku kuata ombili yoku linga upange wa Yehova. Nye ci pondola oku pita la manji yaco? Citava okuti, ka kuata vali otembo yoku likutilila, oku lilongisa Embimbiliya, oku endaenda kolohongele, kuenda kupange woku kunda. Nye tu sukila oku linga, oco tu yuvule ocituwa coku li tatamisa pokati?

13. Ocituwa cipi omanu vamue va siata oku lekisa? Nye tu sukila oku linga oco tu teyuile ekolelo lietu?

¹³ Tu sukila oku lavulula, oco ka tu ka yapuisiwe lomanu vana ka va tava okuti, tu kasi “koloneke via sulako.” Upostolo Petulu wa soneha ovina viatiamẽla koloneke vietu poku popia hati: ‘Koloneke via sulako, kuiya vakuetombo okuti, va enda loloñeyi viavo vietimba, kuenje va popia vati: Ohuminyo yetukuluko lia Ñala yi kasi pi? Momo, tunde eteke akulu vetu va fa, ovina viosi vi kasi ndeci via kala tunde kefetikilo lioluali.’ (2 Pet. 3:3, 4) Oku tanga Embimbiliya olonjanja viosi, ci tu kuatisa oku lavulula loku limbuka okuti, tu kasi “koloneke via sulako.” Embimbiliya li tu sapuila okuti, unanguluke wa fetika osimbu kuenda u kasi oku amamako toke koloneke vilo. ‘Omanu vana ka va pokola kovihandeleko via Yehova,’ va kasi oku amamako oku lambalala afendeli va Yehova. Omo liaco, tu amamiko oku lavulula osimbu tu lavoka eteke lia Yehova. —Sof. 1:7.

14. Oku lekisa ombili kupange wa Yehova ci tu teyuila ndati?

¹⁴ Oku endaenda kupange woku kunda olondaka viwa Viusoma, ci tu kuatisa oku amamako oku lavulula, kuenda oku yuvula ocituwa coku li tatamisa pokati. Yesu Kristu utue wekongelo, eci a tuma olondonge viaye oku ka kundila omanu vo kolofeka viosi oco va linge olondonge, wa vi longisa ndomo via sukilile oku linga upange waco. Kuenje, wa likuminyile oku vi teyuila. (Mat. 28:19, 20) Oku kapako olonumbi viaco, ci tu kuatisa oku kala vakuambili kupange woku kunda.  O pondola hẽ oku sokolola esanju vamanji vo ko Tesalonike va kuata poku kunda loku longisa omanu va lekisa onjongole omo okuti va sukilile oku linga upange waco? Paulu wa va ivaluisa hati: ‘Ko ka tateki upange wespiritu sandu, kuenda ko ka pembuli ovitumasuku viovaprofeto vocili.’ (1 Va Tes. 5:19, 20) Omo liaco, tu sukilavo oku sapuila komanu olonumbi via Yehova tua siata oku lilongisa!

15. Ovina vipi tu pondola oku konomuisa vokuenda kuefendelo lietu liepata?

¹⁵ Tu sukila oku kuatisa epata lietu oco li lekise ombili kupange woku kunda. Vamanji valua poku linga efendelo liavo liepata, va siata oku konomuisa ovipama viatiamẽla kupange woku kunda. Citava okuti o kuatisa epata liove oco li linge esokiyo lioku nyula omanu vana va lekisa onjongole kupange woku kunda. Ovina vipi va sukila oku popia poku nyula omanu vaco? Olonumbi vipi vi vetiya omanu va lekisa onjongole? Elivala lipi ca leluka oku va sanga kolonjo viavo? Vamanji valua, vefendelo liavo liepata va siata oku pongiya ovipama violohongele, oco va kuate elomboloko liovina va ka lilongisa. Ove hẽ o pondolavo oku kuatisa epata liove oku pongiya olohongele oco va ka ece atambululo? Atambululo eca kolohongele, a pamisa ekolelo liove, kuenda a ku kuatisa oku yuvula ocituwa coku li tatamisa pokati. (Osa. 35:18) Efendelo liepata, li tu teyuila kalongiso ka a sangiwa Vembimbiliya, kuenda oku yuvula oku kuata atatahãi.

16. Nye ca siata oku kuatisa Akristão olombuavekua oku yuvula ocituwa coku li tatamisa pokati?

¹⁶ Eci tu sokolola ndomo Yehova a sumũlũisa afendeli vaye kosimbu, poku va kuatisa oku kuata elomboloko liovitumasuku vi sangiwa Vembimbiliya, ci tu kuatisa oku kolela kolohuminyo viaye. Akristão olombuavekua, va kuete elavoko lioku viala kilu la Yesu Kristu. Elavoko liaco, li va kuatisa oku yuvula ocituwa coku li tatamisa pokati! Omo liaco, tu sukila oku pokola kolondaka Paulu a sonehela vamanji vo ko Tesalonike poku popia hati: ‘A vamanji wa soliwi la Yehova Suku, ca sunguluka kokuetu oku vu panduila kokuaye olonjanja viosi. Momo, tunde kefetikilo wo nõli okuti, vu popeliwa loku kolisiwa lespiritu, kuenda oku kolela ondaka yocili.’—2 Va Tes. 2:13.

17. Elungulo lipi o pondola oku sanga kelivulu lia 2 Va Tesalonike 3:1-5?

¹⁷ Omanu vana va kuete elavoko lioku kala palo posi, va sukilavo oku yuvula ocituwa coku li tatamisa pokati. Nda o kuete elavoko lioku kala palo posi, kapako elungulo Paulu a sonehela Akristão olombuavekua va kala ko Tesalonike. (Tanga 2 Va Tesalonike 3:1-5.) Omunu lomunu pokati ketu, o sukila oku pokola kolondaka viaco. Vovikanda Paulu a sonehela Akristão vo ko Tesalonike, mu sangiwa alungulo atiamẽla koku vangula ovina ka via sungulukile. Omo okuti tu kasi koloneke via sulako violuali lulo, tu sukilavo oku pokola kolonumbi viaco.