1, 2. (a) Ovolandu api tua siata oku mola koloneke vilo? (b) Ovina vipi tua kũlĩha viatiamẽla Kusoma wa Suku?

OCILI okuti, omanu pamue ka va ivaluka ovina viosi via kongela vulandu umue. Cimuamue haico ci pondola oku pita lomunu umue okuti, ka tẽla oku ivaluka ovina viosi ndotolo o sapuila viatiamẽla kocitangi a kuete. Citava okuti omunu ka tẽla oku sanga osapi yaye ale ovinokolo viaye, ndaño okuti vi kasi ocipepi laye. Olonoño vimue via siata oku popia viti, nda omunu o linga ovina vialua vonjanja yimosi, o kala omeke. Momo, owoño wetu u tu kuatisa lika oku linga ocina ci mosi vonjanja yimuamue.

² Omo okuti koloneke vilo omanu valua “va kasi vupeke,” kuenda ka va tẽla oku limbuka ovolandu a kasi oku pita voluali. Ndaño va tava okuti ovina voluali via fetika oku pongoloka calua tunde kunyamo wo 1914, pole, ka va kuete elomboloko liovolandu aco. Vosi yetu tua kũlĩha okuti, Usoma wa Suku wa fetika oku viala kunyamo wo 1914, eci Yesu a linga Osoma kilu. Pole, tua kũlĩhavo okuti, vovina viaco mua kongela etambululo liohutililo yokuti: “Usoma wove wiye. Ocipango cove ci lingiwe posi ndeci ci lingiwa kilu.” (Mat. 6:10) Vohutililo yaco, mua kongela etambululo lienyolẽho lioluali lulo lua vĩha. Eci ovina viaco vi ka lingiwa, ocipango ca Suku ci ka tẽlisiwa palo posi, ndeci ci kasi oku lingiwa kilu.

3. Elilongiso lietu Liembimbiliya li tu kuatisa oku limbuka nye?

 ³ Omo okuti tua siata oku lilongisa ondaka ya Suku olonjanja viosi, tu pondola oku limbuka ovitumasuku vi kasi oku tẽlisiwa toke cilo. Pole, omanu valua ka va kuete ukũlĩhĩso waco! Ovo va sakalala lika lovina va yongola oku linga komuenyo wavo, kuenda, ka va tava okuti, Kristu wa fetika oku viala tunde kunyamo wo 1914. Ovo, ka va kapeleko elungulo liokuti, ndopo oluali lulo lua vĩha lu ka nyõliwa. Omo liaco, lipula ndoco: ‘Anga hẽ ndi tava okuti esulilo lioluali lulo li kasi muẽle ocipepi? Ovolandu api a lekisa uvangi waco?’ Ndaño okuti ndopo wa linga Ombangi ya Yehova, pole, pi o sukila oku tiamisila utima wove? Tu konomuisi atosi atatu a velapo a lekisa esunga lieci tu sukilila oku kolela okuti, ndopo ocipango ca Suku ci ka tẽlisiwa palo posi.

4, 5. (a) Nye Yesu a kasi oku linga tunde kunyamo wo 1914? (Tala elitalatu kefetikilo liocipama cilo.) (b) Alume vatatu va endela kolokavalu va lomboloka nye? Ocitumasuku caco ci kasi oku tẽlisiwa ndati koloneke vilo?

⁴ Kunyamo wo 1914, eci Yesu Kristu a tambula ekolowa kilu, wa linga Ombiali Yusoma wa Suku. Noke yoku vialekiwa komangu Yusoma, wa fetika oku endela kokavalu, oco a nyõle oluali lulo lua vialiwa la Satana. (Tanga Esituluilo 6:1, 2.) Ocitumasuku ci sangiwa kelivulu Liesituluilo kocipama 6 ci lekisa okuti, eci Usoma wa Suku wa fetika oku viala kilu, voluali mua fetika oku kala ovitangi vialua ndeci: Uyaki, onjala, ovovei, kuenda ovitangi vikuavo via siata oku kokela olofa komanu valua. Ovitangi via tukuiwa ndeti, vi situluiwa kalume vatatu va endela kolokavalu okuti, va kuãi Yesu Kristu.—Esit. 6:3-8.

⁵ Ndomo ca lomboluiwa vocitumasuku caco, ‘uyaki wopa ombembua palo posi,’ ndaño okuti, olombiali via likumiyile oku likuata omunga, oco vi nene ombembua voluali luosi. Uyaki Watete wa Pita Voluali Luosi, owo wa fetika oku upa ombembua palo posi. Ndaño okuti uloño wa livokiya calua tunde kunyamo wo 1914, pole, onjala voluali yi kasi oku amamako toke cilo. Tua kũlĩha okuti, ovovei, ovilunga via siata oku pita voluali, kuenda ovitangi vikuavo, vi kasi oku ponda omanu valua unyamo lunyamo. Ku tava hẽ okuti, ovina viaco vi kasi oku nena ovitangi vialua komanu okuti kosimbu ci sule? Ovolandu a tukuiwa ndeti, a siata oku nena ovitangi vialua pokati komanu. Wa kũlĩha hẽ elomboloko liovina viaco?

6. Velie va limbuka oku tẽlisiwa kuocitumasuku Cembimbiliya, kuenda ca va vetiya oku linga nye?

⁶ Eci Uyaki Watete wa Pita Voluali Luosi wa fetika, omanu valua va tiamisilile lika utima kovina vikuavo, omo liuvei wo Gripe Espanhola. Pole, Akristão olombuavekua va kala oku lavoka okuti, ‘Otembo ya Vakualofeka’ yi sulila kunyamo wo 1914. (Luka 21:24) Akristão olombuavekua ka va kũlĩhĩle ndomo ocitumasuku Cembimbiliya ca laikele oku tẽlisiwa. Pole, va kũlĩhĩle okuti, kunyamo wo 1914, Usoma wa Suku wa laikele oku linga ocina cimue ci kuete esilivilo lia velapo. Vokuenda kuotembo yaco, va kuata elomboloko lioku tẽlisiwa kuocitumasuku caco, kuenje, va fetika oku kundila omanu vati, Usoma wa Suku wa fetika oku viala. Pole, vamanji va kala oku kunda esapulo Liusoma, va fetika oku lambalaliwa. Kuenje, elambalalo liaco lia lekisa oku tẽlisiwa kuocitumasuku Cembimbiliya. Omo liaco, ovanyãli Vusoma wa Suku ‘va kapa ovihandeleko’ vioku kangisa vamanji, loku va kapa volokayike, kuenda oku va ponda, oco va liwekepo oku linga upange woku kunda.—Osa. 94:20; Esit. 12:15.

7. Momo lie omanu valua ka va kapeleleko ovina vi kasi oku pita voluali koloneke vilo?

⁷ Omo okuti kuli ovovangi alua a lekisa okuti, Usoma wa Suku wa tumbikiwa kilu,  momo lie omanu ka va yonguila oku kuata elomboloko Liusoma waco? Momo lie ka va tavela okuti ovolandu a siata oku pita voluali a lekisa oku tẽlisiwa kuovitumasuku via tukuiwa Vembimbiliya, ndomo afendeli va Yehova va siata oku kunda vokuenda kuanyamo alua? Anga hẽ, omanu va tiamisila lika utima kovina va lete lovaso avo? (2 Va Kor. 5:7) Anga hẽ, va sakalala lika lovopange avo eteke leteke, kuenje ka va lete ovina Yehova a kasi oku linga? (Mat. 24:37-39) Anga hẽ omanu vamue va tiamisila lika utima kovohembi oluali lulo lua Satana? (2 Va Kor. 4:4) Tu sukila oku yuvula oku tiamisila lika utima kovina tu lete lovaso, oco tu limbuke eci Usoma wa Suku u kasi oku linga cilo. Tu kuete esanju omo lioku limbuka ovina vi kasi oku pita voluali koloneke vilo!

8-10. (a) Ocitumasuku ci sangiwa kelivulu lia 2 Timoteo 3:1-5, ci kasi oku tẽlisiwa ndati? (b) Momo lie tu popela tuti, ungangala wa livokiya calua koloneke vilo?

⁸ Esunga liavali lieci tu tavela okuti ndopo Usoma wa Suku u ka viala oluali lulo, lieli okuti, ungangala voluali wa livokiya calua okuti, kosimbu ci sule. Tunde eci ocitumasuku ci sangiwa kelivulu lia 2 Timoteo 3:1-5, ca fetika oku tẽlisiwa, pa pita ale ocita canyamo. Ovina via tukuiwa vocipama eci, via li sanduila voluali luosi. Ku tava hẽ okuti ocitumasuku caco ci kasi oku tẽlisiwa koloneke vilo? Omo liaco, tu konomuisi ovolandu a lekisa uvangi waco.—Tanga 2 Timoteo 3:1, 13.

⁹ Sokisa ovina omanu va tendele okuti ka via sungulukile oku upisa kunyamo wo 1940, ale oku u pisa kunyamo wo 1950, levi vi kasi oku pita koloneke vilo kovitumãlo viupange woku sanda eteku, vovitalukilo, kuenda ndomo omanu va siata oku wala. Ungangala, kuenda ukahonga, via li sanduila kolonepa viosi violuali. Omanu vamue va siata oku sumuisa vakuavo omo lioku linga ungangala, kuenda ovina vikuavo ka via sungulukile. Ovina omanu va tendele okuti ka via sungulukile via enda oku lekisiwa vo Televisãu oku upisa kunyamo wo 1950, cilo omanu valua va sima okuti, ca sunguluka oku vi tala. Omanu valua va tava kovisimĩlo viokuti, ca sunguluka ulume lulume ale ukãi lukãi oku tokekisa olohuela. Kuenje, va vetiya omanu  vakuavo oku kuama ocituwa cavo coku wala, kuenda ekalo liomuenyo wavo. Tu eca olopandu Suku omo lioku kũlĩha okuti, ka sanjukila ovina viaco.—Tanga Yuda 14, 15.

¹⁰ Sokisa esino amalẽhe va enda oku lekisa kosimbu, leli amalẽhe vo koloneke vilo va siata oku lekisa. Oku upisa kunyamo wo 1950, olonjali via enda oku sumua poku mola omãla vavo va sipa akaya, oku nyua ovina vi koluisa, ale oku piluka lonjila yimue ka ya sungulukile. Pole, koloneke vilo, tua siata oku yeva asapulo a nena esumuo pokati komanu. Umalẽhe umue o kuete 15 kanyamo, wa ponda luta akamba vaye vavali kosikola, kuenda wa lemeha 13 kamalẽhe kosikola yaco. Amalẽhe vamue va sipa eliamba, va ponda kafeko umue o kuete anyamo ecea, noke va tipula isiaye, kuenda ocimumba caye. Ulandu ukuavo wa lekisa okuti, volupale lumue vocifuka co Asia, amalẽhe vamue va linga ungangala vokuenda kueci ci soka ekũi lianyamo. Ku tava hẽ okuti, ovitangi via livokiya calua koloneke vilo?

11. Momo lie omanu ka va tavela okuti, ekalo lĩvi lia livokiya calua koloneke vilo?

¹¹ Upostolo Petulu wa popia hati: “Tete limbuki okuti, koloneke via sulako, kuiya vakuetombo loku tomba, va enda loloñeyi viavo vietimba, vati: ‘Ohuminyo yetukuluko lia Yesu yi kasi pi? Momo, tunde eteke akulu vetu va fa, ovina viosi vi kasi ño ndeci via kala tunde kefetikilo lioluali.’” (2 Pet. 3:3, 4, NW) Momo lie omanu vamue va siatela oku lekisa ovituwa viaco? Momo, ndaño va kũlĩha ovina vimue, pole ka va kapiko alungulo aco. Nda ekamba limue li lekisa ovituwa vĩvi vocipikipiki, tu sumua. Pole, nda omanu vamue va lekisa levando ovituwa vĩvi vokuenda kuotembo yalua, pamue ka tu ci limbuka lonjanga. Omo okuti ovituwa vĩvi via li vokiya calua, vi pondola oku kapa kohele ekalo lietu.

12, 13. Momo lie ka tu sukilila oku pua ekolelo omo liovitangi vi kasi oku pita voluali? (b) Nye ci tu kuatisa oku pandikisa ‘koloneke vilo viohali’?

¹² Upostolo Paulu o tu lungula hati, koloneke via sulako, “ku iya otembo yohali.” (2 Tim. 3:1) Pole, ka tu sukila oku tila ovitangi vi kasi mulo voluali. Tu pondola oku yula ovitangi tu liyaka lavio, ale usumba tu kuete. Tu pondolavo oku pamisa ukamba wetu la Yehova, poku pinga espiritu liaye, kuenda ekuatiso lia vamanji. Yehova Suku ‘o pondola oku tu ĩha unene waye’ okuti, wetu u sule.—2 Va Kor. 4:7-10.

¹³ Upostolo Paulu wa fetika oku tukula ocitumasuku catiamẽla koloneke via sulako lolondaka a popia hati, “limbuki okuti.” Olondaka viaye vi lekisa okuti, ocitumasuku caco ndopo ci tẽlisiwa. Tua kũlĩha okuti, ovitangi vi ka amamako oku livokoya, toke eci Yehova a nena esulilo lioluali lulo. Ovolandu tua konomuisa a tu longisa okuti, nda omanu va tenda ovina vĩvi ndu okuti via sunguluka, va kuata ovitangi. Koloneke vilo, omanu vamue ka va kapeleko vali ocituwa coku tepisa pokati keci ciwa leci cĩvi, ndeci ca kala kosimbu. Ndaño okuti omanu ka va tava kovina via tukuiwa ndeti, pole, ovolandu a siata oku pita voluali tunde kunyamo wo 1914, a tu vetiya oku tava okuti, ndopo Usoma wa Suku u ka malako ovina viosi via vĩha.

14-16. Esunga lipi liatatu li lekisa okuti Usoma wa Suku u kasi “ocipepi”?

¹⁴ Ovolandu a siata oku pita la vamanji, a lekisa esunga liatatu lieci tu sukilila oku kolela okuti esulilo lioluali lulo li kasi ocipepi. Osimbu Usoma wa Suku ka wa fetikile oku viala kilu, ocimunga cimue ca Kristão olombuavekua ca kala ale oku vumba Suku. Omo okuti ocitumasuku caco ka ca tẽlisiwile kunyamo wo 1914 ndomo va lavokaile, nye va sukilile oku linga? Ndaño okuti valua pokati kavo va liyaka lovitangi kuenda elambalalo, pole,  va amamako oku fendela Yehova lekolelo. Omo liaco, pokati Kakristão olombuavekua va amamako loku pandikisa palo posi toke kolofa.

¹⁵ Vocitumasuku Yesu a tukula catiamẽla kesulilo lio luali lulo lua Satana, wa popia hati: “Ocitumbulukila cilo ka ci pui te ovina evi viosi vi lingiwa.” (Tanga Mateo 24:33-35.) Tua kũlĩha okuti, eci Yesu a tukula ondaka “ocitumbulukila cilo,” wa yi tiamisila kovimunga vivali Viakristão olombuavekua. Ocimunga catete, ca kala kunyamo wo 1914, kuenda ca limbuka okuti, Yesu wa fetika oku viala kunyamo waco. Vana vatiamẽlele kocimunga caco, va kala ale komuenyo osimbu unyamo wo 1914 ka wa pitĩlile. Pole, citava okuti, va nõliwa lespiritu sandu lia Suku kunyamo waco, ale va nõliwa eci unyamo waco ka wa pitĩlile.—Va Rom. 8:14-17.

¹⁶ Vana vatiamẽla kocimunga cavali “cocitumbulukila” Yesu a tukula, va nõliwa eci vamue va panga onepa kocimunga catete Cakristão olombuavekua va kala handi komuenyo palo posi. Omo liaco, vamue pokati Kakristão olombuavekua va kasi handi palo posi koloneke vilo, ka va kongeliwile vocitumbulukila Yesu a tukula. Vamanji vatiamẽla kocimunga cavali koloneke vilo, vana okuti va kuka. Pole, olondaka via Yesu vi sangiwa kelivulu lia Mateo 24:34, vi tu kuatisa oku kolela okuti, vamanji vamue olombuavekua va panga onepa ‘kocitumbulukila eye a tukula, ka va fi vosi, momo, va ka mola eci ohali ya piãla yi ka fetika.’ Ovina tua konomuisa ndeti, vi tu kuatisa oku limbuka okuti, Yesu Osoma Yuviali wa Suku, o ka nyõla oluali lulo lua vĩha, kuenda o ka nena oluali luokaliye luesunga.—2 Pet. 3:13.

17. Nye ci tu kuatisa oku kuata elomboloko liovolandu tua konomuisa vocipama cilo?

¹⁷ Nye tu pondola oku limbuka, noke yoku konomuisa olonepa vitatu viovitumasuku Viembimbiliya? Yesu o tu sapuila hati, ka tua kũlĩhĩle eteke lowola esulilo li ya. (Mat. 24:36; 25:13) Pole, tua kũlĩha okuti, tu kasi “kotembo” ya sulako upostolo Paulu a tukula. (Tanga Va Roma 13:11.) Ocili okuti, tu kasi koloneke via sulako. Nda tua lavulula lutate ndomo ovitumasuku Viembimbiliya vi kasi oku tẽlisiwa, loku kũlĩha ovina Yehova Suku kumue la Yesu Kristu va kasi oku linga, tu limbuka okuti esulilo lioluali lulo li kasi ocipepi.

18. Nye ci ka pita lomanu vana ka va tava okuti, Kristu eye Soma yavo?

¹⁸ Ndopo, vana va likala okuti Yesu Kristu o kuete omoko yoku viala, va ka kisikiwa oku limbuka okuti olondingaĩvi. Ovo, ka va ka puluka kenyõleho li laika oku iya. Eci ovina viaco vi ka tẽlisiwa va ka lila loku popia vati: ‘Helie o tẽla oku pandikisa?’ (Esit. 6:15-17) Elivulu Liesituluilo, kocipama 7, ceca etambululo liepulilo eli. Akristão olombuavekua va kasi handi palo posi, kumue lowiñi wakahandangala u kuete elavoko lioku kala palo posi, va ka amamako oku ‘pandikisa,’ omo lioku taviwa la Suku. Omo liaco, “owiñi wakahandangala” wolomeme vikuavo, u ka puluka kohali ya piãla, oco wiñile voluali luokaliye palo posi.’—Esit. 7:9, 13-15.

19. Omo lioku kũlĩha okuti esulilo li kasi ocipepi, nye o lavoka kovaso yoloneke?

¹⁹ Nda tua kapako ovitumasuku Viembimbiliya vi kasi oku tẽlisiwa koloneke vilo, ka tu ecelela oku yapuisiwa lovina violuali lulo lua Satana. Nda tua ci linga, tu kuata elomboloko lia suapo liovitangi vi kasi oku pita voluali. Ndopo Yesu o ka yula, kuenje, o ka nyõla oluali lulo lua Satana vokuenda kuyaki wo Harmagedo. (Esit. 19:11, 19-21) Omo liaco, tu ka kuata esanju lialua eci ovina viaco vi ka tẽlisiwa!—Esit. 20:1-3, 6; 21:3, 4.