Kunyamo wo 1985, eci nda kuata ekũi lianyamo, kofeka yo ko Kambonja, kua tunda omãla vamue veya kosikola nda kala oku lilongisila, volupale luo Kolumbus, Ohio, ko Estados Unidos. Pokati kavo, pa kala umalẽhe umue okuti, wa kũlĩhĩle lika olondaka vimue vielimi Liongelesi. Eci a ndi lekisa alitalatu amue, wa fetika oku ndi lomboluila ovolandu omanu va kangisiwa, ava va pondiwa, kuenda vana va tila oco ka va ka pondiwe. Kuteke, nda enda oku lila eci ndi sokolola omãla vaco. Kuenje, nda sapela lavo ovina viatiamẽla Koluali Luokaliye, kuenda kepinduko liava va fa. Pole, ka va kuatele elomboloko liovina nda va sapuila, momo, ka va tẽlele oku vangula elimi liange. Ndaño okuti kotembo yaco nda kala umalẽhe, pole, nda nõlapo oku lilongisa elimi lio ko Kambonja, oco ndi sapele lakamba vange vo kosikola, catiamẽla ku Yehova. Kotembo yaco, sia kũlĩhĩle okuti, onjila nda nõlapo, yi ka ndi kuatisa kovaso yoloneke.

Omo okuti ka ca lelukile oku lilongisa elimi lio ko Kambonja, nda yonguile oku liwekapo oku lilongisa olonjanja vivali. Pole, Yehova wa vetiya olonjali viange oco nda amameko oku lilongisa. Noke, alongisi, kumue lakamba vange vo kosikola, va ndi vetiya oku sandiliya upange umue okuti ndi fetiwa olombongo vialua. Omo okuti nda yonguile oku kala ukundi wotembo yosi, nda nõlapo oku tangela kosikola ya pita pokati, oco ndi sange upange umue wolowola vikuãla veteke. Olonjanja viosi eci ndi tunda kosikola, nda kuata ocituwa coku sandiliya akundi votembo yosi, oco tu endele kumosi kupange woku kunda. Noke, nda fetika oku longisa omanu elimi Liongelesi. Omo liaco, onjila nda nõlapo, ya ndi kuatisa kovaso yoloneke.

Eci nda tẽlisa 16 kanyamo, nda yeva okuti, ocimunga cimue ca vamanji va tunda ko Kambonja, va kala vimbo lio Long Beach, volupale luo Kalifornia, kofeka yo Estados Unidos. Eci nda nyula ofeka yaco, vamanji va ndi longisa oku tanga elimi lio ko Kambonja. Eci nda mala oku lilongisa kosikola, nda fetika upange wakundi votembo yosi. Kuenje, nda amamako oku kundila omanu vo ko Kambonja, va kala ocipepi lonjo yetu. Eci nda tẽlisa 18 kanyamo, nda nõlapo oku ilukila kofeka yo Kambonja. Ndaño okuti ka ca lelukile oku kala vofeka yo Kambonja, pole, mua kala ekũi kolohuluwa viomanu, kuenda valua pokati kavo, ka va la yeva esapulo liolondaka viwa. Noke, vofeka yaco mueya oku kala ekongelo limue lia kuata 13 kakundi. Nda nyula ofeka yo Kambonja onjanja yatete, eci nda tẽlisa 19 kanyamo. Eci pa pita anyamo avali, nda nõlapo oku ilukila kofeka yaco. Kuenje, nda sanga upange umue wolowola vikuãla veteke, woku pongoluila kelimi likuavo, kuenda nda kala ulongisi welimi Liongelesi. Noke, nda sanga manji umue ukãi okuti, wa kuata ocimãho cimuamue leci cange. Kuenje, tua kuata esanju, omo liomanu valua tua kundila okuti, va linga Olombangi Via Yehova.

Yehova wa ndi kuatisa oku tẽlisa onjongole yutima wange. (Osamo 37:4) Oku kunda olondaka viwa Viusoma, ci nena esanju lialua komuenyo. Vokuenda kueci ci soka 16 kanyamo nda kala vofeka yo Kambonja, ocimunga ca kuata lika 13 kafendeli va Yehova, ca linga 12 kakongelo, kuenda mu kuete ovimunga vikuãla via vamanji va kasi kovaimbo ocipãla!—Ulandu wa lomboluiwa la manji Jason Blackwell.