Oku liyaka lovitangi, ci tu nenela esumuo. Momo, vi tepulula esanju lietu, kuenda vi tu nenela ehonguo. Soma Daviti wo ko Isareli, wa liyakavo lovitangi vialua. Wa vi yula ndati? Daviti wa tambulula lolondaka vi sangiwa Vosamo poku popia hati: ‘Mbilikiya ku Yehova londaka yange. Londaka yange ndi likutilila ku Yehova. Ndi pinga kokuaye loku lisiõsiõla. Ndu lomboluila ohali yange. Eci ndi hongua, ove wa kũlĩha onjila yange.’ Ocili okuti, Daviti wa likutilila lumbombe ku Suku, oco o kuatise.—Osa. 142:1-3.

Vosamo yikuavo, Daviti wa imba ocisungo hati: ‘Cimosi nda pinga ku Yehova okuti oco ndi sandiliya ceci okuti, ñala vonjo ya Yehova oloneke viosi viomuenyo wange, oku limbuka esanju lia Yehova, loku likutilila vonembele yaye.’ (Osa. 27:4) Ndaño okuti Daviti ka tiamelẽle kepata lia va Lewi, pole, wa kala posamua yocitali ci kola, ocipepi locitumãlo cefendelo liocili. Omo okuti Daviti wa kuata esanju lialua, wa yonguile oku kala pocitumãlo caco cefendelo, oloneke viosi viomuenyo waye, oco a ‘limbuke esanju lia Yehova.’

Ondaka “esanju,” yi tiamisiwila kovina “vi sanjuisa utima, kuenda ovisimĩlo vietu.” Daviti wa enda oku sanjukila’ eliangiliyo lia Suku lioku u fendela. Omo liaco, tu sukila oku lipula ndoco: ‘Ndi kuete hẽ ovisimĩlo vimuamue ndevi Daviti a kuatele?’

Koloneke vilo, eliangiliyo lia Yehova lioku kuata ukamba laye, ka li tiamisiwila kocitumãlo cimue ci letiwe lovaso etu. Pole, li tiamisiwila konembele yinene yespiritu okuti yi lomboloka eliangiliyo liefendelo liocili. * Nda tua kapako eliangiliyo liaco, ‘tu limbuka esanju lia Yehova.’

Kũlĩhĩsa utala wosipi woku yoka olombanjaile viovinyama via enda oku kapiwa puvelo wo tavernakulu. (Etu. 38:1, 2; 40:6) Utala waco wa lombolokele onjongole ya Yehova yoku tava omuenyo wa Yesu oco a linge ocilumba. (Va Hev. 10:5-10) Sokolola eci utala waco u lomboloka kokuetu! Upostolo Paulu wa soneha ndoco: ‘Osimbu tua kala ovanyãli va Suku, tua linalisa laye lekuatiso liolofa Viomõlaye.’ (Va Rom. 5:10) Poku lekisa ekolelo kosonde ya Yesu ya peseka, tu pondola oku taviwa la Yehova, kuenda oku kala akamba vaye. Nda tua ci linga, ‘tu kuata ukamba wocili la Yehova.’—Osa. 25:14.

Omo okuti Yehova wa ‘ecela akandu etu,’ tu limbuka ‘esanju li tunda Kokuaye.’ (Ovil. 3:19) Ekalo lietu, li sokisiwa lomunu o kasi vokayike okuti, o likekembela ovina vĩvi a linga kosimbu. Kuenje, o linga apongoloko, osimbu a kevelela oku pondiwa. Eci onganji yimue ukuacisola yi limbuka apongoloko omunu waco a kasi oku linga, cu vetiya oku u yovola oco ka ka pondiwe. Omunu o kasi vokayike eci a yeva ondaka yaco, o kuata esanju lialua! Onganji ya tukuiwa ndeti, yi sokisiwa la Yehova okuti, o lekisa ohenda komanu vosi va likekembela akandu avo, kuenje, o va yovola kolofa.

Pokati kovina viatiamẽla kefendelo liocili Daviti a mola vonjo ya Yehova, pa kala owiñi wa va Isareli va tanga Ocihandeleko, kuenda oku lekisa elomboloko liaco. Wa molavo insensu via kala oku timihĩwa, upange u kola wa kala oku lingiwa Lovitunda, kuenda va Lewi. (Etu. 30:34-38; Ate. 3:5-8; Esin. 31:9-12) Ovina via enda oku lingiwa vefendelo liocili kotembo ya va Isareli, vi kuetevo elitokeko, levi vi kasi oku lingiwa koloneke vilo.

Tunde kosimbu toke koloneke vilo, ‘ca sunguluka nda vamanji va tunga pamosi lombembua!’ (Osa. 133:1) ‘Ukamba u kasi pokati ka vamanji,’ wa li vokiya calua voluali luosi. (1 Pet. 2:17) Ondaka ya Suku ya siata oku tangiwa, kuenda oku lomboluiwa komanu veya kolohongele vietu. Yehova lekuatiso liocisoko caye, wa siata oku tu ĩha olonumbi vioku tu pindisa. Koloneke vilo, tua siata oku tambula okulia kualua kuespiritu kua sandekiwa valivulu, oco a tu kuatise kelilongiso lio pokolika, kuenda kefendelo liepata. Manji umue watiamẽla Kosungu Yolombangi Via Yehova wa popia hati: “Oku sokolola Ondaka ya Yehova loku kuata elomboloko liaco, kuenda oku yi konomuisa lutate, ca siata oku ndi nenela esanju lialua volowola vina okuti sia pekelele handi.” Ocili okuti, ukũlĩhĩso wondaka ya Suku, u sanjuisa utima wetu.’—Olosap. 2:10.

Koloneke vilo, Yehova wa siata oku yevelela olohutililo viafendeli vaye eteke leteke. Olohutililo vi sokisiwa lisensu vielemba liwa. (Osa. 141:2) Tu sanjuka calua poku limbuka okuti, Yehova Suku o tava olohutililo vietu tu linga lumbombe!

Mose wa likutilila hati: “Ohenda yove yi kale letu a Yehova Suku. Tu kuatise oco upange wovaka etu wende ciwa.” (Osa. 90:17, NW) Osimbu tu lekisa ombili koku kunda olondaka viwa, Yehova o sumũlũisa upange wetu. (Olosap. 10:22) Citava okuti, tua kuatisa omanu vamue oku lilongisa Embimbiliya. Poku ci linga, pamue tua pita anyamo alua loku pandikisa kupange woku kunda omo liomanu ka va lekisa onjongole, oku vela, ale elambalalo. (1 Va Tes. 2:2) Tua siata hẽ ‘oku limbuka esanju lia Yehova,’ kuenda tua kũlĩha okuti, o sanjukila alikolisilo etu?

Daviti wa imba ocisungo hati: “Yehova eye onepa yocipiñalo cange, haeye okopo yange. Ocipiñalo cange ci kasi peka liaye. Ovikolo violoseteko, via kupukila kokuange.” (Osa. 16:5, 6, NW) Daviti wa eca olopandu omo ‘liocipiñalo’ a tambula, oku kala ekamba lia Yehova, kuenda oku kuata esumũlũho lioku u vumba. Citava okuti, tu liyakavo lovitangi, pole, tu kuete asumũlũho alua, ndeci ca pita la Daviti! Omo liaco, tu amamiko oku endela vefendelo liocili, kuenda oku ‘sanjukila oku kala’ vonembele yespiritu ya Yehova.