1. Omo okuti tua lulikiwa lesetahãlo lia Yehova, ovoloño api tu kuete?

OMANU valua va siata oku popia vati: “Omõla u, wa setahãla isiaye, ale isia wa setahãla omõlaye.” Ocili okuti, omãla valua va setahãla olonjali viavo. Esetahãlo liomõla, li tunda kolonjali viaye. Yehova, Isietu wokilu, eye wa tu ĩha omuenyo. (Osa. 36:9) Omo okuti tumãla va Yehova, tu kuete ovituwa ndevi viaye. Omo okuti tua lulikiwa ‘lesetahãlo liaye,’ tu kuete uloño woku sokolola ovina, oku nõla onjila tu kuama, kuenda oku kuata ukamba lomanu.—Efet. 1:26.

2. Yehova o pondola oku kala ndati Ekamba lietu?

² Yehova, o pondola oku kala ekamba lietu lia velapo. Ukamba waco, tu u limbukila kocisola a tu kuetele, ekolelo tu lekisa kokuaye, kuenda Komõlaye. Yesu wa popia hati: ‘Omo Suku a sola calua oluali, wa eca Omõlaye wongunga okuti, wosi u kolela ka fi, pole, o kuata omuenyo ko pui.’ (Yoa. 3:16) Kuli ovolandu alua omanu va kuata ukamba la Yehova. Pokati kovolandu aco, tu konomuisapo avali.

3, 4. Momo lie ukamba Avirahama a kuata, wa li tepelele lowu wovitumbulukila viaye?

³ Yehova wa tukula Avirahama isia ya va Isareli hati, ‘ekamba liange.’ (Isa. 41:8) Elivulu Liavali Liasapulo 20:7, li tukulavo Avirahama hati, ekamba lia Yehova Suku. Nye ca kuatisa ­Avirahama oku kuata ukamba wocili Lululiki waye? Ekolelo Avirahama a lekisa, olio lio kuatisa oku ci linga.—Efet. 15:6; Tanga Tiago 2:21-23.

⁴ Ovitumbulukila via Avirahama vina vieya oku linga ofeka ya va Isareli, via kuatele ukamba la Yehova, kuenda eye wa kala Isiavo. Pole, noke vieya oku tepa ukamba wavo la Yehova. Momo lie? Momo, ka via lekisile vali ekolelo kolohuminyo Viaye.

5, 6. (a) Yehova o pondola oku kala ndati Ekamba liove? (b) Apulilo api tu sukila oku konomuisa?

⁵ Osimbu o lilongisa catiamẽla ku Yehova, o pamisa ekolelo liove kokuaye, kuenje, ocisola cove ci li vokiya. Sokolola otembo eci wa lilongisa okuti, Suku Omunu umue wocili, kuenda o pondola oku kala ekamba liaye. Wa lilongisavo okuti, vosi yetu tua piñala ekandu omo liesino lia Adama. Noke wa kuata elomboloko liokuti, omanu valua ka va kuete ombembua la Suku. (Va Kol. 1:21) Wa lilongisavo okuti, Isietu wokilu ukuacisola, ka kasi ocipãla letu, pole, wa tu kapako. Eci tua lilongisa okuti, Yehova wa eca Omõlaye ndocisembi, tua fetika oku lekisa ekolelo kocisembi caco, kuenda oku kuata ukamba la Yehova.

⁶ Poku sokolola ndomo tua kũlĩha Yehova, ci tu vetiya oku lipula ndoco: ‘Ndi kasi hẽ oku vokiya ukamba wange la Yehova? Ndu u kuetele hẽ ekolelo lia pama, kuenda ocisola cange Kokuaye ci kasi oku livokiya eteke leteke?’ Gideone, omunu umue wa kuatele ukamba wocili la Yehova kosimbu. Omo liaco, tu konomuisi ulandu waye, oco tu kuame ongangu yaye.

7-9. (a) Ulandu upi Gideone a pita lawo, kuenda onima yipi a kuata? (Tala elitalatu kefetikilo liocipama cilo.) (b) Tu pondola ndati oku kala akamba va Yehova?

⁷ Gideone, una wa kala Onganji, wa vumba Yehova kotembo yovitangi eci va Isareli va iñila Vofeka Yohuminyo. Elivulu Liolonganji kocipama 6, li lombolola okuti, ungelo umue wa Yehova, wa pasuisa Gideone volupale luo Ofra. Kotembo yaco, va Midiane va kala oku lambalala va Isareli, kuenda Gideone wa kala oku sasa otiliku vocikoselo cayuva okuti, ca lelukile oku yi seleka lonjanga. Noke, ungelo umue wa molẽha ku Gideone, kuenje, wo tukula hati, “ukuakuyaka.” Ndaño okuti Yehova wa yovola va Isareli Kegito, pole, Gideone wa kuata atatahãi okuti, ka pondola oku u kuatisa vepuluvi liaco. Pole, ungelo wa sapuila Gideone hati, Yehova o pondola oku u kuatisa.

⁸ Noke, Gideone wa lekisa esakalalo, momo ka kũlĩhĩle ndomo a pondola ‘oku popela va Isareli peka lia va Midiane.’ Pole, Yehova wo sapuila hati: ‘Ndi kala kumue love, kuenje va Midiane o va kundula ndomunu umosi.’ (Olong. 6:11-16) Omo okuti Gideone ka kũlĩhĩle ndomo a ci linga, wa pinga ondimbukiso yimue ku Yehova. Ulandu owu ka u lekisa okuti, Gideone wa kuata atatahãi atiamẽla ku Yehova nda Omunu wocili ale sio.

⁹ Ulandu wa kuamamo wa vokiya ekolelo lia Gideone, kuenje, co kuatisa oku pamisa ukamba waye la Yehova. Omo liaco, Gideone wa teleka okulia, kuenje, wa ku eca kungelo. Noke, ungelo wa linga ocikomo cimue, kuenje, wa timĩha okulia kuaco londalu ya tunda kombueti yaye. Eci Gideone a limbuka okuti ungelo waco wa tumiwa la Yehova, wa fetika oku luluma, kuenje wa popia hati: “Nda mõla ungelo wa Yehova liso liange muẽle.” (Olong. 6:17-22) Anga hẽ ulandu Gideone a pita lawo u lekisa okuti, wa tepa ukamba waye la Yehova? Sio, ka tepele ukamba waye! Momo, wa kuata ombembua la Yehova. Tua kũlĩha ulandu waco, momo pocitumãlo Gideone a tungila utala waco pa tukuiwa hati: “Yehova eye Salom,” ci lomboloka okuti, “Yehova Ukuambembua.” (Tanga Olonganji 6:23, 24.) Eci tu ­sokolola ovina Yehova a siata oku tu lingila oloneke viosi, tu limbuka okuti, eye Ekamba liocili. Oku likutilila ku Yehova olonjanja viosi, ci vokiya ombembua yetu, kuenda ci pamisa ukamba wetu laye.

10. Ndomo ca lomboluiwa Vosamo 15:3, 5, nye Yehova a yongola kokuetu oco tu kale akamba vaye?

¹⁰ Nda tu yongola okuti Yehova o kala ekamba lietu, tu sukila oku pokola kolonumbi vimue. Vocisungo Daviti a imba Vosamo 15, wa tukula ovina tu sukila oku linga, oco tu kale vonjo ya Yehova okuti tu linga akamba vaye. (Osa. 15:1)2 Cilo, tu konomuisi atosi avali ndeci: Oku yuvula olombonde, kuenda oku kala vakuacili. Catiamẽla kovina evi, Daviti wa tukula omunu o pondola oku kala vonjo ya Yehova hati: ‘Ka endisa olombonde lelimi liaye, kuenda ka tambula ovitukiko.’—Osa. 15:3, 5.

11. Momo lie tu sukilila oku yuvula oku lingila olombonde vakuetu?

¹¹ Vosamo yikuavo, Daviti wa lungula hati: “Lava elimi liove kevĩho.” (Osa. 34:13) Nda ka tua pokuile kalungulo aco, tu nyõla ukamba wetu la Isietu wokilu. Satana unyãli wa velapo wa Yehova, eye wa siata oku linga olombonde. Kelimi lio Helasi ondaka “Eliapu,” yi lomboloka “ukualombonde.” Nda tua lavulula ovina tu popia viatiamẽla ku vakuetu, kuenda ndomo tu vi popia, ci pamisa ukamba wetu la Yehova. Tu sukila oku lavulula poku popia eci catiamẽla ku vamanji va nõliwa oco va songuile ekongelo.—Tanga Va Heveru 13:17; Yuda 8.

12, 13. (a)Momo lie tu sukilila oku kala vakuacili kovina viosi? (b) Onima yipi yi tunda koku kala vakuacili?

¹² Afendeli va Yehova va kũlĩhĩwa okuti, omanu vamue vakuacili. Upostolo Paulu wa soneha ndoco: “Tu pinga okuti vu tu likutililako, momo tua kolela okuti, tu kuete utima wa pua episo, momo tu yongola oku kala vakuacili kovina viosi.” (Va Hev. 13:18, NW) Omo okuti tu yongola “oku kala vakuacili kovina viosi,” tu yuvuli oku kemba vamanjetu. Nda vamanji vamue va talavaya kupange wetu woku sanda eteku, tu sukila oku va tata ciwa, kuenda oku va feta olombongo tua sokiya. Omo okuti Tulombangi Via Yehova, tu sukila oku kala vakuacili la vana va talavaya letu, kuenda lomanu vakuavo. Nda tu talavaya kupange wa manji umue, tu sukila oku lekisa esumbilo kokuaye, kuenda oku yuvula oku tatiwa lonjila yimue ya velapo okuti, vakuetu ci sule.

¹³ Olonjanja vimue, tua siata oku yeva omanu voluali va pandiya Olombangi Via Yehova omo lioku kala vakuacili! Usongui wocisoko cupange umue woku tunga olonjo, eci a limbuka okuti Olombangi Via Yehova vakuacili, wa popia hati: “Wa siati oku tẽlisa olohuminyo viene.” (Osa. 15:4) Ocituwa caco, ci tu kuatisa oku amamako lukamba wetu la Yehova Isietu wo kilu, kuenda oku eca esivayo Kokuaye.

14, 15. Tu pondola ndati oku kuatisa omanu kupange woku kunda, oco va linge akamba va Yehova?

¹⁴ Ndaño omanu valua va tava okuti kuli Suku, pole, vamue tua siata oku kundila olondaka viwa, ka va tava okuti, eye Ekamba lia velapo. Tu pondola oku va kuatisa ndati? Kũlĩhĩsa olonumbi Yesu a eca kueci ci soka 70 kolondonge viaye, eci a vi tuma oku enda kupange woku kunda vivali vivali. Eye wa popia hati: “Eci wiñili vonjo yimue, tete popi hoti: ‘Ombembua yi kale vonjo yilo.’ Nda omunu wa sangi o sole ombembua, ombembua yene yi kala laye, pole, nda ka sole ombembua, yi tiukila kokuene.” (Luka 10:5, 6) Tu pondola oku kuatisa omanu oku lilongisa Embimbiliya, poku linga lavo ukamba. Nda tua lekisa ovituwa viwa komanu vana va tu ­lambalala, ci va kuatisa oku tulumuha, kuenje, eci tu tiuka onjanja yikuavo, pamue va tava oku tu yevelela.

¹⁵ Nda tua sanga omanu vana okuti va kakatela ketavo liavo, ale va kapako ovihilahila viatavo avo, tu sukila oku amamako oku lekisa ukamba, kuenda ombembua kokuavo. Tu sukilavo oku yolela omanu vosi veya kolohongele vietu, ca piãla enene vana va sumua omo liovitangi violuali lulo okuti, va yongola oku lilongisa catiamẽla ku Suku tu kasi oku fendela. Ovipama losapi hati: “Embimbiliya li Pongolola Omuenyo Womanu,” via siata oku kuatisa valua oku linga apongoloko komuenyo wavo.

16. Tu pondola ndati oku kala akamba va Yehova, kuenda ‘olondingupange’ viaye?

¹⁶ Omanu vana va talavayela kumosi, va siata oku kuata ukamba wocili. Afendeli vosi va litumbika ku Yehova, va kuete esumũlũho lioku kala akamba vaye, kuenda ‘olondingupange’ viaye. (Tanga 1 Va Korindo 3:9.) Osimbu tu amamako oku kundila omanu loku va longisa oco va linge olondonge, tu lilongisa ovituwa vialua viwa via Isietu wokilu. Kuenje, tu limbuka ndomo espiritu liaye li tu kuatisa oku kunda olondaka viwa.

17. Okulia kuespiritu tua siata oku tambula kolohongele vietu vimbo levi viofeka, ku eca ndati uvangi wokuti, Yehova eye Ekamba lietu?

¹⁷ Osimbu tu amamako oku pesila otembo yalua kupange woku kunda, tu limbuka okuti, ukamba wetu la Yehova u li vokiya. Kuenje, tu limbuka ndomo Yehova a kasi oku tateka ovanyãli va yongola oku imũla upange woku kunda. Nda tua sokolola otembo ya pita, tu limbuka ndomo Yehova a kasi oku tu songuila, kuenda tu komõha ndomo a siata oku tu ĩha okulia kuespiritu lekuatiso liolohongele, kuenda alivulu. Kolohongele viofeka levi vimbo, tua siata oku limbuka okuti, Yehova Isietu ukuacisola, wa kũlĩha ovitangi vietu, kuenda ovina tu sukila. Noke liohongele yimue yofeka, epata limue lia soneha ndoco: “Ovipama viohongele, via pamisa ekolelo lietu. Tua limbuka ndomo Yehova a sole omunu lomunu pokati ketu, kuenda o yongola okuti, tu kuata ekalo liwa.” Manji umue lukãi waye, eci va endele kohongele yimue yofeka okuti va tunda kofeka yo Alemanya, noke yoku enda kohongele yofeka ya lingiwila ko Irlanda, va eca olopandu omo lioku va yolela kuenda oku va tata ciwa. Ovo va popiavo vati: “Tu ecavo olopandu ku Yehova, kuenda ku Soma Yesu Kristu. Momo, va tu laleka, oco tu likuate omunga lomanu vosi. Tua sapelavo ovina viatiamẽla kelitokeko tu likuetele eteke leteke. Ovolandu tua kuata kohongele yofeka ya lingiwila ko Dublin, a ka tu ivaluisa esumũlũho tu kuete lioku fendelela kumosi Suku yetu kumue lene.”

18. Nye tu sukila oku lipula catiamẽla koku sapela la Yehova?

¹⁸ Omanu va kuata lika ukamba, nda va kuete ocituwa coku sapela. Koloneke vilo, omo okuti uloño wa li vokiya calua, omanu va siata oku sapela lekuatiso lio Internet, kuenda ovikanda. Anga hẽ ovina viaco vi sokisiwa loku sapela la Yehova okuti eye Ekamba lietu lia velapo? Yehova ‘ukuakuyevelela olohutililo.’ (Osa. 65:2) Tu pondola ndati oku sokiya otembo yoku sapela laye?

19. Nda tua limbuka okuti ka ca lelukile oku sapuila ku Yehova ovisimĩlo vietu volohutililo, nye ci pondola oku tu kuatisa?

¹⁹ Ka ca lelukile kafendeli vamue va Yehova oku lianja, oco va lombolole ovina vi kasi vutima wavo. Pole, Yehova o yongola okuti, poku likutilila tu situlula ovisimĩlo vi kasi vutima wetu. (Osa. 119:145; Asiõ. 3:41) Nda tua limbuka okuti ka ca lelukile oku sanga olondaka vioku situlula ovisimĩlo vietu, tu kuete ekuatiso. Paulu wa sonehela Akristão vo ko Roma hati: ‘Ka tua kũlĩhĩle ovina tu pinga volohutililo vietu, ale vievi tu sukila, puãi espiritu li tu livondelelako lovina ka vi popiwa. U o konomuisa ovitima viomanu, wa kũlĩha ovisimĩlo vietu, momo espiritu li pingilako olosandu ndeci Suku a yongola.’ (Va Rom. 8:26, 27) Nda tua sokolola olondaka vi sangiwa kelivulu lia Yovi, leli Liolosamo, kuenda Liolosapo, tu kuata ovisimĩlo vi tu kuatisa oku lombolola ku Yehova ovina vi kasi vutima wetu.

20, 21. Elembeleko lipi tu sanga volondaka via Paulu kelivulu lia Va Filipoi 4:6, 7?

²⁰ Eci tu liyaka lovitangi, tu sukila oku sokolola olondaka upostolo Paulu a sonehela vamanji vo ko Filipoi, poku popia hati: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene.” Nda tua kuama onjila yaco poku likutilila ku Yehova, tu kuatisiwa. Paulu wa amisako hati: “Ombembua ya Suku, yina ya piãla olondunge viosi, yi lava ovitima viene lovisimĩlo viene vu Kristu Yesu.” (Va Fil. 4:6, 7) Omo liaco, tu sukila oku eca olopandu omo ‘liombembua ya Suku,’ yi lava ovitima vietu, kuenda ovisimĩlo vietu.

²¹ Olohutililo vi tu kuatisa oku kuata ukamba la Yehova. Omo liaco, tu kuati ‘ocituwa coku likutilila’ olonjanja viosi. (1 Va Tes. 5:17) Tu yongola okuti, ocipama cilo ci pamisa ukamba wetu la Yehova Suku, kuenda oku pokola kolonumbi viaye viesunga. Tu sokiyi otembo yoku sokolola asumũlũho tua siata oku tambula, momo, Yehova Suku Isietu, eye Ekamba lietu.