1. Ocina cipi ci kuete esilivilo lia velapo vefendelo lietu?

ANGA hẽ wa muile ale onduko Yehova ya sonehiwa vocimano cosapalalo yimue, ale vovikuata vi kasi vonjo yoku seleka ovina viosimbu? Nda wa muile onduko Yehova povitumãlo viaco, citava okuti, o komõha. Kokuetu Tulombangi Via Yehova, onduko ya Suku yi kuete esilivilo lia velapo vefendelo lietu! Voluali luosi, ka kuli omanu vakuavo va tukuiwa londuko ya Suku. Pole, tua kũlĩha okuti, voku tukuiwa londuko yaco, mua kongela ovina vialua.

2. Ovina vipi via kongeliwa vesumũlũho lietu lioku tukuiwa londuko ya Suku?

² Oco tu taviwe la Yehova, ka tu sukila lika oku tukula onduko yaye. Pole, tu sukila oku ambata omuenyo u litava lolonumbi viaye. Eli olio esunga lieci Embimbiliya li vetiyila afendeli va Yehova okuti, va sukila oku ‘tunda kevĩho.’ (Osa. 34:14) Upostolo Paulu wa tukula onumbi yaco eci a soneha ndoco: “Wosi o tukula onduko ya [Yehova] a litepe levĩho.” (Tanga 2 Timoteo 2:19.) Omo okuti Tulombangi Via Yehova, tua kũlĩhĩwa londuko yaye. Pole, tu litepa ndati levĩho?

3, 4. Olondaka vipi viovisonehua via siata oku kapa vatatahãi omanu valua vakuakukonomuisa Embimbiliya, kuenda momo lie?

³ Konomuisa olondaka via Paulu vi sangiwa vukanda 2 Timoteo 2:19, vi tukula “ociseveto ca Suku ca sevetiwa ciwa,” kuenda asapulo avali a sonehiwamo. Esapulo liatete liopiwa kelivulu Liatendelo 16:5 li lekisa okuti, “Yehova [wa kũlĩha] ava vatiamẽla kokuaye.” (Tala vocipama catete.) Esapulo liavali liokuti, “Wosi o tukula onduko ya [Yehova] a litepe levĩho,” lia siata oku kapa vatatahãi omanu valua vakuakukonomuisa Embimbiliya. Momo lie?

⁴ Olondaka via Paulu vi lekisa okuti, viopiwa Vovisonehua vikuavo. Pole, vi molẽha ndu okuti, ka kuli ocinimbu lacimue Covisonehua vio Heveru ci likuata lolondaka Paulu a tukula. Nye Paulu a lombolola poku popia hati: “Wosi o tukula onduko ya [Yehova] a litepe levĩho”? Ocili okuti, olondaka Paulu a tukula, viopiwa kelivulu Liatendelo kocipama 16, kuna ku lombolola ulandu wesino Kora a lekisa. Anga hẽ, esapulo liavali li tiamisiwilavo kulandu waco wesino?

5-7. Ovolandu o koloneke via Mose a kuete elitokeko lipi lolondaka Paulu a tukula vukanda 2 Timoteo 2:19? (Tala elitalatu kefetikilo liocipama cilo.)

⁵ Embimbiliya li popia okuti, omãla va Eliyava ndeci, Datana la Avirama, va li kongelelevo ku Kora, oco va lingile usuanji Mose la Arone. (Ate. 16:1-5) Ovo ka va lekisile esumbilo ku Mose, kuenda ka va tavele komoko yaye yoku songola Suku a ecele kokuaye. Omo okuti omanu vaco va amamako oku kala pokati kafendeli va Yehova, va kapele kohele ekolelo lia vana va lekisile epokolo. Eci lia pitĩlapo eteke Yehova a linga etepiso pokati kafendeli vaye vakuekolelo, kuenda vakuesino, wa ecele kokuavo onumbi yimue.

⁶ Ulandu waco u popia ndoco: “Yehova wa kumbulula Mose hati: ‘Sapuila omanu huti, “Tundi kombalaka ya Kora la Datana kuenda Avirama!’” Oco Mose wa votoka, wa enda ku Datana la Avirama, kuenje akulu va va Isareli vo kuama. Wa popia lomanu hati: ‘Avoyo, tundi kolombalaka viomanu ava vakuakandu. Ko ka lambi cimue cavo, sanga wu nyõlẽha lovakandu avo osi.’ Oco va tunda kombalaka ya Kora la Datana kuenda Avirama. Kuenje Datana la Avirama va tunda.” (Ate. 16:23-27) Noke, Yehova wa ponda omanu vosi va lekisa esino. Pole, afendeli vaye vakuekolelo va litepele kevĩho, va popeliwa.

⁷ Ocili okuti, Yehova o lete ovina vi kasi vovitima viomanu! Eye wa kũlĩha vakuekolelo vatiamẽla kokuaye. Pole, omanu vaco vakuekolelo, va sukila oku lekisa utõi oco va litepe la vakuevĩho. Citava okuti, olondaka Paulu a tukula, wa vi tiamisila kulandu u sangiwa kelivulu Liatendelo 16:5, 23-27, eci a soneha ndoco: “Wosi o tukula onduko ya [Yehova] a litepe levĩho.” Elomboloko liaco, li kuete elitokeko lolondaka Paulu a popia hati: “Yehova [wa kũlĩha] ava vatiamẽla kokuaye.”—2 Tim. 2:19.

8. Momo lie oku tukula onduko Yehova, ale oku tiamẽla vekongelo Liakristão vocili hacoko ci kuete esilivilo lia velapo?

⁸ Paulu wa tukula ovolandu a pita koloneke via Mose, poku ivaluisa Timoteo, oco a kuate utõi woku teyuila ukamba waye la Yehova. Ndeci ca pita koloneke via Mose okuti oku tukula lika onduko Yehova hacoko ocina ca velelepo, cimuamue haico ca pita kocita catete okuti, oku tiamẽla lika vekongelo Liakristão hacoko ocina ca kuatele esilivilo lia velapo. Omo liaco, afendeli vosi va Yehova, va  sukila oku ‘litepa levĩho.’ Olondaka evi via kuata elomboloko lie ku Timoteo? Ovina vipi afendeli va Yehova koloneke vilo va pondola oku lilongisa kelungulo lia Paulu?

9. ‘Olombangulo violonamalãla viuveke’ via nyõla ndati ekongelo liatete Liakristão?

⁹ Vondaka ya Suku mu sangiwa elungulo liatiamẽla kevĩho Akristão vocili va sukila oku yuvula. Vukanda 2 Timoteo 2:19, tu sangamo elungulo Paulu a sapuila Timoteo hati, ka ca sungulukile ‘oku liyenja lolondaka,’ kuenje, wo vetiya oku “yuvula olombangulo vietombo.” (Tanga 2 Timoteo 2:14, 16, 23.) Vekongelo mua kala omanu vamue va enda oku longisa alongiso olonanguluke. Mua kalavo omanu vakuavo va enda oku longisa ovina vi koka olonamalãla. Ndaño alongiso aco a kala ndu okuti ka a pisiwa Lembimbiliya, pole, a nenele olonepele vekongelo. Noke, omanu va fetika oku liyenja lolondaka, kuenje, ca honguisa ekolelo liavo. Omo liaco, Paulu wa lombolola esilivilo lieci tu sukilila oku yuvula ‘olombangulo violonamalãla viuveke.’

10. Nye tu sukila oku linga eci tu liyaka lunanguluke?

¹⁰ Koloneke vilo, afendeli va Yehova ka va siatele oku liyaka calua locitangi cunanguluke vekongelo. Pole, nda tua fetika oku tiamisila utima wetu kalongiso ka a sangiwa Vembimbiliya, tu sukila oku kuata utõi woku a yuvula lonjanga. Ka ca sungulukile oku pesila otembo yetu koku vangula lolonanguluke ndeci: Oku sapela laye, oku tambulula ovikanda viaye vo Internet, ale lonjila yikuavo yoku sapela. Ndaño poku sapela lomunu waco tu ci linga lonjongole yoku u kuatisa, pole, oku sapela laye ci lekisa okuti, ka tu kasi oku pokola kolonumbi Viembimbiliya tua konomuisa. Omo okuti tuafendeli va Yehova, tu sukila oku yuvula ukamba lolonanguluke.

11. Nye ci pondola oku koka ‘ombangulo yuveke’? Akulu vekongelo va pondola ndati oku lekisa ongangu yiwa?

¹¹ Ndaño okuti kuli unanguluke, pole, kulivo ovina vikuavo vi nyõla ombembua vekongelo. Ocili okuti, ovisimĩlo via litepa viatiamẽla kovitalukilo, vi koka ‘olombangulo violonamalãla viuveke.’ Nda umue o vetiya ovitalukilo vi pisiwa lolonumbi via Yehova, akulu vekongelo, ka va ka ecelele ocituwa caye loku sima okuti, nda wa lunguiwa ci nena onjuela. (Osa. 11:5; Va Efe. 5:3-5) Pole, akulu vekongelo va sukila oku lavulula oco va yuvule oku eca ovisimĩlo viavo muẽle. Ovo va pokola kelungulo lia eciwa kakulu vekongelo kosimbu li popia hati: “Lavi ocunda ca Suku co kundikilui,. . . Haloku tulamelako ava va kundikiwa kokuene, te oku eca ongangu kocunda”—1 Pet. 5:2, 3; tanga 2 Va Korindo 1:24.

12, 13. (a) Ocituwa cipi Olombangi Via Yehova vi sukila oku lekisa poku nõla ovitalukilo, kuenda onumbi yipi Yembimbiliya via kapako? (b) Olonumbi via lomboluiwa pocinimbu 12, vi tiamisiwila ndati kovina via litepa omunu a yongola oku linga?

¹² Catiamẽla kovitalukilo, ocisoko ca Yehova ka ci tukula olofilme, olovideo violomapalo, alivulu, ale ovisungo, oco tu nõle evi tu sukila oku yuvula. Momo lie? Momo, Embimbiliya li tu vetiya okuti, omunu lomunu o sukila oku pindisa olondunge viaye oco a ‘tẽle oku tepisa pokati keci ciwa leci cĩvi.’ (Va Hev. 5:14) Ovisonehua vi eca olonumbi vi pondola oku kuatisa Ukristão oku nõla ovitalukilo viwa. Kovina viosi tu linga, kuenda ovimãho vietu, tu sukila oku “kũlĩhĩsa ovina vi sanjuisa Ñala.” (Va Efe. 5:10) Embimbiliya lilongisa okuti, ulume o kuete omoko yoku nõla olomapalo vi lingiwa konjo. * —1 Va Kor. 11:3; Va Efe. 6:1-4.

 ¹³ Olonumbi Viembimbiliya via tukuiwa vocipama cilo, ka vi tiamisiwila lika kovitalukilo tu yongola oku nõla. Ovisimĩlo viatiamẽla koku wala loku li posuisa, kuhayele, kovikulia, kuenda kovina vikuavo, via siatavo oku nena olonamalãla pokati komanu. Nda ka kuli onumbi yimue Yembimbiliya yi kasi oku lueyiwa, afendeli va Yehova va sukila oku yuvula oku lihoyisa pokati catiamẽla kovina viaco, momo, “oku yaka ka kua sungulukilile ukuenje wa Ñala, te oku omboka [lomanu] vosi.”—2 Tim. 2:24.

14. Ocindekaise cipi upostolo Paulu a linga ci tu kuatisa oku yuvula akamba vavĩ?

¹⁴ Vana va ‘tukuiwa londuko ya Yehova va sukila oku litepa ndati levĩho’? Va ci linga poku yuvula oku kuata ukamba lomanu va siata oku linga ovina via vĩha. Eli olio esunga lieci Paulu a lingila ocindekaise ‘cociseveto ca pama ca Suku,’ locindekaise cikuavo. Eye wa soneha ovina viatiamẽla ‘konjo yimue yinene,’ “ka muli lika ovikuata viulu levi viopalata, puãi mulivo evi viuti levi viotuma, vikuavo vietepo, vikuavo viesepu.” (2 Tim. 2:20, 21) Paulu wa vetiyavo Akristão oco va ‘liyelise’ kevĩho, ale oku yuvula ovikuata “viesepu.”

15, 16. Nye tu pondola oku lilongisa kocindekaise “conjo yinene”?

¹⁵ Ocindekaise upostolo Paulu a tukula ci lomboloka nye? Eye wa sokisa ekongelo Liakristão ‘lonjo yimue yinene,’ kuenda omunu lomunu vekongelo ‘lovikuata’ vio vonjo. Pole, citava okuti ovikuata vionjo vi kuatiwa leliño li kapa kohele uhayele womanu. Nda kua molẽha ocitangi caco, muẽle yonjo yaco o sukila oku tepa ovikuata via liña levi via yela oku kongelamo vina a siata oku telekela ovikulia.

¹⁶ Cimuamue haico ca siata oku pita koloneke vilo okuti, oco afendeli va Yehova va kuate omuenyo umue uwa, va sukila oku yuvula oku kuata ukamba lomanu vana ka va pokola kolonumbi via Yehova. (Tanga 1 Va Korindo 15:33.) Ocili okuti, nda tu yuvula ukamba lomanu vamue vekongelo, tu sukilavo  oku ‘tepa’ ukamba lomanu vana ka va fendela Yehova. Momo, vamue pokati kavo ‘vakuakusola olombongo, va siñaila olonjali viavo, ka va kuete efendelo, vakualundi, olongangala, ka va sole eci ciwa, haivo olomakuli, vakuepela, vakuakusola ca lua esanju, Suku ci sule!’ —2 Tim. 3:1-5.

17. Va Isareli vakuepokolo va lekisa ndati utõi oco va litepe levĩho?

¹⁷ Embimbiliya li lombolola utõi va Isareli va lekisa eci Yehova a popia hati: “Tundi kombalaka ya Kora la Datana kuenda Avirama”. Ulandu waco wa popia hati: “Va tunda kombalaka.” (Ate. 16:24, 27) Omo liaco, ka va kuatele atatahãi oku tava kelungulo va tambula. Ovisonehua vi lombololavo utõi va lekisa poku pokola kelungulo liaco. Kuenje, ‘va tunda vombalaka yaco.’ Va Isareli vana vakuepokolo, ka va kalele kohele yoku kunduiwa. Momo va lekisile epokolo kovina viosi. Ovo, va nõlelepo oku pokola ku Yehova, kuenje, va yuvula evĩho. Nye tu lilongisa kulandu waco?

18. Nye Paulu a yonguile oku popia eci a vetiya Timoteo lolondaka viokuti, “yuvula oloñeyi viamalẽhe”?

¹⁸ Oco tu teyuile ukamba wetu la Yehova, tu sukila oku nõlapo lonjanga oku linga eci ca sunguluka. Eli olio esunga lieci Paulu a vetiyila Timoteo lolondaka viokuti: “Yuvula oloñeyi viamalẽhe.” (2 Tim. 2:22) Omo okuti kotembo yaco Timoteo wa kala ale ukulu, citava okuti wa kuatele 30 kanyamo. Pole, akulu va pondolavo oku yapuisiwa luveke ‘woloñeyi viamalẽhe.’ Omo liaco, eci Timoteo a liyaka loloñeyi viaco wa vi “yuvula.” Momo, wa sukilile oku ‘litepa levĩho.’ Yesu wa tukulavo esapulo limuamue eci a popia hati: “Nda iso liove li ku lingila ocilondokua li tofolamo, [kuenda] li inasi.” (Mat. 18:9) Koloneke vilo, Akristão vana va pokola kelungulo liaco, oco va teyuile ukamba wavo la Yehova, va sukila oku ci linga lonjanga kuenda lutõi.

19. Nye vamanji vamue va siata oku linga, oco va li teyuile kovina vi kapa kohele ukamba wavo la Yehova?

¹⁹ Vamanji vamue okuti osimbu ka va lingile Olombangi Via Yehova va liyakele locitangi cuholua, va nõlapo onjila yoku yuvula oku nyua ovina viosi vi koluisa. Vakuavo va siata oku yuvula ovitalukilo vimue okuti, ndaño ka vi pisiwa lolonumbi Viembimbiliya, pole, vi pondola oku va vetiya oku kuata oloñeyi vĩvi. (Osa. 101:3) Manji umue osimbu ka lingile Ombangi ya Yehova wa solele calua oku piluka kovipito vimue okuti, omanu vaco va kuatele ovituwa via vĩha. Pole, noke yoku lilongisa ocili, wa fetika oku yuvula oku piluka, ndaño ceci Olombangi Via Yehova vi linga olomapalo vimue. Momo, wa kuatele ohele yokuti, nda wa piluka, o vetiyiwa loloñeyi vĩvi a kuatele kosimbu. Ocili okuti, Akristão vocili ka va kisikiwa oku yuvula ovina vi koluisa, oku piluka, ale ovina vikuavo ka vi pisiwa Lembimbiliya. Omo liaco, vosi yetu tu sukila oku likolisilako oco tu li teyuile kovina vi kapa kohele ukamba wetu la Yehova.

20. Ndaño okuti ka ca lelukile oku “litepa levĩho,” nye ci tu ĩha ekolelo, kuenda elembeleko?

²⁰ Ocili okuti, voku tukuiwa londuko ya Suku, mua kongela ovina vialua. Tu sukila oku “litepa levĩho,” kuenda ‘oku yuvula ovina vĩvi.’ (Osa. 34:14) Ndaño okuti ka ca lelukile oku ci linga, pole, tu sanjuka calua poku limbuka okuti, Yehova o sole ‘vana vatiamẽla kokuaye,’ kuenda vana va lekisa epokolo kolonjila viaye viesunga.—2 Tim. 2:19; tanga 2 Asapulo 16:9a.