MANJI umue o tukuiwa hati KATHERINE, wa kulila kofeka yo Estados Unidos wa papatisiwa eci a tẽlisa 16 kanyamo, kuenje, wa linga Ombangi ya Yehova. Ndaño wa likolisilako calua kupange woku kunda, pole, vocikanjo caco ka sangelemo omanu va lekisa onjongole kesapulo Liusoma. Eye wa popia hati: “Nda tanga ovolandu atiamẽla komanu va likutilila ku Yehova Suku oco a tume omunu umue u kuatisa oku lilongisa eci catiamẽla kokuaye. Omo liaco, nda yonguilevo oku sanga omunu umue wa likutilila oco ndu kuatise, pole, sio sangele.”

Noke lioku kundila vocikanjo caco vokuenda kuanyamo alua, manji Katherine wa sokolola oku ilukila kocikanjo cikuavo kuli omanu va lekisa onjongole kesapulo Liusoma. Kuenje, wa lipula nda wa kuatele epondolo lioku ci linga. Onjanja yimue eci a kala ocipãla lepata liaye vokuenda kuolosemana vivali, wa kuatele ongeva yalua. Omo okuti wa yonguile oku kuatisa omanu oco va kũlĩhe Yehova, wa yula ocitangi caco. Noke lioku konomuisa ovikanjo muna a yonguile oku ilukila, wa sonehela ko Betele Yolombangi via Yehova vofeka yo Guam, kuenje, wa tambula olonumbi a sukilile. Kosãi Yevambi Linene ku nyamo wo 2007, eci manji Katherine a tẽlisa 26 kanyamo, wa ilukila kofeka yo Saipã, vocifuka co Pasifiku ocinãla ci soka 10.000 kolokilometulu la kuna a kala. Ulandu upi a pita lawo?

Eci manji Katherine a pitĩla kocikanjo cokaliye, wa kundila ukãi umue o tukuiwa hati, Doris wa kuata ci pitahãla 40 kanyamo, kuenje, wa tava oku lilongisa Embimbiliya. Eci manji Katherine a mala oku longisa ukãi waco ovipama vitatu vielivulu Embimbiliya Lilongisa Nye?, wa kuata esakalalo. Eye wa popia hati: “Doris wa kala ondonge yimue yiwa, kuenda sia yonguile okuti o liwekapo oku lilongisa. Sia la longisa Embimbiliya komunu umue olonjanja vialua ndeci ca pita la Doris. Momo, noke liotembo yimue, nda limbuka okuti, wa sukilile oku longisiwa la manji umue wa loñoloha calua okuti ame ci sule, haeye o kuete anyamo amuamue la Doris. Omo liaco, manji Katherine wa likutilila ku Yehova oco o kuatise oku sanga manji umue o pondola oku longisa Embimbiliya kondonge yaye. Kuenje, wa sapuila Doris hati, o ka lilongisa Embimbiliya la manji ukuavo.

Manji Katherine wa lombolola hati “osimbu sia popele ondaka yaco,” “Doris wa popia lame okuti o yongola oku ndi sapuila ocitangi cimue. Noke yoku u yevelela, ndo sapuila ndomo Yehova a ndi kuatisa oku liyaka lovitangi ndevi. Eye wa eca olopandu kokuange.” Kuenje Doris wa sapuila manji Katherine hati: “Yehova wa ku tuma oco o ndi kuatise. Keteke liatete weyile konjo yange, wa ndi sanga okuti, nda kala oku tanga Embimbiliya liange vokuenda kuolowola vialua.  Nda kala oku pinga ku Suku loku lila okuti o tuma omunu umue oco a ndi kuatise oku kuata elomboloko Liembimbiliya. Noke ove wa totola kepito liange. Yehova wa tambulula olohutililo viange!” Osimbu Doris a kala oku lombolola ulandu waye, manji Katherine wa fetika oku lila. Eye wa popia hati: “Olondaka via Doris via kala limue pokati ketambululo liolohutililo viange. Yehova wa lekisa okuti ndi kuete epondolo lioku amamako lelilongiso Liembimbiliya.”

Doris wa papatisiwa kunyamo wo 2010, cilo o kasi oku longisa Embimbiliya komanu valua. Manji Katherine wa lombolola hati: “Ndi kuete esanju lialua omo okuti, onjongole yange yosimbu yoku kuatisa omunu ukuotima wa sunguluka oco a linge ufendeli wa Yehova, ya tẽlisiwa!” Cilo, manji Katherine o kuete esanju omo lioku kala ukundi olikasi kofeka yo Kosrai kocifuka co Pasifiku.

Valua pokati ka vamanji va kasi kolofeka vikuavo va kuete (oku upisa kueci ci soka 19 toke 79 kanyamo), va siata oku kundila vocikanjo cofeka yo Mikronesia muli ekambo liakundi Vusoma. Manji Erica wa kuata 19 kanyamo, eci a ilukila kofeka yo Guam kunyamo wo 2006, wa lombolola eci catiamẽla kombili vamanji vaco va lekisa. Eye wa popia hati: “Ciwa oku kundila vocikanjo muna omanu va lekisa onjongole. Ndi pandula Yehova omo a ndi kuatisa oku linga upange waco. Eyi oyo onjila ya velapo komuenyo!” Cilo, manji Erica o kuete esanju lioku kala ukundi olikasi vocifuka co Ebeye ci panga onepa kovifuka vio Marshall. Ocili okuti, ka ca lelukile oku kundila kofeka yikuavo. Tu konomuisi ovitangi vitatu vamanji va liyaka lavio eci va ilukila kofeka yo Mikronesia, oco tu limbuke ndomo va tẽla oku vi yula.

Ekalo liomuenyo. Noke lioku pitĩla vocifuka co Palau kunyamo wo 2007, eci manji Simon a tẽlisa 22 kanyamo, wa limbuka okuti wa laikele oku tambula olombongo vitito okuti vina a enda oku tambula vofeka yaye ko Inglaterra vi sule. Eye wa popia hati: “Nda lilongisa oku yuvula oku landa ovina si sukila. Cilo nda siata oku nõla lutate okulia ndi yongola oku landa loku kũlĩhĩsa ondando yovina viaco okuti vi kuete esilivilo kokuange. Nda vocikuata cimue mua nyõleha onepa yimue, ndi landa yikuavo okuti ondando yaco ka ya tĩlile calua, kuenje, ndi sandiliya umue o ndi kuatisa oku semulula ocikuata caco.” Oku kuata omuenyo wa leluka ca kuatisa ndati manji Simon? Eye wa popia hati: “Oku kuama onjila ya tukuiwa ndeti, ca ndi kuatisa oku kũlĩhĩsa lutate ovina ndi sukila kuenda ndomo ndi pondola oku litekula lolombongo vitito ndi kuete. Nda limbuka okuti Yehova wa siata oku ndi tata ciwa olonjanja viosi. Vokuenda kuanyamo epanduvali nda kala kofeka yaco nda kuata okulia kuenda ocitumãlo coku pekela.” Ocili okuti Yehova o kuatisa afendeli vaye va leluisa omuenyo wavo, momo va yongola oku pitisa kovaso Usoma waye.—Mat. 6:32, 33.

Ongeva. Manji Erica wa popia hati: “Omo okuti ndi kasi ocipepi lepata liange, nda simĩle okuti omo liongeva si pondola oku tẽlisa upange wange woku kunda.” Nye a linga oco a li pongiye? Eye wa popia hati: “Osimbu sia ilukile, nda tanga ovipama Viutala Wondavululi viatiamẽla kongeva. Ovipama viaco via ndi kuatisa oku yula ongeva. Ocipama cimue ca lombolola ndomo onjali yimue ya vetiya omõlaye ufeko  catiamẽla kekuatiso lia Yehova poku u sapuila hati: ‘Yehova o pondola oku eca kokuove ekuatiso lia velapo okuti, ekuatiso liange ci sule.’ Olondaka viaco via ndi vetiya ca lua.” Manji Hannah kumue lulume waye Patrick va kasi ko Majuro oku kundila kocifuka co Marshall. Manji Hannah wa tẽla oku yula ongeva poku tiamisila utima waye ku vamanji va kasi vekongelo liaye. Eye wa popia hati: “Nda siata oku pandula Yehova omo lia vamanji va sangiwa voluali luosi, momo ovo vakuepata liange. Ocili okuti lekuatiso lia Yehova, nda tẽla oku kundila vovikanjo kuli ekambo liakundi.”

Oku linga ukamba. Manji Simon wa popia hati: “Eci omunu a pitĩla vofeka yimue ka kũlĩhĩle, o limbuka okuti, ovina via lua via litepa levi vio kofeka a tunda. Olonjanja vimue, nda siata oku sima okuti, si tẽla oku popia ovina vi koka ovinjola okuti omanu va kuata lonjanga elomboloko liaco.” Manji Erica wa popia hati: “Kefetikilo, nda simĩle okuti sia kapiwileko kuenda ovina viaco via ndi kuatisa oku kũlĩhĩsa esunga lieci nda ilukila kofeka yikuavo. Sia ilukile locimãho coku tẽlisa olonjongole viange, pole, locimãho coku linga ocipango ca Yehova.” Eye wa amisako hati: “Kotembo yaco nda kuata akamba valua.” Manji Simon wa likolisilako oco a lilongise elimi lio Palauan lio kuatisa ‘oku sapela’ la vamanji vo kofeka yaco. (2 Va Kor. 6:13) Alikolisilo aye oku lilongisa elimi likuavo, a sanjuisa vamanji. Ocili okuti, nda vamanji vana va ilukila kofeka yikuavo va kundila kumosi la vamanji va sangiwa kofeka yaco, va kuata esanju kuenda ukamba vekongelo. Asumũlũho api akuavo vana va lieca olumue lioku kundila vovikanjo vina muli ekambo liakundi Vusoma va siata oku kuata?

Upostolo Paulu wa popia hati: “U o kũla calua, ungulavo ca lua” (2 Va Kor. 9:6) Olondaka via tukuiwa ndeti vi tiamisiwila ku vamanji vana va yongola oku vokiya upange wavo woku kunda. Asumũlũho api vamanji ‘vongula’ kofeka yo Mikronesia?

Kofeka yo Mikronesia kuli epuluvi lioku longisa Embimbiliya komanu valua kuenda oku mola ndomo vana va longisiwa va kapako olonumbi viaco loku pamisa ukamba wavo la Yehova. Manji Patrick kumue lukãi waye Hannah, va kundilavo vocifuka co Angaur, mu sangiwa 320 komanu. Noke yoku kundilamo vokuenda kuolosãi vivali, va lisanga lukãi umue o tekula omãla likaliaye. Noke, wa tava lonjanga oku lilongisa Embimbiliya, kuenje, wa linga apongoloko komuenyo waye. Manji Hannah wa popia hati: “Noke lioku longisa olonjanja vialua ukãi waco, tua sia olosikaleta vietu konjo yaye. Kuenje tua li vanja, noke tua popia tuti: ‘Tua pandula a Yehova!’” Manji Hannah wa amisako hati: “Nda kũlĩhĩle okuti Yehova nda wa kokela kokuaye ukãi waco lonjila yimue ya sunguluka. Pole, omo lioku kundila kovikanjo kuli ekambo liakundi Vusoma, tua sanga omanu va sokisiwa lolomeme oco tu va kuatise oku kũlĩha Yehova. Ulandu owu wa tu sanjuisa calua komuenyo wetu!” Manji Erica wa popia hati: “Eci o kuatisa omunu umue oku kũlĩha Yehova, o kuata esanju lialua!”

Kuli olofeka vialua ku sukila akundi Vusoma. Anga hẽ o pondola oku kala umue pokati ka vamanji vana va lieca olumue oco va kundile kovikanjo ku sukila akundi Vusoma? Omo liaco, likutilila ku Yehova oco a ku kuatise oku vokiya ombili yove kupange woku kunda. Sapela lakulu vekongelo catiamẽla konjongole yove, la manji o nyula akongelo, ale la vamanji va kasi oku kundila kovikanjo ku sukila akundi Vusoma. Eci o linga esokiyo liaco, sonehela ko Betele yofeka o kasi loku tukula ocikanjo o yongola oku kundila, oco o tambule olonumbi vikuavo. * Citava okuti o li kongela ku vamanji valua ndeci: Amalẽhe, akulu, vamanji ka va kuelele ale vana va kuele va lieca olumue kupange woku kunda, kuenda oku kuata esanju lioku ‘ungula ca lua.’