1. Momo lie afendeli va Yehova va lavokaila oku tala “ohali ya lua”?

ANGA hẽ, tu komõha poku limbuka okuti, tu lavoka oku liyaka “lohali ya lua” osimbu ka tua tambuile handi onima yomuenyo ko pui? Citava okuti ka tu komõha. Cikale okuti tu kasi otembo yalua vocisoko ca Yehova ale sio, vosi yetu tu pondola oku liyaka lohali ya lua. Momo lie? Momo, tu kasi voluali lua vialiwa la Satana.—Esituluilo 12:12.

2. (a) Omo okuti vosi yetu tua siata oku liyaka lovitangi viekambo lioku lipua, ohali yipi Akristão vocili va siata oku liyaka layo? (Tala elitalatu kefetikilo liocipama cilo.) (b) Helie wa siata oku kokela ohali komanu, kuenda tua ci kũlĩha ndati?

² Omanu vosi ka va lipuile va siata oku liyaka lovitangi komuenyo. Pole, Akristão vocili, va siata oku liyaka lohali yikuavo. (1 Va Korindo 10:13) Yimue pokati kohali yaco, elambalalo, omo lioku nõlapo oku kolela ku Suku. Yesu wa sapuila kolondonge viaye hati: “Ukuenje ka velipo okuti ñala yaye o sule. Nda va fũkĩlisa ame, ene vo fũkĩlisivo.” (Yoano 15:20) Helie wa siata oku koka elambalalo liaco? Satana. Embimbiliya liu tukula hati, o kasi “ndohosi yi koma oku sandiliya u a lia” okuti, afendeli va Yehova. (1 Petulu 5:8) Satana o sandiliya onjila yoku nyõla ekolelo tu kuetele Yehova. Omo liaco, tu konomuisi ovitangi Paulu a liyaka lavio.

3-5. (a) Ohali yipi upostolo Paulu a tala volupale luo Lustra? (b) Olondaka Paulu a tukula viatiamẽla kohali, via pamisa ndati ekolelo lia vamanji?

³ Omo okuti Paulu wa kolelele ku Suku, wa lambalaliwa vokuenda kuotembo ya lua. (2 Va Korindo 11:23-27) Onjanja yimue, eci Paulu a kala volupale luo Lustra, wa sakula ulume umue wa kala ocilema okuti, ka ponduile oku enda. Omo liocikomo a linga, omanu va fetika oku sima okuti, Paulu la Barnaba va kala olosuku. Omo liaco, va pinga komanu oco ka va ka fendeliwe lavo! Pole, eci asongui vetavo lia va Yudea va pitĩla, va fetika oku lundila Paulu la Barnaba ovina vĩvi. Noke, omanu va tava kovohembi aco. Omo liaco, omanu va fetika oku sosola Paulu lovawe, toke eci ambuka.—Ovilinga 14:8-19.

⁴ Eci Paulu la Barnaba va mala oku nyula olupale luo Derbe, “va tiukila ko Lustra lo [ko] Ikoniyu kuenda [ko] Antiokea. Va kolisa ovitima violoñame. Va va vetiya vati: ‘Lameleli ketavo, momo ... tu iñila vusoma wa Suku ... lohali ya lua.’” (Ovilinga 14:21, 22) Ocisimĩlo coku liyaka “lohali ya lua,” ci nena esumuo. Pole, Paulu la Barnaba va tẽla ‘oku kolisa ndati ovitima violoñame’ poku vi sapuila hati, via laikele oku liyaka lohali ya lua?

⁵ Olondaka via Paulu vi eca etambululo liaco. Eye wa popia hati: “Tu iñila vusoma wa Suku ... lohali ya lua.” Paulu ka popele lika hati: “Wosi o pandikisa kohali.” Pole, wa tukula onima yi komõhisa yi ka eciwa komanu vana va amamako oku kolela Suku. Onima yaco hanjoiko. Momo, Yesu wa popia hati: “U o pandikisa toke [kesulilo] eye o popeliwa.”—Mateo 10:22.

6. Omanu vana va pandikisa kohali, va ka tambula onima yipi?

⁶ Nda tua pandikisa kohali, tu ka tambula onima. Akristão olombuavekua, va ka tambula onima yomuenyo ko pui kilu okuti ka va fi vali, kuenda va ka linga olosoma kumue la Yesu. “Olomeme vikuavo” vi ka tambula onima yomuenyo ko pui voluali luombembua palo posi. (Yoano 10:16; 2 Petulu 3:13) Ndopo tu ka liyaka “lohali ya lua.” Omo liaco, tu konomuisa olonjila vivali viohali tu pondola oku liyaka layo.

7. Nye ca kongeliwa velambalalo lio ketimba?

⁷ Yesu wa popele hati: “Vo pakuila kakanga, kuenje vu tipuilua volosunangonga, [wambatiwi] kovaso olonguluvulu lo kovaso olosoma.” (Marko 13:9) Omo liaco, Yesu wa popiavo hati, Akristão vamue vocili va laikele oku liyaka lelambalalo. Olonjanja vimue, elambalalo liaco li  tunda kasongui vatavo esanda, ale kolombiali viopulitika. (Ovilinga 5:27, 28) Sokolola vali ulandu wa Paulu. Anga hẽ, wa kuata usumba omo lielambalalo a pita lalio? Sio, ka kuatele usumba.—Tanga Ovilinga 20:22, 23.

8, 9. Paulu wa lekisa ndati okuti wa nõlelepo oku pandikisa? Koloneke vilo vamanji vamue va siata oku pandikisa ndati kelambalalo?

⁸ Omo okuti Paulu wa liyaka lelambalalo li tunda ku Satana, wa popia hati: “Si tendi omuenyo wange ndocina cimue ci silivila pamue ci mepa. Cimosi lika ndi livela ceci, Oku tẽlisa ocikundi cange loku mala upange nda tambula ku Ñala Yesu, loku imbila uvangi ondaka yiwa yocali ca Suku.” (Ovilinga 20:24) Paulu ka kuatele usumba lelambalalo a liyaka lalio, momo, wa nõlelepo oku pandikisa. Eye wa kuata ocimãho coku “imbila uvangi” ndaño lohali ya lua.

⁹ Koloneke vilo, vamanji valua va siatavo oku pandikisa lekolelo poku liyaka lelambalalo. Vofeka yimue, muli Olombangi vimue Via Yehova okuti, ndopo vi tẽlisa 20 kanyamo vokayike, pole, ka via sombisiwile kombonge. Momo lie? Momo, vi yuvula oku litenga vopulitika. Omo liaco, asongui volokayike ka va ecelela okuti Olombangi viaco Via Yehova vi nyuliwa lapata avo, kuenje, vamue pokati kavo va siata oku tipuiwa, kuenda oku talisiwa ohali.

10. Momo lie ka tu sukilila oku kuatela usumba elambalalo?

¹⁰ Kolofeka vikuavo, vamanjetu va siatavo oku pandikisa kohali yiya ocipikipiki. Nda weya oku pita locitangi caco, ku ka kuate usumba. Ivaluka ulandu wa Yosefe okuti, wa landisiwile kupika. Pole, Yehova “wo popela kohali yaye yosi.” (Ovilinga 7:9, 10) Yehova o pondolavo oku ku kuatisa. Ivaluka okuti, Yehova ‘wa kũlĩha oku popela vana vo sumbila, eci va nyikiwa.’ (2 Petulu 2:9) Omo liaco, o kuete esunga lieci o sukilila oku kolela ku Yehova, kuenda oku pandikisa kelambalalo lutõi. Ivaluka okuti, Yehova o pondola oku ku popela voluali lulo lua vĩha, kuenda oku ku ĩha omuenyo ko pui.—1 Petulu 5:8, 9.

11. Elambalalo lio ketimba lia litepa ndati lalambalalo akuavo?

¹¹ Tu pondolavo oku pandikisa kalambalalo akuavo. Alambalalo aco a litepa ndati lelambalalo lio ketimba? Elambalalo lio ketimba li sokisiwa lehunguhungu liofela yi nyõla onjo yove vokuenda kuotembo yitito. Pole, alambalalo akuavo, a sokisiwa lombunji yi nyõla akoso onjo levando okuti, omunu ka ci limbuka lonjanga. Pole, noke liotembo yimue, oco lika a limbuka ndomo ombunji ya nyõla onjo yaye, momo yi panda koku teka.

12. (a) Pokati kalambalalo akuavo, onjanjo yipi Satana a siata oku yapuisa layo omanu, kuenda wa siata oku kuata onima yipi? (b) Esumuo lia vetiya Paulu oku kuata ovisimilo vipi?

 ¹² Satana o yongola oku nyõla ukamba wove la Yehova. Eye, o pondola oku yapuisa omunu lelambalalo lio ketimba, ale alambalalo akuavo ndeci, esumuo okuti, oyo onjanjo a siata oku yapuisa layo omanu. Momo lie? Momo, onjanjo yaco yi pondola oku nyõla levando ukamba wetu la Yehova Suku. Upostolo Paulu wa endavo oku sumua. Onjanja yimue, wa li tukula hati, “ndukuelamba.” (Tanga Va Roma 7:21-24.) Momo lie Paulu a kuatela esumuo liaco? Ndaño okuti, wa kuatele ukamba wocili la Yehova, kuenda wa pangele onepa kosungu yakulu, pole, wa sumuĩle omo liekambo lioku lipua. Ocili okuti, wa yonguile oku linga ovina via sunguluka, pole, ka ca lelukile oku ci linga. Nda o kasi oku liyaka lovisimĩlo ka via sungulukile, ivaluka okuti, Paulu wa liyakavo locitangi caco.

13, 14. (a) Momo lie afendeli vamue va Yehova va siatela oku sumua? (b) Helie o yongola oku nyõla ekolelo lietu, kuenda momo lie?

¹³ Olonjanja vimue, vamanji va siata oku yeva esumuo, kuenda asakalalo, kuenje va sima okuti, ka va kuete esilivilo. Manji umue ukãi ukundi wotembo yosi wa popia hati: “Olonjanja vimue nda siata oku sokolola akandu nda linga, kuenje, ovisimĩlo viaco via enda oku ndi sakalaisa vokuenda kuotembo yalua. Eci ndi sokolola ovina vĩvi ndaenda oku linga, ndi kuata ovisimĩlo viokuti, lomue o ndi sole, oku kongelamo Yehova.”

¹⁴ Momo lie afendeli vamue va Yehova vakuambili kupange waye, va siatela oku sumua ndeci ca pita la manji ukãi wa tukuiwa pocinimbu cekũi latatu? Kuli esunga lieci va siatela oku sumua. Citava okuti va sokolola ovina ka via sungulukile va linga, ale ovitangi vikuavo komuenyo. (Olosapo 15:15) Vamanji vamue va kasi oku liyaka lovisimĩlo viaco omo lioku vela, kuenje, via siata oku va nenela esumuo. Ndaño tu kuete esunga lieci tu sumuĩla, pole, tu sukila oku ivaluka okuti, kuli umue o yongola oku tu yapuisa lovisimĩlo viaco. Helie o yongola okuti tu sumua oco tu liwekepo oku vumba Yehova? Ocili okuti Satana. Omo okuti Satana o lavoka oku pondiwa, o tu vetiya oku simavo okuti, ka tu kuete elavoko. (Esituluilo 20:10) Satana o yongola okuti tu kuata usumba, kuenje, tu tepulula ombili yetu. Ndaño lelambalalo lio ketimba, ale alambalalo akuavo tu liyaka lavo, pole, Satana o yongola okuti, tu liwekapo oku vumba Yehova Suku. Ku ka kembiwe, momo, Akristão vocili, va kuete uyaki woku teyuila ekolelo liavo ku Yehova.

15. Ndomo ukanda 2 Va Korindo 4:16, 17 u lekisa, nye tu sukila oku linga?

¹⁵ Amamako loku pandikisa kalambalalo. Tiamisila utima wove kasumũlũho o lavoka. Paulu wa sonehela Akristão vo ko Korindo ndoco: “Ka tu konyoha. Ndaño etimba li kasi loku nyõleha, haimo utima u [kasi oku tumbuluiwa] eteke keteke. Momo ohali yilo yetu yitito, haiyo yokatembo kamue lika, yi kasi loku talavaya oku tu pongiyila ulamba wa lua, wa piãla ovolamba osi akuavo, haiwo wenda hũ.”—2 Va Korindo 4:16, 17.

16. Momo lie oku li pongiya cilo ci kuetele esilivilo kohali yi laika okuiya?

¹⁶ Satana o kuete ‘olonjanjo’ vialua vioku tu yapuisa. (Va Efeso 6:11) Eli olio esunga lieci tu sukilila oku pokola kolondaka vi sangiwa vukanda 1 Petulu 5:9, a popia hati: “Pami lekolelo liene kuenje tamalali laye.” Oco tu amameko loku pandikisa, tu sukila oku pongiya ciwa ovisimĩlo vietu, kuenda utima wetu cilo, oco tu linge ovina via sunguluka. Kũlĩhĩsa ulandu owu: Osimbu asualali ka va endele kuyaki, va siata oku tambula epindiso li sukiliwa, oco va linge ciwa uyaki waco. Cimuamue haico ci pondola oku pita letu. Momo, ka tua kũlĩhĩle uyaki tu ka kuata kovaso yoloneke. Omo liaco, tu sukila oku li pindisa cilo, osimbu uyaki waco ka wa fetikile. Eli olio esunga lieci upostolo Paulu a vetiyila Akristão vocili lolondaka viokuti: “Liseteki ene muele nda . . . vu kasi ocili vekolelo. Linyiki muẽle.”—2 Va Korindo 13:5.

17-19. (a) Tu pondola oku li kũlĩhĩsa ndati etu muẽle? (b) Amalẽhe va pondola oku lipongiya ndati oco va teyuile ekolelo liavo osimbu va kasi oku lilongisa kosikola?

¹⁷ O pondola oku li kũlĩhĩsa ove muẽle poku li pula ndoco: ‘Ndi kuete hẽ ocituwa coku likutilila olonjanja viosi? Eci vakuetu va ndi vetiya oku linga ovina ka via sungulukile, ndi lekisa hẽ epokolo ku Yehova ombiali ya velapo okuti,  omanu ci sule? Nda siata hẽ oku endaenda kolohongele olonjanja viosi? Ndi lekisa hẽ utõi poku sapela lomanu catiamẽla kovina nda lilongisa Vembimbiliya? Ndi kuete hẽ ocituwa coku ecela vamanji, ndeci ndi yongola okuti va ngecelavo? Nda siata hẽ oku pokola kakulu vekongelo ndi kasi, kuenda ku vamanji va kuete ocikele coku songuila akongelo voluali luosi?’

¹⁸ Tua ñualiwa lomanu va yongola oku yapuisa ovisimĩlo vietu. Vamanji valua amalẽhe, va siata oku kuata utõi poku lomboluila ku vakuavo kosikola, ovina va lilongisa Vembimbiliya. Poku ci linga, ka va kuata osõi, ale usumba. Nye ca siata oku kuatisa amalẽhe vaco oku vangula lutõi? Va kuãi olonumbi vi sangiwa volorevista vietu. O Despertai! Yevambi Linene yunyamo wo 2009, yeca onumbi yokuti, nda umue u tangela kosikola yimuamue ka tava kovina viatiamẽla ku Yehova, kuenje, o ku pulisa hati: “Momo lie ku tavela kelongiso liokuti ovina via tukuluka ño?” O pondola oku u tambulula ndoco: “Momo lie ndi sukilila oku tava kelongiso liokuti ovina via tukuluka ño? Ndaño okuti olonoño vi kuete ukũlĩhĩso wa lua, pole, vi kuete atatahãi atiamẽla kelongiso liaco!” Alonjali, sapeli ovina viaco lomãla vene, oco va kũlĩhe ndomo va pondola oku teyuila ekolelo liavo okuti, va ka ci lingavo kosikola.

¹⁹ Ocili okuti, ka ca lelukile oku teyuila ovina tua lilongisa Vembimbiliya, ale oku linga ovina Yehova a yongola. Noke lioku linga upange woku sanda eteku vokuenda kueteke, pamue tu sukila oku likolisilako oco tu ende kohongele. Pamue ka ci leluka oku pasuka komẽle oco ende kupange woku kunda. Pole, ivaluka okuti, nda wa kuata ocituwa coku linga ovina viaco cilo, ci ku kuatisa oku lipongiya eci o ka liyaka lohali yalua kovaso yoloneke.

20, 21. (a) Oku sokolola lutate ocisembi ci tu kuatisa ndati oku yula ovisimĩlo ka via sungulukile? (b) Nye tua nõlapo oku linga?

²⁰ Nye ci popiwa catiamela kalambalalo akuavo? Tu pondola oku yula ndati ovisimĩlo vi tu sumuisa? Onjila yimue yoku ci linga, oku sokolola eliangiliyo liocisembi ca Yesu. Eci oco ca kuatisa upostolo Paulu otembo a enda oku sima okuti, ukuahali. Momo, wa kũlĩhĩle okuti, Kristu ka filile omanu va lipua, pole, wa fila omanu vakuakandu. Eye wa soneha ndoco: “Nda kolela Omõla a Suku u wa [ndi] sola haeye wa liecela oku mopela.” (Va Galatia 2:20) Omo liaco, Paulu wa tava kocisembi, kuenda wa kũlĩhĩle okuti, ci pondola oku u kuatisa.

²¹ O pondolavo oku kuatisiwa nda wa tava okuti, ocisembi ombanjaile yimue ya eciwa la Yehova. Pole, ka ci lomboloka okuti, esumuo liaco li pua vonjanja yimosi. Vamanji vamue, citava okuti, va amamako loku pandikisa lesumuo liaco, toke kesulilo lioluali lulo. Pole, ivaluka okuti, vamanji vana va amamako loku pandikisa, va ka tambula onima. Kesulilo lieteke leteke, tu sukila oku ivaluka okuti, otembo yoku iya Kusoma wa Suku yi kasi ocipepi. Eci otembo yaco yi pitĩla, voluali luosi mu ka kala ombembua, kuenda omanu vosi va ka li pua. Omo liaco, tu sukila oku nõlapo oku iñila Vusoma wa Suku, ndaño lohali yalua.