1, 2. Nye Yesu a linga kuteke 14 kosãi ya Nisana yunyamo wa 33 K.K.? (Tala ociluvialuvia kefetikilo liocipama cilo.)

 KUTEKE 14 kosãi ya Nisana kunyamo wa 33 K.K., ko Yerusalãi kua kala owi walua. Yesu kumue lovapostolo vaye va linga ocipito Copaskoa oco va ivaluke ndomo Yehova a yovola va Isareli Kegito eci ci soka 1.500 kanyamo kosimbu. Noke, Yesu wa sovola ondalelo yilikasi kumue leci ci soka 11 kovapostolo vaye okuti va sukilile oku ivaluka ondalelo yaco unyamo lunyamo oco va ivaluke olofa viaye​—Mateo 26:1, 2.

² Yesu noke yoku likutilila wa eca ombolo ka yi kuete etumbisa kovapostolo vaye poku popia hati: “Tambuli, li.”Noke wa nyañulavo okopo, wa likutilila kuenje wa popia hati: “Nyuiko vosi.” (Mateo 26:26, 27) Ombolo lovinyu vi kuete elomboloko limue lilikasi. Ovapostolo va Yesu vakuekolelo va lilongisa ovina vialua kuteke waco ulikasi.

3. Apulilo api tu konomuisa vocipama cilo?

³ Yesu wa yonguile okuti, olondonge viaye vi ivaluka olofa  viaye pocipito ci lingiwa onjanja yimosi vunyamo. Noke ocipito caco ceya oku tukuiwa hati: ‘Ondalelo ya Ñala,’ ale Ocipito Conjivaluko. (1 Va Korindo 11:20) Ku lingiwa apulilo amue ndeci: Momo lie tu sukilila oku ivaluka olofa via Yesu? Ombolo lovinyu vi kuete elomboloko lie? Tu pondola oku lipongiya ndati oco tu ende Kocipito Conjivaluko? Helie o kuete omoko yoku lia kombolo loku nyua kovinyu? Akristão vocili va lekisa ndati okuti va velisapo elavoko liavo?

4. Olofa via Yesu via tu yuluila onjila yipi?

⁴ Omo okuti Adama wa lueya, vosi yetu tua piñala ekandu kuenda olofa. (Va Roma 5:12) Omo liaco, ka kuli omunu o pondola oku eca ku Yehova omuenyo waye ale omuenyo womanu vakuavo ndocisembi. (Osamo 49:6-9) Pole, Yesu wa eca kokuetu omuenyo waye wa lipua, kuenda wa eca ku Suku esilivilo liomuenyo waye. Yesu poku ci linga, ca ecelela okuti tu kuata elavoko liomuenyo ko pui okuti, tu yovuiwa kekandu kuenda kolofa.​—Va Roma 6:23; 1 Va Korindo 15:21, 22.

5. (a) Tua kũlĩha ndati okuti Yehova la Yesu va tu kuetele ocisola? (b) Momo lie tu sukilila oku enda Kocipito Conjivaluko?

⁵ Yehova wa lekisa ocisola caye komanu poku linga eliangiliyo liocisembi. (Yoano 3:16) Yesu wa lekisavo ocisola caye kokuetu eci a tu fila. Osimbu Yesu keyile palo posi, ‘wa sanjukilile omãla vomanu.’ (Olosapo 8:30, 31) Tua sanjukila ovina Yehova kumue la Yesu va siata oku tu lingila! Eli olio esunga lieci tu sukilila oku pokola konumbi ya Yesu yokuti: “Ci lingaili oku njivaluka” poku endaenda Kocipito Conjivaluko.​—1 Va Korindo 11:23-25.

6. Elomboloko lipi tu kuete liatiamẽla kombolo kuenda kovinyu Yocipito Conjivaluko?

⁶ Vokuenda kuondalelo ya sulako Yesu a linga kumue lovapostolo vaye, ka lingile ocikomo okuti o pongolola ombolo oco yi linge etimba liaye, ale ovinyu oco yi linge osonde yaye. Eye wa popia hati, ombolo yi lomboloka “etimba liange.” Noke wa popiavo hati, ovinyu yi lomboloka “osonde yange yocisila yi pesilua [omanu] va lua.” (Marko 14:22-24) Ocili okuti ombolo lovinyu, ovindekaise.

7. Ombolo ka yi kuete etumbisa yi lomboloka nye?

⁷ Koñolosi yaco yilikasi, olombolo ka vi kuete etumbisa via supile kocipito co Paskoa, ovio Yesu a linga lavio ondalelo. (Etundilo 12:8) Olonjanja vimue Embimbiliya li tukula etumbisa okuti li tiamisiwila kekandu. (Mateo 16:6, 11, 12; Luka 12:1) Ombolo ka yi kuete etumbisa Yesu a linga layo ondalelo, yi lomboloka etimba liaye ka li kuete ekandu. (Va Heveru 7:26) Eli olio esunga lieci okuti, Kocipito Conjivaluko ku kala ombolo ka yi kuete etumbisa.

8. Ovinyu yi lomboloka nye?

⁸ Ovinyu Yesu a sokiyile pocipito Conjivaluko yi lomboloka osonde yaye, ale omuenyo waye, ndeci tua siata oku linga lovinyu keteke Liocipito Conjivaluko koloneke vilo. Yesu wa fila pocitumãlo cimue ci tukuiwa hati  Gongota ocipepi lo Yerusalãi, kuenje wa eca omuenyo waye oco tu tambule “ongecelo yakandu.” (Mateo 26:28; 27:33) Nda tua sanjukila ombanjaile yaco yilikasi, vosi yetu unyamo lunyamo tu lipongiya ciwa poku lavoka ocipito caco cilikasi. Tu pondola oku ci linga ndati?

9. (a) Momo lie tu sukilila oku tanga ovipama Viembimbiliya viatiamẽla Kocipito Conjivaluko? (b) Ovisimĩlo vipi o kuete viatiamẽla kocisembi?

⁹ Oco tu lipongiye ciwa osimbu tu lavoka Ocipito Conjivaluko, tu sukila oku tanga ovipama Viembimbiliya viatiamẽla kocipito caco vi sangiwa vokalendariu, kuenda vokalivulu Konomuisa Ovisonehua Eteke Leteke. Oku tanga ovolandu Embimbiliya ci tu kuatisa oku sokolola ovina Yesu a linga osimbu handi ka file. a (Tala etosi pombuelo yemẽla.) Manji umue ukãi wa soneha ndoco: “Tu lavoka lesanju lialua Ocipito Conjivaluko. Unyamo lunyamo tu limbuka esilivilo lia velapo liocipito caco. Toke cilo ndi ivaluka eteke tua kala vonjo mua siata oku kapiwa ovivimbi ka via kendiwile handi . . . , loku vandekela isia yange wa fa, osimbu di sokolola kesilivilo liocilumba cocisembi. . . . Nda kũlĩhĩle ovinimbu viosi Viembimbiliya kuenda nda tẽlele oku vi lombolola! Pole, eci nda yeva esumuo li tunda kolofa, oco lika utima wange wa ndi vetiya oku kuata esanju omo liovina [Yehova a ka tu lingila] lekuatiso liocisembi.” Oku sokolola ndomo ocilumba ca Yesu ci ka kuatisa omunu lomunu pokati ketu, ci tu vetiya oku lipongiya ciwa oco tu ende Kocipito Conjivaluko.

10. Nye tu sukila oku linga oco tu li pongiyile Kocipito Conjivaluko?

¹⁰ Onjila yikuavo yoku li pongiya oco tu ende kocipito conjivaluko oku vokiya ombili yetu kupange woku kunda, loku laleka omanu valua. Citava okuti tu litumbika kupange wakundi vasokamo. Eci tu sapela lomanu ovina viatiamẽla ku Yehova, komõlaye,  kuenda kelavoko liomuenyo ko pui, tu kuata esanju lioku limbuka okuti tua siata oku linga ovina Yehova a yongola.​—Osamo 148:12, 13.

11. Momo lie Paulu a popela hati, vamue pokati ka va Korindo ka va lekisile esumbilo poku lia kombolo loku nyua kovinyu Kocipito Conjivaluko?

¹¹ Eci tu li pongiya oco tu ende Kocipito Conjivaluko, tu vetiyiwa oku sokolola olondaka Paulu a sonehela Akristão vo ko Korindo. (Tanga 1 Va Korindo 11:27-34.) Eye wa popia hati, nda omunu umue wa siata oku lia kombolo loku nyua kovinyu wa lueya, ale wa linga cimue ka ci lekisa esumbilo, o kuata eko omo ‘lietimba losonde ya Ñala.’ Omo liaco, nda manji umue ombuavekua o litumbika kelinga limue lĩvi, pole amamako oku lia kombolo loku nyua kovinyu, “o likokela episo.” Koloneke via Paulu, Akristão vamue vo ko Korindo va enda oku linga ovina via vĩha. Citava okuti vamue pokati kavo va enda oku lia kuenda oku nyua osimbu ka va endele Kocipito Conjivaluko, kuenje vokuenda Kuocipito caco okuti pamue va suñila. Omo okuti ka va endele oku lekisa esumbilo kocipito caco, ndaño okuti va lia kombolo kuenda va nyua kovinyu, ka va taviwile la Yehova.

12. (a) Paulu wa sokisa la nye Ocipito Conjivaluko? Elungulo lipi a eca komanu vana va siata oku lia kombolo loku nyua kovinyu? (b) Nda manji umue wa siata oku lia kombolo loku nyua kovinyu wa linga ekandu linene nye a sukila oku linga?

¹² Paulu poku sokisa Ocipito Conjivaluko ndepuluvi limue lioku lila kumosi, wa lungula omanu va pangele onepa kondalelo yaco poku popia hati: “Ene ko tẽla oku nyua okopo ya Ñala loku nyuavo okopo yolondele. Ko tẽla oku lia komesa ya Ñala kuenda komesa yolondele.” (1 Va Korindo 10:16-21) Nda manji umue wa siata oku lia kombolo loku nyua kovinyu wa linga ekandu limue linene, o sukila oku sapela lakulu vekongelo oco a kuatisiwe. (Tanga Tiago 5:14-16.) Nda ovituwa viaye vi eca uvangi wokuti wa likekembela, ci lekisa okuti ka tombele ocisembi ca Yesu eci a lia kombolo loku nyua kovinyu Pocipito Conjivaluko.​—Luka 3:8.

13. Momo lie tu sukilila oku kongela volohutililo vietu ovina viatiamẽla kelavoko Yehova a tu ĩha?

¹³ Tu pondolavo oku lipongiya oco tu ende Kocipito Conjivaluko poku likutilila, loku sokolola kelavoko Yehova a eca komunu lomunu pokati ketu. Tu yuvuli oku lekisa etombo kocilumba ca Yesu. Tu yuvulivo oku lia kombolo loku nyua kovinyu nda ka tu kuete uvangi u lekisa okuti tulombuavekua. Helie o kuete omoko yoku lia kombolo loku nyua kovinyu?

14. Omo okuti Akristão olombuavekua va panga onepa kocisila cokaliye nye va siata oku linga Pocipito Conjivaluko?

¹⁴ Vamanji vosi va siata oku lia kombolo loku nyua kovinyu Pocipito Conjivaluko va kuete uvangi u lekisa okuti, va panga onepa kocisila cokaliye. Yesu wa popia eci catiamẽla kovinyu hati: “Okopo eyi oyo ocisila cokaliye cosonde yange.” (1 Va Korindo 11:25) Ndaño okuti Yehova wa lingile ocisila Cocihandeleko la va Isareli, pole noke wa popele okuti, wa laikele oku piñainya ocisila Cocihandeleko locisila cokaliye. (Tanga Yeremiya  31:31-34.) Eye wa linga ocisila caco cokaliye Lakristão olombuavekua. (Va Galatia 6:15, 16) Olofa via Yesu via ecelela okuti esokiyo liaco li tẽlisiwa. (Luka 22:20) Yesu eye Mitakati yocisila cokaliye. Akristão olombuavekua vakuekolelo ovo lika va panga onepa kocisila cokaliye okuti, va ka kala kilu la Yesu.​—Va Heveru 8:6; 9:15.

15. Velie va panga onepa kocisila Cusoma? Nda va amamako oku lekisa ekolelo, onima yipi va ka tambula?

¹⁵ Akristão olombuavekua va kũlĩha okuti va pangavo onepa kocisila Cusoma. (Tanga Luka 12:32.) Yesu wa linga ocisila caco lolondonge viaye olombuavekua vakuekolelo vana va yevela kumuamue laye “olongembia.” (Va Filipoi 3:10) Akristão olombuavekua vo koloneke vilo va pangavo onepa kocisila caco. Ovo va ka linga olosoma kumue la Kristu kilu otembo ka yi pui. (Esituluilo 22:5) Akristão vaco va kuete uvangi u lekisa okuti va kuete omoko yoku lia kombolo loku nyua kovinyu vokuenda Kuondalelo ya Ñala.

16. Lombolola elomboloko liolondaka vielivulu lia Va Roma 8:15-17.

¹⁶ Akristão olombuavekua va kuete ekolelo liokuti omãla va Suku, va pondola oku lia kombolo loku nyua kovinyu. (Tanga Va Roma 8:15-17.) Paulu wa popia hati, Akristão olombuavekua va pondola oku vilikiya lolukandi vati: “Aba, a Tate”! Ondaka “Aba” kelimi lio Aramaiku yi lomboloka omunu ukuacisola, ndeci “papa,” kuenda “isia” wa sumbiwa calua. Ondaka yaco yi tiamisiwila kukamba Akristão olombuavekua va kuete la Yehova eci va tambula ‘espiritu lioku kala omãla’ vaye. Kuenje, espiritu lia Suku ‘lieca uvangi’ kokuavo wokuti, ovo va kũlĩha okuti omãla vaye olombuavekua. Pole, ka ci lomboloka okuti, ka va yongola oku kala palo posi. Momo va kũlĩha okuti, nda va pandikisa toke kolofa, va ka linga olosoma kilu kumue la Yesu. Ovo va kũlĩhavo okuti va ‘wavekiwa la Yehova o kola.’ Koloneke vilo, palo posi ketendelo lieci ci soka 144.000 komãla va Suku kua siala lika etendelo limue litito. (1 Yoano 2:20; Esituluilo 14:1) Ovo va kuete ukamba la Yehova okuti vo tukula vati, “Aba, a Tate”!

17. Elavoko lipi Akristão olombuavekua va kuete? Va kũlĩha ndati okuti olombuavekua?

¹⁷ Nda o panga onepa Kakristão olombuavekua, volohutililo viove o sukila oku kongelamo elavoko o kuete lioku ka kala kilu. Kuenje ovina o lilongisa Vembimbiliya vi kuata esilivilo lia velapo kokuove. Embimbiliya poku popia ovina viatiamẽla ku Yesu o ka tokekisa olohuela la ‘ndombua’ yaye kilu, ivaluka okuti olondaka viaco vi tiamisiwilavo kokuove, kuenje o lavoka lesanju oku tẽlisiwa kuolohuela viaco. (Yoano 3:27-29; 2 Va Korindo 11:2; Esituluilo 21:2, 9-14) Eci Embimbiliya li tukula ocisola Yehova Suku a kuetele olombuavekua, wa kũlĩha okuti ovina viaco vi tiamisiwila kokuove. Eci o tanga Vembimbiliya olonumbi viatiamẽla kolombuavekua, espiritu sandu li ku vetiya oku pokola kokuavo. Olio ‘li eca uvangi’ kumue love okuti, o kuete elavoko lioku ka kala kilu.

18. Elavoko lipi “olomeme vikuavo” vi kuete? Nye o yeva vutima omo lielavoko liaco?

 ¹⁸ Nda watiamẽla ‘kowiñi wakahandangala’ ‘wolomeme vikuavo,’ Yehova wa siata oku eca kokuove epuluvi lioku kala komuenyo otembo ka yi pui voluali luokaliye palo posi. (Esituluilo 7:9; Yoano 10:16) Nye o yeva vutima omo lielavoko o kuete kovaso yoloneke? O kuata esanju lialua poku sokolola ovina. Embimbiliya li popia viatiamẽla Koluali Luokaliye kovaso yoloneke. O lavoka lesanju oku kala voluali luombembua kumue lepata liove kuenda akamba. Ocili okuti o yongola oku tala esulilo liovina ka vi ka kalako vali voluali luokaliye ndeci: Onjala, uhukũi, ohali, ovovei, kuenda olofa. (Osamo 37:10, 11, 29; 67:6; 72:7, 16; Isaya 33:24) O lavoka lesanju oku mola omanu va ka pinduiwa. (Yoano 5:28, 29) Omo liaco, eca olopandu ku Yehova omo lielavoko liaco li komõhisa! Ndaño okuti kuli kombolo kuenda ku nyui kovinyu, pole o pondola oku enda Kocipito Conjivaluko omo lioku sanjukila ocilumba cocisembi ca Yesu.

19, 20. (a) O pondola oku kala ndati komuenyo otembo ka yi pui? (b) Momo lie o sukilila oku enda Kocipito Conjivaluko?

¹⁹ Cikale okuti o kuete elavoko lioku kala palo posi ale kilu, o pondola lika oku kuata omuenyo ko pui nda wa lekisa ekolelo ku Yehova Suku, kuenda kocilumba cocisembi ca Yesu Kristu. Eci enda Kocipito Conjivaluko sokolola kelavoko liove, kuenda kesilivilo lia velapo liolofa via Yesu. Votãlo koñolosi keteke 3 kosãi ya Kupupu yunyamo ulo wo 2015, omanu valua voluali luosi va ka enda Kocipito Conjivaluko ci ka lingiwila Vonjango Yusoma, kuenda kovitumãlo vikuavo.

²⁰ Eci tu lipongiya oco tu ende Kocipito Conjivaluko tu lekisa ocituwa ca sunguluka, ci tu vetiya oku eca olopandu kocilumba cocisembi ca Yesu. Nda wa yevelela lutate ohundo Yocipito Conjivaluko, ci ku vetiya oku lekisa ocisola komanu poku va sapuila ovina viatiamẽla kocisola ca Yehova, kuenda kocipango caye catiamẽla kokuetu. (Mateo 22:34-40) Omo liaco, likolisilako oco ende Kocipito Conjivaluko.