1. Momo lie tu ecela olopandu ku Yehova?

 YEHOVA o tu ĩha ‘ovina viosi viwa lombanjaile yosi ya lipua.’ (Tiago 1:17) Eye Ungombo wetu ukuacisola, kuenda wa siata oku tu ĩha ovina viosi tu sukila. (Osamo 23:1-3) Yehova o sesamẽla olopandu vietu. Momo eye “ocikolo cetu haeye ongusu yetu,” ca piãla enene eci tu tala ohali. (Osamo 46:1) Tu kuete ovisimĩlo ndevi viukualosamo wa soneha ndoco: “Sivayi Yehova. Panduli Yehova momo uwa. Ocisola caye ka ci pui cenda ño-o hũ.”​—Osamo 106:1.

2, 3. (a) Ovitangi vipi vi yilila koku kala ukualutukãi? (b) Apulilo api tu konomuisa vocipama cilo?

² Momo lie tu sukilila oku eca olopandu ku Yehova? Ndomo Embimbiliya lia ci popele, koloneke vilo omanu va linga vakualutukãi. (2 Timoteo 3:2) Omanu valua ka va sanjukilile ovina viwa Yehova a siata oku va  lingila. Tu kasi voluali lumue okuti omanu va velisapo calua ovokuasi, kuenje va vetiyiwa oku landa ovina ka va sukila. Omo liaco, valua pokati kavo ka va sanjukilile ovina va kuete. Ndeci ca pita la va Isareli, citava okuti tu kala vakualutukãi, kuenje ka tu sanjukila vali asumũlũho tu kuete, kuenda ukamba wetu la Yehova.​—Osamo 106:7, 11-13.

³ Sokololavo ovina vi pondola oku pita letu eci tu pandikisa kovitangi. Nda tua tiamisila lika utima wetu kovitangi okuti ka tu kapiko asumũlũho tua siata oku tambula, tu yuliwa lovitangi viaco. (Osamo 116:3) Tu pondola oku amamako ndati oku eca olopandu? Tu kuata ndati ovisimĩlo via sunguluka ndaño lovitangi vialua? Tu ci konomuisi.

4. Tu pondola oku amamako ndati oku eca olopandu ku Yehova?

⁴ Tu sukila oku likolisilako oku eca olopandu ku Yehova. Catete, tu ci linga poku limbuka ndomo Yehova a siata oku sumũlũisa omunu lomunu pokati ketu. Noke, tu sukilavo oku sokolola lutate ndomo asumũlũho aco a situlula ocisola Yehova a tu kuetele. Eci ukualosamo a ci linga, wa komõha calua omo liovina viwa Yehova o lingila.​—Tanga Osamo 40:5; 107:43.

5. Nye tu pondola oku lilongisa kongangu yupostolo Paulu yatiamẽla koku eca olopandu?

⁵ Tu pondola oku lilongisa oku eca olopandu ku Yehova poku konomuisa ulandu wupostolo Paulu. Tua kũlĩha okuti Paulu wa enda oku sokolola asumũlũho a tambula omo lioku eca olopandu ku Yehova poku likutilila. Paulu wa limbukile okuti wa enda oku ‘popia atonãi, wa kangisa omanu, kuenda wa kala ukuakutondala.’ Ndaño okuti kosimbu ka kuatele ovituwa viwa, pole wa eca olopandu ku Yehova kuenda ku Kristu omo liohenda va lekisa kokuaye, kuenje va ecele kokuaye ocikele coku kundila omanu vakuavo. (Tanga 1 Timoteo 1:12-14.) Paulu olonjanja vialua wa eca olopandu ku Yehova omo liovituwa viwa vamanji Akristão va lekisa kuenda upange wavo wekolelo. (Va Filipoi 1:3-5, 7; 1 Va Tesalonike 1:2, 3) Paulu wa kala ukuambili poku eca olopandu ku Yehova omo liovina viosi vamanji va enda oku u lingila poku liyaka lalambalalo. (Ovilinga  28:15; 2 Va Korindo 7:5-7) Paulu wa pamisa ekolelo Liakristão poku popia hati: “Lingi vakuakuimbaimba olopandu. Lilongisi pokati loku lilungula lolondunge viocili. Imbaimbi olosamo lovisungo lasivayo Espiritu . . . ,lolopandu.”​—Va Kolosai 3:15-17.

6. Momo lie wa siatela oku eca olopandu ku Yehova?

⁶ Tu kuama ndati ongangu ya Paulu? Tu pondola oku ci linga poku sokolola ovina Yehova a siata oku tu lingila. (Osamo 116:12) O tambulula ndati nda omunu umue wa ku pula hati: “Asumũlũho api a tunda ku Yehova wa sanjukila”? O pondola hẽ oku kongelamo ukamba ulikasi o kuetele Yehova? Ale o kongelamo ongecelo yakandu ove omo liocisembi ca Kristu? O pondola hẽ oku kongelamo vamanji va siata oku ku kuatisa poku liyaka lovitangi? O pondola hẽ oku eca olopandu omo liolohuela viove ale omãla o kuete? Omo liaco, sokiya otembo yoku sokolola ndomo Eye a siata oku ku sumũlũisa volonepa vialua. Nda wa ci linga, ci ku vetiya oku eca olopandu ku Yehova oloneke viosi.​—Tanga Osamo 92:1, 2.

7. (a) Momo lie tu sukilila oku eca olopandu ku Yehova volohutililo vietu? (b) O kuatisiwa ndati poku eca olopandu ku Yehova volohutililo viove?

⁷ Eci tu sokolola asumũlũho tua siata oku tambula, ci tu vetiya oku eca olopandu ku Yehova volohutililo vietu. (Osamo 95:2; 100:4, 5) Omanu vamue va siata oku likutilila lika nda va yongola oku pinga ovina vimue ku Yehova. Pole, Yehova o sanjuka calua nda volohutililo vietu tu kongelamo olopandu omo liovina tu kuete. Vembimbiliya tu sangamo ovolandu alua afendeli va Yehova ndeci Hana la Hesekiya okuti, va ecele olopandu ku Yehova poku likutilila. (1 Samuele 2:1-10; Isaya 38:9-20) Omo liaco, kuama ongangu yavo yoku eca olopandu, kuenda eca olopandu ku Yehova omo liovina a siata oku ku lingila. (1 Va Tesalonike 5:17, 18) Nda wa ci linga, o kuata esanju, kuenje ocisola o kuetele Yehova ci livokiya, kuenda o linga ekamba Liaye.​—Tiago 4:8.

8. Nye ci pondola oku tu kokela oku kala vakualutukãi?

⁸ Nda ka tua lavuluile, citava okuti ka tu sanjukila vali ovina viwa Yehova a siata oku tu ĩha. Momo lie? Momo, ka tua lipuile, kuenda tua piñala ocituwa colutukãi ku Adama la Heva. Yehova wa va kapele vocumbo cimue ceposo, kuenda wa ecele kokuavo ovina viosi va sukilile. Ovo va ponduile oku kuata ombembua kuenda oku kala komuenyo otembo ka yi pui. (Efetikilo 1:28) Pole, ka va sanjukilile asumũlũho avo, momo va kuatele ocipululu, kuenda va yonguile oku kuata ovina vikuavo. Omo liaco, veya oku pumba ovina viosi va kuatele. (Efetikilo 3:6, 7, 17-19) Omo okuti tu kasi voluali luomanu vakualutukãi, nda ka tua lavuluile citava okuti tu kalavo vakualutukãi. Kuenje, ka tu sanjukila vali ovina viosi Yehova a siata oku tu lingila. Citava okuti ka tu sanjukila ukamba tu kuete la Suku, ale esumũlũho lioku  likuata omunga la vamanji voluali luosi. Kuenje tu tiamisila lika utima wetu kovina violuali lulo. (1 Yoano 2:15-17) Oco tu yuvule ocituwa caco, tu sukila oku sokolola ovina viwa tua siata oku tambula, kuenda oku eca olopandu ku Yehova omo liesumũlũho tu kuete lioku kala afendeli vaye.​—Tanga Osamo 27:4.

9. Eci tu liyaka lovitangi, momo lie tu sukilila oku sokolola kasumũlũho tu kuete?

⁹ Nda tua lekisa ocituwa coku eca olopandu, ci tu kuatisa oku pandikisa eci tu liyaka lovitangi. Citava okuti tu yapuisiwa lovitangi vi pondola oku pongolola ekalo liomuenyo wetu ndeci: Nda ohueli yetu yi linga ukahokolo, oku vela, olofa via umue ukuepata, ale ceci tu pita locilunga cimue. Oku sokolola asumũlũho tua siata oku tambula ku Yehova, ci tu ĩha elembeleko, kuenda ci pamisa ekolelo lietu oco tu amameko oku pandikisa. Tu konomuisi ovolandu a kuãimo.

10. Manji Irina wa kuatisiwa ndati omo lio ku sokolola kasumũlũho a kuata?

¹⁰ Manji umue o tukuiwa hati Irina okuti ukundi wotembo yosi wo kofeka yo Amerika yo Konano, wa kueliwile lukulu umue wekongelo okuti noke weya oku linga ukahokolo, kuenje wo siapo kumue lomãla vavo. a (Tala etosi pombuelo yemẽla.) Nye ca kuatisa manji Irina oku vumba Yehova lekolelo? Eye wa popia hati: “Ngeca olopandu ku Yehova omo liekuatiso nda siata oku tambula kokuaye. Omo lioku nõlapo oku eca olopandu kovina viosi viwa nda siata oku tambula, ci ndi kuatisa oku limbuka esumũlũho lioku kũlĩhĩwa la Isietu wo kilu ukuacisola okuti, o tu teyuila. Nda kũlĩha okuti ka ka ndi yanduluka.” Ndaño okuti manji Irina wa siata oku pandikisa kovitangi vialua komuenyo waye, pole esanju liaye lio kuatisa oku liyaka lovitangi, kuenda oku vetiya vakuavo.

11. Nye ca kuatisa manji Kyung-sook oku liyaka luvei?

¹¹ Manji umue o tukuiwa hati Kyung-sook okuti o kasi vocifuka co Asia, eye kumue lulume waye va litumbika kupange wakundi votembo yosi ci pitahãla 20 kanyamo. Noke, olondotolo via limbuka okuti o kuete uvei wo kanser, kuenje vio sapuila hati, o kala lika komuenyo olosãi vitatu ale epandu. Ndaño okuti eye kumue lulume waye kosimbu va pandikisa kovitangi vialua, ka va endele oku vela calua. Ukãi waye wa popia hati: “Uvei waco wa ndi sumuisa calua, kuenje nda kala ndomunu umue wa pesela ovina viaye viosi, kuenda nda kuatele usumba walua.” Nye ca kuatisa manji Kyung-sook oku liyaka locitangi caco? Ukãi waye wamisako hati: “Oloneke viosi koñolosi osimbu sia pekelele handi, nda kuata ocituwa coku londa kilu lionjo  kuenje ndi likutilila lolukandi catiamẽla kovina vitãlo okuti ovio ngeca olopandu oku upisa keteke liaco. Noke nda limbuka okuti ekolelo liange lia pamisiwa, kuenje ca ndi vetiya oku lekisa ocisola ku Yehova.” Olohutililo a linga vokuenda kuoloneke viaco koñolosi via kuatisa ndati manji Kyung-sook? Ukãi waye wa popia hati: “Nda limbuka okuti Yehova wa siata oku tu kuatisa poku liyaka lovitangi, kuenje asumũlũho tu kuete ka a sokisiwa lovitangi viaco.”

12. Manji Jason wa lembelekiwa ndati noke yolofa viukãi waye?

¹² Manji umue o tukuiwa hati Jason wo ko Betele yimue vocifuka co Afrika, o kasi ale kupange wotembo yosi kueci ci pitahãla 30 kanyamo. Eye wa popia hati: “Ndaño pa pita ale anyamo epanduvali tunde eci ukãi wange a fa, handi nda siata oku sumua calua. Oku sokolola ndomo a liyaka luvei waco wo kanser, ci nena esumuo lialua.” Nye ca kuatisa manji Jason oku kuata utima wa tula? Eye wa amisako loku popia hati: “Ndi ivaluka apuluvi awa nda kala kumosi lukãi wange, kuenje tua enda oku eca olopandu ku Yehova volohutililo omo liovina viwa a tu lingila. Esanju nda kuata lia ndi vetiya oku eca olopandu ku Yehova olonjanja viosi omo lioku sokolola ovina viaco. Oku eca olopandu ca ndi kuatisa oku kuata ovisimĩlo via sunguluka. Ndaño okuti toke cilo nda sumua, pole, ngeca olopandu ku Yehova omo liolohuela viwa nda kuatele, kuenda omo liesumũlũho lioku u vumba kumosi lukãi wange wa solele calua Yehova.”

13. Nye ca kuatisa manji Sheryl oku pandikisa eci epata liaye lia fa?

¹³ Kunyamo wo 2013 eci Andunde Ovava Kumue Lehunguhungu Liofela via nyõla onepa yimue yofeka yo Filipina, ufeko umue o tukuiwa hati Sheryl okuti wa kuata lika 13 kanyamo, cosi va kuatele ca enda lovava. Eye wa popia hati: “Onjo yetu ya teka, kuenda epata liange lia fa.” Olonjali  viaye, kumue la vamanjaye va fa lehunguhungu liaco liovava. Nye ca siata oku u kuatisa oku pandikisa kovitangi viaco? Eye wa siata oku eca olopandu ku Yehova poku sokolola asumũlũho a kuete. Noke wa popiavo hati: “Nda mola ovina vamanji va linga poku kuatisa vana va pita locilunga, kuenda evetiyo va eca kokuavo. Nda kũlĩhĩle okuti, vamanji kolonepa viosi violuali va kala oku ndi kongela volohutililo viavo.” Eye wa amisako hati: “Ngeca olopandu ku Yehova momo eye Suku yange. Eye wa siata oku tu ĩha ovina viosi tu sukila.” Nda tu eca olopandu omo liasumũlũho tua siata oku tambula, ci tu kuatisa oku yuvula esumuo. Nda tua ci linga, ci tu kuatisa oku pandikisa kovitangi viosi tu pita lavio.​—Va Efeso 5:20; tanga Va Filipoi 4:6, 7.

14. Elavoko lipi tu kuete? (Tala elitalatu kefetikilo liocipama cilo.)

¹⁴ Tunde kosimbu, afendeli va Yehova va siata oku eca olopandu omo liasumũlũho va kuete. Eci va Isareli va yovuiwa peka lia Fareo kumue lolohoka viaye Vokalunga Kakusuka, va imba lesanju ovisungo vioku eca olopandu ku Yehova. (Etundilo 15:1-21) Koloneke vilo, tu kuete esumũlũho lioku kũlĩha okuti, ndopo ka ku ka kala vali ohali. (Osamo 37:9-11; Isaya 25:8; 33:24) Sokolola esanju tu ka kuata eci Yehova a ka kundula ovanyãli vaye vosi, kuenje tu ka kala voluali luokaliye luombembua kuenda luesunga. Kotembo yaco tu ka eca olopandu ku Yehova!​—Esituluilo 20:1-3; 21:3, 4.

15. Nye wa nõlapo oku linga vokuenda kunyamo wo 2015?

¹⁵ Vokuenda kunyamo wo 2015, tu ka mola asumũlũho alua a tunda ku Yehova. Ndaño okuti pamue tu liyaka lovitangi, pole, tua kũlĩha okuti Yehova ka tu yanduluka. (Esinumuĩlo 31:8; Osamo 9:9, 10) Eye o ka amamako oku tu ĩha ovina tu sukila oco tu u fendele lekolelo. Omo liaco, tu nõlipo oku kuama ongangu yuprofeto Havakuke wa popia hati: “Ndaño ukuyu [ka u] yovi, pamue uyuva ka wimi, ndaño koliveira ka kuiya apako, pamue kovapia ka ku tundi okulia, ndaño vocunda ka mũli olomeme, pamue olongombe vocimanga cavio, haimo njolela Yehova, sanjukila Suku yeyovo liange.” (Havakuki 3:17, 18) Vokuenda kunyamo ulo tu ka amamako oku sokolola asumũlũho osi tu kuete, kuenda tu vetiyiwa oku kapako ocisonehua cunyamo ulo wo 2015 losapi hati: “Panduli Yehova momo uwa.”​—Osamo 106:1.