OKU KUNDA olondaka viwa owo upange wa velapo u kasi oku lingiwa voluali koloneke vilo. Esumũlũho limue linene oku kala onumiwa ya Yehova kupange woku longisa. Pole, olonjanja vimue ka ca lelukile kakundi votembo yosi la vamanji vakuavo oku amamako oku kuata ombili kupange woku kunda. Momo lie?

Akundi vamue va limbuka okuti ka va vangula calua kupange woku kundila konjo lanjo, momo omanu valua ka va sangiwa kolonjo viavo. Eci omanu va sangiwa kolonjo viavo, pamue ka va lekisa onjongole kesapulo Liusoma kuenda va pondola oku tema letu. Akundi vakuavo va kuete ocikanjo cinene okuti omanu vaco va lekisa onjongole, pole va kuete usumba wokuti omanu vaco ka va pondola oku kundila omanu vocikanjo caco. Vamanji vakuavo va kasi oku kunda vokuenda kuanyamo alua, va siata oku yeva esumuo omo liesulilo ka lieyile handi.

Tu ka liyaka lovitangi vialua vi pondola oku tepulula ombili yetu kupange woku kunda. Omo okuti tu kasi voluali lumue lua vialiwa ‘lukuevĩho’ okuti Satana Eliapu, tua kũlĩha okuti ka ci ka leluka oku kunda olondaka viwa.​—1 Yoano 5:19.

Ndaño okuti o kasi oku liyaka lovitangi kupange woku kunda, ivaluka okuti Yehova o ka ku kuatisa oku pandikisa. Pole, nye o sukila oku linga oco ombili yove kupange woku kunda yi livokiye? Tu konomuisi olonumbi vimue.

Unyamo lunyamo omanu valua va siata oku papatisiwa oco va linge Olombangi Via Yehova. Nda wa papatisiwa ndopo o pondola oku lilongisa ovina vialua la vamanji vana okuti, va kasi oku kunda vokuenda kuanyamo alua. Nda o kasi oku kunda vokuenda kuanyamo alua, anga hẽ o pondola oku kuatisa vana va fetika ndopo oku kunda? O pondola oku kuata esanju lialua poku ci linga.

Yesu wa kũlĩhĩle okuti olondonge viaye via sukilile epindiso oco va kale alongisi va loñoloha kuenje wa va longisa ndomo va pondola oku kunda. (Luka 8:1) Koloneke vilo, vana va fetika ndopo oku kunda va sukilavo oku pindisiwa oco va linge akundi va loñoloha.

 Ka tu ka simi okuti vana va fetika ndopo oku kunda omo va siata oku enda kupange woku kunda, va kũlĩha ale ndomo va kunda. Ovo va sukila epindiso liomunu umue o kuete ohenda kuenda ocisola. Akundi va loñoloha va sukila oku longisa ndomo (1) ku pongiyiwa ocindekaise kuenda ovina vi ka popiwa komanu tu kundila, (2) ndomo va fetika oku sapela lomanu, (3) oku eca alivulu etu, (4) oku linga apasu komanu va lekisa onjongole, kuenda (5) oku fetika elilongiso Liembimbiliya. Vana va fetika ndopo oku kunda va pondola oku loñoloha, nda va lavulula lutate loku setukula akundi va loñoloha ndomo va longisa. (Luka 6:40) Vana va fetika ndopo oku kunda va pondola oku kuata ekolelo nda va limbuka okuti, kuli umue o va ĩha ekuatiso eci va sukila. Oku eca epandiyo kuenda oku va lekisa olonumbi vimue ci pondolavo oku va kuatisa.—Ukundi 4:9, 10.

Ndaño okuti tua siata oku likolisilako oku sapela lomanu tu kundila, pole, ci kuete esilivilo oku sapela la manji tua tunda laye kupange woku kunda. Ivaluka okuti Yesu wa tuma olondonge viaye oku kunda “vavali, vavali.” (Luka 10:1) Osimbu va talavayela kumosi, va enda oku likolisa loku livetiya pokati. Etu tu kuetevo epuluvi liwa “lioku likolisa pokati,” eci tu talavaya la vamanji kupange woku kunda.​—Va Roma 1:12.

Ovina vipi tu sukila oku sapela lamanji tua tunda laye kupange woku kunda? Anga hẽ o kuete ulandu umue u vetiya? Wa lilongisa hẽ etosi limue wa sola velilongiso liove lio pokolika ale vefendelo liepata? Wa vetiyiwa hẽ lonepa yimue wa yeva kohongele? Olonjanja vimue o sukila oku enda kupange woku kunda la manji umue kua kũlĩhĩle ciwa. Citava okuti o pondola oku u pulisa ndomo eye a kũlĩha ocili. Nye co vetiya oku limbuka okuti eci ocisoko ca Yehova? Ovikele vipi ale ovolandu eye a kuete? Citava okuti o pondolavo oku u sapuilako ovolandu ove. Cikale okuti omanu tu sanga vocikanjo va lekisa onjongole ale sio, nda tu talavaya lamanji umue kupange woku kunda, tu kuete epuluvi liwa lioku “likolisa pokati.”​—1 Va Tesalonike 5:11.

Oco tu amameko oku kuata ombili kupange woku kunda, tu sukila oku mioñolola ocituwa cetu coku linga elilongiso lio pokolika. Omo liaco, “ukuenje wa kolelua haeye wa lunguka,” wa sandeka olonumbi vialua via litepa tu pondola oku lilongisa. (Mateo 24:45) Tu konomuisi osapi yimue tu pondola oku kũlĩhĩsa kelilongiso lio pokolika: Momo lie upange woku kunda u kuetele esilivilo  lia velapo? Pokakasia losapi hati “ Momo Lie o Sukilila Oku Amamako Oku Lekisa Ombili Kupange Woku Kunda?” ka lombolola asunga amue lieci tu sukilila oku ci linga.

Oku konomuisa atosi a sangiwa pokakasia ci ku kuatisa oku amamako oku kuata ombili kupange woku kunda. Poku nõla ovipama o lilongisa, seteka oku kongelamo asunga akuavo a sangiwa Vovisonehua a ku kuatisa oku lekisa ombili koku kunda. Noke sokolola kasunga aco. Nda wa ci linga, ombili o lekisa kupange woku kunda yi pamisiwa.

Ocisoko ca Yehova ca siata oku tu ĩha olonumbi vi tu kuatisa kupange woku kunda. Tu pondola oku ci linga poku kundila konjo lanjo, poku eca uvangi lekuatiso liovikanda, oku kundila lotelefone, volokololo ale povitumãlo ku sangiwa omanu, uvangi ka wa sokiyiwile kuenda kupange woku sanda eteku. Tu pondolavo oku kundila kovikanjo kuna kuli esukila liakundi.

Ove hẽ, o kuete onjongole yoku seteka oku linga cimue cokaliye? Akundi valua va seteka olonumbi viaco, va siata oku kuata onima yiwa. Konomuisa ovolandu atatu.

Manji umue ukãi o tukuiwa hati April, wa seteka oku kuama onumbi yimue yi sangiwa Vupange Wetu Wusoma vocipama ci lekisa ndomo ku fetikiwa alilongiso Embimbiliya. Eye wa seteka oku longisa Embimbiliya komanu vatatu va talavayela kumosi kupange woku sanda eteku. Manji April wa komõha kuenda wa kuata esanju eci a limbuka okuti, omanu vaco vatatu va tava oku lilongisa Embimbiliya, kuenje, va fetika oku enda enda kolohongele.

Tua siata oku vetiyiwa oco tu sandiliye omanu va lekisa onjongole kolorevista vietu. Manji umue ukuakunyula akongelo wa eca o Despertai! kasongui wolovenda vialola, yi kuete ocipama cimue ci  lombolola ovina viatiamẽla kalola, konepa yimue yolupale kofeka yo Estados Unidos. Eye kumue lukãi waye va ecavo o Despertai! yi kuete ocipama losapi hati: “Os desafios de ser médico” kueci ci pitahãla 100 koloseketa violondotolo. Eye wa popia hati, oku linga apasu aco ca kuatisa omanu oku kũlĩha ovina viatiamẽla kupange wetu woku kunda kuenda alivulu etu. Noke lioku kũlĩha ciwa omanu vocikanjo, manji ukuakunyula akongelo kumue lukãi waye va linga apasu alua.

Manji umue ukãi o tukuiwa hati Judy wa sonehela kombala Yolombangi Via Yehova, momo wa sanjukilile evetiyo a tambuile poku eca uvangi lekuatiso liotelefone. Eye wa popia hati inaye wa kuatele 86 kanyamo, ndaño wa velele calua, wa enda oku kundila omanu lekuatiso liotelefone. Omo liaco, eye wa fetika oku longisa Embimbiliya kukãi umue wa kuatele 92 kanyamo!

Olonumbi vi sangiwa valivulu etu a pondola oku tu kuatisa. Kapako olonumbi viaco! Ovio vi pondola oku ku kuatisa oku amamako oku kuata ombili kupange woku kunda.

Nye ci tu kuatisa oku kuata onima kupange wetu woku kunda? Ndaño okuti tua siata oku eca alivulu etu komanu loku va longisa Embimbiliya, ale oku kuatisa omanu valua oco va linge Olombangi Via Yehova, pole ovina viaco havioko vi nena onima kupange woku kunda. Sokolola ulandu wa Noha. Noha wa kuatisa omanu vañami oku kongelamo epata liaye, oco va kale afendeli va Yehova? Pole, wa kuata onima kupange waye woku kunda. Ca velapo kokuetu oku fendela Yehova lekolelo.​—1 Va Korindo 4:2.

Akundi valua va limbuka okuti oco va kuate onima yiwa kupange woku kunda va sukila oku kuata ovimãho via sunguluka. Vipi vimue pokati kovimãho viaco? Vimue pokati kavio vi sangiwa pokakasia losapi hati “ Kuata Ovimãho Via Sunguluka.”

Pinga ku Yehova oco a ku kuatise oku kuata onima kupange woku kunda. Eci o tẽlisa ovimãho viove, o kuata esanju poku limbuka okuti o kasi oku likolisilako kupange woku kunda olondaka viwa.

Ocili okuti ka ca lelukile oku kunda olondaka viwa. Pole, kuli ovina o pondola oku linga oco o kuate ombili kupange woku kunda. Sapela lonjila yimue yi vetiya manji wa tunda laye kupange woku kunda, linga elilongiso lio pokolika olonjanja viosi, kapako olonumbi via siata oku eciwa lukuenje wa kolelua haeye wa lunguka, kuenda kuata ovimãho via sunguluka. Ca velapo ceci okuti, Yehova Suku wa ku ĩha ocikele coku kunda olondaka viwa, omo lioku kala umue pokati Kolombangi viaye. (Isaya 43:10) Ocili okuti, o pondola oku kuata esanju osimbu wa amamako oku kuata ombili kupange woku kunda!