KOHONGELE yimue yilikasi ya lingiwa kolupale luo Nagoya kofeka yo Japãu keteke 28 kosãi ya Kupupu yunyamo wo 2013, manji Anthony Morris watiamẽla Kosungu Yolombangi Via Yehova, wa sandeka elivulu limue liokaliye kelimi lio ko Japãu losapi hati: The Bible​—The Gospel According to Matthew Embimbiliya Evanjeliu Lia Sonehiwa la Mateo. Ci pitahãla 210.000 komanu veyile kohongele yaco kuenda vakuavo va kuama ohongele yaco lekuatiso liovideo. Eci olonjeveleli via yeva esapulo liaco, via lekisa esanju poku pandula vokuenda kuotembo yalua.

Elivulu liaco Lievanjeliu lia Mateo liopiwa vo Tradução do Novo Mundo. Ndaño elivulu liaco li kuete lika 128 kamẽla, ka li sokisiwa. Manji Morris wa lombolola okuti, elivulu liaco lia pangiwila oco li kuatise omanu vo kofeka yo Japãu. Elivulu liaco lia litepa ndati? Momo lie lia pangiwila? Nye omanu va yeva vutima?

Omanu valua va komõha ndomo elivulu liaco lia Mateo lia pongiyiwa. Omanu vo ko Japãu eci va soneha ololetala, pamue vi miuha ale ka vi miuha. Alivulu alua o ko Japãu, oku kongelamo alivulu etu a sonehiwa lonjila yimue okuti ololetala viaco ka via miuhile. Omo liaco, ololetala vielivulu liokaliye ka via miuhile ndeci ovikanda viasapulo kuenda alivulu akuavo o kofeka yaco via sonehiwa. Momo ca leluka komanu vo ko Japãu oku tanga lonjila yaco. Olosapi via siata oku kapiwa kefetikilo liemẽla, via kapiwa ndotulosapi oco vi kuatise omanu va tanga elivulu liaco oku limbuka lonjanga atosi a velapo.

Vamanji va fetika oku tanga elivulu liaco lia Mateo vonjanja yaco. Manji umue ukãi o kuete ci pitahãla 80 kanyamo wa popia hati: “Nda siatele oku tanga elivulu lia Mateo olonjanja vialua, pole, onjila ndomo elivulu lilo lia sonehiwa kuenda otulosapi tuaco, ca ndi kuatisa oku kuata elomboloko liasuapo Yohundo Yesu a lingila Komunda.” Manji umue ufeko wa soneha ndoco: “Nda tanga elivulu lia Mateo vonjanja yimosi. Ndi sole oku tanga elivulu liaco lia sonehiwa lonjila yimue ya miuha, pole, omanu vakuavo va nõlapo oku tanga elivulu lia sonehiwa lonjila yimue ka ya miuhile.”

Momo lie elivulu liaco li kuetele esilivilo lia velapo komanu vo ko Japãu? Ndaño okuti omanu valua kofeka yo Japãu ka va kũlĩhĩle ovina vialua viatiamẽla Kembimbiliya, pole, va lekisa onjongole yoku tanga elivulu liaco. Omanu valua okuti ka va la mola Embimbiliya, cilo va kuete epuluvi lioku kuata onepa yimue Yembimbiliya kuenda oku yi tanga.

Momo lie kua nõliwila elivulu lia Mateo? Eci omanu vo ko Japãu va yeva ondaka “Embimbiliya,” va sokolola Yesu Kristu. Omo liaco, kua nõliwa elivulu lia Mateo momo mu sangiwa ulandu watiamẽla kocikoti cepata lia Yesu, oku citiwa kuaye, Ohundo a lingila Komunda kuenda ovitumasuku viatiamẽla koloneke via sulako. Ovina via tukuiwa ndeti via siata oku vetiya omanu vo ko Japãu.

 Akundi vo ko Japãu va fetika oku eca elivulu liokaliye komanu poku kundila konjo lanjo, kuenda eci va linga apasu. Manji umue ukãi wa soneha ndoco: “Cilo ndi kuete apuluvi alua oku sapela lomanu catiamẽla kondaka ya Suku vocikanjo cetu. Omo liaco, keteke liohongele yaco yilikasi kekumbi nda eca elivulu limosi lia Mateo!”

Onjila yipi akundi va kuama poku eca elivulu liokaliye komanu? Omanu valua vo kofeka yo Japãu va kũlĩhĩle olondaka ndeci: “Vombundi ya sukatela,” ‘oku imba olomota viondongo kolongulu,’ kuenda “ko ka sakalali lovina vi keya eteke likuavo.” (Mateo 6:34; 7:6, 13) Poku lilongisa okuti olondaka evi via Yesu Kristu, va komõha calua. Ovo eci va mola olondaka viaco velivulu lia Mateo, omunu lomunu pokati kavo wa popia hati: “Olonjanja viosi nda kuatele onjongole yoku tanga Embimbiliya, ndaño okuti ndi ci linga lika onjanja yimosi.”

Eci akundi va endele oku ka linga apasu komanu vana va tambuile elivulu lia Mateo, valua pokati komanu vaco va popia okuti, va tanga onepa yimue yelivulu liaco kuenda vakuavo va li tanga liosi. Ulume umue o kuete eci ci pitahãla 60 kanyamo wa sapuila kukundi umue hati: “Nda tanga elivulu liaco olonjanja vialua kuenje lia ndi vetiya calua. Ndi longise vali eci catiamẽla Kembimbiliya.”

Elivulu lia Mateo lia siata oku eciwavo kupange woku kundila kovitumãlo ku sangiwa omanu. Osimbu manji umue a kala oku kunda wa eca onumbi yaye yo Internet kufeko umue wa tambula elivulu. Eci pa pita owola yimosi ufeko waco wa tuma vo Internet esapulo ku manji poku popia okuti wa tanga ale onepa yimue yelivulu kuenda wa yonguile oku lilongisa ovina vikuavo. Eci pa pita osemana yimue ufeko waco wa fetika oku lilongisa Embimbiliya, kuenje wa fetikavo oku enda enda kolohongele.

Ci pitahãla 1.600.000 kohuluwa violokopia vielivulu lia Mateo, via siata oku tumiwa kakongelo o ko Japãu. Osãi losãi, Olombangi Via Yehova via siata oku eca alivulu alua komanu. Olondaka vioku fetika vielivulu liaco, via situlula ovisimĩlo viasonehi vielivulu liaco poku popia hati: “Tu lavoka okuti oku tanga elivulu lilo, li vetiya onjongole yove yoku tanga Embimbiliya.”