1, 2. (a) Nye Yesu a situlula catiamẽla koloneke via sulako? (b) Apulilo api tu konomuisa vocipama cilo?

 SETEKA oku sokolola Yesu wa tumala Komunda yo Oliveira okuti wa vandekela konembele yo Yerusalãi. Eye o kasi kumue lolondonge viaye vikuãla ndeci: Petulu, Andereu, Tiago, kuenda Yoano. Ovo va yevelela lutate ovina Yesu a kala oku va lomboluila viatiamẽla kocitumasuku cimue ca laikele oku tẽlisiwa kovaso yoloneke. Ocitumasuku caco ca situlula ovina via laikele oku pita vokuenda kuoloneke via sulako violuali lulo lua vĩha, eci Yesu a viala Vusoma wa Suku. Yesu wa va sapuila hati vokuenda kuotembo yaco, “ukuenje wa kolelua haeye wa lunguka” wa laikele oku kala onumiwa yaye palo posi, kuenda oku eca okulia kuespiritu kolondonge viaye votembo ya tukuiwa.​—Mateo 24:45-47.

² Noke vocitumasuku caco, Yesu wa tukula olusapo luafeko ekũi. (Tanga Mateo 25:1-13.) Vocipama cilo, tu  konomuisa apulilo amue ndeci: (1) Ulandu upi wa tukuiwa volusapo luaco? (2) Olombuavekua vakuekolelo via siata oku kapako ndati olonumbi violusapo luaco? (3) Koloneke vilo omunu lomunu pokati ketu o pondola oku kuatisiwa ndati lolusapo lua Yesu?

3. Kosimbu, alivulu etu a enda oku lombolola ndati olusapo luafeko ekũi, kuenda lonima yipi?

³ Vocipama ca pita, tua lilongisa okuti vokuenda kuanyamo a sulako, ukuenje wa lunguka wa siata oku linga apongoloko koku lombolola ovolandu amue Embimbiliya. Koloneke vilo, ukuenje wa kolelua wa siata oku lombolola calua catiamẽla kovina tu lilongisa kovolandu aco okuti, kovolandu wupopi wovindekaise ale kelomboloko liovitumasuku vimue ci sule. Kũlĩhĩsa olusapo lua Yesu luafeko ekũi. Alivulu etu kosimbu a enda oku lombolola okuti ondiyelo, ulela, kuenda ovipupu viulela, via kuatele elomboloko liocina cimue, ale omunu umue. Anga hẽ poku tiamisila utima kovina vitito, ci lekisa okuti esapulo lionjanga hailio lia leluka liolusapo ka lia kuatele esilivilo? Etambululo liepulilo eli li kuete esilivilo.

4. Ndomo tua lilongisa volusapo helie (a) o lomboloka sandombua? (b) Velie afeko ekũi?

⁴ Tu konomuisi esapulo liolusapo lua Yesu. Catete, sokolola omanu va tukuiwa volusapo luafeko ekũi. Helie sandombua? Yesu. Tua kũlĩha ulandu waco momo tete Yesu wa li tukula hati eye sandombua. (Luka 5:34, 35) Velie afeko ekũi? “Okacunda katito” okuti Akristão olombuavekua. Tua ci kũlĩha ndati? Afeko ekũi va tukuiwa volusapo, va sukilile oku liangiliya lolondiyelo viavo via taima toke eci sandombua a pitĩla. Sokolola eci Yesu a sapuila olondonge viaye olombuavekua hati: “Iñi pimo, kuenda olondiyelo viene vi taime. Lingi ndomanu va lavoka ñala yavo oku liuka kuvala.” (Luka 12:32, 35, 36) Upostolo Paulu kuenda upostolo Yoano va sokisa Olondonge via Yesu olombuavekua lafeko vawa. (2 Va Korindo 11:2; Esituluilo 14:4) Omo liaco, tu pondola oku limbuka okuti, olonumbi kuenda alungulo a sangiwa kelivulu lia Mateo 25:1-13, a tiamisiwila kolondonge via Yesu olombuavekua.

5. Yesu wa situlula ndati otembo olusapo luaye lua laikele oku tẽlisiwa?

⁵ Elungulo lia Yesu, li tiamisiwila kotembo yipi? Ovina Yesu a popia kesulilo liolusapo luaye, vi tu kuatisa oku kũlĩha oku li tiamisiwila. Eye wa popia hati: “Sandombua weya.” (Mateo 25:10) Vutala Wondavululi 15 Yevambi Linene wo 2013, tua lilongisa okuti ocitumasuku ci sangiwa kelivulu lia Mateo kocipama 24 kuenda 25, ci tiamisiwila kolotembo ecelãla “vioku iya” kua Yesu. Eci Yesu a tukula “oku iya” kuaye, wa tiamisila otembo yaco vokuenda kuohali ya piãla, eci  a keya oku sombisa omanu loku nyõla oluali lulo lua vĩha. Omo liaco, tu pondola oku popia tuti olusapo lua Yesu lu tẽlisiwa koloneke via sulako, pole, ‘o keya’ vokuenda kuohali ya piãla.

6. Esapulo lipi lia tukuiwa volusapo?

⁶ Esapulo lia tukuiwa volusapo luaco li tu longisa nye? Ivaluka elomboloko liulandu waco Wembimbiliya. Kelivulu lia Mateo kocipama 24, Yesu wa popia eci catiamẽla ‘kukuenje wa kolelua haeye wa lunguka.’ Ukuenje wa kolelua, o lomboloka ocimunga citito calume olombuavekua, va kasi oku songuila olondonge via Kristu vokuenda kuoloneke via sulako. Yesu wa lungula alume vaco hati, va sukila oku amamako lekolelo. Vocipama cikuavo, Yesu wa tukula olusapo luafeko ekũi, oco a lungule olondonge viaye viosi olombuavekua koloneke vilo via sulako. Vesapulo liaco wa va vetiya oku ‘lavulula,’ oco ka va ka pumbe onima yavo yoku ka kala kilu. (Mateo 25:13) Cilo, tu konomuisa olusapo luaco oco tu limbuke ndomo olombuavekua via siata oku kapako elungulo liaco.

7, 8. (a) Momo lie afeko va lunguka va lipongiyilile? (b) Olombuavekua via lipongiya ndati?

⁷ Volusapo Yesu wa popia hati, afeko va lunguka ka va sokisiwa lafeko va wulua, momo vana va lunguka va lipongiyile ale eci sandombua a pitĩla. Momo lie? Momo va lipongiyile ale kuenda va kala oku lavulula. Afeko vosi ekũi, va sukilile oku amamako loku lavulula kuenda oku tamisa olondiyelo viavo vokuenda kuteke. Pa kala etepiso pokati kafeko va wulua lafeko vatãlo va lunguka va lipongiyile ciwa, momo va nenele ulela u supa woku kapa volondiyelo viavo. Akristão olombuavekua vakuekolelo va siata oku li pongiyila ndati oku iya kua Yesu?

⁸ Olombuavekua via lipongiya oco vi tẽlise ocikele cavo toke kesulilo. Ovio via limbuka okuti upange va kasi oku lingila Suku, u va kisika oku yuvula ovokuasi oluali lulo lua Satana, kuenje va siata oku lekisa onjongole yoku ci linga. Olombuavekua via nõlapo oku fendela Yehova lekolelo, kuenda ka vi ci lingila omo okuti esulilo li kasi ocipepi, pole, vi ci linga omo liocisola vi kuetele Yehova kuenda Omõlaye. Handi vali, vi kasi oku amamako oku lekisa epandi, kuenda ka vi ecelela oku yapuisiwa lovokuasi oluali lulo, ovituwa vĩvi, kuenda epela. Olombuavekua vi kasi oku amamako oku nina ndekumbi, ndeci afeko va lunguka va lipongiyile lolondiyelo viavo okuti, va kevelela lepandi oku iya kua Sandombua, ndaño va simĩle okuti wa kala oku cilua.​—Va Filipoi 2:15.

9. (a) Elungulo lipi Yesu a eca liatiamẽla koku pekela konepa yespiritu? (b) Akristão olombuavekua va siata oku tambulula ndati kevilikiyo liti: “Tali sandombua weya”? (Tala etosi pombuelo yemẽla.)

 ⁹ Afeko va lunguka va lipongiyile osimbu sandombua keyile handi, momo va kala oku lavulula. Pole, volusapo afeko vosi ekũi va “suñila kuenje va pekela,” osimbu va kevelela sandombua wa kala ndu okuti wa cilua. Anga hẽ citava okuti Akristão olombuavekua koloneke vilo va “pekela” okuti ka va lavulula osimbu Kristu keyile? Citava. Yesu wa kũlĩhĩle okuti ndaño omanu vana va kuete onjongole yoku u talamẽla, citava okuti va pondola oku hongua kuenda oku tepulula ombili yavo yoku talamẽla oku iya kuaye. Omo liaco, Akristão olombuavekua vakuekolelo va siata oku likolisilako oco va amameko oku lavulula. Ndamupi? Volusapo, afeko ekũi vosi yavo va tava kevilikiyo liokuti: “Tali sandombua weya!” Pole, afeko va lunguka ovo lika va amamako oku lavulula. (Mateo 25:5, 6; 26:41) Cimuamue haico ci kasi oku pita vokuenda kuoloneke vilo via sulako okuti, Akristão olombuavekua vakuekolelo va kasi oku tambulula kevilikiyo liokuti: “Tali sandombua weya!” Ovo va tava okuti, Yesu ndopo wiya kuenje va kasi oku u talamẽla. a (Tala etosi pombuelo yemẽla.) Cilo, tu konomuisa onepa ya sulako yolusapo lua Yesu yi tiamisiwila kotembo yimue ya tukuiwa.

10. Nye tu pondola oku pula catiamẽla kombangulo afeko va lunguka va kuata lafeko va wulua?

¹⁰ Osimbu olusapo ka lua pitĩlile kesulilo, afeko va wulua va pinga ulela kafeko va lunguka, oco va kape volondiyelo viavo. Pole, afeko va lunguka va likala oku va kuatisa. (Tanga Mateo 25:8, 9.) Otembo yipi Akristão olombuavekua vakuekolelo va likala oku kuatisa umue wa sukilile ekuatiso? Ivaluka otembo olusapo luaco lu ka tẽlisiwa. Yesu okuti eye Sandombua, o keya ocipepi lesulilo liohali ya piãla oco a sombise omanu. Omo liaco, ombangulo yaco yi tiamisiwila kueci ci ka pita osimbu esulilo liohali ya piãla ka yeyile. Momo lie tu popela ndoco? Momo kotembo yaco, olombuavekua vi ka tambula ondimbukiso yavo ya sulako.

11. (a) Nye ci ka pita osimbu ohali ya piãla ka ya fetikile? (b) Nye afeko va lunguka va yonguile oku popia kafeko va wulua poku va sapuila vati kuendi ka landi ulela?

¹¹ Osimbu ohali ya piãla ka ya fetikile, olombuavekua viosi vakuekolelo vi kasi handi palo posi, vi ka tambula ondimbukiso yavo ya sulako. (Esituluilo 7:1-4) Noke liovina viaco olombuavekua vi ka enda kilu. Pole, sokolola otembo osimbu ohali ya piãla ka ya fetikile. Nye ci ka pita lolombuavekua vina okuti ka vi ka amamako oku lavulula kuenda vi ka pua ekolelo? Ka vi ka tambula ondimbukiso ya sulako. Kotembo yaco, Akristão vakuavo vakuekolelo va ka wavekiwa. Eci ohali ya piãla yi ka fetika, vana va wulua va ka sumua, momo va ka mola eci o Bavulono Yinene yi ka nyõliwa. Kotembo yaco oco lika va ka limbuka okuti ka va lipongiyilile oku iya kua Yesu. Nye ci ka pita lavo nda va pinga ekuatiso kotembo yaco? Etambululo li sangiwa volusapo. Afeko va lunguka ka va tavele oku eca ulela wavo kafeko va wulua, kuenje va  sapuila kafeko vaco, oco va ka lande ulela. Omo okuti vepuluvi liaco ca kala ale “vokati kuteke,” lomue vali wa ponduile oku landisa ulela kokuavo. Momo va ciluile calua!

12. (a) Vokuenda kuohali ya piãla, nye ci ka pita la vana va kala olombuavekua pole va pua ekolelo osimbu ka va tambuile ondimbukiso ya sulako? (b) Nye ci ka pita la vana va sokisiwa lafeko va wulua?

¹² Vokuenda kuohali ya piãla, olombuavekua vakuekolelo ka vi ka kuatisa omanu vana va pua ekolelo. Momo ka ku ka kala otembo yoku ci linga. Nye ci ka pita lomanu vana va pua ekolelo? Sokolola eci ca pita lafeko va wulua va endele oku ka landa ulela: “Sandombua weya. Kuenje ava va lipongiya ale va iñila laye kuvala, kuenje epito lia yikiwa.” Eci Yesu a keya lulamba waye kesulilo liohali ya piãla, o ka kongela olombuavekua vakuekolelo kilu. (Mateo 24:31; 25:10; Yoano 14:1-3; 1 Va Tesalonike 4:17) Pole, Yesu o ka likala vana va pua ekolelo. Ndeci ca pita lafeko va wulua, ovo va ka popia vati: “A Ñala, a Ñala, tu yuluileko!” Yesu o ka va tambulula ndati? Eye o ka eca etambululo ndeli a ka eca komanu vana va sokisiwa lolohombo hati: “Mopia lavo siti, Sia lo kũlĩhi!”​—Mateo 7:21-23; 25:11, 12.

13. (a) Momo lie ka tu sukilila oku sima okuti valua pokati Kakristão olombuavekua va ka pua ekolelo? (b) Momo lie tu ponduila oku popia tuti, olusapo lua Yesu lu situlula ekolelo a kuetele Akristão olombuavekua? (Tala ociluvialuvia kefetikilo liocipama cilo.)

¹³ Anga hẽ Yesu wa popia hati valua pokati kolombuavekua va ka pua ekolelo kuenje va ka piñanyiwa? Sio. Kelivulu lia Mateo ocipama 24, tu tangako okuti, Yesu wa lungula ukuenje wa kolelua haeye wa lunguka oco ka ka kale ondingaĩvi. Pole, ka ci lomboloka okuti wa lavokaile oku mola ocitangi caco. Cimuamue haico okuti, olusapo luafeko ekũi, lua kala elungulo. Omo okuti pa kala afeko vatãlo va wulua, kuenda afeko vatãlo va lunguka, omunu lomunu pokati Kakristão olombuavekua o sukila oku nõlapo oku lipongiya loku lavulula. Nda ka va ci lingile va pondola oku wulua kuenda oku pua ekolelo. Paulu wa ecavo elungulo limuamue ku va manjaye Akristão olombuavekua. (Tanga Va Heveru 6:4-9; sokisa Lesinumuĩlo 30:19.) Ndaño okuti wa eca elungulo liaco, wa kolelele va manjaye okuti va pondola oku ka tambula onima yavo. Elungulo li sangiwa volusapo luafeko ekũi, lia situlula okuti Yesu wa kolelelevo olombuavekua. Eye wa kũlĩha okuti omunu lomunu pokati Kakristão olombuavekua, o pondola oku amamako  lekolelo oco a tambule onima yi komõhisa!

14. Momo lie “olomeme vikuavo” vi ponduila oku kuatisiwavo lolusapo luafeko ekũi?

¹⁴ Olusapo lua Yesu, lua tiamisiwila Kakristão olombuavekua. Anga hẽ “olomeme vikuavo” vi pondolavo oku kuatisiwa lolusapo lua Yesu? (Yoano 10:16) Vi pondola! Ivaluka okuti esapulo liolusapo luaco lia leluka liti: “Lavululi.” Yesu onjanja yimue wa popia hati: “Eci mopia lene haico mopia la vosi, siti, Lavululi.” (Marko 13:37) Yesu o yongola okuti olondonge viaye viosi vi lipongiya kuenda vi lavulula. Kuenje Akristão vosi vocili va sukila oku kuama ongangu yiwa yolombuavekua okuti via pitisa kovaso upange woku kunda komuenyo wavo. Ivaluka okuti, afeko va wulua va pinga kafeko va lunguka ulela wavo. Pole, ka va tavele oku eca ulela. Ulandu owu u tu ivaluisa okuti, omunu lomunu pokati ketu o sukila oku amamako oku kolela ku Suku, oku lipongiya, kuenda oku amamako loku lavulula. Lomue o pondola oku tu lingilako ovina viaco. Omo okuti Yesu Kristu Onganji yesunga ndopo wiya, omunu lomunu pokati ketu o ka lombolola kokuaye ovina a linga. Omo liaco, tu sukila oku liangiliya!

15. Momo lie olohuela via Kristu la ndombua yaye vi sanjuisila Akristão vosi vocili?

¹⁵ Akristão vosi va lavoka lesanju oku tẽlisiwa kuolohuela via tukuiwa volusapo lua Yesu. Kovaso yoloneke, noke liuyaki wo Harmagedo, Akristão olombuavekua va ka kala ondombua ya Kristu. (Esituluilo 19:7-9) Omanu vosi palo posi va ka kuatisiwa luvala u ka lingiwa kilu. Momo lie? Momo uvala waco u ka nena Uviali wa lipua komanu vosi. Omo liaco, ci kale okuti tu kuete elavoko lioku enda kilu ale lioku kala palo posi otembo ka yi pui, tua amamiko oku lipongiya kuenda oku lavulula. Nda tua ci linga, tu ka kuata omuenyo wesanju Yehova a tu pongiyila!