OKU sokisa uti wa posoka wosedro wo ko Levanone, luti woliveira wa penga, citava okuti ovina viaco ka vi komõhisa calua. Pole, uti woliveira u pondola oku kala otembo yalua ndaño ka u tapeliwa ovava. Oviti vimue vi pondola oku kala 1.000 kanyamo. Omo okuti olombombo viuti wo oliveira vi pondola oku iñila calua kosi, nda uti waco wa tetiwa u yova vali. Omo liaco, osimbu olombombo via amamako oku kala kosi, uti waco u yova vali.

Ulume umue o tukuiwa hati Yovi wa kuatele ekolelo liokuti, nda wa fa o pondola oku kala vali komuenyo. (Yovi 14:13-15) Eye wa tukula ocindekaise cuti umue wo oliveira, oco a lekise okuti wa kolelele kuloño wa Suku woku u pindula. Yovi wa popia hati: “Nda uti u timbuiwa kuli elavoko okuti u yova vali.” Ndaño kua pita otembo yalua okuti ombela ka yi loki, pole, eci yi fetika oku loka, uti wo oliveira wa kukutile “u yova ovisapa ndocikũla cokaliye.”​—Yovi 14:7-9.

Ndeci ukuakulima a kuata onjongole yoku mola uti wo oliveira wa tetiwa okuti noke u yova vali, cimuamue haico ci pita la Yehova Suku okuti o kuetevo onjongole yoku pindula afendeli vaye kuenda omanu vakuavo. (Mateo 22:31, 32; Yoano 5:28, 29; Ovilinga 24:15) Sokolola esanju tu ka kuata poku yolela omanu vana va fa okuti va ka pinduiwa!