1-3. Momo lie Paulu a kolelele okuti Yehova wa laikele oku u kuatisa? (Tala ociluvialuvia kefetikilo liocipama cilo.)

NDA wa kalele Ukristão wocili ko Roma kocita catete, nda wa kala kotembo yimue yohali. Akristão vocili va lambalaliwile calua la va Roma. Momo va va lundilile vati, va imba ondalu vo Roma, kuenda ka va solele omanu. Valua pokati ka vamanji va tualiwa volokayike. Vakuavo va liwa lovinyama. Kua kalavo vamue va valeliwa voviti, kuenje va timihĩwa lomuenyo oco ulienge waco wece ocinyi kuteke. Eteke leteke wa kũlĩhĩle okuti, ovina viaco via laikele oku pita love.

² Vokuenda kuoloneke viaco viohali, upostolo Paulu wa kapiwile vokayike. Citava okuti wa lipulile nda vamue pokati ka vamanji va laikele oku u kuatisa, omo lioku sokolola ovitangi a liyakele lavio kosimbu okuti lomue wo kuatisile. Pole, Paulu wa tambuile ekuatiso lia tunda ku Yehova vonduko ya Ñala Yesu. Eye wa soneha ndoco: “Ñala, eye wa ñaila onyima, haeye wa nyiha ongusu.” Yesu wa ecele ku Paulu ongusu a sukilile. Omo liaco, Paulu wa soneha ndoco:  “Nda popelua vomẽla wohosi.”—2 Timoteo 4:16, 17. * (Tala etosi pombuelo yemẽla.)

³ Paulu wa ivaluka ndomo Yehova o kuatisile kosimbu. Momo, wa kolelele okuti Yehova wa laikele oku u pamisa oco a pandikise kovitangi a kala oku liyaka lavio kuenda vikuavo a laikele oku pita lavio kovaso yoloneke. Omo okuti wa kũlĩhĩle ovitangi viaco wa soneha ndoco: “Ñala o muluisa kevĩho liosi.” (2 Timoteo 4:18) Paulu wa limbukile okuti, ndaño vamanji ka va ponduile oku u kuatisa kovitangi a liyaka lavio, pole wa kolelele kekuatiso li tunda ku Yehova kuenda ku Yesu. Momo ka kuatele atatahãi.

4, 5. (a) Helie o pondola oku ku ĩha ekuatiso o sukila olonjanja viosi? (b) O pondola oku pamisa ndati ukamba wove la Yehova?

⁴ Anga hẽ wa liyakele ale locitangi cimue kuenje wa kala ndu okuti lomue oku kuatisa? Citava okuti wa tundisiwa kupange wove woku sanda eteku, ale wa lambalaliwile kosikola. Pamue wa kala oku vela calua, ale wa liyaka locitangi cikuavo. Kuenje wa pinga ekuatiso komanu vamue pole, wa sumuile calua omo okuti ka va ku ĩhile ekuatiso wa sukilile. Ocili okuti kuli ovitangi vimue omanu ka va tẽla oku tetulula. Nye o sukila oku linga? Embimbiliya li tu sapuila okuti tu sukila oku “Kolela Yehova.” (Olosapo 3:5, 6) Ove hẽ wa kolela okuti Yehova o ku kuatisa muẽle? Oco! Tu pondola oku tanga eci catiamẽla kovolandu alua a sangiwa Vembimbiliya a tu vetiya oku tava okuti, Yehova wa siata oku kuatisa afendeli vaye.

⁵ Nda wa limbuka okuti omanu ka va yongola oku eca ekuatiso o sukila, ku ka sumue. Pole, sokolola ovitangi viaco ndepuluvi lioku kolela ku Yehova ndeci Paulu a linga. Ovina viaco vi ku ĩhavo epuluvi lioku limbuka ndomo Yehova a pondola oku ku tata. Nda wa kolela ku Yehova, ukamba wove laye u pamisiwa.

6. Momo lie pamue ka ci lelukila oku kolela ku Yehova eci tu liyaka lovitangi?

⁶ Citava okuti o kuete ocitangi cimue ci ku sumuisa. Pamue wa likolisilako oku ci tetulula, loku likutilila ku Yehova oco a ku kuatise. Cilo o pondola hẽ oku tulumũha omo lioku kolela okuti eye o ku kuatisa? Citava okuti o ci linga! (Tanga Osamo 62:8; 1 Petulu 5:7.) Nda o yongola oku kuata ukamba wocili la Yehova, o sukila oku lilongisa oku kolela kokuaye. Pole, pamue ka ci leluka oku ci linga. Momo lie? Momo pamue Yehova ka tambulula ohutililo yove vepuluvi liaco.—Osamo 13:1, 2; 74:10; 89:46; 90:13; Havakuki 1:2.

7. Momo lie Yehova pamue ka tambuluila olohutililo vietu vepuluvi liaco?

⁷ Momo lie pamue Yehova ka tambuluila olohutililo vietu vepuluvi liaco? Embimbiliya li lekisa okuti Yehova eye Isietu, kuenje etu tumãla vaye. (Osamo  103:13) Isia ka eci komõlaye ovina viosi a pinga, ale pamue oku vi eca kokuaye vepuluvi liaco. Momo wa kũlĩha okuti pamue omõlaye o yongola ocina cimue vocipikipiki, pole noke ka ci yongola vali. Isia wa kũlĩha ovina vi panga ciwa komõlaye, kuenda ndomo vi kuatisa vakuavo. Eye wa kũlĩhavo ovina omõla a sukila, kuenda otembo a pondola oku vi kuata. Nda isia eca komõla ovina viosi a pinga vepuluvi liaco, o linga upika womõlaye. Yehova Isietu wo kilu o tu kuetele ocisola. Omo okuti eye Ululiki wetu ukualondunge, wa kũlĩha ovina tu sukila, kuenda o nõla epuluvi lia sunguluka lioku tu ĩha ovina tua pinga. Eli olio esunga lieci tu sukilila oku kevelela oco tu limbuke ndomo Yehova a tambulula olohutililo vietu.—Sokisa lelivulu lia Isaya 29:16; 45:9.

8. Nye Yehova a tu likuminya okuti tu pondola oku ci linga oco tu pandikise?

⁸ Ivalukavo okuti Yehova wa kũlĩha ovina omunu lomunu pokati ketu a pondola oku pandikisa lavio, kuenda evi ka pondola. (Osamo 103:14) Eye o tu ĩha ongusu tu sukila. Pamue tu sima okuti ka tu pondola vali oku linga ovina vimue. Pole, Yehova wa likuminya okuti nda ovitangi via livokiya kuenje ka tu tẽla oku pandikisa lavio, eye o tu “muisavo evelo.” (Tanga 1 Va Korindo 10:13.) Oku limbuka okuti Yehova wa kũlĩha ovitangi tu pondola oku pandikisa lavio ci tu lembeleka calua, kuenda ci tu vetiya oku kolela kokuaye.

9. Nye tu sukila oku linga nda tua pinga ekuatiso ku Yehova vohutililo pole, ka tu tambulula vepuluvi liaco?

⁹ Nda tua likutilila ku Yehova oco a tu kuatise, pole tua limbuka okuti ka tu tambulula vepuluvi liaco, tu sukila oku kuata epandi. Ivaluka okuti Yehova o yongola oku tu kuatisa, pole, o kevelela lepandi toke vepuluvi lio sungulukila oco a tu ĩhe ovina tu sukila. Embimbiliya li tu sapuila ndoco: “Yehova o talamẽla oku u kuatisi; oco o katuka oku [vu] lingi ohenda. Momo Yehova eye Suku yesunga; ava vo wimbila ovaso va sumũlũha.”—Isaya 30:18.

10-12. (a) Momo lie pamue ka ci lelukila oku tata umue ukuepata o vela? (b) Nda wa kolela Yehova poku liyaka lovitangi, ci ku kuatisa ndati oku pamisa ukamba wove laye? Tukula ulandu umue.

¹⁰ Citava okuti o liyaka lovitangi vialua, kuenje o kala nda Paulu wa sukilile oku popeliwa “vomẽla wohosi.” (2 Timoteo 4:17) Nda o kasi oku liyaka lovitangi ndevi via Paulu, o sukila oku kolela ku Yehova. Citava okuti o kasi oku liyaka locitangi coku tata umue ukuepata o vela. Pamue o likutilila ku Yehova okuti oku kuatisa oku nõla onjila ya sunguluka oco o pamisiwe. * (Tala etosi pombuelo yemẽla.) Nda wa ivaluka okuti Yehova o lete ocitangi cove kuenda wa ci kapako, o kuata ombembua vutima. Yehova o pondola  oku ku kuatisa oku pandikisa loku kolela kokuaye.—Osamo 32:8.

¹¹ Olonjanja vimue ku limbuka okuti Yehova o kasi oku ku kuatisa. Pamue olondotolo ka vi tava kueci ci sukila oku lingiwa. Ale o kuata elavoko liokuti epata liove li ku lembeleka, pole o limbuka okuti lia linga ovina vi ku sakalaisa. Omo liaco, kolela Yehova olonjanja viosi oco o pamisiwe. Amamako oku kuata ukamba laye. (Tanga 1 Samuele 30:3, 6.) Eci o limbuka ndomo Yehova a siata oku ku kuatisa, ukamba wove laye u pamisiwa.

¹² Eci oco ca pita la manji umue o tukuiwa hati Linda. * (Tala etosi pombuelo yemẽla.) Eye wa tatele olonjali viaye eci via kala oku vela osimbu ka via file handi. Eye wa popia hati: “Eci nda liyaka locitangi caco, ame kumue lulume wange, kuenda manjange, pamue ka ca lelukile oku kũlĩha eci tua sukilile oku linga. Olonjanja vimue tua kala ndu okuti ka tu kuete omunu o tu kuatisa. Pole, cilo tua limbuka ndomo Yehova a tu kuatisa kotembo yaco. Eye wa pamisa ekolelo lietu, kuenda wa tu ĩha ovina tua sukilile ndaño ca kala ndu okuti ka tua kuatele onjila tu kuama.”

13. Oku kolela ku Yehova ca kuatisa ndati manji Rhonda oku pandikisa kovilunga a liyaka lavio?

¹³ Ekolelo tu kuetele Yehova li tu kuatisa oku pandikisa poku liyaka lovilunga. Eci oco ca pita la manji umue o tukuiwa hati Rhonda. Ulume waye okuti Hambangiko ya Yehova wa li nyãla laye. Vokuenda kuotembo yaco manjaye wa limbuka okuti o kuete uvei umue u tukuiwa hati lupus. Noke liolosãi vimue ukãi wa manjaye weya oku fa. Eci ovitangi manji Rhonda a liyaka lavio via kala oku tepuluka, wa fetika upange wakundi votembo yosi. Pole, noke inaye weya oku fa. Manji Rhonda wa tẽla ndati oku pandikisa kovilunga via tukuiwa ndeti? Eye wa popia hati: “Ndaenda oku likutilila ku Yehova oloneke viosi, ndaño poku nõla onjila nda sukilile oku kuama poku linga ovina vimue. Poku ci linga nda limbuka okuti Yehova omunu wocili. Ovitangi viaco via ndi longisa oku kolela lika kokuaye okuti si likolela ame muẽle, ale omunu ukuavo. Yehova wa nyiha ekuatiso liocili, kuenda wa ndi tata kovina viosi nda sukilile. Omo liaco—nda limbuka okuti nda linga ovina viaco lekuatiso lia Yehova.”

14. Yehova o pondola oku ku kuatisa ndati nda umue ukuepata liove wa tundisiwa vekongelo?

¹⁴ Sokolola ocitangi cimue okuti ka ca lelukile oku ci tetulula. Citava okuti umue ukuepata liove wa tundisiwa vekongelo. Ove wa kũlĩha eci Embimbiliya li popia okuti oco tu sukila oku linga poku kala lomanu vana va tundisiwa vekongelo. (1 Va Korindo 5:11; 2 Yoano 10) Omo okuti o sole ukuepata liove, pamue o sima okuti ka ci leluka oku pokola konumbi yaco Yembimbiliya. Ove hẽ wa kolela okuti Isiove wo kilu o pondola oku ku ĩha ongusu yoku pokola kokuaye lekolelo? O sima hẽ okuti ocitangi caco ci ku ĩha epuluvi lioku amẽla ku Yehova?

15. Momo lie Adama ka pokuilile ku Yehova?

¹⁵ Ocitangi eci ci sokisiwa ndati  leci ca pita lulume watete Adama? Eye wa tavele hẽ okuti o pondola oku tomba olonumbi via Yehova, kuenje amamako oku kala komuenyo? Sio, momo Adama “ka kembiwile.” (1 Timoteo 2:14) Momo lie ka pokuilile ku Yehova? Adama wa lia kepako ukãi waye a ecele kokuaye, momo wa lekisile ocisola ca lua kukãi waye okuti ku Yehova ci sule. Adama wa yevelela kondaka yukãi waye, pole ka pokuile kocihandeleko ca Yehova.—Efetikilo 3:6, 17.

16. Kulie tu sukila oku pamisa ocisola cetu, kuenda momo lie?

¹⁶ Onjila Adama a nõla, yi tu longisa okuti tu sukila oku lekisa ocisola calua ku Yehova okuti eci tua siata oku lekisa komunu umue ci sule. (Tanga Mateo 22:37, 38.) Nda tu lekisa ocisola calua ku Yehova, tu pondola oku kuatisa vakuepata lietu lonjila yimue ya sunguluka, ci kale okuti Olombangi Via Yehova ale sio. Amamako oku pamisa ocisola cove ku Yehova kuenda kolela kokuaye. Nda wa sakalala la umue ukuepata wa tundisiwa vekongelo, likutilila ku Yehova kuenda u sapuila ovisimĩlo viove viosi. * (Tala etosi pombuelo yemẽla.) (Va Roma 12:12; Va Filipoi 4:6, 7) Ndaño wa sumua calua, sokolola ocitangi caco ndepuluvi o kuete lioku pamisa ukamba wove la Yehova. Kolela kokuaye kuenda ivaluka okuti, nda wa lekisa epokolo o tambula onima yiwa.

17. Nda tua amamako oku linga upange woku kunda tu kolela okuti Yehova o linga nye?

¹⁷ Momo lie Yehova a yovuila Paulu “vomẽla wohosi”? Paulu wa popia hati: “[Yehova] wa nyiha ongusu yoku kunda ondaka.” (2 Timoteo 4:17) Yehova wa tu ĩhavo upange woku kunda “ondaka yiwa” kuenda o tu tukula hati, “tulondingupange” viaye. (1 Va Tesalonike 2:4; 1 Va Korindo 3:9) Nda tu amamako oku pesila otembo yalua kupange tu kasi oku linga, tu pondola oku kolela okuti Yehova o ka tu ĩha ovina viosi tu sukila. (Mateo 6:33) Kuenje, ci leluka oku kevelela ku Yehova oco atambululo olohutililo vietu.

18. O pondola oku kolela ndati ku Yehova oco o pamise ukamba wove laye?

¹⁸ Pamisa ukamba wove la Yehova eteke leteke. Eci o liyaka lovitangi okuti vi ku sakalaisa calua, tenda ovitangi viaco ndepuluvi lioku pamisa ukamba wove la Yehova. Lilongisa, kuenda sokolola ovina o tanga Vondaka ya Suku yi sangiwa Vembimbiliya. Amamako oku likutilila ku Yehova loku u vumba. Nda wa linga ovina viaco, o pondola oku kolela okuti Yehova oku kuatisa oku pandikisa kovitangi viosi o liyaka lavio cilo, kuenda evi vi keya kovaso yoloneke.