Vokuenda kuanyamo alua alivulu etu a enda oku lombolola okuti, onduko Goge ya Magoge, yi tiamisiwila ku Satana, noke yoku tundisiwa kilu. Momo lie? Momo elivulu Liesituluilo li tukula Satana hati, eye usongui womanu voluali luosi, oco va ñualelepo afendeli va Suku. (Esituluilo 12:1-17) Omo liaco, tua kuatele elomboloko liokuti, pamue Goge onduko yikuavo ya Satana.

Pole, omanu ka va kuatele elomboloko lia suapo liatiamẽla kelomboluilo liaco. Sokolola ulandu u kuãimo ndeci: Yehova poku lombolola eci catiamẽla kenyõleho lia Goge wa popia hati, wa laikele oku “eca [Goge] kolonjila viñi viñi vina vi lialia ositu, kuenda ovinyama viovusenge okuti o liwa.” (Esekiele 39:4) Noke Yehova wa amisako loku popia hati: “Eteke liaco ngeca ku Goge usenge wayambo vofeka ya Isareli.” (Esekiele 39:11) Omo okuti Satana ociluvo cimue cespiritu ka ci muiwa, citava ndati okuti o liwa lolonjila, kuenda lovinyama vio vusenge? Wa laikele oku kendiwa ndati palo posi? Embimbiliya li lombolola okuti, Satana o ka imbiwa vekungu muna a ka kala ci soka 1.000 kanyamo. Eye ka ka liwa, ale oku kendiwa.—Esituluilo 20:1, 2.

Embimbiliya li lekisa okuti, kesulilo lieci ci soka 1.000 kanyamo, Satana o kopiwa vekungu, noke o ka “kemba olofeka vi kasi kavindi akuãla o kilu lieve, okuti Goge la Magoge, kuenje o va konga ovita.” (Esituluilo 20:8) Pole, nda Satana wa kalele Goge, ci lomboloka okuti nda wa li yapuisa eye muẽle. Omo liaco, onduko “Goge” ka yi tiamisiwila ku Satana ndomo ca lekisiwa kelivulu lia Esekiele, ale kelivulu Liesituluilo.

Helie Goge ya Magoge? Oco epulilo eli li tambuluiwe, tu sukila oku konomuisa eci Embimbiliya li lombolola oco tu limbuke omanu va ka ñualelapo afendeli va Suku. Embimbiliya li tukula uyaki u ka lingiwa la ‘Goge ya Magoge,’ uyaki u ka lingiwa lo “Soma yo ko Norte,” kuenda uyaki u ka lingiwa “lolosoma viokilu lieve.” (Esekiele 38:2, 10-13; Daniele 11:40, 44, 45; Esituluilo 17:14; 19:19) Anga hẽ ovoyaki aco a litepa? Sio, ka a litepele. Citava okuti Embimbiliya li tukula olonduko via litepa oco li lombolole uyaki umuamue. Momo lie tu popela ndoco? Momo Embimbiliya li tu sapuila okuti, olofeka viosi vio kilu lieve vi ka panga onepa kuyaki waco wa sulako okuti u ka fetika luyaki wo Harmagedo.—Esituluilo 16:14, 16.

Eci tu sokisa ovinimbu viosi Viembimbiliya viatiamẽla kuyaki wa sulako woku ñualelapo afendeli va Suku, tu kuata elomboloko liokuti,  onduko Goge ya Magoge, ka yi tiamisiwila ku Satana. Pole, onduko Goge ya Magoge yi tiamisiwila kocimunga cimue colofeka. Anga hẽ “Soma yo ko Norte” eye o ka songuila ocimunga comanu vaco? Ka tua kũlĩhĩle nda eye o ka ci songuila. Pole, elomboluilo eli soketi li tiamisiwila kolondaka Yehova a popia viatiamẽla ku Goge viokuti: “O tunda kocitumãlo cove kuna ka ku ci, ka ku ci, ko Norte. O [ka] tunda lapata alua aiñi aiñi kumosi love, vosi va endela kotuvalu, ocitundo cinene, olohoka via lua.”—Esekiele 38:6, 15.

Uprofeto Daniele una wa kala kotembo yimuamue la Esekiele wa popia eci catiamẽla ku soma yo ko Norte hati: ‘Asapulo a ka tunda kutundilo lo ko Norte a ko sakalaisa, kuenje o tunda lokufungula kua lua ha kundula loku nyanyõla valua. O tamulũila olombalaka vielombe liaye pokati kokalunga lomunda yi kola haiyo yulamba. Haimo esulilo liaye liya, kuenje lomue u kuatisa.’ (Daniele 11:44, 45) Olondaka evi vi sokisiwa leci elivulu lia Esekiele li lombolola kueci Goge a ka linga.—Esekiele 38:8-12, 16.

Nye ci ka pita kesulilo liuyaki wa sulako? Daniele o tu sapuila hati: “Koloneke viaco [viuyaki wo Harmagedo,] ku katuka Mingeli [okuti Yesu Kristu], ombiali yinene haeye ombindikiyi yomãla vepata liene [tunde kunyamo wo 1914]. Oco ku [ka] kala otembo yohali, okuti ya linga ndoyo ka ya leya tunde kefetikilo liolofeka toke opo. Koloneke viaco, epata liene li popelua, okuti u wosi onduko yaye yi sangiwa okuti ya sonẽhĩwa velivulu.” (Daniele 12:1) Ovina tu tanga kelivulu Liesituluilo 19:11-21, vi sokisiwa lovina Yesu a ka linga.

Pole, helie “Goge la Magoge” wa tukuiwa kelivulu Liesituluilo 20:8? Onduko eyi yi tiamisiwila komanu vosi va lekisa esino ku Yehova okuti, va ka ñualelapo afendeli vaye vokuenda kuoseteko ya sulako kesulilo lieci ci soka 1.000 kanyamo. Ovo va ka lekisavo esuvu ndeci Goge ya Magoge a linga okuti, omanu valua voluali va ka ñualelapo afendeli va Suku kesulilo liohali ya piãla. Ndeci ci ka pita lolofeka vi ka kunduiwa vuyaki wo Harmagedo, Goge la Magoge o ka kunduiwavo. (Esituluilo 19:20, 21; 20:9) Omo liaco, ca sunguluka okuti, omanu vosi vakuesino, kesulilo lieci ci soka 1.000 kanyamo va ka tukuiwa vati: “Goge la Magoge.”

Omo okuti tua siata oku kapako ovina tu lilongisa Vembimbiliya, tu lavoka oku kũlĩha una o ka kala “soma yo ko Norte” kovaso yoloneke. Pole, ndaño ka tua kũlĩhĩle esunga lieci olofeka vi ka ñualelapo afendeli va Suku, tua kolela kovina vivali ndeci: (1) Goge ya Magoge kuenda olohoka viaye va ka yuliwa kuenje va ka kunduiwa. (2) Soma yetu Yesu Kristu, o ka popela afendeli va Suku loku va nenela oluali luokaliye luombembua kuenda oku kolapo kuocili.—Esituluilo 7:14-17.