1-3. Momo lie manji umue ukãi a tavela okuti Yehova wa kũlĩhĩle ovina a sukilile?

MANJI Lana okuti ukundi wotembo yosi, lalimue eteke a ivalako ulandu a pita lawo eci a ka nyulile ofeka yo Alemanya kunyamo wo 2012. Eye wa limbukile okuti Yehova wa tambulula olohutililo viaye vivali. Osimbu a kala vomboyo oco a ende kocila colombalãu, wa pinga ku Yehova okuti u kuatisa oku sanga omunu umue oco o kundile. Eci a pitĩla kocila colombalãu wa limbuka okuti ombalãu a laikele oku endela yenda lika eteke likuavo. Noke manji Lana wa likutilila oco Yehova o kuatise, momo ka kuatele vali olombongo, kuenda wa sukilile oku sanga ocitumãlo cimue oco a lalemo uteke waco.

² Osimbu ka malele oku likutilila wa yeva umue wa popia hati: “Ciwa a Lana, nye o kasi oku linga kulo?” Noke wa limbuka okuti omunu wo lama, umalẽhe umue ukuenje va tangelele kosikola yimuamue. Umalẽhe waco wa kala la inaye kuenda inakulu yaye veyile oku u sindikila kocila colombalãu oco a  ende kofeka yo Afrika do Sul. Eci manji Lana a va sapuila ocitangi caye ina yumalẽhe waco kumue la inakulu yaco vo laleka oco a ende konjo yavo. Eci va pitĩla konjo yaco vo pulisa ovina vialua a lilongisa Vembimbiliya, kuenda eci catiamẽla kupange wakundi votembo yosi.

³ Keteke likuavo komẽle noke yoku lia ongawu, manji Lana wa eca atambululo alua kapulilo vo lingile atiamẽla Kembimbiliya. Noke wa pinga kokuavo etendelo liotelefone yavo oco a li ece ku manji umue o pondola oku amamako oku tambulula apulilo avo. Kuenje, manji Lana wa tiukila ciwa konjo yaye, kuenda toke cilo o kasi oku amamako kupange wakundi votembo yosi. Eye wa limbuka okuti Yehova wa siata oku yevelela olohutililo viaye, wa kũlĩha ovina a sukila, kuenda wo kuatisa.—Osamo 65:2.

4. Nye tu sukila oku konomuisa?

⁴ Nda tu kasi oku liyaka locitangi cimue, ca leluka oku likutilila ku Yehova oco a tu kuatise, momo o sanjuka calua poku yevelela olohutililo vietu. (Osamo 34:15; Olosapo 15:8) Pole, ohutililo ya Yesu yi tu longisa okuti, kuli ovina vialua tu sukila oku kongela vohutililo. Vocipama cilo tu konomuisa ndomo apingilo akuãla a sulako vohutililo ya Yesu a pondola oku tu kuatisa oku kala vakuacili ku Yehova.—Tanga Mateo 6:11-13.

5, 6. Momo lie Yesu a tu longisila oku pinga “okulia kuetu” ndaño okuti pamue tu kuete okulia kualua?

⁵ Yesu wa tu longisa oku pinga “okulia kuetu,” pole, ka popele hati, “okulia kuange.” Manji umue ukuakunyula akongelo o tukuiwa hati Vitor o kasi vocifuka co Afrika wa lombolola ndoco: “Olonjanja vialua nda siata oku eca olopandu ku Yehova omo okuti ame kumue lukãi wange ka tua siatele oku sokolola calua oku ku tunda okulia kueteke likuavo, ale oku sakalala nda helie o feta olombongo vionjo tu kasi. Momo, vamanji va siata oku tu ĩha ovina tu sukila eteke leteke. Pole, volohutililo viange nda siata oku kongelamo vamanji vana va tu kuatisa oco va pandikise kovitangi vioku sanga olombongo.”

⁶ Citava okuti tu kuete okulia kualua, pole, vamanji valua olohukũi. Kulivo vamanji vamue va siata oku pita lovilunga. Ka tu sukila lika oku va kongela volohutililo vietu, pole, tu sukilavo oku linga cimue ci pondola oku va kuatisa. Tu ci linga poku li tepela lavo ovina tu kuete. Tu pondolavo oku eca olombanjaile vietu oco vi kuatise kupange wafendeli va Yehova u kasi oku lingiwa kolonepa viosi violuali. Tua kũlĩha okuti olombanjaile vietu via siata oku kuatisa vamanji va sukila ekuatiso.—1 Yoano 3:17.

7. Yesu wa tu longisa ndati lolondaka viokuti: ‘Ko ka sakalali leteke likuavo’?

⁷ Eci Yesu a mala oku longisa ohutililo yaye, wa tu longisavo oku yuvula oku tiamisila utima wetu kovokuasi. Noke wa popia hati, nda Yehova wa siata oku tata ciwa olonelẽho vio vusenge, ‘a vakuekolelo litito ko walisi hẽ ca velapo vali? Omo liaco, ko ka sakalali hoti, tu wala nye?’ Noke wa pitulula olondaka viokuti: ‘Ko ka sakalali leteke likuavo.’ (Mateo 6:30-34) Ka tu sukila oku sakalala lovina vi keya kovaso yoloneke. Pole, tu sukila oku sanjukila ovina tu kuete eteke leteke. Tu pondola oku pinga volohutililo vietu onjo yoku kala, oku sanga upange woku sanda eteku oco tu tekule epata lietu. Tu pondolavo oku pinga olondunge oco vi tu kuatise oku nõla onjila ya sunguluka, kuenda ovina viatiamẽla kuhayele wetu. Pole, kuli ovina vi kuete esilivilo lia velapo tu sukilavo oku pinga vohutililo.

8. Olondaka via Yesu viatiamẽla kokulia kuetu kuetaili vi tu ivaluisa nye? (Tala ociluvialuvia kefetikilo liocipama cilo.)

 ⁸ Olondaka via Yesu viatiamẽla kokulia kuetu kuetaili vi tu ivaluisa olondaka vikuavo a popia hati: “Omunu ka muila omuenyo kombolo lika, te kondaka yosi yi tunda vomẽla wa Suku.” (Mateo 4:4) Omo liaco, tu sukila oku likutilila oco Yehova amameko oku tu longisa kuenda oku tu ĩha ovina vi pamisa ukamba wetu laye.

9. Momo lie akandu etu a sokisiwila lolofuka?

⁹ Yesu wa popia hati: “Tu ecele okulueya kuetu.” Onjanja yikuavo wa popia hati: “Tu ecele akandu etu.” (Mateo 6:12; Luka 11:4) Yesu wa popia olondaka evi momo akandu etu a sokisiwa lolofuka. Kunyamo wo 1951, Utala Wondavululi wa lombolola okuti, nda tu lueya ci sokisiwa loku levala Yehova. Tua levala ku Yehova ocisola kuenda epokolo. Nda tu lueyela Yehova Suku ka ci lekisa okuti tu kasi oku eca ovina tua levala kokuaye. Utala waco Wondavululi wa lombolola okuti, nda Yehova wa panga, o pondola oku tepa ukamba wetu laye. Noke wa amisako ndoco: “Ekandu li lomboloka ekambo liocisola ku Suku.”—1 Yoano 5:3.

10. Momo lie Yehova a ponduila oku ecela akandu etu, kuenda nye tu yevite vutima catiamẽla kondaka yaco?

¹⁰ Tu kuete esanju omo liesokiyo Yehova a linga liocisembi ca Yesu oco tu tambule ongecelo yakandu! Tu sukila ongecelo ya Yehova oloneke viosi.  Ndaño okuti tunde eci Yesu a fa omo liakandu etu pa pita ale 2.000 kanyamo, pole, tu kuatisiwa locisembi caco oloneke viosi. Tu sukila oku eca olopandu ku Yehova olonjanja viosi omo liombanjaile yaco yi kuete esilivilo lia velapo. Lomue pokati ketu o kuete epondolo lioku feta ocisembi ca sukiliwile oco tu yovuiwe kekandu kuenda kolofa. (Tanga Osamo 49:7-9; 1 Petulu 1:18, 19.) Olondaka viohutililo Yesu a longisa viokuti “tu ecele akandu etu,” vi tu ivaluisa okuti, tu sukila ocisembi kuenda vamanjetu va ci sukilavo. Yehova o yongola okuti tu va sokolola kuenda tu sokololavo ukamba wavo laye. Vovina viaco mua kongela oku va ecela lonjanga eci va tu lueyela. Ndaño okuti vamanji va siata oku tu lueyela kovina vitito, pole nda tu va ecela tu lekisa okuti tu va kuetele ocisola. Tu lekisavo olopandu omo Yehova a siata oku tu ecela.—Va Kolosai 3:13.

11. Momo lie ci kuetele esilivilo oku ecela vakuetu?

¹¹ Omo okuti ka tua lipuile, pamue ka ci leluka kokuetu oku ecela vana va tu lueyela. (Ovisila 19:18) Nda tua fetika oku popia catiamẽla kovina va siata oku tu linga, vamanji vakuavo vekongelo pamue va li kongelavo vombangulo yaco, kuenje ci pondola oku tepa ukamba u kasi vekongelo. Nda tua ecelela okuti ovina viaco viamamako ceca uvangi wokuti, ka tua kapeleko ombanjaile yocisembi Suku a tu ĩha, kuenje, ka tu tambula asumũlũho. (Mateo 18:35) Nda ka tu ecela vamanji, Yehova ka tu ecelavo. (Tanga Mateo 6:14, 15.) Omo liaco, nda tu yongola okuti Yehova o tu ecela, tu sukila oku yuvula oku linga ovina a nyãle.—1 Yoano 3:4, 6.

12, 13. (a) Nye ca pita la Yesu noke liepapatiso liaye? (b) Momo lie tu sukilila oku yuvula oku lundila vakuetu nda tua konyoha? (c) Uvangi upi Yesu a eca poku amamako lepandi toke kolofa?

¹² Olondaka viohutililo Yesu a longisa viokuti, “ku ka tu songuile veyonjo,” vi tu ivaluisa ovina via pita la Yesu noke yoku papatisiwa. Espiritu lia Suku lio songuila vekalasoko muna a “setekiwa Leliapu.” (Mateo 4:1; 6:13) Momo lie Yehova a ecelela ovina viaco? Yehova wa tumile Yesu palo posi oco a tetulule ocitangi cimue ca votuiwa eci Adama la Heva va likala uviali wa Yehova. Momo, esino liavo lia votola apulilo a sukilile oku tambuluiwa vokuenda kuotembo yimue. Anga hẽ kua kala ocina cimue ca lueyiwa konjila Yehova a kuama poku lulika omanu? Citava hẽ okuti omunu wa lipua o lekisa epokolo ku Yehova nda o yonjiwa ‘londingaĩvi’? Ca sunguluka hẽ okuti omanu va li viala ovo muẽle? (Efetikilo 3:4, 5) Kovaso yoloneke eci apulilo osi a votuiwa a ka tambuluiwa oco Yehova a sanjuke, oviluvo viosi vio kilu, levi vio posi vi ka kũlĩha okuti, onjila ya Yehova yoku viala oyo ya sunguluka.

¹³ Omo okuti Yehova o kola, ka seteka omanu lovina vĩvi.  Satana eye “Uyonji.” (Mateo 4:3) Eye wa siata oku seteka oku tu yonja lolonjila via litepa. Pole, tu kuete elianjo lioku nõla. Omunu lomunu pokati ketu o pondola oku nõla nda o tamalãla keyonjo limue ale sio. (Tanga Tiago 1:13-15.) Eci Satana a seteka Yesu, ka yapuisiwile leyonjo liaco, pole, wa tukula Ondaka ya Suku. Momo, wa pokola ku Suku. Pole, Satana ka liwekelepo. Eye wa kevelela ‘toke kepuluvi lia sunguluka.’ (Luka 4:13) Ndaño okuti Satana wa seteka Yesu lolonjila via litepa, pole, Yesu wa pokola ku Suku olonjanja viosi, momo eye Ombiali yaye. Eye wa eca uvangi wokuti, omunu wa lipua o pondola oku pokola ku Yehova ndaño poku liyaka lovitangi vialua. Pole, Satana wa siatavo oku seteka olondonge via Yesu oku kongelamo ove, oco ku ka pokole ku Yehova.

14. Nye tu sukila oku linga oco tu tamalãle kayonjo?

¹⁴ Apulilo a votuiwa atiamẽla konjila ya Yehova yoku viala handi a sukila atambululo. Pole, toke cilo Yehova wa siata oku ecelela okuti Satana o tu seteka. Yehova ka ‘tu songuila veyonjo.’ Momo wa kolela okuti tu pondola oku pokola kokuaye, kuenda o yongola oku tu kuatisa. Pole, ka tu kisika oku linga eci ca sunguluka. Momo, wa sumbila elianjo lietu lioku nõla. Omo liaco, Yehova wa siata oku ecelela okuti, etu tu nõla nda tu lekisa epokolo ale sio. Oco tu yuvule oku yonjiwa, tu sukila oku linga ovina vivali ndeci: Oku pamisa ukamba wetu la Yehova,  kuenda oku amamako oku likutilila oco a tu kuatise. Yehova o tambulula ndati olohutililo vietu oco tu tamalãle kayonjo?

15, 16. (a) Kayonjo api tu sukila oku tamalãla? (b) Helie o kuete eko nda tua tava oku yapuisiwa?

¹⁵ Yehova wa siata oku tu ĩha espiritu sandu liaye oco li tu kuatise oku liyaka layonjo a Satana. Yehova wa tu ĩhavo Embimbiliya kuenda vamanji va kasi vekongelo oco va tu lungule kovina vi koka ovitangi. Eye wa siata oku tu lungula oco tu yuvule oku pesila otembo yetu, olombongo vietu, kuenda ongusu yetu kovina ka tu sukila. Manji umue o tukuiwa hati Espen kumue lukãi waye Janne, va kasi vofeka yimue muli ukuasi kocifuka co Europa. Ovo va kala akundi votembo yosi vokuenda kuanyamo alua konepa yimue yofeka yaco okuti ka kua kalele akundi valua. Eci ukãi waye a cita oñaña, va liwekapo upange wakundi votembo yosi, kuenje cilo va kuete omãla vavali. Manji Espen wa popia hati: “Pamue tua siata oku likutilila ku Yehova oco ka tu ka wile veyonjo, momo cilo ka tu pondola oku pesila otembo yalua kupange wa Yehova ndeci tua enda oku linga kosimbu. Tua siata oku likutilila ku Yehova oco a tu kuatise oku amamako oku pamisa ekolelo lietu kuenda oku lekisa ombili kupange woku kunda.”

¹⁶ Eyonjo likuavo tu sukila oku tamalãla lalio, oku tala omanu va kasi epolõla haivo va linga umbondo. Nda tua yapuisiwa leyonjo liaco, tu sukila oku yuvula oku lundila Satana. Momo lie? Momo, Satana kumue loluali luaye ka va pondola oku tu kisika oku linga cimue cĩvi. Kuli vamue va siata oku tala omanu va kasi epolõla haivo va linga umbondo, momo ka va yongola oku yuvula ovisimĩlo vĩvi. Pole, vamanji valua va siata oku tamalãla kayonjo aco, kuenda tu pondolavo oku ci linga.—1 Va Korindo 10:12, 13.

17. (a) Tu pondola oku lekisa ndati okuti Yehova o yongola oku tu ‘popela kondingaĩvi’? (b) Nye tu lavoka?

¹⁷ Tu pondola oku lekisa ndati okuti Yehova o yongola oku tu ‘popela kondingaĩvi’? Tu sukila oku yuvula oku ‘kala vakualuali’ kuenda oku yuvula oku ‘sola oluali pamue ovina vi kasi voluali.’ (Yoano 15:19; 1 Yoano 2:15-17) Eci Yehova a ka kundula Satana kumue loluali lulo lua vĩha, tu ka kuata ekalo liwa! Pole, toke eci otembo yaco yi pitĩla, tu sukila oku ivaluka okuti, Satana o kuete ‘onyeño ya lua, omo a limbuka okuti oloneke viaye vitito.’ Eye o ka amamako oku sandiliya onjila yoku tu yapuisa oco tu liwekepo oku vumba Yehova. Omo liaco, tu sukila oku amamako oku likutilila ku Yehova oco a tu teyuile ku Satana.—Esituluilo 12:12, 17.

18. Nda tu yongola oku puluka kesulilo lioluali lulo lua Satana, nye tu sukila oku linga?

¹⁸ O yongola hẽ oku kala voluali lumue okuti ka muli Satana? Nda o yongola, amamako oku likutilila oco Usoma wa Suku wiye okuti onduko yaye yi sumbiwa, kuenda ocipango caye ci lingiwa palo posi. Kolela ku Yehova olonjanja viosi okuti oku tata loku eca kokuove ovina viosi o sukila oco amameko oku pokola kokuaye. Nda wa ci linga, o pondola oku kapako olondaka viohutililo Yesu a longisa.