ECI manji Anita a linga Ombangi ya Yehova ulume waye wo suvukile calua. * (Tala etosi pombuelo yemẽla.) Eye wa seteka oku u tateka oco a liwekepo oku endaenda kolohongele, kuenda wa handeleka oco ka ka tukule vali onduko ya Suku. Olonjanja viosi manji Anita a tukula onduko Yehova, ulume waye wa enda oku kuata onyeño yalua.

Handi vali, ulume waco ka yonguile okuti manji Anita o longisa komãla vavo ovina viatiamẽla ku Yehova ale oku enda lavo kolohongele. Ka ca lelukile ku manji Anita, momo wa yonguile oku kuatisa omãla vavo vuyombeki okuti ulume waye ka ci kũlĩha.

Ndomo ulandu wa manji Anita u lekisa, citava okuti umue ukuepata liove o seteka oku ku vetiya oco o liwekepo oku vumba Yehova. Citava okuti o kuete ocitangi cikuavo, ale o kasi oku vela vokuenda kuotembo yalua. Pamue omõla wove, ulume wove, ale ukãi wove wa fa. Citavavo okuti umue ukuepata liove wa liwekapo oku vumba Yehova. Nda o kasi oku liyaka lovitangi via tukuiwa ndeti, nye o sukila oku linga oco amameko oku kolela Yehova?

Upostolo Paulu wa popia hati: “Vu sukila epandi.” (Va Heveru 10:36) Nye ci pondola oku ku kuatisa oku lekisa epandi?

Nda o kasi oku tala ohali ivaluka okuti o sukila ekuatiso lia Yehova oco o pandikise. Likutilila kokuaye oco a ku kuatise. Manji Ana oco a linga eci ulume waye a fa ocipikipiki. Tunde eci va tokekisa olohuela viavo pa pitile 30 kanyamo. Manji Ana wa popia hati: “Eci ulume wange a endele kupange ka tiukile vali konjo lomuenyo. Kotembo yaco wa kuatele lika 52 kanyamo.”

Ndaño okuti kupange woku sanda eteku manji Ana wa enda oku linga upange walua, pole ka ca tepuluile evalo liaye. Nye a linga? Eye wa popia hati: “Nda likutilila ku Yehova oco a ndi kuatise.” Manji Ana wa kũlĩhĩle okuti Yehova wo kuatisa momo, noke yoku likutilila wa limbuka okuti wa kuata ombembua kuenda utima wa tula. Noke wa amisako loku popia hati: “Nda kolela okuti Yehova o ka pindula ulume wange.”—Va Filipoi 4:6, 7.

Yehova wa likuminya kafendeli vaye hati, o yevelela olohutililo viavo. (Osamo 65:2) Eye o pondola oku eca kokuavo ovina viosi va sukila oco va amameko oku u vumba. Yehova o ku kuatisa oco o kolele kokuaye ndaño poku liyaka lovitangi.

Kuli onjila yikuavo Yehova a tu kuatisa layo oco tu pandikise. Eye wa tu ĩha vamanji va kasi vekongelo. Tu pondolavo oku lilongisa kongangu ya vamanji vo ko Tesalonike va li kuatisa pokati eci va kala oku lambalaliwa. Vokuenda kuotembo yaco, va sukilile oku li pamisa pokati. (1 Va Tesalonike 2:14; 5:11) Ovo va kuatisa vamanjavo oku amamako oku kolela Yehova poku kala kumosi kolohongele kuenda oku kuata ukamba. Nye tu pondola oku linga oco tu pamise ekolelo lietu ndeci vamanji vo ko Tesalonike va linga?

Tu sukila oku kuata ukamba la vamanji vekongelo kuenda oku livetiya pokati ca piãla enene poku liyaka lovitangi. (Va Roma 14:19) Ndaño okuti upostolo Paulu wa tala ohali omo lielambalalo kuenda ovitangi vikuavo, pole Yehova wo pamisa oco a pandikise. Yehova wa linga esokiyo liokuti vamanji va vetiya Paulu. Upostolo Paulu wa popia eci catiamẽla kakamba vaye hati: “Va ñolaisa ocili.” (Va Kolosai 4:10, 11) Vamanji va solele calua Paulu. Omo liaco, eci a sukilile ekuatiso, vo lembeleka kuenda vo vetiya. Citava okuti o sokolola otembo vamanji vekongelo va ku sapuila  cimue ale va ku lingila ovina via pamisa ekolelo liove.

Yehova wa siata oku ku ĩhavo akulu vekongelo. Ovo va pondola oku ku vetiya kuenda oku ku ĩha alungulo awa a tunda Vembimbiliya. Ovo “va soka ndocivundilo coku tila ofela pamue ndocipundo coku tila ombela. Va soka ndolondui viovava vekango, pamue ndulembo wewe linene vofeka.” (Isaya 32:2) Tu lembelekiwa poku kũlĩha okuti va pondola oku tu kuatisa olonjanja viosi. Omo liaco, nda o kasi oku liyaka lovitangi sandiliya akulu vekongelo. Momo va pondola oku ku kuatisa oco amameko oku vumba Yehova.

Ocili okuti akulu vekongelo ka va pondola oku tetulula ovitangi viove viosi. Momo ka va lipuilevo ndove. (Ovilinga 14:15) Pole, o pondola oku kuata utima wa tula nda o sandiliya ukulu umue wekongelo okuti o kongela volohutililo viaye ovitangi viove. (Tiago 5:14, 15) Ulandu umue wa pita kofeka yo Italia u lekisa okuti, akulu vamue vekongelo va vetiya manji umue wa kala oku tala ohali vokuenda kuanyamo alua omo lioku vela. Kuenje manji yaco wa popia hati: “Ocisola vamanji va lekisa kokuange, locikembe kuenda ndomo va ndi pasuisa, ca ndi kuatisa oku pandikisa.” Nda o kasi oku tala ohali Yehova o yongola okuti o pinga ekuatiso kakulu vekongelo.

Nda tu tiamisila utima wetu koku vumba Yehova, tu limbuka ndomo a pondola oku tu kuatisa. Eci oco manji John a linga. Eci a tẽlisa 39 kanyamo wa limbuka okuti o kuete uvei wo kanser. Omo okuti wa kala umalẽhe wa simĩle okuti ka ca sungulukile oku kuatiwa luvei waco. Omo liaco, wa kuatela esakalalo ukãi waye kuenda omõla wavo wa kuatele lika anyamo atatu. Eye wa popia hati: “Ukãi wange ka kuatele lika ocikele coku tata omõla wetu utito, pole wa sukililevo oku ndi tata kuenda oku ndi kuatisa oku nyua ovihemba.” Omo liovihemba a kala oku nyua wa enda oku kava calua kuenda wa kuata evalo vimo. Pole, wa kuatavo ovitangi vikuavo. Noke manji John wa limbuka okuti Isiaye wa kala oku panda kolofa kuenda wa sukilile umue o pondola oku u kuatisa.

Nye ca kuatisa manji John kumue lepata liaye vokuenda kuovitangi viaco? Ndaño okuti olonjanja vimue wa enda oku kava calua, pole wa kolelele okuti epata liaye lia tiamisilile utima koku vumba Yehova. Eye wa popia hati: “Tua kuatele ocituwa coku endaenda kolohongele viosi, oku enda kupange woku kunda olosemana viosi, kuenda oku linga efendelo liepata olonjanja viosi ndaño okuti pamue ka ca lelukile oku ci linga.” Manji John wa limbuka esilivilo lioku pamisa ukamba waye la Yehova. Ndaño okuti kefetikilo wa sumuile kuenda wa kuatele esakalalo, noke weya oku tula utima. Eye wa kũlĩhĩle okuti Yehova u kuetele ocisola kuenda wo pamisa. Yehova o pondolavo oku ku kuatisa eci o sakalala ale ceci o kuata usumba. Manji John wa popia hati: “Yehova o pondola oku ku pamisa ndeci a linga kokuange.”

Nda o kasi oku liyaka lovitangi, ivaluka olondaka via Paulu wa popia hati: “Vu sukila epandi.” Kolela ku Yehova poku likutilila kokuaye. Kuata ukamba la vamanji vekongelo, pinga ekuatiso kakulu vekongelo, kuenda amamako oku tiamisila utima wove koku fendela Yehova. Nda wa ci linga, Eye oku kuatisa oku yula ovitangi viosi o liyaka lavio cilo, ale vievi vi keya kovaso yoloneke.