1. Momo lie Paulu a popela hati: “Kristu eye unene wa Suku”?

YEHOVA wa lekisa unene waye lekuatiso lia Yesu Kristu lonjila yimue yi komõhisa. Eci Yesu a kala palo posi wa linga ovikomo vialua. Tu pondola oku tanga vimue pokati kovikomo viaco Vembimbiliya okuti, vi pamisa ekolelo lietu. (Mateo 9:35; Luka 9:11) Ocili okuti, Yehova wa eca unene walua ku Yesu. Omo liaco, upostolo Paulu wa popia hati: “Kristu eye unene wa Suku.” (1 Va Korindo 1:24) Pole, ovikomo Yesu a linga vi tu kuatisa ndati?

2. Nye tu pondola oku lilongisa kovikomo via Yesu?

² Upostolo Petulu wa popia hati: Yesu wa linga “ovikomo.” (Ovilinga 2:22) Ovikomo viaco vi tu longisa nye? Ovio vi tu longisa ovina Yesu a ka linga vokuenda Kuviali waye Wohulukãi Yanyamo. Kotembo yaco o ka linga ovikomo vialua okuti vi ka kuatisa omanu vosi palo posi. Ovikomo viaco vi ka tu kuatisavo oco tu kuate elomboloko liatiamẽla kovituwa viaye kuenda via Isiaye. Vocipama cilo, tu ka  konomuisa ovikomo vitatu Yesu a linga kuenda tu ka lilongisa ndomo vi pondola oku tu kuatisa koloneke vilo, kuenda kovaso yoloneke.

3. (a) Momo lie Yesu a lingila ocikomo caye catete? (b) Yesu wa lekisa ndati ocali kofeka yo Kanana?

³ Yesu wa linga ocikomo caye catete puvala umue kofeka yo Kanana. Ka tua kũlĩhĩle esunga liaco, pole, ka kua kalele ovinyu yalua oco yeciwe komanu vosi va lalekiwile puvala waco. Nda ka kua lingiwile esokiyo liaco, nda ca kokela osõi kolondombua, momo nda ca lekisa okuti olondombua viaco ka vi kuete ocituwa coku yekisa akombe. Maria ina ya Yesu, wa kalavo umue pokati komanu va lalekiwile. Anga hẽ wa pinga ku Yesu oco a ece ekuatiso omo a tavele okuti wa kuatele unene woku ci linga? Citava okuti Maria wa sokoluile ovitumasuku viosi viatiamẽla komõlaye, kuenda wa kũlĩhĩle okuti wa laikele oku tukuiwa hati: “Mõla a Tõlo.” (Luka 1:30-32; 2:52) Pole, ci kale Maria ale Yesu va yonguile oku kuatisa olohueli viaco. Omo liaco, Yesu wa linga ocikomo poku pongolola eci ci soka 380 kalitulu ovava okuti a linga “ovinyu yiwa.” (Tanga Yoano 2:3, 6-11.) Anga hẽ Yesu wa sukilile muẽle oku linga ocikomo caco? Sio. Pole, wa ci lingila omo lioku kapako omanu, kuenda wa kala oku setukula Isiaye ukuacali.

4, 5. (a) Ocikomo catete Yesu a linga ci tu longisa nye? (b) Ocikomo ca lingiwila kofeka yo Kanana ci tu longisa nye catiamẽla kovaso yoloneke?

⁴ Ocikomo Yesu a linga covinyu yiwa, ca ecelela okuti yeciwa kocimunga comanu valua. O pondola hẽ oku limbuka ovina ocikomo caco ci tu longisa? Ulandu owu u lekisa okuti Yehova la Yesu ka va kuete ocituwa coku limĩla, pole, vakuacali. Ocikomo caco ci tu ĩha uvangi wokuti ovo va kapako ekalo liomanu. Ci lekisavo okuti Yehova lekuatiso liunene waye o ka eca okulia kualua voluali luokaliye kolonepa viosi ku ka kala omanu palo posi.—Tanga Isaya 25:6.

⁵ Sokolola ndoco! Ndopo Yehova o ka tu ĩha ovina vialua tu sukila. Omunu lomunu o ka kuata onjo ya posoka kuenda okulia kuwa. Tu ka kuata esanju lialua eci tu ka sokolola ovina viosi viwa Yehova a ka tu ĩha ocali Voluali Luokaliye palo posi.

6. Yesu olonjanja viosi wa talavayele ndati lunene waye, kuenda tu pondola oku setukula ndati ongangu yaye?

⁶ Yesu lalimue eteke a talavayele lunene waye oco a li kuatise eye muẽle. Sokolola eci Eliapu lia seteka Yesu oco a pongolole ovawe okuti a linga olombolo. Yesu ka tavele oku linga ocikomo caco oco a li kuatise eye muẽle. (Mateo 4:2-4) Pole, Yesu wa talavaya lunene waye oco a kuatise omanu. Tu pondola oku setukula ndati ocituwa caye coku kapako omanu? Yesu wa popia hati, tu sukila oku lekisa ocituwa ‘coku ava.’ (Luka 6:38) Tu pondola oku ci linga poku laleka  vakuetu oku iya konjo yetu oco va lie letu. Tu pondolavo oku pesila otembo yetu poku eca ekuatiso komunu umue noke liohongele ndeci, oku yevelela manji umue o kasi loku pongiya ohundo yaye. Ale, pamue tu pondola oku eca ekuatiso lietu poku pindisa vamanji vamue kupange woku kunda. Tu setukula ongangu ya Yesu yoku lekisa ocali poku kuatisa omanu vakuavo olonjanja viosi.

7. Ocitangi cipi ci ka amamako voluali lulo lua Satana?

⁷ Uhukũi ocitangi cimue ca fetika osimbu. Momo, Yehova wa sapuilile va Isareli hati: “Lalimue eteke olosuke vi pua vofeka.” (Esinumuĩlo 15:11) Noke lianyamo alua, Yesu wa popia hati: “Olosuke vi kasi ño-o hũ lene.” (Mateo 26:11) Anga hẽ olondaka evi via Yesu vi lomboloka okuti omanu palo posi va ka amamako oku kala olohukũi? Sio. Eye wa yonguile oku popia hati osimbu tu kasi voluali lulo lua vialiwa la Satana, uhukũi u ka amamako. Pole, voluali luokaliye omanu va ka kuata ekalo liwa! Kotembo yaco ka ku ka kala vali uhukũi. Momo omanu vosi va ka kuata okulia kualua kuenda va ka kuata esanju!

8, 9. (a) Momo lie Yesu a tekuila omanu valua? (b) Nye o yevite vutima catiamẽla kocikomo caco?

⁸ Ukualosamo wa sapuila Yehova hati: “Nyanyumula eka liove, kuenje o kutisa [ovina] viosi vi kasi lomuenyo.” (Osamo 145:16) Eci Yesu a kala palo posi wa setukula Isiaye kuenda wa kapeleko omanu poku va kuatisa. Eye ka lingile ovina viaco oco a lekise okuti wa kala ukuonene. Yesu wa kapeleko omanu a kuatisa. Omo liaco, tu konomuisi ulandu u sangiwa kelivulu lia Mateo 14:14-21. (Tanga.) Owiñi wa kuamele Yesu valupale osi a pita. (Mateo 14:13) Eci ekumbi lia kala oku iñila, olondonge via kuata esakalalo lomanu va honguele haivo va kuata onjala. Omo liaco, via pinga ku Yesu oco omanu va ka lande okulia kuavo. Nye Yesu a sukilile oku linga?

⁹ Yesu wa tekula lolombolo vitãlo kuenda olõsi vivali ci soka 5.000 kalume lakãi, oku kongelamo omãla. Momo lie Yesu a lingila ocikomo caco? Momo wa solele omanu, kuenda wa va tatele ciwa. Yesu wa sokiyile okulia kualua, momo omanu “vosi va lia, ve kuta.” Okulia kuaco kua pamisa etimba liavo oco va linge ungende woku tiukila kolonjo viavo. (Luka 9:10-17) Noke omanu vosi va lia ve kuta, kuenje olondonge viongolola 12 kakualu eyuka ovimuanyuila violombolo!

10. Nye ci ka pita luhukũi kovaso yoloneke?

¹⁰ Omo liuhembi wa siata pokati kolombiali, omanu valua va linga olohukũi. Valua pokati ka vamanji ka va kuete eci va lia. Pole, ndopo  omanu vana va siata oku pokola ku Yehova va ka kala voluali lumue okuti ka mu ka kala vali uhembi ale uhukũi. Omo okuti Yehova eye Suku Ukuonene wa Velapo, o yongola okuti olonjongole viomanu vosi vi tẽlisiwa. Eye wa likuminya okuti ndopo o ka malako ohali yosi!—Tanga Osamo 72:16.

11. Momo lie o tavela okuti Kristu lekuatiso liunene waye ndopo o ka linga ovina vi komõhisa palo posi, kuenda nye o yongola oku linga?

¹¹ Eci Yesu a kala palo posi wa linga ovikomo vimue vokuenda kuanyamo atatu lolosãi epandu. (Mateo 15:24) Omo okuti Yesu eye Osoma, o ka kuatisa omanu vosi vokuenda Kuviali waye Wohulukãi Yanyamo. (Osamo 72:8) Ovikomo Yesu a linga vi tu ĩha ekolelo liokuti o ka tu lingila ovina viwa lekuatiso liunene waye. Ndaño okuti ka tu kuete unene woku linga ovikomo, pole nye tu pondola oku linga? Tu pondola oku pesila otembo yetu kuenda ongusu yetu koku sapela lomanu ovina viatiamẽla kolohuminyo Viembimbiliya vi ka tẽlisiwa kovaso yoloneke. Upange waco u kasi peka lietu Tulombangi Via Yehova. (Va Roma 1:14, 15) Eci tu sokolola ovina Kristu a ka tu lingila kovaso yoloneke, ci tu vetiya oku sapuila komanu ovina viaco.—Osamo 45:1; 49:3.

12. Momo lie tu tavela okuti Yesu o kuete elomboloko lia suapo liekalo lioluali?

¹² Eci Suku a lulika ongongo lovina viosi vi kasimo, Yesu wa “kala laye ndomesele.” (Olosapo 8:22, 30, 31; Va Kolosai 1:15-17) Omo liaco, Yesu wa kuatele elomboloko liasuapo liekalo lioluali. Eye wa kũlĩhĩle ndomo a linga upange lekuatiso liolongusu violuali kuenda oku vi pokuisa.

13, 14. Tukula ulandu umue u lekisa ndomo Kristu a pondola oku pokuisa olongusu violuali.

¹³ Eci Yesu a kala palo posi, wa lekisa okuti wa kuata unene wa Suku poku pokuisa olongusu viongongo. Sokolola ndomo Yesu a pokuisa ehunguhungu liofela. (Tanga Marko 4:37-39.) Ulume umue ukuakukonomuisa ovina vi sangiwa Vembimbiliya wa lombolola okuti ondaka “ehunguhungu” kelimi lio Helasi, elivulu lia Marko li tukula ondaka yaco oco li lombolole okuti ofela yalua ale ombela yenda lofela. Ovina viaco vi tiamisiwila kehunguhungu liofela yalua yenda lalende a tekãva, ovikẽlu kuenda ombela yociwe. Eci ombela yaco yi pita, ovina viosi vi nyõleha. Upostolo Mateo wa tukula ofela yaco hati: “Ehunguhungu.”—Mateo 8:24.

¹⁴ Kũlĩhĩsa ulandu owu: Akimba okalunga a veta vowato olonjanja vialua kuenje owato waco wa fetika oku yengenga. Ndaño lonjuela yehunguhungu liofela ya kala oku veta vowato, pole vepuluvi liaco Yesu wa kala oku pekela omo liekavo. Olondonge via kuata usumba walua kuenje via pasula Yesu loku u sapuila hati: “Tu kasi loku nyõleha.” (Mateo 8:25) Nye Yesu a linga? Eye wa votoka  kuenje wa sapuila ofela lokalunga hati: “Liweka, tulumũha!” (Marko 4:39) Ofela yaco ya pita, kuenje kua kala “etulumũho lialua.” Ulandu owu u komõhisa weca uvangi wokuti, Yesu o kuete unene woku pokuisa olongusu violuali!

15. Yehova wa siata oku lekisa ndati okuti o kuete unene woku pokuisa olongusu violuali?

¹⁵ Unene wa Kristu u tunda ku Yehova Suku, pole tua kũlĩha okuti Yehova Ukuonene wa Velapo o pondola oku pokuisa olongusu violuali. Osimbu Etande ka lieyile, Yehova wa popele hati: “[Voloneke] epanduvali ... ndokisa ombela kilu lieve akũi akuãla kovotanya lakũi akuãla kovoteke.” (Efetikilo 7:4) Kelivulu Lietundilo 14:21, tu tangakovo ndoco: “Yehova wa sikisa ofela yokutundilo uteke wosi kuenje ya tiuwiya ovava okalunga.” Kelivulu lia Yona 1:4, tu tangako ndoco: “Yehova puãi wa tuma ofela yonupi, kuenje vokalunga mueya ehunguhungu ndokuti onaviyu ya [puluka] oku nyanyõha.” Omo liaco, ci kuete esilivilo lia velapo oku kũlĩha okuti voluali luokaliye Yehova o ka amamako oku pokuisa olongusu violuali.

16. Momo lie tu sanjukila poku kũlĩha okuti Yehova la Yesu va kuete unene woku pokuisa olongusu violuali?

¹⁶ Tu sanjuka calua poku kũlĩha okuti Yehova la Yesu va kuete unene woku pokuisa olongusu violuali. Vokuenda Kuviali wa Kristu Wohulukãi Yanyamo, omanu vosi va ka kala palo posi va ka popeliwa. Lomue o ka lemehĩwa, ale oku pondiwa lovilunga  violuali ndeci: Ovipepe, akimba okalunga, kuenda ovilemawe. Ka tu ka kuata usumba omo liovilunga violuali, momo “onjo ya Suku” yi ka kala lomanu! (Esituluilo 21:3, 4) Tua kolela okuti, Yehova o ka eca unene ku Yesu oco a pokuise olongusu violuali vokuenda Kuviali waye Wohulukãi Yanyamo.

17. Onjila yipi tu sukila oku kuama oco tu setukule Yehova Suku la Kristu cilo?

¹⁷ Ocili okuti ka tu pondola oku tateka ovilunga via siata oku pita voluali. Yehova la Yesu ovo lika va pondola oku ci linga. Pole, kuli ocina cimue tu pondola oku linga. Tu pondola oku kapako elivulu Liolosapo 3:27. (Tanga.) Nda vamanji va tala ohali, tu pondola oku va kuatisa lovina va sukila, oku va lembeleka, kuenda oku va vetiya. (Olosapo 17:17) Citava okuti tu va kuatisa eci va pita locilunga cimue. Manji umue ocimbumba okuti onjo yaye ya teyiwa lehunguhungu liofela wa popia hati: “Ndi kuete esanju lialua omo lioku panga onepa kocisoko ca Yehova, momo nda siata oku kuatisiwa kovina ndi sukila ketimba kuenda kespiritu.” Manji umue ukãi okuti ka kuelele wa kala ndu okuti ka kuatele elavoko eci andunde ovava a teya onjo yaye. Noke vamanji vo kuatisa oku yi semulũla, kuenje wa popia hati: “Si tẽla oku eca olopandu! Si pondola oku lombolola esanju ndi kuete.” Noke wa amisako hati: “Nda pandula a Yehova!” Tu eca olopandu ku vamanji va siata oku eca ekuatiso ku vana va pita lovilunga. Ndaño lekuatiso lia vamanji, pole tu eca olopandu ku Yehova la Yesu Kristu okuti va siata oku tu tata ciwa.

18. Nye ci ku komõhisa catiamẽla kesunga lieci Yesu a lingila ovikomo?

¹⁸ Yesu vokuenda kupange waye woku kunda wa eca uvangi wokuti “eye unene wa Suku.” Eye lalimue eteke a talavayele lunene waye oco a komõhise omanu vakuavo, ale oku li kuatisa eye muẽle. Pole, wa kuatisiwa lunene waye oco a linge ovikomo omo liocisola a kuatela omanu. Vocipama ci kuãimo tu ka lilongisa ovina vikuavo viatiamẽla kondaka yaco.