1. Tu kasi kotembo yipi?

TU KASI “kotembo yohali.” Tunde kunyamo wo 1914 eci “oloneke via sulako” via fetika, ovitangi voluali via livokiya calua okuti kosimbu ci sule. (2 Timoteo 3:1-5) Tua kũlĩha okuti ovitangi voluali vi ka amamako oku livokiya, momo ocitumasuku Cembimbiliya ci lekisa okuti, “omanu vãvi lolohembi vamamako loku linga eci cĩvi.”​—2 Timoteo 3:13.

2. Ovitalukilo vipi omanu valua va siata oku sanjukila? (Tala elitalatu kefetikilo liocipama cilo.)

² Vovitalukilo, omanu valua koloneke vilo va siata oku tala ale oku linga ovina viungangala, ukahonga, kuenda ovina mua kongela umbanda. Ovolandu a lekisa okuti o Internet, ovipama viotelevisãu, olofilme, alivulu, kuenda olorevista, olonjanja vimue vi lekisa ungangala kuenda ukahonga lonjila yimue ndu okuti vi taviwa. Koloneke vilo, ovina viaco via vĩha okuti ka via sungulukile oku vi tala, via siata oku taviwa kovitumãlo vialua. Pole, ka ci lomboloka okuti Yehova o  tava ovina viaco via vĩha.​—Tanga Va Roma 1:28-32.

3. Omanu valua va siata oku sima nye catiamẽla ku vana va kapako olonumbi via Suku?

³ Kocita catete, omanu va endavo oku tala ovina viungangala kuenda ovitalukilo via vĩha. Pole, olondonge via Yesu ka via endele oku tala ovina viaco, momo via kapeleko olonumbi via Suku. Kuenje omanu va tungile lavo va enda oku ‘komõha’ calua. Nye ceyililako? Omanu va enda oku yola epembe Akristão vocili kuenda oku va lambalala. (1 Petulu 4:4) Koloneke vilo, omanu valua va siatavo oku sima okuti vana va kapako olonumbi via Suku aveke. Omo liaco, Embimbiliya li tu lungula hati, omanu vana va kuãi ongangu ya Yesu Kristu, va lavokavo oku “kangisiwa.”​—2 Timoteo 3:12.

4. Momo lie tu sukilila oku yuvula oku sola oluali lulo?

⁴ Nda tu yongola oku linga ocipango ca Suku, tu sukila oku yuvula oku ‘sola oluali pamue ovina vi kasi voluali.’ (Tanga 1 Yoano 2:15, 16.) Satana “osuku yoluali lulo,” eye o kasi oku viala oluali. Eye wa siata oku yapuisa omanu lekuatiso liatavo esanda, olombiali, ovisoko violomĩlu, kuenda ovitalukilo. (2 Va Korindo 4:4; 1 Yoano 5:19) Omo okuti ka tu yongola oku yapuisiwa loluali lulo, tu sukila oku yuvula akamba vãvi. Momo, Embimbiliya li tu lungula hati: “Ko ka kembiwi. Akamba vãvi va nyõla ovituwa viwa.”​—1 Va Korindo 15:33.

5, 6. Velie tu sukila oku yuvula oku linga lavo ukamba, kuenda momo lie?

⁵ Oco ukamba wetu la Yehova wamameko tu sukila oku yuvula oku linga ukamba lomanu vana va siata oku linga ovina via vĩha. Vukamba waco mua kongela oku yuvula omanu vana va siata oku popia vati va kasi oku fendela Yehova, pole ka va pokola kokuaye. Nda omanu vaco va linga ekandu limue linene okuti ka va likekembela, tu sukila oku liwekapo oku kuata ukamba lavo.​—Va Roma 16:17, 18.

⁶ Ocili okuti, omanu va yongola oku sanjuisa akamba vavo kuenda oku taviwa lavo. Omo liaco, nda tua linga ukamba lomanu ka va pokola ku Suku, tu yapuisiwa kuenje tu lingavo ovina va siata oku linga. Ovolandu a lekisa okuti, nda tua kuata ukamba lomanu vakuakulinga ukahonga, tu kalavo ndomanu vaco. Ovina viaco via siatavo oku pita la vamanji vamue. Kuenje vana ka va likekembela va tundisiwa vekongelo. (1 Va Korindo 5:11-13) Nda ka va likekembela ekalo liavo li pondola oku sokisiwa leli upostolo Petulu a tukula.​—Tanga 2 Petulu 2:20-22.

7. Velie tu sukila oku nõla oco va linge akamba vetu?

⁷ Ndaño okuti tu yongola oku lekisa esunguluko komanu vosi, pole ka tu sukila oku linga ukamba la vana ka va pokola ku Suku. Ka ca sungulukile okuti  Ombangi yimue ya Yehova yi namulãla lomunu umue ka papatisiwile. Ocina ca velapo, oku taviwa la Suku okuti lomanu ka vo kuetele ocisola ci sule. Tu sukila oku kuata lika ukamba lomanu vana va linga ocipango ca Suku. Yesu wa popia hati: “U o linga ocipango ca Suku eye manjange, haeye mukãi wange, haeye mãi [yange].”​—Marko 3:35.

8. Akamba vãvi va yapuisile ndati va Isareli kosimbu?

⁸ Akamba vãvi va koka ovitangi. Sokolola eci ca pita la va Isareli. Osimbu ka va iñilile Vofeka Yohuminyo, Yehova wa va lunguile eci catiamẽla komanu va kalamo tete. Eye wa popia hati: “Ka vu petamẽla kolosuku viavo ndaño oku vi vumba, ka vu setukula ovilinga viavo. Puãi vu va kupula muẽle, loku nyanyõla olongunji viavo vi kola. Vu vumba Yehova Suku yene.” (Etundilo 23:24, 25) Pole, va Isareli valua ka va pokuile kolonumbi via Suku, kuenda ka va kolelele vali kokuaye. (Osamo 106:35-39) Nye ca pita lavo? Noke, Yehova wa likala epata lia va Isareli kuenje wa nõla ekongelo Liakristão vocili oco va kale afendeli vaye.​—Mateo 23:38; Ovilinga 2:1-4.

9. Momo lie ovitalukilo violuali lulo vi ponduila oku kapa kohele ekalo Liakristão vocili?

⁹ Ovitalukilo vialua violuali via siata oku lekisiwa vovipama viotelevisãu, vo Internet, kuenda valivulu, vi pondola oku kapa kohele ukamba wetu la Yehova. Ovina viaco ka via sokiyiwile oco vi kuatise Akristão vocili oku lekisa ekolelo ku Yehova kuenda kolohuminyo viaye. Pole, vi vetiya omanu oku kolela koluali lulo lua vĩha lua Satana. Omo liaco, tu sukila oku lavulula oco ka tu ka nõlepo oku tala, loku tanga, ale oku yevelela ovina vi pondola oku tu vetiya oku kuata “oloñeyi violuali.”​—Tito 2:12.

10. Nye ci ka pita lovitalukilo violuali lulo lua vĩha?

¹⁰ Ndopo oluali lulo lua Satana kumue lovitalukilo via vĩha vi ka kunduiwa. Embimbiliya li popia hati: “Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.” (1 Yoano 2:17) Ukualosamo wa imbavo ocisungo hati: “Olondingaĩvi vi [ka] nyõleha.” Noke wa amisako hati: “Ambombe puãi va [ka] piñala ofeka, kuenje va sanjukila okusalala kualua.” Otembo yiñami? “Olondingesunga vi [ka] piñala ofeka, vi tungamo oloneke ka vi pui.”​—Osamo 37:9, 11, 29.

11. Suku wa siata oku tu kuatisa ndati oco tu amameko oku kolela kokuaye?

¹¹ Oluali lua Satana lua litepa locisoko ca Yehova, momo ca siata oku tu kuatisa oku ambata omuenyo lonjila yimue okuti yi tu ecelela oku kuata elavoko liomuenyo ko pui. Yesu wa likutilila ku Yehova poku popia hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.” (Yoano 17:3) Yehova lekuatiso liocisoko caye wa siata oku tu ĩha ovina viosi tu sukila oco tu u kũlĩhe ciwa. Tu kuete olorevista vialua, olombrochura, alivulu, olovideo, kuenda onumbi yetu yo Internet oco vi tu kuatise oku amamako oku vumba Suku. Ocisoko caye ca siatavo oku linga eliangiliyo liolohongele olonjanja viosi kueci ci pitahãla 110.000 kakongelo voluali luosi.  Ovina tua siata oku lilongisa kolohongele vitito lo kolohongele vinene, vi tunda Vembimbiliya, kuenje vi pamisa ekolelo lietu ku Yehova kuenda kolohuminyo viaye.​—Va Heveru 10:24, 25.

12. Lombolola onumbi yi sangiwa Vembimbiliya yoku kuelela lika “vu Ñala.”

¹² Akristão vana va yongola oku kuela va sukila oku lavulula poku nõla omanu vana va linga lavo ukamba. Ondaka ya Suku yi tu lungula ndoco: “Ko ka kutiwili kokanga ka ya lisokele kumosi lava ka va tavele. Momo esunga leci hesungako ci kutiwila ndati pamosi? Utanya u livala ukamba we lowelema?” (2 Va Korindo 6:14) Embimbiliya li lungula afendeli va Yehova oco va kuelele lika “vu Ñala,” ci lomboloka okuti va sukila oku kuela lika omunu umue wa litumbika ku Yehova okuti wa papatisiwa, kuenda wa kapako olonumbi viaye. (1 Va Korindo 7:39) Nda wa kuela omunu umue o sole Yehova Suku, o ka ku kuatisa oku amamako oku kolela kokuaye.

13. Elungulo lipi Suku a ecele ku va Isareli liatiamẽla koku kuela?

¹³ Yehova wa kũlĩha ovina vi tu kuatisa, kuenda elungulo liaye lioku kuelela lika “vu Ñala” liosimbu. Tu konomuisi elungulo Yehova a ecele ku va Isareli liatiamẽla komanu vana ka va kalele afendeli vaye. Lekuatiso lia Mose wa handeleka hati: “Ka ci tava oku likuela lavo okuti omãla vene akãi vu va eca komãla vavo alume, pamue omãla vavo akãi oku va kuelisa omãla vene alume. Momo nda oco vu linga va tindula omãla vene koku fendela ame ha va vumbi olosuku viñi. Kuenje nda oco onyeño ya Yehova nda yo wengukili, kuenje eye nda wo nyõli lombili.”​—Esinumuĩlo 7:3, 4.

14, 15. Nye ca pita la Salomone omo lioku liwekapo oku kapako olonumbi via Yehova?

¹⁴ Noke Salomone eci a linga osoma yo ko Isareli, vohutililo wa pinga olondunge kuenje Yehova wo tambulula. Omo liaco, Salomone wa kuata ekemãlo kuenda olondunge, ndeci ca siata oku pita lolombiali vio kolofeka vikuavo. Omo okuti nasoma yo ko Sieva wa komõhele calua omo liolondunge Salomone a kuatele, noke wo sapuila hati: “Tala, ndaño onepa ka ya sapuililue. Uvanga wove lukuasi via pitahãla oluhimo nda yeva.” (1 Olosoma 10:7) Ongangu ya Salomone yi tu longisavo ovina vi pondola oku pita lomunu umue nda ka kapiko olonumbi via Yehova Suku, kuenje o kuela umue ka fendela Yehova.​—Ukundi 4:13.

¹⁵ Ndaño okuti Yehova wa sumũlũisile Salomone, pole, noke ka lekisile vali epokolo kolonumbi viaye. Momo Salomone weya oku “sola akãi valua vakualofeka” ka va fendelele Yehova okuti, va kala eci ci  soka 700 kakãi kuenda 300 kovakama. Nye ceya oku pita laye? Eci Salomone a kuka, akãi vaye “va tiamisa utima waye kolosuku vikuavo, . . . kuenda Salomone wa linga eci cĩvi kovaso a Yehova.” (1 Olosoma 11:1-6) Akamba vãvi vo yapuisa, kuenje wa liwekapo oku kolela ku Yehova. Ndeci ca pita la Salomone, ci pondolavo oku pita lomanu vakuavo. Eli olio esunga lieci tu sukilila oku yuvula ovisimĩlo vioku kuela omunu umue ka sole Yehova!

16. Elungulo lipi Embimbiliya lieca kumanji umue wa kuela omunu una ka fendela Yehova?

¹⁶ Nye ci pondola oku pita lomunu umue o linga ufendeli wa Yehova osimbu okuti ohueli yaye ka yi fendela Yehova? Embimbiliya li popia ndoco:“Ene akãi, pokoli ku vaveyene okuti vamue, ndaño ka va tava kondaka, kuenda ndaño ondaka yimosi ka yi popiwa, haimo va kokiwa lovilinga viakãi vavo.” (1 Petulu 3:1) Ocili okuti, olondaka evi vi tiamisiwilavo kalume vana okuti akãi vavo ka va fendela Yehova. Ondaka ya Suku yi lekisa ndoco: Kala ulume uwa ale ukãi uwa, kuenda kapako olonumbi via Suku viatiamẽla kolohuela. Momo nda ohueli yove ya limbuka okuti o kasi oku linga apongoloko awa kekalo liove, oyo yi pondolavo oku vetiyiwa oku vumba Yehova. Olohueli vialua via siatavo oku pita lovolandu aco.

17, 18. Nye ca kuatisa Noha oku puluka Ketande, kuenda nye ca kuatisavo Akristão vo kocita catete oku puluka kenyõleho lio Yerusalãi?

¹⁷ Akamba vãvi va pondola oku ku vetiya oco ku ka pokole ku Yehova, pole akamba vawa va ku kuatisa oku kolela kokuaye. Noha wa tu sila ongangu yiwa. Eye wa kala komuenyo eci “ũvi womanu wa lova kilu lieve,” kuenda “lovisimĩlo viosi vi simaiwa vovitima viavo via vĩha ño oloneke viosi.” (Efetikilo 6:5) Omo liomanu va kuatele ovituwa vĩvi, Yehova wa nõlapo oku va kundula. Pole, Noha wa kuatele ovituwa via litepa. Embimbiliya lio tukula hati, “ukuesunga,” kuenda “wa endaenda la Suku.”​—Efetikilo 6:7-9.

¹⁸ Noha ka kuatele ukamba lomanu vana ka va solele Yehova. Eye kumue lepata liaye vamamako oku pesila otembo yavo koku tunga ocimbaluku, kuenda wa “sapula esunga.” (2 Petulu 2:5) Noha kumue lukãi waye, oku kongelamo omãla vavo vatatu, kuenda akãi vomãla vavo, va li kuatelele ukamba pokati. Ovo vamamako oku linga ovina vi sanjuisa Suku, kuenje va puluka Ketande. Vosi yetu tu kasi komuenyo koloneke vilo, tuvitumbulukila viavo. Omo liaco, tu sukila oku eca olopandu ku Noha kumue lepata liaye omo liepokolo va lekisa ku Yehova loku yuvula akamba vãvi. Cimuamue haico ca pita Lakristão vo kocita catete okuti, ka va kuatele ukamba lomanu vana ka va solele Yehova. Ovo va pokola kokuaye, kuenje va popeliwa eci o Yerusalãi ya nyõliwa kunyamo 70 O.Y.​—Luka 21:20-22.

19. Nye ci tu kuatisa oku amamako oku kolela ku Yehova?

¹⁹ Ndeci Noha kumue lepata liaye va linga kuenda Akristão vo kocita catete, tu sukilavo oku yuvula oku linga ukamba lomanu vana ka va sole Yehova. Tu kuete vamanji valua vakuekolelo tu pondola oku nõla oco va linge akamba vetu. Ovo va pondola oku tu kuatisa oku ‘pama vetavo’ vokuenda kuoloneke vilo viohali. (1 Va Korindo 16:13; Olosapo 13:20) Sokolola esanju tu ka kuata eci tu ka puluka kesulilo lioluali lulo lua vĩha okuti, tu ka kala voluali luokaliye lua Yehova! Omo liaco, oku yuvula akamba vãvi cilo, ci kuete esilivilo lia velapo!