1, 2. (a) Nye o lavoka oku mola Voluali luokaliye? (Tala ociluvialuvia kefetikilo liocipama cilo.) (b) Nye ci ka tu nenela esanju lialua voluali luokaliye?

TU LAVOKA oku kuata “omuenyo ko pui,” una upostolo Paulu a tukula hati, “omuenyo wocili.” (Tanga 1 Timoteo 6:12, 19.) Komanu valua, ci ka lomboloka oku kala komuenyo otembo ka yi pui voluali Luokaliye palo posi. Ka ca lelukile oku sokolola ndomo tu ka kala, poku pasuka luhayele, kuenda oku kuata esanju oloneke viosi komẽle. (Isaya 35:5, 6) Sokolola esanju o ka kuata poku pesila otembo koku kala lepata liove, akamba, oku kongelamo vana va ka pinduiwa. (Yoano 5:28, 29; Ovilinga 24:15) O ka kuata otembo yoku lilongisa ovoloño okaliye kuenda oku kũlĩha ciwa ovina o sole calua. Citava okuti o ka lilongisa ovina vialua viatiamẽla kuloño. Ale pamue o ka lilongisa oku sika ovisikilo, kuenda oku sokiya ndomo onjo yove yi ka tungiwa.

² Ndaño okuti tu kasi oku lavoka ovina vialua viwa, pole oku fendela Yehova ci ka tu nenela esanju lialua. Sokolola ndomo  omuenyo u ka kala eci omanu vosi va ka sumbila onduko yi kola ya Yehova kuenda oku tava okuti eye Ombiali yavo. (Mateo 6:9, 10) Tu ka kuata esanju lialua poku mola ongongo yi ka yuka lomanu va lipua, ndomo Suku a yonguile. Sokololavo ndomo ci ka leluka oku pamisa ukamba wetu la Yehova osimbu tu ka linga omanu va lipua vokuenda kuotembo!​—Osamo 73:28; Tiago 4:8.

3. Nye tu sukila oku pongiya cilo?

³ Tua kolela okuti Yehova o ka linga ovina viaco vi komohĩsa, momo kokuaye “ovina viosi vi tẽliwa.” (Mateo 19:25, 26) Nda tu yongola oku kala voluali luokaliye otembo ka yi pui, cilo, tu sukila oku ‘kakatela’ komuenyo wocili. Omo okuti esulilo ndopo liya, tu sukila oku ambata omuenyo lonjila yimue yeca uvangi wokuti tu kasi oku talamẽla esulilo li keya vepuluvi ka tua kũlĩhĩle. Tu sukila oku likolisilako cilo oku lipongiya, oco tu ka kale voluali luokaliye. Cilo tu konomuisi ndomo tu ci linga.

4. Tu pondola oku lipongiya ndati cilo oco tu ka kale voluali luokaliye? Tukula ulandu umue.

⁴ Tu pondola oku lipongiya ndati cilo oco tu ka kale voluali luokaliye? Nda tua linga esokiyo lioku ilukila kofeka yikuavo, tu pondola oku linga ovina vimue vi tu kuatisa oku lipongiya oco tu ka kale vofeka yaco. Tu ci linga poku fetika oku lilongisa elimi liomanu va kasi vofeka yaco kuenda ovituwa viavo. Tu pondolavo oku seteka okulia ovikulia vimue viofeka yaco. Cimuamue haico okuti, tu pondola oku lipongiya cilo oco tu ka kale voluali luokaliye poku likolisilako oku linga ovina vi lekisa ndu okuti tu kasi ale voluali luaco. Omo liaco, tu konomuisi vimue pokati kolonjila viaco vi tu kuatisa oku ci linga.

5, 6. Oku lilongisa oku pokola kolonumbi viocisoko ca Yehova ci tu kuatisa ndati oku lipongiya oco tu ka kale voluali luokaliye?

⁵ Voluali lulo, Satana o yongola okuti omanu va kuata ovisimĩlo viokuti va pondola oku linga ovina viosi va yongola. Omanu valua va siata oku sima okuti oku linga ovina okuti lomue o va tumila ci kuete esilivilo lia velapo, kuenda ka va sukila oku pokola ku Suku. Onima yipi va siata oku kuata? Va siata oku liyaka lohali yalua kuenda esumuo. (Yeremiya 10:23) Pole, Yehova eye Ombiali ukuacisola. Voluali luokaliye eci omanu vosi va ka pokola kokuaye, tu ka kuata omuenyo wa velapo!

⁶ Voluali luokaliye, tu ka kuata esanju poku kuama olonumbi viocisoko ca Yehova oco vi tu kuatise oku pongolola ongongo okuti yi kala yokaliye, kuenda oku longisa omanu vana va ka pinduiwa. Yehova o ka tu ĩha upange walua. Pole, nye tu sukila oku linga nda omanu vana va ka tu songuila va pinga kokuetu oco tu linge upange umue ka tu sole? Anga hẽ tu ka lekisa epokolo? Tu ka likolisilako hẽ oku tẽlisa ocikele cetu loku ci sanjukila? Oco tu lipongiyile oku ka kuata omuenyo ko pui voluali luokaliye, cilo tu sukila oku pokola kolonumbi vi tunda vocisoko ca Yehova.

7, 8. (a) Momo lie tu sukilila oku pokola ku vamanji va siata oku tu songuila? (b) Vamanji vamue va siata oku pita vapongoloko api? (c) Kovina vipi tua kolela viatiamẽla koluali luokaliye?

⁷ Nda tu yongola oku lipongiya oco tu kale voluali luokaliye, tu sukila oku lilongisa oku kuata esanju, oku kuatisa ocisoko ca Yehova, kuenda oku li kuatisa pokati la vakuetu. Nda tua tambula ocikele cimue cokaliye, tu sukila oku lekisa onjongole yoku ci tẽlisa kuenda oku likolisilako oku kuata esanju. Nda tua lilongisa cilo oku kuatisa vamanji vana va tu  songuila, ci ka tu kuatisavo oku linga ovina viaco voluali luokaliye. (Tanga Va Heveru 13:17.) Eci va Isareli va iñila Vofeka Yohuminyo, va tambuile ovitumãlo va sukilile oku kala. (Atendelo 26:52-56; Yehosua 14:1, 2) Voluali luokaliye ka tua kũlĩhĩle ocitumãlo omunu lomunu a ka tambula oco a kalemo. Pole, nda tua lilongisa oku eca ekuatiso, tu ka kuata esanju lioku linga ocipango ca Yehova kocitumãlo tu ka kala.

⁸ Sokolola esumũlũho tu ka kuata lioku vumba Suku voluali luokaliye vemẽhi Liusoma waye! Omo liaco, tu kuete esanju lioku kuatisa ocisoko ca Yehova cilo, kuenda oku tẽlisa ovikele viosi tua tambula. Vokuenda kuotembo, pamue ocikele cetu ci pongoloka. Ovolandu a lekisa okuti, vamanji vamue va kala ko Betele yo kofeka yo Estados Unidos va tambula ocikele cikuavo coku ka kundila kovikanjo vimue. Omo lioku kuka ale ovitangi vikuavo, vamanji vamue vakuakunyula akongelo va tumiwa kupange wakundi valikasi. Ovo va sanjukila ovikele viavo viokaliye, kuenje Yehova wa siata oku va sumũlũisa. Nda tua pinga ekuatiso ku Yehova vohutililo, loku likolisilako oku u vumba, kuenda oku sanjukila ovikele viosi va tu ĩha, tu kuata esanju, kuenje Yehova o tu sumũlũisa. (Tanga Olosapo 10:22.) Nye tu sukila oku linga nda voluali luokaliye tu yongola oku kala pocitumãlo cimue pole, ocisoko ca Yehova ci pinga kokuetu oco tu ilukile pocitumãlo cikuavo? Kotembo yaco, tu ka sanjukila oku kala kovitumalo viosi, ale oku linga ovopange osi. Tu ka eca olopandu omo lioku kala voluali luokaliye.​—Nehemiya 8:10.

9, 10. (a) Momo lie tu ka sukilila oku lekisa epandi voluali luokaliye? (b) Tu pondola oku lekisa ndati epandi cilo?

⁹ Voluali luokaliye tu ka sukila oku lekisa epandi olonjanja vimue. Momo pamue tu ka yeva omanu vamue va kuete esanju lialua omo liepata liavo lia pinduiwa kuenda akamba vavo. Omo liaco, pamue tu ka sukila oku kevelela toke eci vakuepata lietu va ka pinduiwa. Nda ovina viaco vieya oku pita letu anga hẽ tu ka kuata esanju kumue lomanu vakuavo kuenda tu ka lekisa epandi? (Va Roma 12:15) Nda cilo tua lilongisa oku kevelela lepandi toke eci Yehova a ka tẽlisa olohuminyo viaye, ci ka tu kuatisavo oku lekisa epandi.​—Ukundi 7:8.

¹⁰ Tu pondolavo oku lipongiya oco tu kale voluali luokaliye poku lekisa epandi eci ku lingiwa apongoloko amue atiamẽla kelomboloko lietu liocili Cembimbiliya. Tua siata hẽ oku lilongisa ovipama viaco viokaliye kuenda tu lekisa epandi nda ka tu kuete elomboloko liaco? Nda tua siata oku ci linga, voluali luokaliye ci ka leluka oku lekisa epandi eci Yehova a ka eca kokuetu olonumbi viokaliye.​—Olosapo 4:18; Yoano 16:12.

11. Momo lie tu sukilila oku ecela vakuetu cilo, kuenda ci ka tu kuatisa ndati voluali luokaliye?

¹¹ Onjila yikuavo yi tu kuatisa oku lipongiya oco tu kale voluali luokaliye, oku lilongisa oku ecela vana va tu lueyela. Vokuenda Kuohulukãi Yanyamo Yuviali wa Kristu, tu ka  sukila oku kala otembo yimue oco omunu lomunu a li pue. (Ovilinga 24:15) Tu ka lekisa hẽ ocisola kuenda tu ka ecela vakuetu? Nda cilo tua lilongisa oku ecela vakuetu okuti tu kuata ukamba lavo, ci ka lelukavo kokuetu oku ci linga voluali luokaliye.​—Tanga Va Kolosai 3:12-14.

12. Momo lie tu sukilila oku lipongiya cilo oco tu kale voluali luokaliye?

¹² Voluali luokaliye, olonjanja vimue ka tu ka kuata ovina viosi tu yongola, ale pamue tu ka sukila oku vi kevelela. Tu ka sukila oku eca olopandu kuenda oku sanjukila ekalo lietu. Ocili okuti, tu ka lekisavo ovituwa ndevi Yehova a siata oku tu longisa okuti ovio tu sukila oku lekisa cilo. Omo liaco, nda tua lilongisa oku lekisa ovituwa viaco cilo, tu eca uvangi wokuti oluali luokaliye lu keya muẽle, kuenda tu kasi oku lipongiya oco tu kuate omuenyo ko pui. (Va Heveru 2:5; 11:1) Tu ka ecavo uvangi wokuti tu yongola oku kala voluali luna okuti, omanu vosi va pokola ku Yehova.

13. Voluali luokaliye nye tu ka pitisa kovaso komuenyo wetu?

¹³ Voluali luokaliye tu ka kuata ovina viosi tu sukila oco tu kuate esanju komuenyo. Pole, esanju lietu lia velapo li ka tunda koku kuata ukamba la Yehova. (Mateo 5:3) Tu ka pesila otembo yalua koku linga upange wa Yehova, kuenda tu ka sanjukila oku u vumba. (Osamo 37:4) Omo liaco, nda tua pitisa kovaso upange wa Yehova komuenyo wetu cilo, tu ka lekisa okuti tua lipongiya oco tu kale voluali luokaliye.​—Tanga Mateo 6:19-21.

14. Ovimãho vipi vamanji amalẽhe va pondola oku kuata kupange wa Yehova?

¹⁴ Tu pondola oku kuata ndati esanju lialua poku vumba Yehova? Onjila yimue yoku ci linga oku kuata ovimãho. Nda ove umalẽhe, sokolola lutate ndomo o pondola oku ambata omuenyo wove oco o vumbe Yehova. Momo lie ku lingila akonomuiso amue valivulu etu atiamẽla kovopange a litepa otembo yosi? O pondola oku kuata ocimãho coku  nõla umue pokati kovopange aco. * (Tala etosi pombuelo yemẽla.) Sapela la manji umue o kasi oku vumba Yehova kupange wotembo yosi vokuenda kuanyamo alua. Nda wa lieca kupange wa Yehova, o pondola oku tambula epindiso li kuete esilivilo lia velapo. Epindiso liaco li ka ku kuatisa oku vumba Yehova voluali luokaliye.

15. Ovimãho vipi vikuavo tu pondola oku kuata kupange wa Yehova?

¹⁵ Kuli ovimãho vialua tu pondola oku nõla kupange wa Yehova. Tu pondola oku kuata ocimãho coku lilongisa ovoloño okaliye oco a tu kuatise kupange woku kunda. Ale tu seteka oku kuata elomboloko lia suapo liolonumbi Viembimbiliya, kuenda oku lilongisa ndomo tu vi kapako komuenyo wetu. Tu pondolavo oku likolisilako oku mioñolola oku tangela pokati komanu, ale oku linga ciwa olohundo vietu, kuenda oku eca atambululo kolohongele. Etosi lia velapo lieli liokuti: Nda wa kuata ovimãho kupange wa Yehova, ci ku kuatisa oku vokiya ombili yove kuenda oku lipongiya oco o kale voluali luokaliye.

16. Momo lie oku vumba Yehova oyo onjila ya velapo komuenyo?

¹⁶ Nda tu pesila otembo yetu koku lipongiya oco tu ka kale voluali luokaliye lua Suku, ci lekisa hẽ okuti tu kasi oku pumba ekalo liomuenyo umue wa velapo koloneke vilo? Sio! Momo oku vumba Yehova oyo onjila ya velapo komuenyo. Ka tu kasi oku vumba Yehova omo liomunu umue wa tu kisika oku ci linga, ale omo okuti tu yongola oku puluka kohali ya piãla. Nda tu kuete ukamba la Yehova tu kuata omuenyo wa velapo kuenda tu sanjuka. Eli olio esunga lieci a tu lulikila. Oku kuata ocisola ca Suku kuenda oku tambula olonumbi viaye komuenyo wetu, oco ca velapo okuti ovina vikuavo vi sule. (Tanga Osamo 63:1-3.) Vosi yetu tu pondola oku kuata esanju li tunda koku fendela Yehova lutima wetu wosi. Vamanji vamue va  kasi oku vumba Yehova vokuenda kuanyamo alua, va siata oku popia vati, eyi oyo onjila ya velapo komuenyo.​—Osamo 1:1-3; Isaya 58:13, 14.

17. Voluali luokaliye momo lie ci ka kuatela esilivilo oku lekisa onjongole komanu vakuavo kuenda oku linga olomapalo?

¹⁷ Voluali luokaliye palo posi, tu ka sanjukila oku pesila otembo koku lekisa onjongole komanu kuenda oku linga olomapalo. Omo okuti, Yehova wa tu lulika locimãho coku kuata esanju, wa tu likuminya hati, o ka “kutisa [ovina] viosi vi kasi lomuenyo.” (Osamo 145:16; Ukundi 2:24) Ndaño okuti tu sukila oku linga olomapalo kuenda oku puyuka, pole, tu sanjukila lika ovina viaco nda tua pitisa kovaso ukamba wetu la Yehova. Cimuamue haico tu ka sukila oku linga voluali luokaliye. Omo liaco, tu sukila oku ‘sandiliya tete Usoma,’ loku tiamisila utima kasumũlũho tua siata oku tambula a tunda koku vumba Yehova.​—Mateo 6:33.

18. Tu pondola oku lekisa ndati okuti tua lipongiya oco tu ka kale Voluali Luokaliye palo posi otembo ka yi pui?

¹⁸ Voluali luokaliye tu ka kuata omuenyo wa velapo okuti, cilo ka tu tẽla oku sokolola ndomo ovina vi ka kala. Yilo oyo otembo yoku lekisa okuti tu yongola oku kala voluali luokaliye, oco tu kuate “omuenyo ko pui.” Tu kuati ovituwa Yehova a siata oku tu longisa okuti ovio tu sukila oku lekisa. Tu lekisivo ombili kupange woku kunda olondaka viwa. Citava okuti tua siata oku kuata esanju poku pitisa kovaso efendelo lia Yehova komuenyo wetu. Tua kolela okuti, voluali luokaliye Yehova o ka linga ovina viosi a likuminya. Omo liaco, tu sukila oku ambata omuenyo umue u lekisa ndu okuti, tu kasi ale voluali luokaliye!