1, 2. Ocimãho cipi Akristão vosi va kuete? Tukula ulandu umue.

NDA ukãi enda kocitanda nye a sukila oku konomuisa poku landa apako? Citava okuti ka tiamisila lika utima waye koku landa apako anene omo okuti ondando yaco ka ya tĩlile. Pole, o sandiliya apako ana a kuete elemba liwa okuti a kasi ciwa, kuenda citava oku a lia. Eye o yongola oku landa apako ana okuti a pia.

² Omunu noke yoku lilongisa ovina viatiamẽla ku Yehova, o nõlapo oku papatisiwa kuenje ukamba waye la Yehova wamamako oku livokiya. Eye o kuata ocimãho coku kala Ukristão wa loñoloha. Oku loñoloha kuaco ka ku tiamisiwila koku kala ukulu wendamba. Pole, ku lomboloka oku kula konepa yespiritu loku kuata ukamba wocili la Yehova. Upostolo Paulu wa yonguile okuti Akristão vo ko Efeso va loñoloha. Omo liaco, wa va vetiya oco va likuate omunga vekolelo kuenda oku amamako oku lilongisa ovina viatiamẽla ku Yesu oco va kale ‘omanu vendamba va soka loseteko yutunga woku yuka kua Kristu.’—Va Efeso 4:13.

3. Vamanji vekongelo lio ko Efeso va sokisiwa ndati lafendeli va Yehova vo koloneke vilo?

 ³ Ko Efeso kua kala ale ekongelo limue eci Paulu a va sonehela ukanda. Valua pokati komanu vekongelo liaco, va kala Akristão va loñoloha. Pole, vamue pokati kavo va sukilile handi oku pamisa ukamba wavo la Yehova. Koloneke vilo kulivo vamanji valua va kasi oku vumba Yehova vokuenda kuanyamo alua, okuti va linga Akristão va loñoloha. Pole, vakongelo mu sangiwa vamanji vamue okuti ka va loñolohele. Ndaño okuti omanu valua va siata oku papatisiwa unyamo lunyamo, pole va sukila handi oku loñoloha. Nye ci popiwa catiamẽla kokuove?—Va Kolosai 2:6, 7.

4, 5. Etepiso lipi li kasi pokati Kakristão va loñoloha, pole nye vosi yavo va kuete? (Tala elitalatu kefetikilo liocipama cilo.)

⁴ Eci o tala apako amue a pia a kasi pocitanda, o limbuka okuti a litepa. Pole, kuli ocina cimue ci tu kuatisa oku limbuka okuti a pia. Cimuamue haico ci pita Lakristão va loñoloha. Ovo va litepa. Momo va tunda kolofeka via litepa, kuenda va kuete ovituwa via litepa. Handi vali, ka va kuete anyamo amuamue, kuenda ka va sole ovina vimuamue. Pole, Akristão vosi va loñoloha va kuete ovituwa vimue vi eca uvangi waco. Vipi vimue pokati kovituwa viaco?

⁵ Ukristão wa loñoloha o setukula Yesu kuenda o kuama “volomãi viaye.” (1 Petulu 2:21) Yesu wa popia hati, ci kuete esilivilo lia velapo nda omunu o sole Yehova lutima waye wosi, lomuenyo waye wosi, lolondunge viaye viosi, kuenda o solevo omanu vana a lisungue lavo ndeci a lisole eye muẽle. (Mateo 22:37-39) Ukristão wa loñoloha o likolisilako oku pokola kocihandeleko caco. Ovituwa omunu a lekisa komuenyo waye vi eca uvangi wokuti ukamba waye la Yehova kuenda ocisola a kuetele omanu vakuavo oco ocina ca velapo kokuaye.

6, 7.(a) Ovituwa vipi Akristão va loñoloha va sukila oku lekisa? (b) Nye tu sukila oku lipula?

⁶ Ocisola ocituwa cimue pokati kovituwa vialua Ukristão wa loñoloha a sukila oku lekisa. (Va Galatia 5:22, 23) Eye o lekisavo ovituwa ndeci: Umbombe, oku likandangiya, kuenda epandi. Ovituwa viaco vi pondola oku u kuatisa oku pandikisa kovitangi okuti ka sumua, kuenje amamako lekolelo kuenda ka pui elavoko. Ukristão wa loñoloha, velilongiso liaye lio pokolika o sandiliya olonumbi Viembimbiliya viu kuatisa oku tepisa pokati keci ciwa leci cĩvi.  Noke, eci a kuatisiwa lovisimĩlo viaye via pindisiwa Lembimbiliya, o nõla onjila ya sunguluka. Ukristão wa loñoloha o lekisa umbombe, momo o tava okuti olonumbi via Yehova kuenda alungulo aye vi kuete esilivilo lia velapo okuti viaye muẽle vi sule. * (Tala etosi pombuelo yemẽla.) Eye o lekisa ombili kupange woku kunda olondaka viwa, kuenda o likolisilako oku kuatisa vamanji vekongelo oco va likuate omunga.

⁷ Ndaño okuti tu kasi oku vumba Yehova vokuenda kuanyamo alua, pole omunu lomunu pokati ketu o sukila oku lipula ndoco: ‘Kuli hẽ apongoloko amue ndi sukila oku linga oco ndi setukule ciwa Yesu?’ Kuli hẽ ovina vimue ndi sukila oku mioñolola?

8. Yesu wa kũlĩhĩle ndati Embimbiliya loku kuata elomboloko liaco?

⁸ Yesu Kristu wa kũlĩhĩle ciwa Ovisonehua, kuenda wa kuatele elomboloko liaco. Momo, eci a kuata ci soka 12 kanyamo wa tukula Ovisonehua  poku sapela lalongisi vonembele. Omo liaco, “vosi vo yeva va komõha olondunge viaye latambululo aye.” (Luka 2:46, 47) Poku kunda wa enda oku tukula Ondaka ya Suku oco a tambulule ovanyãli vaye.—Mateo 22:41-46.

9. (a) Esokiyo lipi lielilongiso Liembimbiliya Ukristão wa loñoloha a sukila oku kuata? (b) Momo lie tu lilongisila Embimbiliya?

⁹ Omunu wosi o yongola oku kala Ukristão wa loñoloha, o kuama ongangu ya Yesu oco a kuate elomboloko Liembimbiliya. Olonjanja viosi o linga akonomuiso ovina via longa Viovisonehua, momo wa kũlĩha okuti “okulia kua kola kuakulu.” (Va Heveru 5:14) Ukristão wa loñoloha o lekisa onjongole yoku kuata ‘ukũlĩhĩso wa suapo’ Wembimbiliya. (Va Efeso 4:13) Omo liaco, lipula ndoco: ‘Anga hẽ nda siata oku tanga Embimbiliya eteke leteke? Nda siata hẽ oku linga akonomuiso velilongiso liange lio pokolika? Nda siata hẽ oku linga efendelo liepata olosemana viosi?’ Eci o lilongisa Embimbiliya sandiliya olonumbi vi ku kuatisa oku limbuka ovisimĩlo via Yehova. Noke kapako olonumbi viaco poku nõla onjila o yongola oku kuama. Nda wa ci linga, ci ku kuatisa oku pamisa ukamba wove la Yehova.

10. Ukristão wa loñoloha o tenda ndati ocihandeleko ca Suku kuenda alungulo aye?

¹⁰ Ukristão wa loñoloha o sukila oku linga ovina vikuavo okuti oku kũlĩha lika eci Embimbiliya li popia ci sule. Eye o sukila oku sola ocihandeleko ca Suku kuenda alungulo aye. O lekisavo ocisola caco poku kuata onjongole yoku linga ocipango ca Suku okuti, ka pitisa kovaso olonjongole viaye muẽle. O linga apongoloko komuenyo waye, kovisimĩlo, kuenda kovilinga viaye. Handi vali, o setukula Yesu poku wala omunu wokaliye okuti o “tungiwa lesetahãlo lia Suku lesunga kuenda oku kola.” (Tanga Va Efeso 4:22-24.) Oku ivaluka okuti Suku wa ecelela espiritu sandu liaye oco li songuile asonehi Vembimbiliya, ci kuete esilivilo lia velapo . Omo liaco, nda Ukristão o lilongisa Embimbiliya espiritu sandu lia Yehova Suku liu kuatisa oku vokiya ukũlĩhĩso, ocisola, kuenda oku pamisa ukamba laye.

11. Nye ca pita la Yesu eci a kala palo posi?

¹¹ Yesu wa kala ulume umue wa li pua. Eci a kala palo posi wa ñualiwile lomanu ka va lipuile. Olonjali viaye kumue la vamanjaye, vosi yavo va kala omanu ka va lipuile. Handi vali, olondonge via Yesu via lekisavo ovituwa ka via sungulukile ndeci, epela kuenda oku livelisapo. Kuteke wa sulako osimbu Yesu ka file, olondonge viaye via lihoya pokati catiamẽla komunu wa laikele oku ‘linga unene pokati kavo.’ (Luka 22:24) Ndaño okuti olondonge via kuatele ovisimĩlo ka via sungulukile omo liekambo lioku lipua, pole Yesu wa kũlĩhĩle okuti via laikele oku kala Akristão va loñoloha, kuenda oku sokiya ekongelo limue okuti omanu vaco va likuete omunga. Kuteke waco, Yesu wa va kongela vohutililo oco va likuate omunga. Eye wa pinga ku Isiaye wo kilu oco vosi yavo va likuate omunga poku popia hati: “Vosi va kala vamuamue, ndeci ove, a Tate, o kasi vokuange lame ñasi vokuove.” Noke wamisako hati: “Va kale vamuamue ndeci etu.”—Yoano 17:21, 22.

12, 13. (a) Omo okuti Tuakristão vocili ocimãho cipi tu kuete? (b) Manji umue wa lilongisa ndati oku likuata omunga vekongelo?

¹² Ukristão wa loñoloha o lekisa ovituwa viwa oco vamanji vekongelo va likuate omunga. (Tanga Va Efeso 4:1-6, 15, 16.) Omo okuti Tuakristão vocili, ocimãho cetu  oku “tokekisua loku sokekisua” okuti, ci lomboloka oku lingila kumosi ovopange. Oco vamanji vekongelo va likuate omunga, Ukristão o sukila oku lekisa umbombe. Ndaño okuti pamue Ukristão wa loñoloha o yeva esumuo omo liekambo lioku lipua lia vamanji vakuavo, pole o likolisilako oco vamanji vekongelo va likuate omunga. Omo liaco, lipula ndoco: ‘Ocituwa cipi ndi sukila oku lekisa nda manji umue wa ndi lueyela? Nye ndi yeva vutima nda omunu umue wa ndi sumuisa? Nda siata hẽ oku liwekapo oku sapela lomunu waco? Ale ndi likolisilako oku linga ukamba laye?’ Ukristão wa loñoloha o likolisilako oku tetulula ovitangi okuti, ka kokela ovitangi ku vamanji vakuavo.

¹³ Tu konomuisi ulandu wa manji umue o tukuiwa hati Uwe. Kosimbu wa ecelela okuti ekambo lioku lipua lia vamanji vakuavo liu sumuisa. Pole, wa nõlapo oku kuatisiwa Lembimbiliya, kuenda elivulu Estudo Perspicaz das Escrituras, oco a lilongise ovina viatiamẽla komuenyo wa Daviti. Momo lie a konomuisila ulandu watiamẽla ku Daviti? Momo, pokati ka Daviti kumue lafendeli vakuavo va Suku pa kalelevo ovitangi. Ovolandu a lekisa okuti Soma Saulu wa setekele oku ponda Daviti, noke omanu vamue va yonguile oku u ponda lovawe, kuenda ukãi waye wo yola epembe. (1 Samuele 19:9-11; 30:1-6; 2 Samuele 6:14-22) Ndaño okuti omanu va lingila Daviti ovina ka via sungulukile, pole wa lekisa ocisola ku Yehova, kuenda ekolelo kokuaye. Daviti wa lekisavo ohenda. Noke, manji Uwe wa limbuka okuti o sukila oku kuama ongangu yaco. Lekuatiso lielilongiso Liembimbiliya wa limbuka okuti wa sukilile oku linga apongoloko kovisimĩlo viaye viatiamẽla kekambo lioku lipua lia vamanji. Eye wa sukilile oku liwekapo oku sokolola akulueya avo poku lekisa ovituwa viwa oco vamanji vekongelo va likuate omunga. Ove hẽ o kuete ocimãho coku kuama ongangu yaye?

14. Yesu wa nõlele ndati akamba vaye?

¹⁴ Yesu wa kuatele ukamba lomanu. Alume, akãi, amalẽhe, akulu kuenda omãla, va enda oku lianja la Yesu. Pole, wa nõlele lutate akamba vaye. Eye wa sapuila ovapostolo vaye hati: “Ene wakamba vange nda vu linga ovina ndu handeleki.” (Yoano 15:14) Yesu wa nõlele akamba vaye pokati komanu vana va enda oku u kuama okuti, va solele Yehova loku u vumba. Ove hẽ wa siata oku nõla akamba vana va sole Yehova lutima wavo wosi? Momo lie ci kuetele esilivilo?

15. Amalẽhe va pondola oku kuatisiwa ndati nda va linga ukamba Lakristão va loñoloha?

¹⁵ Apako alua a siata oku pia lika nda kuli utanya walua. Cimuamue haico okuti, ocisola ca vamanji ci ku kuatisa oku kala Ukristão wa loñoloha. Ove hẽ umalẽhe umue okuti o kasi oku seteka oku nõla ovina o ka linga komuenyo wove? Nda o  kasi oku ci linga, o sukila oku nõla lutate akamba vana va kasi oku vumba Yehova vokuenda kuotembo yimue okuti, va vetiya oku likuata omunga vekongelo. Citava okuti va liyakele lovitangi komuenyo wavo, kuenje va siata oku lekisa epandi osimbu va kasi oku amamako oku vumba Yehova. Ovo va pondola oku ku kuatisa oco o nõle onjila ya velapo komuenyo. Nda wa sokiya otembo yoku kala lavo, citava okuti va ku kuatisa oku nõla onjila ya sunguluka, kuenda oku kala Ukristão wa loñoloha.—Tanga Va Heveru 5:14.

16. Vamanji vamue va kuka va kuatisa ndati manji umue eci a kala umalẽhe?

¹⁶ Manji umue o tukuiwa hati Helga vokuenda kunyamo wa sulako kosikola a kala oku tangela ivaluka okuti, valua pokati komanu va tangela kumosi laye va enda oku sapela ovina viatiamẽla kovimãho viavo vio kovaso yoloneke. Valua pokati kavo va yonguile oku tangela kosikola ya velapo oco va kuate ekemãlo komuenyo. Pole, manji Helga wa sapela lakamba vaye va loñoloha vekongelo a kala. Eye wa popia hati: “Omo okuti valua pokati kakamba vaco va kala akulu vange, va ndi kuatisa calua. Ovo va ndi vetiya oku litumbika kupange wotembo yosi. Kuenje, nda kala ukundi wotembo yosi vokuenda kuanyamo atãlo. Omo okuti pa pita ale anyamo alua, cilo ndi kuete esanju lialua omo lioku pesila otembo yange yovomalẽhe kupange wa Yehova. Si kuete esunga lioku livela omo nda nõlapo oku linga upange waco.”

17, 18.Tu pondola oku vumba ndati ciwa Yehova?

¹⁷ Nda tua kuama ongangu ya Yesu, tu kuatisiwa oku kula konepa yespiritu oco tu kale Akristão va loñoloha. Nda tua ci linga, tu pamisa ukamba wetu la Yehova, kuenje onjongole yetu yoku u vumba yi livokiya. Omunu o pondola lika oku vumba ciwa Yehova nda wa loñoloha. Yesu wa vetiya olondonge viaye poku popia hati: “Ocinyi cene ci taimile ndoco kovaso omanu okuti va mola ovilinga viene viwa kuenje va sivaya Isiene o kasi kilu.”—Mateo 5:16.

¹⁸ Vocipama cilo tua lilongisa ndomo Ukristão wa loñoloha a pondola oku kuatisa vamanji vekongelo. Ukristão o pondolavo oku lekisa okuti wa loñoloha nda o tiamisila utima waye kovina via sunguluka. Utima wetu u pondola oku tu kuatisa ndati oku nõla onjila ya sunguluka? Tu pondola oku lekisa ndati esumbilo kovisimĩlo via vakuetu? Vocipama ci kuãimo tu ka tambulula apulilo a lingiwa ndeti.