1, 2. Etepiso lipi li kasi pokati komanu lovinyama?

OWOÑO womunu wa pangiwa lonjila yimue ya litepa. Omanu va kuete uloño woku lilongisa oku vangula elimi limue. Oku vangula elimi limue ci tu kuatisa oku tanga, oku soneha, oku popia, kuenda oku kuata elomboloko liovina tu yeva. Ci tu ĩhavo uloño woku likutilila kuenda oku imbila Yehova ovisungo. Ovina viosi via tukuiwa ndeti vi lekisa etepiso li kasi pokati ketu lovinyama. Olonoño ka vi pondola oku kuata elomboloko lia suapo ndomo owoño wetu u pondola oku linga ovina viaco vi komõhisa.

² Uloño wetu woku vangula elimi limue, ombanjaile yimue yi tunda ku Yehova. (Osamo 139:14; Esituluilo 4:11) Eye wa tu ĩhavo ombanjaile yikuavo yi lekisa etepiso li kasi pokati ketu lovinyama. Omanu va lulikiwa ‘lesetahãlo lia Suku.’ Tu kuete elianjo lioku linõlela ovina tu yongola oku linga. Kuenje, elimi tu vangula li pondola oku tu kuatisa oku vumba Yehova kuenda oku eca esivayo kokuaye.​—Efetikilo 1:27.

3. Nye Yehova a tu ĩha oco tu kuate olondunge?

³ Omo okuti Yehova wa tu ĩha Embimbiliya, wa lekisa ndomo  tu pondola oku u vumba kuenda oku eca esivayo kokuaye. Embimbiliya ale onepa yimue Yembimbiliya ya sandekiwa kueci ci pitahãla 2.800 kalimi. Nda tu sokolola ovina Embimbiliya li popia, tu kuata ovisimĩlo ndevi via Suku. (Osamo 40:5; 92:5; 139:17) Ovisimĩlo via Yehova Suku vi tu kuatisa oco tu kuate olondunge kuenda omuenyo ko pui.​—Tanga 2 Timoteo 3:14-17.

4. Oku sokolola ku lomboloka nye, kuenda apulilo api tu tambulula?

⁴ Oku sokolola ku lomboloka oku tiamisila utima kocina cimue, kuenda oku ci sokolola lutate. (Osamo 77:12; Olosapo 24:1, 2) Tu kuatisiwa calua eci tu sokolola ovina tua lilongisa viatiamẽla ku Yehova kuenda ku Yesu. (Yoano 17:3) Vocipama cilo tu tambulula apulilo a kuãimo ndeci: Tu pondola oku tanga ndati lonjila yimue ya leluka okuti yi tu kuatisa oku sokolola? Ovina vipi tu sukila oku sokolola? Nye ci pondola oku tu kuatisa oku sokolola olonjanja viosi loku sanjukila ovina viaco?

5, 6. Nye ci pondola oku ku kuatisa oku ivaluka ciwa ovina wa tanga kuenda oku kuata elomboloko liaco?

⁵ Ove hẽ wa limbukile ale okuti kuli ovina vimue wa siata oku linga osimbu kua vi sokoluile ndeci, oku fuima, oku enda, ale oku endisa osikaleta? Ocili okuti olonjanja vimue o pondola oku tanga kuenje ku sokolola ovina viaco. Pamue o fetika oku sokolola ovina vimue osimbu o kasi oku tanga. Nye o pondola oku linga oco o liteyuile kovisimĩlo viaco? Oku tiamisila utima kovina o tanga, loku sokolola elomboloko liaco, ci kuete esilivilo lia velapo. Eci o pitĩla kesulilo liocinimbu cimue ale pokasapi kelivulu limue, talamapo kamue, kuenje sokolola ovina wa tanga. Sokolola ovina wa lilongisa oco o limbuke nda via ku lomboloka ciwa.

⁶ Olonoño via limbuka okuti, nda tu tanga ovina vimue lolukandi, ci leluka oku vi sokolola. Omo okuti Ululiki wetu wa kũlĩha ciwa ovina viaco, wa sapuila Yehosua oco a tange Elivulu liovihandeleko loku “li sokolola” okuti o ci linga lutate. (Tanga Yehosua 1:8.) Oku tanga Embimbiliya lolukandi ci ku kuatisavo oku tiamisila utima kulandu waco kuenda oku ivaluka ovina viaco.

7. Vepuluvi lipi ca sunguluka oku sokolola ovina Viembimbiliya? (Tala ociluvialuvia kefetikilo liocipama cilo.)

⁷ Tu sukila oku likolisilako oku sokolola lutate ovina tu lilongisa kuenda oku tiamisila utima kovina viaco. Oku sokolola ovina wa tanga vepuluvi lina okuti kua kavele, ci kuetele esilivilo lia velapo. Pole, o sukila oku ci lingila pocitumãlo cimue ka pali onjuela okuti lacimue ci ku tateka. Ukualosamo Daviti kuteke wa enda oku sokolola osimbu a kasi pula. (Osamo 63:6) Ndaño okuti Yesu wa lipuile, pole wa enda oku nõla ocitumãlo cimue ka pali onjuela, oco a sokolole kuenda oku likutilila.​—Luka 6:12.

8. (a) Nye tu pondola oku sokolola? (b) Nye Yehova a yeva vutima eci tu sapela lomanu vakuavo ovina viatiamẽla kokuaye?

⁸ Ndaño okuti wa siata oku tanga Embimbiliya, pole kuli ovina vikuavo o pondola oku sokolola. Eci o tala ovina vi komõhisa Yehova a lulika, sokolola lutate kuenje lipula ndoco: ‘Ovina evi vi ndi longisa nye catiamẽla ku Yehova?’ Ovisimĩlo viaco vi ku vetiya oku eca olopandu ku Yehova vohutililo. Nda o kasi lomanu vakuavo, o kuata onjongole yoku va sapuila ovina viaco. (Osamo 104:24; Ovilinga 14:17) Yehova o tu yevelela, kuenda o kuata esanju nda tu sokolola ovina viatiamẽla kokuaye, tu likutilila, kuenda tu sapuila komanu ovina viaco. Embimbiliya li tu sapuila ndoco: “Kuo sonehĩwĩla [elivulu] lionjivaluko yava va sumba Yehova, haivo va sokolola onduko yaye.”​—Malakiya 3:16.

9. (a) Nye Paulu a sapuila Timoteo okuti oco a sukilile oku sokolola? (b) Ovina vipi tu sukila oku sokolola poku lipongiya oco tu ende kupange woku kunda?

⁹ Upostolo Paulu wa sapuila Timoteo oco a sokolole ndomo olondaka viaye, ovituwa viaye, kuenda oku longisa kuaye ku pondola oku vetiya omanu vakuavo. (Tanga 1 Timoteo 4:12-16.) Citava okuti o sokololavo ovina viaco. O sukila oku sokiya otembo yoku sokolola eci o pongiya elilongiso Liembimbiliya. Sokolola eci catiamẽla komunu o longisa Embimbilya, kuenda sanda epulilo ale ocindekaise cimue ci pondola oku u  kuatisa oco a loñolohe. Nda wa kuama onjila yaco eci o lipongiya oco o ka longise Embimbiliya komanu, ekolelo liove li pamisiwa, kuenje o loñoloha, kuenda o kala ulongisi uwa Wembimbiliya. O kuatisiwavo nda o sokolola osimbu kua endele kupange woku kunda. (Tanga Esera 7:10.) Citava okuti o tanga ocipama cimue velivulu Liovilinga oco ci ku kuatise oku kuata ombili kupange woku kunda. O pondolavo oku sokolola kolondaka vi sangiwa vovinimbu Viembimbiliya wa sokiya oku tanga kupange woku kunda, kuenda alivulu o yongola oku eca komanu. (2 Timoteo 1:6) Sokolola eci catiamẽla komanu va kasi vocikanjo, kuenda ovina o pondola oku va sapuila okuti vi va vetiya. Nda wa ci linga, o loñoloha poku kundila omanu lekuatiso Liembimbiliya.​—1 Va Korindo 2:4.

10. Ovina vipi vikuavo viwa o sukila oku sokolola?

¹⁰ Kovina vipi vikuavo tu pondola oku sokolola? Nda wa soneha atosi amue a tukuiwa vokuenda kuohundo, kohongele yimbo, kuenda kohongele yofeka, sokiya otembo yoku sokolola lutate atosi aco. Poku ci linga lipula ndoco: ‘Nye nda lilongisa Vondaka ya Suku kuenda vocisoko caye?’ O pondolavo oku sokolola ovipama via siata oku sandekiwa olosãi viosi Vutala Wondavululi, vo Despertai!, kuenda alivulu a sandekiwa kohongele yofeka ya lingiwa ndopo. Eci o tanga ulandu umue vo Anuário, talamapo kamue, kuenda sokolola ulandu waco, noke ecelela okuti u vetiya utima wove. Nda o kasi oku tanga alivulu etu, citava okuti o taya atosi a velapo ale o soneha ovina vikuavo ponele yemẽla liaco. Nda wa ci linga, ci ku kuatisa oku lipongiya oco o linge apasu, oku nyula vamanji, ale oku linga ohundo. Eci o sokolola lutate ovina wa tanga, ci vetiya utima wove, kuenje ci ku kuatisa oku eca olopandu ku Yehova vohutililo omo liovina viwa wa lilongisa.

11. Elivulu lipi li kuete esilivilo lia velapo tu sukila oku sokolola? Oku ci linga ci tu kuatisa ndati? (Talavo etosi pombuelo yemẽla.)

¹¹ Pokati kalivulu osi, Embimbiliya olio elivulu lia velapo tu sukila oku sokolola lutate. Nda eteke limue ka va ku ecelela oku kuata Embimbiliya nye o linga? * (Tala etosi pombuelo yemẽla.) Lomue o pondola oku ku tateka oku sokolola ovina vi kasi vutima wove ndeci, ovinimbu Viembimbiliya o sole calua, ale ovisungo Viusoma. (Ovilinga 16:25) Espiritu lia Suku li ku kuatisa oku sokolola ovina wa lilongisa, kuenda oku amamako lekolelo.​—Yoano 14:26.

12. Esokiyo lipi o pondola oku linga oco o tange Embimbiliya oloneke viosi?

¹² Esokiyo lipi o pondola oku linga oco o tange Embimbiliya oloneke viosi? Vokuenda  kuoloneke vimue vosemana o pondola oku tanga loku sokolola ovipama Viembimbiliya vi tangiwa Kosikola Yupange Wakristão. Oloneke vikuavo o pondola oku tanga Avanjeliu ndeci lia Mateo, lia Marko, lia Luka, lia Yoano, kuenda oku sokolola ovina Yesu a popia levi a linga. (Va Roma 10:17; Va Heveru 12:2; 1 Petulu 2:21) Tu kuetevo elivulu limue li lombolola ovolandu omuenyo wa Yesu okuti li kuete ulala u lekisa ndomo ovina viaco via pita. Elivulu liaco li pondola oku ku kuatisa calua poku tanga Avanjeliu.​—Yoano 14:6.

13, 14. Momo lie ci kuetele esilivilo kokuetu oku amamako oku sokolola ovina viatiamẽla ku Yehova kuenda ku Yesu? Ovina viaco vi tu vetiya oku linga nye?

¹³ Oku sokolola ovina viatiamẽla ku Yehova kuenda ku Yesu, ci pondola oku kuatisa omunu oco a linge Ukristão umue wa loñoloha kuenda oku pamisa ekolelo liaye. (Va Heveru 5:14; 6:1) Nda omunu ka sokiya otembo yoku sokolola ovina viatiamẽla ku Yehova Suku, vokuenda kuotembo ukamba waco laye u nyõleha. (Va Heveru 2:1; 3:12) Yesu wa lungula hati, nda ka tua yevelele ale ka tua tavele Ondaka ya Suku ‘lutima wa lipua haiwo wa sunguluka,’ ka tu ‘imi apako.’ Kuenje, ci leluka kokuetu oku “totomisua lohele lukuasi lalau omuenyo.”​—Luka 8:14, 15.

¹⁴ Omo liaco, tuamamiko oku sokolola ovina vi sangiwa Vembimbiliya oco tu kũlĩhe ciwa Yehova. Nda tua ci linga, ci tu vetiya oku setukula ovituwa viaye viwa, kuenda ekalo liaye. (2 Va Korindo 3:18) Tu pondola oku amamako oku lilongisa ovina vialua viatiamẽla ku Isietu wo kilu, kuenda oku u setukula otembo ka yi pui. Ka kuli esumũlũho li sokisiwa lovina viaco!​—Ukundi 3:11.

15, 16. (a) O kuatisiwa ndati poku sokolola ovina viatiamẽla ku Yehova kuenda ku Yesu? (b) Momo lie pamue ka ci lelukila oku sokolola, pole momo lie tu sukilila oku amamako oku ci linga?

¹⁵ Oku sokolola ovina viatiamẽla ku Yehova kuenda ku Yesu, ci tu kuatisa oku amamako oku lekisa ombili kocili. Ocituwa caco ci pondola oku vetiya vamanji kuenda omanu o sanga kupange woku kunda. Eci o sokolola ovina Yehova a ku lingila poku sokiya ocilumba cocisembi ca Yesu, o vetiyiwa oku amamako oku lekisa esilivilo liukamba wove la Suku. (Va Roma 3:24; Tiago 4:8) Manji umue o tukuiwa hati Mark, wo kofeka yo Afrika do Sul okuti wa kala vokayike vokuenda kuanyamo atatu omo liekolelo liaye wa popia hati: “Oku sokolola ku sokisiwa locina cimue tu linga okuti ci komõhisa. Nda tu sokolola olonjanja vialua ovina viatiamẽla konepa yespiritu, tu limbuka ovina viokaliye viatiamẽla ku Yehova Suku yetu. Olonjanja vimue eci ndi yeva esumuo ale esakalalo liovina viatiamẽla kovaso yoloneke, ndi tanga Embimbiliya, kuenda ndi sokolola ocinimbu cimue nda tanga. Noke, ndi limbuka okuti ocinimbu caco ca ndi kavuluisa.”

 ¹⁶ Oluali lulo lue yuka ovina vialua vi pondola oku tateka omunu oku sokiya otembo yoku sokolola ovina vi sangiwa Vembimbiliya. Manji Patrick wo kofeka yo Afrika do Sul wa popia hati: “Ovisimĩlo viutima wange vi sokisiwa lukanda umue mua sonehiwa asapulo alua okuti oloneke viosi ndi seleka lika ana a kuete esilivilo, pole akuavo sio. Osimbu ndamamako oku sokolola ovina vi kasi vutima wange, olonjanja vimue eci ndi kuata ‘atatahãi alua,’ ndi likutilila ku Yehova catiamẽla katatahãi aco osimbu ndi kuete utima wa yela. Ndaño okuti oku ci linga cambata otembo yalua osimbu sia fetikile oku sokolola ovina viespiritu, pole ukamba wange la Yehova u pamisiwa. Kuenje, ovina viaco vi ndi kuatisa oku kuata elomboloko liovina viocili.” (Osamo 94:19) Tu pondola oku kuatisiwa lolonjila via litepa eci tu tanga ovina vi sangiwa Vembimbiliya, kuenda oku vi sokolola oloneke viosi.​—Ovilinga 17:11.

17. O pondola oku sanga ndati otembo yoku sokolola?

¹⁷ Vamanji vamue va siata oku pasuka selo oco va tange Embimbiliya, oku sokolola ovina va tanga kuenda oku likutilila. Vakuavo va siata oku ci linga noke lionanya. Citava okuti kokuove ca sungukuluka oku tanga Embimbiliya kelivala liuteke ale ceci kua endele handi pula. Omanu vamue va sole oku tanga Embimbiliya komẽle kuenda va ci linga vali osimbu ka va pekelele. (Yehosua 1:8) Ocina ca velapo o sukila oku linga, oku ‘talavaya ciwa lotembo’ ci lomboloka okuti, o sukila oku yuvula oku pesila otembo kovina ka vi kuete esilivilo lia velapo, oco o sokolole ovina viatiamẽla kondaka ya Suku oloneke viosi.​—Va Efeso 5:15, 16.

18. Nye Embimbiliya lia likuminya komanu va siata oku sokolola Ondaka ya Suku oloneke viosi okuti va kapako ovina va lilongisa?

¹⁸ Embimbiliya lia likuminya okuti Yehova o ka sumũlũisa omanu vosi va siata oku sokolola ovina vi sangiwa Vondaka yaye kuenda vana va likolisilako oku kapako ovina va lilongisa. (Tanga Osamo 1:1-3.) Yesu wa popia hati: “Ava va yeva ondaka ya Suku kuenje va yi pokola ovo va sumũlũha.” (Luka 11:28) Oku sokolola Ondaka ya Yehova oloneke viosi ci tu kuatisa oku linga ovina lonjila yimue yeca esivayo kokuaye. Nda tua ci linga, Yehova o tu sumũlũisa oco tu kuate esanju cilo, kuenda elavoko liomuenyo ko pui voluali luokaliye palo posi.​—Tiago 1:25; Esituluilo 1:3.