ECI nda tẽlisa anyamo ecea utunga wange ka wa livokiyile vali. Cilo nda tẽlisa 43 kanyamo, pole ndi kuete lika ometulu yimosi. Eci olonjali viange via limbuka okuti sia laikele vali oku lepa, via ndi vetiya oku linga ovopange alua oco si ka sokolole calua eci catiamẽla kutunga wange. Oco ndamameko lupange walua, nda yala omesa yapako kovaso yonjo yetu okuti yi vetiya omanu va yongola oku landa apako aco.

Oku linga upange walua ka kua pongoluile ovina viosi. Momo, ndamamako oku kala umbumbulu, kuenda ka ca lelukile oku linga ovopange amue ndeci, oku talavaya komesa yoku landisa ovina vovenda. Kokuange ovina viosi via kala ndu okuti via sokiyiwila lika omanu vana ka va kuete utunga ndowu wange. Ndaño nda sumuile calua, pole ovina via pongoloka lika eci nda tẽlisa 14 kanyamo.

Eteke limue akãi vavali okuti Olombangi Via Yehova noke yoku landa apako amue kokuange, va ndi longisa Embimbiliya. Noke nda limbuka okuti oku kũlĩha Yehova kuenda ocipango caye oco ocina ca velapo okuti oku sokolola utunga wange ci sule. Ovina viaco via ndi kuatisa calua. Ndi sole calua Osamo 73:28. Onepa yatete yocinimbu caco yi popia ndoco: “Ame puãi, ciwa oku kala ocipepi la Suku.”

Noke, ekalo liomuenyo wange lieya oku pongoloka calua eci epata lietu lia tunda vofeka yo Côte d’Ivoire muna tua kala, kuenje lia ilukila ko Burkina Faso. Kofeka tua kala omanu va lisunguile letu va enda oku ndi muila ocipepi lomesa yapako. Pole, valua pokati komanu tu lisungue lavo cilo kofeka tua ilukila, ka va ndi kapeleko omo liutunga wange. Omo okuti omanu va siatele oku ndi vanja loku ndi yola epembe, ndaenda oku salama konyima yepito vokuenda kuolosemana vialua. Kuenje nda ivaluka okuti ciwa oku kala ocipepi la Yehova. Noke nda sonehela ko Betele Yolombangi Via Yehova, kuenje va tuma manji umue oco a ndi kuatise. Manji umue omisionalia o tukuiwa hati Nani, weyile lomoto oku ndi nyula.

Atapalo a kala ocipepi lonjo yetu a enda oku sielena calua omo lieseke, kuenje kotembo yombela a enda oku kuata olonata vialua. Ndaño okuti manji Nani wa enda oku kupuka lomoto olonjanja vialua poku iya oco a ndi longise Embimbiliya, pole ka liwekelepo. Eteke limue wa sapela lame oco ngende laye kohongele. Kuenje, nda kuata ovisimĩlo viokuti ndi tunda konjo yetu oco ndi ka lekise epandi omo liomanu va ka ndi vanja loku ndi yola epembe. Handi vali, oku ngambata ca vokiyile ocilemo komoto ya kuatele ovitangi poku yendisa. Pole, nda tava kuenda nda ivaluka onepa yavali yocinimbu Cembimbiliya  ndi sole ci popia hati: “Nda nõla Yehova Suku ha lingi ocikolo cange.”

Ame kumue la manji Nani, tua enda oku kupukila volonata olonjanja vialua, pole omo okuti tua solele calua oku endaenda kolohongele, ka tua kapeleko ocitangi caco. Esanju liomanu nda sanga Vonjango Yusoma lia litepele calua lomanu ka va lilongisa Embimbilya va enda oku mbanja lãvi! Noke ndeya oku papatisiwa eci pa pita olosãi ecea.

Onepa yatatu yocinimbu Cembimbiliya ndi sole calua yi popia hati: “[Ndi] sapula ovilinga viove viosi.” Nda kũlĩhĩle okuti, ka ca lelukile oku enda kupange woku kunda. Toke cilo ndivaluka onjanja yatete eci ndaendele oku kundila konjo lanjo. Omãla kumue lakulu va enda oku mbanja lãvi, loku ndi yola epembe omo liongendo yange. Ndaño okuti nda sumuile calua omo liovina viaco, pole eci nda ivaluka okuti omanu vaco va sukilavo oku kala Voluali Luokaliye ndeci ame ndi yongola, nda tẽla oku pandikisa.

Oco ovina vi leluke, nda landa omoto yi kuete alola atatu. Manji ngenda laye kupange woku kunda o sinda omoto yaco, kuenje eci yi fetika oku lupuka vociloka, eye o londavo. Ndaño okuti kefetikilo ka ca lelukile oku enda kupange woku kunda, pole noke liotembo yimue nda kuata esanju lialua, kuenje kunyamo wo 1998 nda linga ukundi wotembo yosi.

Nda longisa omanu valua Embimbiliya, kuenje vakuãla pokati kavo va papatisiwa. Handi vali, umue pokati ka vamanjange wa tavavo oku lilongisa Embimbiliya! Poku yeva okuti omanu vakuavo vamamako oku pamisa ekolelo liavo, ca enda oku ndi vetiya calua. Eci nda kuatiwile luvei womalaria, eteke limue nda tambula ukanda wa tunda kofeka yo Côte d’Ivoire. Momo, onjanja yimue nda fetikile oku longisa Embimbiliya puvelo womunu umue wa kala oku tangela kosikola ya velapo kofeka yo Burkina Faso okuti, noke nda sapela lamanji umue oco amameko oku u longisa. Pole, noke omunu waco wa ilukila kofeka yo Côte d’Ivoire. Nda kuata esanju lialua eci nda yeva okuti wa linga ukundi umue ka papatisiwile!

Nda siata oku sanga ndati ovina ndi sukila? Ocisoko cimue ca siata oku kuatisa omanu va lemãla, ca ndi longisa oku tonga uwalo. Umue pokati kalongisi vaco eci a limbuka ndomo ndi linga upange, wa popia hati: “Tu sukila oku ku longisa ndomo onjapãu yi pangiwa.” Kuenje va ci linga. Cilo nda siata oku sukula lonjapãu ya pangiwila konjo. Omo okuti omanu va solele calua onjapãu ndi panga, va enda oku pinga oco ndi va pangelekovo. Omo liaco, ndaenda oku yeca komanu lekuatiso liomoto yange.

Nda liwekapo upange wakundi votembo yosi kunyamo wo 2004 omo lievalo nda kuata vonyima. Pole, toke cilo nda siata oku enda kupange woku kunda.

Omanu va siata oku popia vati, va ndi kũlĩha omo lioku yola kuange. Omo liaco, ndi kuete esunga lioku kuata esanju, momo ciwa oku kala ocipepi la Suku.​—Wa lomboluiwa la manji Sarah Maiga.