1. Ekolelo li kuete esilivilo lie? (Tala elitalatu kefetikilo liocipama cilo.)

OVE hẽ eteke limue wa lipulile ale ndoco: ‘Anga hẽ Yehova o ka ndi popela vokuenda kuohali ya piãla?’ Upostolo Paulu wa lombolola okuti ekolelo, oco ocituwa ca velapo tu sukila oku lekisa oco tu popeliwe. Eye wa popia hati: “Oku sanjuisa Suku ka ku tẽliwa te lekolelo.” (Va Heveru 11:6) Ndaño olondaka viaco vi kasi ndu okuti via leluka, pole “havosiko va kuete ekolelo.” (2 Va Tesalonike 3:2) Ovinimbu vivali Viembimbiliya via tukuiwa ndeti, vi tu kuatisa oku limbuka esilivilo lioku pamisa ekolelo lietu.

2, 3. (a) Ekolelo lietu li kuete esilivilo lie? (b) Nye tu konomuisa cilo?

² Upostolo Petulu wa popia eci catiamẽla koku ‘nyikiwa’ kuekolelo. (Tanga 1 Petulu 1:7.) Omo okuti, ohali ya piãla yi kasi ocipepi, tu yongola oku ‘kuata ekolelo li popela omuenyo wetu.’ (Va Heveru 10:39) Omo liaco, tu sukila oku likolisilako oku pamisa ekolelo lietu. Tu yongola oku kala pokati komanu vana va ka tambula onima, eci Yesu Kristu Soma yetu a ka situluiwa. Ndeci ulume a pinga ku Yesu oco o vokiye ekolelo, tu sukilavo oku popia tuti: “Nda nda kamba ekolelo ñuatise.” (Marko 9:24) Ale ndeci ovapostolo va popia, pamue tu popiavo tuti: “Tu vokiyeko ekolelo.”​—Luka 17:5

 ³ Vocipama cilo tu konomuisa atosi a kuãimo ndeci: Ndomo tu pondola oku pamisa ekolelo lietu, ndomo tu lekisa okuti ekolelo lietu lia pama, kuenda esunga lieci tu sukilila oku kolela okuti Suku o tu tambulula eci tu pinga okuti tu vokiye ekolelo.

4. Ovolandu api a pondola oku tu vetiya oco tu pamise ekolelo lietu?

⁴ Omo okuti ekolelo li kuete esilivilo lia velapo, Yehova lekuatiso Liembimbiliya wa siata oku tu lomboluila ovolandu alua omanu va lekisa ekolelo. Ovolandu aco a “sonehiwila oku tu longisa.” (Va Roma 15:4) Ovolandu omanu vamue ndeci, Avirahama, Sara, Isake, Yakoba, Mose, Rahava, Gideone, Baraka, kuenda vakuavo, a pondola oku tu vetiya oku pamisa ekolelo lietu. (Va Heveru 11:32-35) Ndaño lovolandu o kosimbu a tukuiwa ndeti, pole koloneke vilo tu kuetevo ovolandu a komõhisa a vamanji va siata oku lekisa ekolelo. * (Tala etosi pombuelo yemẽla.)

5. Eliya wa lekisa ndati okuti wa kuatele ekolelo lia pama ku Yehova, kuenda nye tu sukila oku lipula?

⁵ Vembimbiliya mu sangiwa ulandu wuprofeto Eliya. Osimbu o sokolola ongangu ya Eliya, kũlĩhĩsa atosi atãlo a lombolola ndomo a lekisa ekolelo lia pama ku Yehova. (1) Eci Eliya a sapuila Soma Ahava okuti Yehova wa laikele oku nena ocitenya, eye wa popia hati: “La Yehova Suku ya Isareli o kasi lomuenyo, haeye ndukuakuvumba, anyamo alo ka ku kala olume ndaño ombela.” (1 Olosoma 17:1) (2) Eliya wa kuatele ekolelo liokuti Yehova wa laikele oku eca kokuaye kuenda komanu vakuavo ovina va sukilile vokuenda kuocitenya. (1 Olosoma 17:4, 5, 13, 14) (3) Eliya wa kuatelevo ekolelo liokuti Yehova wa laikele oku pindula omõla wocimbumba. (1 Olosoma 17:21) (4) Eye ka kuatele atatahãi okuti, ondalu ya Yehova ya laikele oku timĩha ocilumba caye Komunda Karimele. (1 Olosoma 18:24, 37) (5) Ndaño okuti ombela ka ya lokele, pole, Eliya wa lekisa ekolelo poku sapuila Ahava hati: “Lamana, lia, nyua. Momo ku yevala okuõla kuombela ya lua.” (1 Olosoma 18:41) Noke yoku konomuisa ovolandu a tukuiwa ndeti, tu sukila oku lipula ndoco: ‘Ndi kuete hẽ ekolelo lia pama ndeli Eliya a lekisa?’

6. Nye tu sukila oku linga oco tu pamise ekolelo lietu ku Yehova?

⁶ Omo okuti ka tu pondola oku pamisa ekolelo longusu yetu muẽle, tu sukila oku pinga ku Suku espiritu sandu. Momo lie? Momo ekolelo li panga onepa kepako liespiritu sandu. (Va Galatia 5:22) Tu kuata  olondunge nda tu kapako alungulo a Yesu, kuenda tu likutilila oco tu kuate espiritu sandu. Yesu wa likuminya hati, Yehova wa laikele oku eca “espiritu sandu kuava vo pinga.”​—Luka 11:13.

7. Lombolola ndomo tu pondola oku amamako oku pamisa ekolelo lietu.

⁷ Nda tua limbuka okuti tu kuete ekolelo lia pama ku Suku, tu sukila oku amamako oku li pamisa. Tu pondola oku sokisa ekolelo londalu. Eci tu siakãla ondalu, tu limbuka okuti ulienge waco u livokiya. Pole, nda ka tua vokiyile olohũi piko, ondalu yaco yima, kuenje pa siala lika etiko lia pola. Pole, nda tuamamako oku kapa olohũi piko, ondalu yaco ka yimi. Cimuamue haico ci pita lekolelo lietu. Nda tuamamako oku tanga loku lilongisa Ondaka ya Suku oloneke viosi, ocisola tu kuetele Embimbiliya kuenda Yehova ci livokiya. Nda tua ci linga, tuamamako oku pamisa ekolelo lietu.

8. Nye ci pondola oku ku kuatisa oku amamako oku pamisa ekolelo liove?

⁸ Ku sukila lika oku sanjukila ovina wa lilongisa osimbu kua papatisiwile. (Va Heveru 6:1, 2) Pole, oku lilongisa ovitumasuku vina via tẽlisiwa ale, ci ku kuatisa oku amamako oku pamisa ekolelo liove. O pondolavo oku kuatisiwa Londaka ya Suku oco o limbuke nda o kuete ekolelo lia pama.​—Tanga Tiago 1:25; 2:24, 26.

9, 10. Ekolelo lietu li pamisiwa ndati (a) lakamba vawa? (b) Lolohongele viekongelo? (c) Lupange woku kunda?

⁹ Upostolo Paulu wa popia hati, Akristão vocili va pondola oku kuata “evelo lioku likolisa pokati, okuti ekolelo.” (Va Roma 1:12) Eci ci lomboloka nye? Nda tu pesila otembo yetu poku kala la vamanji, tu pondola oku pamisa ekolelo liomunu lomunu pokati ketu. Ca piãla enene nda tu pesila otembo koku kala la vamanji vana okuti ekolelo liavo lia ‘nyikiwa.’ (Tiago 1:3) Akamba vãvi va pondola oku nyõla ekolelo lietu, pole akamba vawa va pamisa ekolelo lietu. (1 Va Korindo 15:33) Eli olio esunga lieci tu vetiyiwila oku endaenda kolohongele olonjanja viosi. Kolohongele viaco tu pondola “oku livetiya pokati.” (Tanga Va Heveru 10:24, 25.) Handi vali, olonumbi tua siata oku tambula kolohongele viaco vi pamisa ekolelo lietu. Embimbiliya li popia hati, “ekolelo li tunda kueci ci yeviwa.” (Va Roma 10:17) Omo liaco, lipula ndoco: ‘Olohongele Viakristão vocili vi panga hẽ onepa komuenyo wange?’

¹⁰ Tu pondolavo oku pamisa ekolelo lietu eci tu kunda kuenda eci tu longisa komanu olondaka viwa vi sangiwa Vembimbiliya. Ndeci Akristão vo kocita catete va linga, tu sukilavo oku lilongisa oku kolela ku Yehova, kuenda oku popia lutõi poku liyaka lovitangi.​—Ovilinga 4:17-20; 13:46.

11. Momo lie Kalembe la Yehosua va kuatela ekolelo lia pama, kuenda tu pondola oku va setukula ndati?

¹¹ Ekolelo tu kuetele Yehova li pondola oku livokiya eci tu limbuka ndomo a siata oku tu kuatisa kuenda ndomo a tambulula  olohutililo vietu. Eci oco ca pita la Kalembe kuenda Yehosua. Ovo va lekisile ekolelo ku Yehova eci va endele oku ka kũlĩhĩsa ndomo Ofeka Yohuminyo ya kala. Vokuenda kuotembo, ekolelo liavo lieya oku pamisiwa eci va limbuka ndomo Yehova a va kuatisa. Yehosua wa sapuila va Isareli hati: “Polondaka viosi viwa Yehova Suku yene o popeleli, layimue ya kambapo.” Noke wa popia hati: “Oco cilo sumbi Yehova. U vumbi lutima wosi locili.” Eye wa amisako hati: “Puãi ame kumue lonjo yange, tu vumba Yehova.” (Yehosua 23:14; 24:14, 15) Nda tua kolela ku Yehova loku limbuka ndomo a siata oku kuatisa omunu lomunu pokati ketu, ekolelo lietu li pamisiwa.​—Osamo 34:8.

12. Tu lekisa ndati okuti tu kuete ekolelo lia pama?

¹² Tu lekisa ndati okuti tu kuete ekolelo lia pama? Ndonge Tiago wa popia hati: “Ame, lovilinga viange, hu lekisa ekolelo liange.” (Tiago 2:18) Ovilinga vietu vi eca uvangi wokuti tu kuete ekolelo lia pama. Tu konomuisi ndomo ci lekisiwa.

13. Tu lekisa ndati ekolelo lietu poku kunda?

¹³ Onjila ya velapo yoku lekisa ekolelo lietu, oku kunda. Momo lie? Momo, eci tu kunda tu lekisa okuti tu tava okuti esulilo li kasi ocipepi, kuenda ‘ka li cilua.’ (Havakuki 2:3) Oco tu limbuke nda tu kuete ekolelo lia pama ale sio, tu sukila oku lipula ndoco: ‘Oku kunda ku kuete esilivilo lie kokuange? Nda siata hẽ oku likolisilako oku sapuila komanu vakuavo ovina viatiamẽla ku Suku? Nda siata hẽ oku sandiliya onjila yoku pesila otembo yalua kupange wa Yehova?’ (2 Va Korindo 13:5) Omo liaco, tu lekisi okuti tu kuete ekolelo lia pama poku ‘sapula ondaka yi tuala kepopelo’ okuti, ci lomboloka oku kunda olondaka viwa.​—Tanga Va Roma 10:10.

14, 15. (a) Tu pondola oku lekisa ndati ekolelo komuenyo wetu eteke leteke? (b) Lombolola ulandu umue wekolelo lia pama li lekisiwila kovilinga.

¹⁴ Tu lekisavo ekolelo lietu ku Yehova osimbu tu amamako oku pandikisa kovitangi violuali lulo. Nda tu kasi oku liyaka lovitangi ndeci: Oku vela, esumuo, uhukũi ale ovitangi vikuavo, tu sukila oku kolela okuti Yehova kumue la Yesu va pondola oku “tu kuatisa eci tu sukila oku kuatisiwa.” (Va Heveru 4:16) Tu lekisa ekolelo lietu ku Yehova eci tu pinga ekuatiso kokuaye. Yesu wa popia hati, tu pondola oku pinga ku Yehova oco “eteke leteke [a] tu ĩhe okulia kuaco.” (Luka 11:3) Ovolandu Embimbiliya a eca uvangi wokuti, Yehova o pondola oku tu ĩha ovina viosi tu sukila. A lekisavo okuti, vokuenda kuotembo yocitenya ca pita ko Isareli, Yehova wa ecele okulia kuenda ovava ku Eliya. Embimbiliya li popia hati: “Komẽle ovikuamanga vio nenela ombolo lositu, koñolosi ombolo lositu. Leye wa nyua ovava volui.” (1 Olosoma 17:3-6) Omo liaco, tu sukila oku kolela okuti, Yehova o pondolavo oku tu ĩha ovina tu sukila.

¹⁵ Tu sukila oku kolela okuti, nda tua kapako olonumbi Viembimbiliya, tu pondola oku tata ciwa epata lietu. Manji umue o kuele o tukuiwa hati Rebecca okuti o kasi vocifuka co Asia wa lombolola ndomo eye kumue lepata liaye va kapako olonumbi vi sangiwa kelivulu lia Mateo 6:33, kuenda Liolosapo 10:4. Kuenje wa popia hati, ulume waye wa limbuka okuti upange waye woku sanda eteku wa kala oku kapa kohele ukamba waye la Yehova. Omo liaco, wa  siapo upange waco. Omo okuti va kuata omãla vakuãla va sukilile oku tatiwa, va fetika oku teleka okulia oco va ku landise. Omo lioku linga upange waco, va kuata olombongo vioku tekula epata liavo. Manji Rebecca wa popia hati: “Tua limbuka okuti Yehova lalimue eteke a tu yanduluka. Lalimue eteke tua kambelele okulia.” Ove hẽ wa kũlĩha ulandu umue u sokisiwa lowu wa tukuiwa ndeti okuti wa pamisa ekolelo liove?

16. Nye ci pondola oku pita letu nda tua kolela ku Suku?

¹⁶ Ka tu sukila oku kuata atatahãi okuti nda tua kuama olonumbi via Yehova eye ka tu kuatisa. Paulu wa tukula olondaka via Havakuki eci a popia hati: “Ukuesunga o muila omuenyo kekolelo.” (Va Galatia 3:11; Havakuki 2:4) Eli olio esunga lieci tu sukilila oku lekisa ekolelo lia pama ku Yehova okuti o pondola oku tu kuatisa. Paulu o tu ivaluisa hati, Suku “o tẽla oku talavaya lunene u kasi vokati ketu, loku linga eci ca piãla, okuti eci tu pinga, pamue [ceci] tu sima, ci sule.” (Va Efeso 3:20) Ndaño okuti afendeli va Yehova Suku va siata oku likolisilako oku linga ocipango caye, pole va kũlĩha okuti ka va lipuile. Tu eca olopandu ku Suku omo okuti o kasi letu, kuenda wa siata oku sumũlũisa alikolisilo etu.

17. (a) Yesu wa tambulula ndati ovapostolo? (b) Momo lie tu ponduila oku lavoka okuti Yehova o tambulula apingilo etu oku vokiya ekolelo lietu?

¹⁷ Noke lioku konomuisa ocipama cilo, pamue tu kuata ovisimĩlo ndevi ovapostolo va kuata eci va pinga ku Yesu vati: “Tu vokiyeko ekolelo.” (Luka 17:5) Yesu wa tambulula ovapostolo vaye lonjila yimue yilikasi Kopendekoste ya lingiwa kunyamo wa 33, eci va tambula espiritu sandu, kuenje va kuata elomboloko liovina via longa viatiamẽla kocipango ca Suku. Kuenje, ovina viaco via pamisa ekolelo liavo. Onima yipi va kuata? Ovo va fetika upange woku kunda kotembo yaco. (Va Kolosai 1:23) Anga hẽ tu pondolavo oku lavoka okuti apingilo etu oku vokiya ekolelo a tambuluiwa? Yehova wa tu likuminya okuti, tu pondola oku lavoka atambululo, nda “tu pinga cimue ca sungulukila ocipango caye.”​—1 Yoano 5:14.

18. Yehova o sumũlũisa ndati vana va siata oku pamisa ekolelo liavo?

¹⁸ Yehova o lekisa esanju kokuetu nda tua kolela kokuaye. Eye o tambulula epingilo lietu liokuti tu vokiye ekolelo, kuenje ekolelo lietu li pamisiwa, noke tu ka ‘sesamẽla usoma wa Suku.’​—2 Va Tesalonike 1:3, 5.