1. Ocituwa cipi ca velapo ca Suku, kuenda nye o yeva vutima poku ci kũlĩha?

EMBIMBILIYA li tu sapuila okuti, “Suku eye ocisola.” (1 Yoano 4:8) Olondaka evi vi lomboloka nye? Embimbiliya ka li lekisa okuti ocisola oco lika ocituwa ci komõhisa ca Yehova. Pole, ocisola oco ocituwa caye ca velapo. Yehova ka kuete ocisola. Pole eye ocisola. Ovina viosi a linga, o vi endisa locisola. Omo liaco, tu eca olopandu ku Yehova poku limbuka ndomo ocisola co vetiya oku lulika ongongo kuenda ovina viosi vi kasi lomuenyo.

2. Ocisola ca Suku ci tu ĩha ekolelo lipi? (Tala ociluvialuvia kefetikilo liocipama cilo.)

² Yehova wa siata oku lekisa ocisola lohenda kovina viosi a lulika. Ocisola a tu kuetele ceca uvangi wokuti ocipango caye catiamẽla komanu ci ka tẽlisiwa. Kuenje omanu vosi va pokola kokuaye va ka kuata esanju lialua. Omo liocisola, Yehova “wa tukula eteke lioku tetuluila oluali lesunga, kuenje wa nõla ale ulume o linga onganji” okuti Yesu Kristu. (Ovilinga 17:31) Tu sukila oku kolela okuti esombiso liaco li ka lingiwa. Omo  liaco, komanu vakuepokolo ci ka lomboloka oku kala komuenyo lesanju otembo ka yi pui.

3. Omuenyo nda wa kala ndati nda Suku ka solele omanu?

³ Elavoko lipi omanu va laikele oku kuata kovaso yoloneke nda ocisola ka ca kalele ocituwa ca velapo ca Suku? Omanu nda vamamako oku li viala pokati, kuenda oku vetiyiwa la Satana okuti osuku yimue ka yi kuete ocisola. (2 Va Korindo 4:4; 1 Yoano 5:19; tanga Esituluilo 12:9, 12.) Nda Yehova ka lekisile ocisola kokuetu, nda ka tu kuete elavoko liekalo liwa kovaso yoloneke!

4. Momo lie Yehova a ecelela esino kuviali waye?

⁴ Eci Satana a lekisa esino kuviali wa Suku, wa vetiyavo olonjali vietu viatete oku lekisa esino. Eye wa kapa vatatahãi omoko ya Suku yoku kala Ombiali Yoluali luosi. Satana wa popia hati, uviali waye wa laikele oku velapo uviali wa Suku. (Efetikilo 3:1-5) Omo liaco, Yehova Suku wa ecelela okuti, Satana vokuenda kuotembo yimue yitito o lekisa uvangi wovina a popia. Pole, ovovangi a lekisa okuti, ci kale omanu ale Satana, lomue o pondola oku kala ombiali yiwa.

5. Ovolandu atiamẽla komanu a siata oku lekisa nye?

⁵ Koloneke vilo, ovina vi koka usumba voluali via livokiya calua. Ci pitahãla 100 kolohuluwa viomanu va pondiwa vovoyaki vokuenda kueci ci soka 100 kanyamo. Embimbiliya li popia eci catiamẽla “koloneke via sulako.” Momo, “omanu vãvi lolohembi vamamako loku linga cĩvi.” (2 Timoteo 3:1, 13) Embimbiliya li popiavo hati: “A Yehova, ndi ci okuti okuenda kuomunu ka ku kasi povaka aye muẽle. Omunu enda ka tẽla eye muẽle oku suñamisa okuenda kuaye.” (Yeremiya 10:23) Ovolandu a siata oku eca uvangi wokuti, olondaka evi vi kasi oku tẽlisiwa. Yehova ka lulikile omanu luloño ale lomoko yoku liviala ovo muẽle okuti ka va sukila ekuatiso liaye.

6. Momo lie Suku a siatela oku ecelela evĩho?

⁶ Yehova omo lioku ecelela okuti evĩho liamamako vokuenda kuotembo yimue, wa siata oku lekisa okuti uviali waye owo lika u pondola oku nena ekalo liwa. Kovaso yoloneke Suku o ka kundula olondingaĩvi viosi. Noke, nda omunu umue wa kapa vali vatatahãi onjila yocisola Suku a kuama poku viala, o ka nyõliwa vonjanja yaco. Eye o ka kuama ulandu wa pita lomanu vakuesino oco u kale uvangi woku kundula lonjanga. Kuenje, lalimue eteke a ka ecelela vali evĩho.

7, 8. Yehova wa siata oku lekisa ndati ocisola?

⁷ Yehova wa siata oku lekisa ocisola caye volonjila via litepa. Sokolola ndomo oluali luetu lunene, kuenda eposo liaco. Oluo lu kuete olohuluwa vioviengele okuti vocengele cimosi mu sangiwa olohuluwa violombungululu, kuenda  oviengele vikuavo. Ekumbi li pangavo onepa pokati kolombungululu vi sangiwa Vocengele Cetu. Nda ka kua kalele ekumbi, Vongongo nda ka muli omuenyo. Ovina viosi via lulikiwa vi eca uvangi wokuti Yehova eye Ululiki wetu, momo vi situlula ovituwa viaye ndeci, unene, uloño, kuenda ocisola. Ocili okuti, “tunde kokululikiwa kuoluali, unu [wa Suku], una ko muiwa muiwa lovaso, okuti unene waye ko pui, kuenda okukola kuaye, u molehẽla ciwa vovina a lulika.”—Va Roma 1:20

⁸ Yehova wa lulika ongongo oco mu kale omuenyo. Ovina viosi vi kasi vongongo vi pondola oku kuatisa ovinyama kuenda omanu. Suku wa lulika ocumbo cimue ca posoka oco omanu va kalemo, kuenda wa eca kokuavo ovisimĩlo letimba lia lipua, oco va kale komuenyo otembo ka yi pui. (Tanga Esituluilo 4:11.) Handi vali, Suku “ecaeca okulia ku vosi vakuetimba, momo ohenda yaye ka yi pui.”—Osamo 136:25.

9. Ndaño okuti Yehova eye Suku yocisola, nye a nyale?

⁹ Omo okuti Yehova eye Suku yocisola, o nyale ovina vĩvi. Momo, Osamo 5:4-6, yi popia eci catiamẽla ku Yehova ndoco: “Haveko Suku o sanjukila evĩho. . . . O suvuka vosi va lingainga evĩho.” Yehova o nyalevo “ongangala lukuelimbi.”

10, 11. (a) Nye ci ka pita lolondingaĩvi? (b) Yehova o ka sumũlũisa ndati omanu vakuepokolo?

¹⁰ Omo okuti Yehova eye Suku yocisola kuenda o nyale ovina vĩvi, o ka kundula olondingaĩvi voluali luosi votembo a sokiya. Ondaka ya Suku yi popia ndoco: “Olondingaĩvi vi nyõleha; ava puãi va imba ovaso Yehova va piñala ofeka. Okasimbu kaño handi kuenje ondingaĩvi ka yi kalapo.” Ovanyãli va Yehova “va takata ndowisi.”—Osamo 37:9, 10, 20.

¹¹ Ondaka ya Suku yi popia ndoco: “Olondingesunga vi piñala ofeka, vi tungamo oloneke ka vi pui.” (Osamo 37:29) Omanu vakuekolelo va ka “piñala ofeka, kuenje va [ka] sanjukila okusalala kualua.” (Osamo 37:11) Momo lie? Momo, Suku yetu ukuacisola wa siata oku lingila ovina viwa kafendeli vaye vakuekolelo. Embimbiliya li tu sapuila hati: “Eye o puenya asuelẽla osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.” (Esituluilo 21:4) Omanu vakuepokolo okuti va kapako ocisola ca Suku, va ka kuata asumũlũho alua kovaso yoloneke!

12. Helie “omunu wa pua eko”?

¹² Embimbiliya li tu sapuila ndoco: “Limbuka omunu wa pua eko, ndomo a kasi, tala u wa sunguluka, momo omunu ukuambembua o mõla ovitumbulukila. Olondingakandu vi nyõliwa olumue, lovitumbulukila vi va kuãi vi takata.” (Osamo 37:37, 38) “Omunu wa pua eko,” o kũlĩha Yehova kumue Lomõlaye kuenda o pokola kocipango caye. (Tanga Yoano 17:3.) Eye o tava kondaka yokuti, “oluali lu takata loñeyi yaluo, puãi u o lingainga ocipango ca Suku o kala oloneke ka vi pui.” (1 Yoano 2:17) Omo okuti esulilo lioluali lulo li kasi ocipepi, tu  sukila oku ‘kevelela ku Yehova, loku endela vonjila yaye.’—Osamo 37:34.

13. Nye Suku a linga okuti ci lekisa ocisola caye?

¹³ Ndaño okuti ka tua lipuile, pole tu pondola oku pokola ku Suku. Omo liocilumba cocisembi ca Yesu okuti oyo onjila ya velapo yocisola ca Yehova, tu pondola oku kuata ukamba wocili laye. Yehova wa linga eliangiliyo liocisembi oco okuti omanu vakuepokolo va kuata epuluvi lioku yovuiwa kekandu kuenda kolofa. (Tanga Va Roma 5:12; 6:23.) Omo okuti Yesu wa lekisa ekolelo ku Yehova Suku vokuenda kuotembo yalua kilu, wa kolelelevo okuti Omõlaye o pondola oku lekisa ekolelo palo posi. Yehova omo lioku kala Isia umue ukuacisola, wa yeva evalo eci a mola ndomo omanu va kala oku tata lãvi Omõlaye. Yesu wa lekisa ekolelo poku kuatisa oku teyuila omoko ya Suku yoku viala kuenda wa lekisa okuti omanu ka va lipuile va pondola oku kolela ku Yehova ndaño ceci va liyaka lovitangi.

14, 15. Olofa via Yesu via lingila nye komanu?

¹⁴ Ndaño lelambalalo, Yesu wamamako lekolelo, kuenda wa kuatisa komoko yuviali wa Yehova. Omo okuti Yesu wa feta ondando yocisembi poku fa, tu sukila oku eca olopandu, momo caeca komanu epuluvi lioku kuata omuenyo ko pui voluali luokaliye lua Suku! Upostolo Paulu wa lombolola ocisola Yehova kumue la Yesu va lekisa poku eca ocisembi. Eye wa popia hati: “Eci ka tua kaile longusu, otembo yaco haiyo, Kristu a fila vakuakandu. . . . Nda umue o tava naito oku fila ukuesunga, puãi mbi umue o kuete utõi o tava oku fila u wa pua eko. Puãi Suku wa tu muisa ocisola caye okuti, osimbu tua kala vakuakandu oco Kristu a tu fila.” (Va Roma 5:6-8) Upostolo Yoano wa soneha ndoco:  “Ocisola ca Suku ca moleha ocili kokuetu omo a tuma Omõlaye wongunga voluali ha tu muila omuenyo kokuaye. Omo hetuko tua sola Suku, puãi Suku wa tu sola etu, kuenje wa tuma Omõlaye ha lingi ocitundasonde cakandu etu, oco ca lomboloka ocisola.”—1 Yoano 4:9, 10.

¹⁵ Yesu wa popia hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.” (Yoano 3:16) Ndaño okuti Yehova wa yeva evalo, pole wa eca Omõlaye ndocisembi. Kuenje, caeca uvangi wocisola calua a kuetele omanu. Paulu wa soneha ndoco: “Nda kolela okuti ndaño okufa, ndaño omuenyo, ndaño ovangelo, ndaño olombiali, ndaño ovina viacilo, ndaño ovina vi laika oku iya, ndaño ovonene, ndaño ovina viokilu, ndaño ovina viokalunga, ndaño ociluvo cikuavo, lacimue ci tẽla oku tu tepa kocisola ca Suku ci kasi vu Kristu Yesu, Ñala yetu.”—Va Roma 8:38, 39.

16. Usoma u kasi peka lia Mesiya u lomboloka nye, kuenda helie Yehova a nõla oco a linge Osoma?

¹⁶ Uviali wa Suku okuti u kasi peka lia Soma Mesiya, wecavo uvangi wocisola Yehova a kuetele omanu. Ndamupi? Yehova wa nõla ale Yesu Kristu okuti Ombiali yimue yi sole calua omanu haeye o kuete ocikele coku viala. (Olosapo 8:31) Handi vali ci soka 144.000 komanu va nõliwa oco va ka viale la Kristu kilu. Poku pinduiwa, va enda kilu lukũlĩhĩso va kuata weci ci lomboloka oku kala omunu palo posi. (Esituluilo 14:1) Eci Yesu a kala palo posi, Usoma owo wa kala osapi ya velapo koku longisa kuaye, kuenda wa longisa olondonge viaye oku likutilila ndoco: “A Isietu o kasi kilu. Onduko yove yi sumbiwe. Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:9, 10) Tu lavoka oku tẽlisiwa kuolohutililo viaco, eci Usoma wa Suku u ka nena asumũlũho alua komanu!

17. Lekisa etepiso li kasi pokati kuviali wa Yesu luviali womanu.

¹⁷ Pokati kuviali wa Yesu luviali womanu pali etepiso lialua. Uviali womanu wa siata oku songuila ovoyaki a ponda omanu valua. Pole, Ombiali yetu okuti Yesu, o tu sole calua kuenda wa siata oku setukula ovituwa viwa via Suku, ca piãla enene ocisola. (Esituluilo 7:10, 16, 17) Yesu wa popia hati: “Enjui kokuange, vosi wa sovoloki kuenda wa lemiwi kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene, momo okanga yange ya sunguluka, locitele cange ca leluka.” (Mateo 11:28-30) Olondaka evi, ohuminyo yimue yocisola!

18. (a) Nye ca siata oku pita tunde kunyamo wo 1914? (b) Nye tu ka konomuisa vocipama ci kuãimo?

¹⁸ Embimbiliya li lekisa okuti Usoma wa Suku wa fetika oku viala kilu kunyamo wo 1914. Tunde kunyamo waco, kua siata oku kongeliwa omanu vana va ka viala kumue la Yesu kilu, kuenda oku kongeliwa ‘kuowiñi wakahandangala’ womanu vana va ka puluka kesulilo lioluali lulo, oco va iñile voluali luokaliye. (Esituluilo 7:9, 13, 14) Omanu vañami va panga onepa kowiñi wakahandangala koloneke vilo? Nye Suku a yongola kokuavo? Ocipama ci kuãimo ci ka tambulula apulilo a lingiwa ndeti?