1-2. Momo lie Yehova a tu lulikila locituwa coku lingila ovina viwa vakuetu?

 ECI Yehova a tu lulika, wa tu panga lonjila yimue okuti, tu kuata esanju lialua poku lingila ovina viwa vakuetu okuti, oku tambula ci sule. (Ovil. 20:35) Anga hẽ eci ci lekisa okuti ka tu kuata esanju eci tu tambula cimue ku vakuetu? Hacoko. Vosi yetu tu sanjuka calua eci tu tambula ombanjaile yimue. Pole, eci tu eca cimue komunu umue tu kuata vali esanju lialua. Omo liaco, tu pandula calua omo Yehova a tu lulika locituwa caco. Momo lie?

² Momo Yehova wa kũlĩhĩle okuti ca ponduile oku tu nenela esanju. Tu pondola oku kuata esanju lialua eci tu sokolola kolonjila vioku kuatisa vakuetu. Ci komõhisa calua oku kũlĩha okuti Yehova wa tu panga lonjila yaco!—Osa. 139:14.

3. Momo lie Yehova a tukuiwila okuti “Suku ukuesanju?”

³ Embimbiliya li popia okuti, oku lingila ovina viwa vakuetu ci nena esanju lialua. Eli olio esunga lieci Yehova a tukuiwila okuti, “Suku ukuesanju.” (1 Tim. 1:11) Yehova eye omunu watete oku lingila ovina viwa ku vakuavo kuenda ka kuli vali ukuavo wo velapo koku ci linga. Ndomo upostolo Paulu a ci popia, mekonda liaye “tu kuete omuenyo, tu li senga senga, tu kasi komuenyo.” (Ovil. 17:28) Ocili ceci okuti, “ongavelo yosi yiwa, lombanjaile yosi ya lipua,” vi tunda ku Yehova.—Tia. 1:17.

4. Nye ci ka tu kuatisa oku vokiya esanju lietu?

⁴ Ocili okuti, vosi yetu tu yongola calua oku kuata esanju, li  tunda koku lingila vakuetu ovina viwa. Etu tu pondola oku kuata esanju liaco, nda tua setukula ocali ca Yehova. (Va Efe. 5:1) Poku lilongisa ongangu ya Yehova, tu ka limbuka eci tu sukila oku linga, nda vakuetu ka va lekisa olopandu kueci tua va lingila. Eci ci ka tu kuatisa oku amamako oku lingila ovina viwa vakuetu kuenda oku vokiya esanju lietu.

SETUKULA OCITUWA CA YEHOVA COKU ECA

5. Ovina vipi Yehova a siata oku tu ĩha?

⁵ Konepa yipi Yehova a lekisa ocituwa coku eca? Tala ovindekaise vimue. Yehova o tu ĩha ovina tu sukila. Pamue Yehova ka tu ĩha ovina viosi tu yongola, pole, o tu ĩha ovina viosi tu sukila. Ndeci, eye o tu ĩha okulia, uwalo kuenda ocitumãlo coku kala. (Osa. 4:8; Mat. 6:31-33; 1 Tim. 6:6-8) Anga hẽ Yehova o ci linga omo liekisika? Ocili okuti sio! Oco hẽ, momo lie Yehova a lingila ovina viaco kokuetu?

6. Nye tua lilongisa kolondaka vi sangiwa ku Mateo 6:25, 26?

⁶ Yehova o tu ĩha cosi tu sukila momo o tu sole calua. Kũlĩhĩsa eci Yesu a popia ku Mateo 6:25, 26. (Tanga.) Kocisonehua caco eye wa tukula ocindekaise catiamẽla koviluvo. Yesu poku vangula catiamẽla kolonjila, wa popia hati: “Ovio ka vi limi, ka vi ungula kuenda ka vi kuete olosila.” Pole, kũlĩhĩsa eci Yesu a popia noke hati, “Isiene kilu o vi tekola.” Kuenje eye wa pula hati: “Ene ka wa velelipo hẽ okuti ovio vi sule?” Eci ci tu longisa nye? Kovaso a Yehova, afendeli vaye va velapo okuti ovinyama vi sule. Nda Yehova o tata ovinyama, tu pondola oku kolela okuti, eye olonjanja viosi o ka tu tata! Ndeci isia a eca kepata liaye ovina viosi ovo va sukila, Yehova o tu solevo calua kuenda o ka tu tata.—Osa. 145:16; Mat. 6:32.

7. Kolonepa vipi tu setukula ocituwa ca Yehova coku eca? (Talavo ociluvialuvia.)

⁷ Ndeci Yehova a siata oku linga, locisola tu pondola oku kuatisa vakuetu kovina va sukila. Ndeci, ove hẽ wa kũlĩha manji umue okuti o sukila okulia kuenda uwalo? Yehova o pondola oku ku vetiya oco o kuatise manji yaco. Afendeli va Yehova va kũlĩhĩwavo ciwa omo liocituwa cavo coku eca eci ku pita ovilunga vimue. Vokuenda kuefengi lio KOVID-19, vamanji va eca okulia, uwalo kuenda ovina vikuavo ku vana va kuatele esukila. Handi vali, valua va eca olombanjaile oco vi kuatise kupange wetu u kasi oku lingiwa voluali luosi. Eliangiliyo liaco lia kuatisa calua oku amamako oku tata vamanji vana va lipita lovilunga  voluali luosi. Vamanji vaco vakuahenda va kapako olondaka vi sangiwa ku Va Heveru 13:16 viokuti: “Ko ka ivaliko oku linga eci ciwa loku kuatisa vakuene lovina vu kuete, momo Suku o sanjukila ovilumba viaco.”

8. Konepa yipi yikuavo Yehova a tu kuatisa? (Va Filipoi 2:13)

⁸ Yehova o tu ĩha ongusu tu sukila. Yehova o sanjuka calua poku eca kafendeli vaye vakuekolelo ongusu va sukila. (Tanga Va Filipoi 2:13.) Anga hẽ ove wa likutilile ale oku pinga ongusu, oco o tẽle oku tamalãla koseteko yimue, ale oku pandikisa kocitangi cimue? Citava okuti, wa pinga ongusu o sukila oco o tẽle oku pandikisa keteke liaco. Kuenje eci ohutililo yove ya tambuluiwa citava okuti, wa ivaluka olondaka viupostolo Paulu loku tava eci eye a popia ku Va Filipoi 4:13 hati: “Momo kovina viosi ñuete ongusu mekonda lia una o nyĩha unene.”

9. Volonjila vipi tu setukula Yehova poku talavaya longusu yetu oco tu kuatise vakuetu? (Talavo ociluvialuvia.)

⁹ Ndaño okuti ka tua lipuile, tu pondola oku setukula onjila ya Yehova yoku lekisa ocali ndomo a talavaya lunene waye. Ocili okuti, etu ka tu pondola oku tepelako vakuetu ongusu kuenda olohõlo vietu. Pole, tu pondola oku talavaya longusu yetu oco tu kuatise vakuetu. Ndeci, tu pondola oku landa ale oku linga ovopange okonjo ya manji umue wa kuka ale o vela. Nda ekalo lietu li tu ecelela, tu pondolavo oku kuatisa koku yelisa loku semũlũla Onjango Yusoma. Poku talavaya longusu yetu lonjila yaco, tu kuatisa calua vamanjetu.

10. Tu pamisa ndati vakuetu lovina tu popia?

¹⁰ Ku ka ivaleko okuti olondaka vi kuetevo unene. Ove o tẽla hẽ oku sokolola komunu umue okuti o ka sanjuka calua poku wĩha epandiyo liocili? Wa kũlĩha hẽ umue o sukila elembeleko? Nda oco, momo lie ku u sapuilila okuti ove u sole calua? Ove o pondola oku sapela laye polo la polo, oku u telefonalela ale oku u sonehela okokanda kamue, loku u tumisa esapulo limue. Ku sukila oku lisakalaisa calua lovina o popia. Olondaka vitito havio vi popiwa lutima wosi, vi pondola oku kala ovina manji a sukila oco amameko lekolelo oloneke viosi kuenda oku vokiya elavoko liaye.—Olosap. 12:25; Va Efe. 4:29.

11. Yehova o tu ĩha ndati olondunge?

¹¹ Yehova o tu ĩha olondunge. Ndonge Tiago wa soneha ndoco: “Nda umue pokati kene wa kamba olondunge, amameko oku pinga ku Suku, momo eye eca calua ku vosi lutima waye wosi, halokupisako.” (Tiago 1:​5, etosi.) Olondaka evi vi lekisa okuti, Yehova ka li solekela eye muẽle ukũlĩhĩso. Eye o tepelako ukũlĩhĩso  a kuete ku vakuavo. Kũlĩha okuti eci Yehova a eca olondunge, ka ci lingi ‘lokupisa ale locimãho coku sanga eko.’ Yehova ka yongola okuti tu liyeva lãvi poku sanda olonumbi kokuaye. Eye o yongola okuti tu sanda olondunge kokuaye.—Olosap. 2:1-6.

12. Apuluvi api tu kuete oku pitiya ku vakuetu ovina tua kũlĩha?

¹² Nye ci popiwa catiamẽla kokuetu? Anga hẽ tu pondola oku setukula Yehova kuenda oku pitiya ku vakuetu ovina tua kũlĩha? (Osa. 32:8) Afendeli va Yehova va kuete apuluvi alua oku pitiya ku vakuavo ovina va lilongisa. Ndeci, tu pindisa olohundi viokaliye oco vi pange onepa kupange woku kunda. Akulu vekongelo lepandi va kuatisa oloñuatisi viekongelo kuenda vamanji va papatisiwa oku lilongisa oku tata ovikele viavo vekongelo. Vana va kuete uloño woku tunga kuenda woku semũlũla, va kuatisa koku pindisa vakuavo va kuete uloño utito oco va talavaye koku tunga ovitumãlo ku lingiwila upange wa Yehova.

13. Tu setukula ndati Yehova eci tu pindisa vakuetu?

¹³ Likolisilako oku setukula Yehova poku pindisa vakuene. Ivaluka okuti Yehova eca ukũlĩhĩso waye lesanju. Cimuamue haico okuti, etu lutima wosi tu longisavo eci tu tẽla ku vana va kasi oku lilongisa. Ka tu kuata ohele yoku longisa vakuetu eci tu tẽla, loku sima okuti omunu tu kasi oku longisa o ka tu velapo. Tu yuvuli ocisimĩlo cokuti: ‘Lomue wa ndi pindisa! Pamue omanu vamue va sima okuti, omo lomue wo pindisa, ovo ka va pindisavo vakuavo.’ Ufendeli wosi wa Yehova o sukila oku yuvula oku sima ndoco. Etu ka tu sanjukila lika oku pitiya ku vakuetu cosi tu tẽla pole, ‘tu likolisilakovo’ oku va pindisa. (1 Va Tes. 2:8) Tu yongola okuti ovo, ‘va tẽla oku vi longisavo ku vakuavo.’ (2 Tim. 2:1, 2) Nda vosi yetu lohenda yalua tu kuatisa vakuetu lovina tu tẽla, ci kale etu ale vakuetu, tu ka sanjuka calua kuenda tu ka loñolõha.

CECI UMUE KA LEKISA OLOPANDU KOVINA TU LINGA

14. Nye omanu valua va linga eci va va lingila cimue ciwa?

¹⁴ Eci tu lekisa ocali, ca piãla enene ku vamanjetu, ovo va eca olopandu kokuetu. Pamue va ci linga poku tuma okokanda kolopandu, ale va ci linga lonjila yikuavo. (Va Kol. 3:15) Eci ovo va tu pandula, tu yeva esanju lialua omo lioku linga cimue kokuavo.

15. Nye tu sukila oku ivaluka nda umue ka lekisa olopandu kovina tuo lingila?

¹⁵ Pole, tu sukilavo oku ivaluka okuti, halonjanja viosiko omanu va ka tu pandiya omo liovina tua linga. Olonjanja vimue tu limbuka okuti, omunu una tua pesila ongusu yetu kuenda ovipako vietu ka lekisa olopandu. Eci ku pita ovina viaco nye tu sukila oku linga oco ka tu ka tepulule esanju lietu loku sumua? Ivaluka olondaka kua kunamẽla osapi yocipama cilo yi sangiwa Kovilinga 20:35. Esanju lietu ka lia tambele nda omanu va eca olopandu kovina tu va lingila. Handi vali, tu pondola oku nõla oku kuatisa vakuetu ndaño ovo ka va lekisa olopandu. Ndamupi? Tu konomuisi olonjila vimue.

16. Nye ci pondola oku tu kuatisa oku amamako oku eca lesanju?

¹⁶ Likolisilako oku setukula Yehova. Yehova eca ovina viwa komanu, ndaño okuti pamue ka va lekisa olopandu. (Mat. 5:43-48) Yehova wa likuminya okuti, nda tu lingila ovina viwa vakuetu okuti ‘ka tu lavoka oku tu tiuwila cimue, onima yetu yilua.’ (Luka 6:35) Omo liaco, ku ka sumue nda olonjanja vimue omanu ka va lekisa olopandu kovina o va lingila. Ivaluka okuti, Yehova o ka ku sumũlũisa omo lioku kuatisa vakuene kuenda oku “eca lesanju.” —Olosap. 19:17; 2 Va Kor. 9:7.

17. Esunga lipi lia velapo tu kuete lioku kuatisa vakuetu? (Luka 14:​12-14)

 ¹⁷ Ocina cikuavo tu sukila oku linga oco tu setukule Yehova, oku ivaluka ovina Yesu a popia ku Luka 14:12-14. (Tanga.) Hacĩviko oku laleka umue oco tulile kumosi, ale oku poka omanu tua kũlĩha okuti ka va ka tu lingilavo ocina cimuamue. Pole, nye tu linga nda tua limbuka okuti tu kasi oku eca ovina ku vakuetu locimãho coku tu tiuwila cimue? Tu sukila oku linga eci Yesu a popia. Tu pondola oku poka omunu umue tua kũlĩha okuti ka kuete epondolo lioku tu tiuwila ovina tuo lingila. Nda tua ci linga, tu ka kuata esanju lialua momo tu kasi oku setukula Yehova. Kuenje ci ka tu kuatisa oku amamako lesanju eci tu lingila ovina viwa vakuetu, ndaño ka va lekisa olopandu.

18. Nye ci ka tu kuatisa oku yuvula oku kuatela vakuetu ovisimĩlo ka via sungulukile?

¹⁸ Ku ka kuatele vakuene ovisimĩlo ka via sungulukile. (1 Va Kor. 13:7) Nda umue ka lekisa olopandu, lipula ndoco: ‘Anga hẽ omunu waco ukualutukãi, ale wa ivalako oku popia hati nda pandula?’ Citava okuti kuli asunga amue a lingisa okuti omunu ka lingi eci tua lavokaile. Omanu vamue va sanjuka calua omo lieci va va lingila, pole, va kuete ocitangi coku situlula olopandu viaco. Pamue va kuata osõi yoku tambula ekuatiso, ca piãla enene nda kosimbu ovo va enda oku kuatisa vakuavo. Pole, nda tu kuetele ocisola cocili vamanjetu, ka tu ka va kuatela ovisimĩlo ka via sungulukile kuenda tu kamamako oku kuatisa vakuetu lesanju.—Va Efe. 4:2.

19-20. Momo lie epandi li kuetele esilivilo eci tu lingila cimue ciwa vakuetu? (Talavo ociluvialuvia.)

¹⁹ Lekisa epandi. Oku vangula catiamẽla koku lekisa ocali, soma Salomone wa soneha hati: “Imba ombolo yove kilu liovava, momo noke yoloneke vialua ove o ka yi sanga vali.” (Uku. 11:1) Olondaka evi vi lekisa okuti, vamue va eca lika olopandu kueci tua va lingila noke yoku pita otembo yalua, ale “noke yoloneke vialua.” Eci oco ca lipita la manji umue.

²⁰ Kanyamo a pita, ukãi wa manji umue  ukuakunyula akongelo, wa sonehela manji umue wa papatisiwile ndopo okokanda kamue ka lekisa ocisola, poku u sapuila esilivilo lioku amamako oku kolela ku Yehova. Noke lioku pita anyamo ecelãla, oco lika manji a tambulula pocakati cukanda umue poku popia hati: “Nda sukilile oku ku sonehela loku ku sapuila okuti, olondaka viove via ñuatisa calua vokuenda kuanyamo osi a-a. Nda sola calua okokanda wa ndi sonehelele. Ocisonehua wa tukula, ca vetiya utima wange. Ame lalimue eteke nda ivaleleko.” a Noke lioku lombolola ovitangi vimue a lipita lavio manji hati: “Olonjanja vimue nda kuatele ovisimĩlo vioku tokoka kuenda oku liwekapo oku vumba Yehova. Vokuenda kuanyamo aco ecelãla, okokanda wa ndi sonehelele oko ka ñuatisa oku amamako oku pandikisa.” Sokolola esanju ukãi wa manji onyula akongelo a kuata eci a tambula ukanda waco “noke yoloneke vialua!” Cimuamue haico okuti, pamue tu ka tambula lika olondaka viepandiyo noke lioku pita otembo yalua.

21. Momo lie tu yonguila oku setukula ocituwa ca Yehova coku eca?

²¹ Ndomo tua ci konomuisa, Yehova wa tu lulika lonjila yimue yi li kasi. Eye wa tu lulika oco tu kuate esanju omo lioku lingila vakuetu ovina viwa okuti, oku tambula ci sule. Kuenje tu liyeva ciwa eci tu kuatisa vamanji. Handi vali, tu kuatavo esanju eci ovo va tu pandiya omo liovina tua va lingila. Ndaño okuti umue ka lekisa olopandu kekuatiso tuo wĩha, tu ka kuata esanju omo tua kũlĩha okuti tua linga eci ca sunguluka. Lalimue eteke ku ka ivaleko okuti ‘Yehova o tẽla oku eca kokuove ovina vialua okuti, eci wa eca ku vakuene ci sule.’ (2 Asa. 25:9) Ocili ceci okuti, catiamẽla koku eca ovina viwa ku vakuetu, lomue wa velapo Yehova! Ka kuli esanju lia velapo okuti oku sumũlũisiwa la Yehova ci sule. Omo liaco, olonjanja viosi tu nõlipo oku setukula Isietu wo kilu ukuakueca.