1-2. Nye ca siata oku kokela esanju kafendeli va Suku? (Tiago 1:22-25)

 YEHOVA kumue Lomõlaye, va yongola okuti tu kuata esanju. Usonehi Olosamo 119:2 hati: “Va sumũlũha vana va pokola kolonumbi viaye, loku u sanda lutima wosi.” Yesu wa popiavo ndoco: “Va sumũlũha vana va yeva ondaka ya Suku kuenje va yi kapako!”—Luka 11:28.

² Omo lioku kala afendeli va Yehova, tu kuete esanju lialua. Momo lie? Tu kuete asunga alua, pole, esunga lia velapo lieli liokuti, tua siata oku tanga Ondaka ya Suku eteke leteke loku likolisilako oku kapako ovina tu lilongisa.—Tanga Tiago 1:​22-25.

3. Tu kuatisiwa ndati eci tu kapako ovina tua tanga Vondaka ya Suku?

³ Oku kala “vakuakutẽlisa ondaka” ci nena Kuli asumũlũho alua. Momo tua kũlĩha okuti oku ci linga, ci sanjuisa Yehova. Handi vali, ci tu kokelavo esanju. (Uku. 12:13) Eci tu kapako ovina tua lilongisa Vondaka ya Suku, ekalo lietu vepata kuenda la vamanji li kala ciwa. Citava okuti, ove wa ci limbuka ale vomuenyo wove. Handi vali, tu yuvula ovitangi vialua omanu ka va vumbi Yehova va kuete. Ocili okuti, tu tava kolondaka via Soma Daviti okuti noke lioku imba ocisungo caye catiamẽla kovihandeleko, kolonumbi kuenda kasombiso a Yehova, wa malusula lolondaka viokuti: ‘Oku vi kapako ci nena onima yalua.’—Osa. 19:7-11.

4. Momo lie ka ca lelukilile kokuetu oku tanga loku kapako ovina tu lilongisa Vondaka ya Suku?

⁴ Ocili okuti, omo liovina vialua tu kuete vioku linga, halonjanja  viosiko ci leluka kokuetu oku tanga Embimbiliya kuenda oku kapako ovina tua tanga. Kuenje eteke leteke tu sukila oku sokiya otembo yoku tanga kuenda yoku lilongisa Embimbiliya, oco tu kuate elomboloko lieci Yehova a yongola okuti tu ci linga. Vocipama cilo, tu konomuisa olonumbi vimue vi ka tu kuatisa oku tanga Embimbiliya eteke leteke. Tu konomuisavo eci ci pondola oku tu kuatisa oku sokolola kovina tua tanga kuenda ndomo tu ci kapako komuenyo wetu.

SOKIYA OTEMBO YOKU TANGA ONDAKA YA SUKU

5. Ovikele vipi vi tu kokela okuti ka tu kuata otembo yalua?

⁵ Afendeli valua va Yehova va kuete ovina vialua vioku linga. Tu sukila oku tẽlisa ovikele vialua vina via tukuiwa Vembimbiliya okuti, vi kuete esilivilo. Ndeci, valua pokati ketu, tu sukila oku talavaya oco tu litekule etu muẽle kuenda epata lietu. (1 Tim. 5:8) Vamanji valua va sukila oku tata olonjali vi vela, ale via kuka. Handi vali, vosi yetu tu sukila oku tata uhayele wetu okuti, ci sukilavo otembo. Tu kuetevo ovikele vikuavo tu sukila oku tẽlisa vekongelo. Ocikele ca velapo tu sukila oku tẽlisa, oku panga onepa koku kunda olondaka viwa. Oco hẽ lovikele viosi evi, o sanga ndati otembo yoku tanga Embimbiliya eteke leteke, oku sokolola kovina wa tanga kuenda oku vi kapako?

6. Ocina cipi o sukila oku linga oco o velisepo oku tanga Embimbiliya? (Talavo ociluvialuvia.)

⁶ Oku tanga Embimbiliya ocina cimue ci panga onepa ‘kovina via velapo vali’ Akristão va sukila oku linga. Omo liaco, ci sukila oku kala ocina catete kokuetu. (Va Fil. 1:10) Catiamẽla komunu umue wa sumũlũha, Usonehi wosamo yatete wa popia hati: Eye “o sole calua ocihandeleko ca Yehova, kuenda o sokolola ocihandeleko Caye utanya luteke.” (Osa. 1:1, 2) Eci ci lekisa okuti, tu sukila oku sokiya otembo yoku tanga Embimbiliya. Oco hẽ lipi epuluvi liwa lioku tanga Embimbiliya? Ca tamba ño komunu lomunu. Pole, epuluvi liwa lioku tanga Embimbiliya lina li ku ecelela oku  ci linga eteke leteke. Manji umue o tukuiwa Victor wa popia hati: “Ame ndi sole oku tanga Embimbiliya komẽle. Ocili okuti, si sole oku pasuka lomẽle yalua, pole, elivala liaco li ñuatisa oku yuvula ovina vi ndi taluisa. Vepuluvi liaco utue wange wa talala kuenda ndi tiamisila utima kovina ndi tanga.” Citava okuti o simavo ndoco. Omo liaco, li pula ndoco, lipi elivala liwa kokuange lioku tanga Embimbiliya?

SOKOLOLA KOVINA WA TANGA

7-8. Nye tu sukila oku yuvula oco tu kuatisiwe lovina tu tanga? Tukula ocindekaise cimue.

⁷ Ocili okuti, pamue tu pondola oku tanga ovina vialua, pole, ka tu tẽla oku vi patekela. Anga hẽ wa tangele ale cimue kuenje noke wa limbuka okuti lacimue wa patekela? Ocili okuti, vosi yetu tua lipitile ale laco kuenda ci pondolavo oku pita eci tu tanga Embimbiliya. Pamue, tu kuete ocimãho coku tanga ovipama vimue Viembimbiliya veteke. Eci ocimãho ciwa. Tu sukila oku kuata ocimãho cimue loku likolisilako oku ci tẽlisa. (1 Va Kor. 9:26) Ndeci, oku tanga Embimbiliya, ocimãho cimue ciwa, pole, efetikilo ño. Nda tu yongola oku kuatisiwa lovina tu tanga Vembimbiliya, tu sukila oku likolisilako calua.

⁸ Sokolola kocindekaise eci: Ovava ombela a kuete esilivilo lialua koviluvo vi sangiwa mulo vongongo. Pole, nda oyo yi loka calua vokatembo katito, ovava ka a iñila posi. Kuenje ombela ka yi kuata esilivilo. Ciwa nda ombela yi loka levando momo ovava a iñila ciwa posi, loku kuatisa ovikũla oku kula ciwa. Cimuamue haico okuti, tu sukila oku yuvula oku tanga Embimbiliya loku yanga, ale lonjanga okuti, ka tu kuata vali otembo yoku sokolola kovina tua tanga.—Tia. 1:24.

9. Nye tu sukila ku linga nda tua limbuka okuti tua siata oku tanga Embimbiliya lonjanga?

⁹ Anga hẽ eteke limue poku tanga Embimbilliya wa limbuka okuti o kasi oku ci linga lonjanga? Nda oco, nye o sukila oku linga? Tanga levando oco ci ku ecelele oku sokolola kovina o kasi oku tanga. Oku ci linga ca leluka. Eci o sukila lika oku linga, oku talama loku sokolola kovina wa tanga. Citava okuti o sokiya oku vokiya otembo yelilongiso liove,  oco ci ku kuatise oku sokolola kovina wa tanga. Ale pamue o sokiya oku tanga lika ovinimbu vimue kuenda oku talavaya ciwa lotembo ya supapo oco o sokolole kovina wa tanga. Manji Victor wa tukuiwa ale kefetikilo, wa popia hati: “Poku tanga Embimbiliya nda sokiya lika oku tanga ocipama cimosi. Omo okuti nda siata oku tanga Embimbiliya lomẽle yalua, eteke liosi ndi tẽla oku sokolola eci nda tanga.” Onjila yosi o kuama poku tanga, ci kuete esilivilo oku ci linga levando oco o kuatisiwe lovina o kasi oku tanga.—Osa. 119:97. Tala okakasia losapi hati, “ Sokolola Kapulilo a-a.”

10. Tukula ocindekaise cimue ci lekisa ndomo o kapako ovina o kasi oku lilongisa. (1 Va Tesalonike 5:17, 18)

¹⁰ Poku tanga ovinimbu vimue Viembimbiliya, sokolola ndomo o vi kapako komuenyo wove. Osimbu o tanga onepa yimue Yembimbiliya lipula ndoco: ‘Ndi kapako ndati ulandu uwu cilo, ale kovaso yoloneke?’ Ndeci, sokolola okuti, vesokiyo liove lioku tanga Embimbiliya, wa tanga 1 Va Tesalonike 5:17, 18. (Tanga.) Noke lioku tanga ovinimbu evi vivali, citava okuti o talama loku sokolola olonjanja wa siata oku likutilila kuenda nda o ci linga lutima wosi. Handi vali o sukilavo oku sokolola kovina o pondola oku eca olopandu. Citava okuti, o nõlapo oku eca olopandu ku Yehova kovina vitatu a ku lingila. Oku talama akukutu amue loku sokolola kovina wa lilongisa Vembimbiliya, ci ka ku kuatisa oku kuata elomboloko lieci Embimbiliya li popia kuenda oku kapako ovina olio li longisa. Sokolola ndomo o pondola oku kuatisiwa poku ci linga eteke leteke, lolonepa vikuavo Viembimbiliya o tanga! Nda wa ci linga, o ka kala ufendeli uwa wa Yehova. Nye o sukila oku linga nda wa limbuka okuti, o sukila oku mioñoloha kolonepa vimue?

LITUMBIKILA OVIMÃHO VIA SUNGULUKA

11. Momo lie olonjanja vimue o ponduila oku yeva esumuo? Tukula ocindekaise cimue.

¹¹ Eci o tanga Embimbiliya, pamue o pondola oku yeva esumuo, poku limbuka okuti o kuete ovina vialua o sukila oku mioñolõla komuenyo wove. Ndeci, Sokolola okuti o kasi oku tanga ukanda wa Tiago ocipama cimosi veteke, noke o tanga eci catiamẽla koku yuvula ocame. (Tia. 2:1-8) Noke o limbuka okuti, o sukila oku mioñolola onjila ndomo o tata vakuene kuenje o nõlapo oku linga apongoloko. Eci ciwa! Keteke likuavo, o tanga ocinimbu cimue, ci lombolola esilivilo lioku lava upopi wove. (Tia. 3:1-12) Noke ivaluka okuti, onjanja yimue wa vangula ovina vimue ka via sungulukile. Kuenje ove o nõlapo oku popia olondaka vi lembeleka eci o vangula la vakuene. Keteke likuavo, o tanga ocisonehua ci  lungula oku yuvula oku linga ukamba loluali. (Tia. 4:4-12) Ove o limbuka okuti, o sukila oku nõla ciwa ovitalukilo viove. Voloneke viñamiñami ove wa sanga ale ovina vialua o sukila oku mioñolola.

12. Momo lie ku sukilila oku sumua nda poku tanga Embimbiliya wa limbuka okuti o sukila oku linga apongoloko? (Talavo etosi.)

¹² Nda wa limbuka okuti o sukila oku linga apongoloko alua, ku ka sumue. Owu uvangi wokuti, o kuete ocituwa cumbembe kuenda wa limbuka okuti o sukila oku linga apongoloko. Omunu wosi okuti embombe kuenda ukuacili, o tanga Embimbiliya locimãho coku limbuka apa o sukila oku mioñolola. a Ivaluka okuti oku wala “omunu wokaliye” ci sukila oku amamako oku ci linga, momo olonjanja viosi tu kuete eci tu sukila oku mioñolola. (Va Kol. 3:10) Nye ci ka ku kuatisa oku kala ukuakutẽlisa Ondaka ya Suku?

13. O litumbikila ndati ocimãho coku kapako ovina ove wa lilongisa Vembimbiliya? (Talavo ociluvialuvia.)

¹³ Olonjanja viosi eci o likolisilako oku kapako ovina viosi wa tanga, seteka oku kapako etosi limosi ale avali wa tanga. (Olosap. 11:2) Seteka ndoco, soneha ulala wovina o yongola oku mioñolola, noke nõla ocina cimosi ale vivali o sukila oku tiamisila utima. Kuenje ecelela okuti apongoloko akuavo a lingiwa noke. Pole, nda o kuete vialua vioku mioñolola pi o pondola oku fetikila?

14. Ovimãho vipi o sukila oku litumbikila tete?

¹⁴ O pondola oku nõla oku fetikila kocimãho cimue okuti ca leluka oku ci tẽlisa. Ale o pondola oku fetikila konepa o sukila vali lonjanga. Noke lioku limbuka ovina o sukila oku mioñolola, linga akonomuiso valivulu etu. Ove o pondola oku talavaya Lelivulu Lioku  Konomuisa Liolombangi Via Yehova. Likutilila kueci catiamẽla kocimãho cove, loku pinga ku Yehova oco a ku ĩhe “onjongole longusu yoku linga ovina viosi eye a sole.” (Va Fil. 2:13) Noke kapako ovina wa lilongisa. Nda wa mioñoloha kocimãho catete, o ka kuata vali onjongole yoku amamako oku likolisilako oku mioñoloha kolonepa vikuavo. Eci o limbuka okuti wa tẽla oku linga apongoloko, ale oku mioñoloha kocituwa cimue Cukristão, o ka vetiyiwa vali calua oku linga apongoloko kuenje ci ka leluka kokuove oku tẽlisa ovimãho vikuavo.

ECELELA OKUTI ONDAKA YA SUKU YI “TALAVAYA VOKUOVE”

15. Momo lie afendeli va Yehova va litepela lomanu valua va tanga Embimbiliya? (1 Va Tesalonike 2:13)

¹⁵ Omanu vamue va popia okuti va tanga ale Embimbiliya olonjanja vialua. Anga hẽ ovo va tava kueci Embimbiliya li longisa? Ovo va kapako hẽ ovina va lilongisa kuenda oku kuama olonumbi Viembimbiliya? Ci sumuisa ceci okuti, omanu valua ka va kapeleko olonumbi Viembimbiliya. Pole, afendeli va Yehova va litepa calua! Ndeci Akristão vokocita catete va linga, etu tu tava Kembimbiliya “ndomo ci kasi ocili okuti, ondaka ya Suku.” Handi vali, ca velapo ceci okuti tu likolisilako oku kapako olonumbi Viembimbiliya komuenyo wetu.—Tanga 1 Va Tesalonike 2:13.

16. Nye ci ka tu kuatisa oku kala ukuakutẽlisa Ondaka ya Suku?

¹⁶ Olonjanja vimue ka ca lelukile oku tanga kuenda oku kapako Ondaka ya Suku. Pamue ci tĩla kokuetu oku sanga otembo yoku tanga. Ale pamue tu kuete ocituwa coku tanga lonjanga kuenje ka tu patekela ovina tua tanga. Pamue tu kuata esumuo omo lioku sanga ovina vialua tu sukila oku linga apongoloko. Ovitangi viosi o pondola oku sanga, o ka tẽla oku vi yula lekuatiso lia Yehova. Omo liaco, nõlapo oku tava ekuatiso liaye kuenda linga ukuakutẽlisa ondaka okuti, ukuakuyeva lika hacoko. Ocili okuti, eci tu tanga Embimbiliya loku kapako ovina tua tanga vomuenyo wetu, tu ka kuata esanju lialua.—Tia. 1:25.