1. Esombiso lipi li ka pita ndopo?

 TU sangiwa kotembo yimue yi komõhisa calua! Ndopo ku ka pita epongoloko limue linene. Yesu o ka sombisa omunu lomunu pokati ketu mulo Vongongo. Yesu wa lombolola otembo ku ka pita esombiso liaco, eci a eca kolondonge “ondimbukiso” yimue yocitumasuku coku tukuluka kuaye kuna ka ku muiwa lovaso kuenda “yesulilo lioluali.” (Mat. 24:3) Ocitumasuku caco ca lomboluiwa kovipama 24 kuenda 25 vievanjeliu lia Mateo, lia Marko ocipama 13 kuenda lia Luka ocipama 21.

2. Nye tu konomuisa vocipama cilo kuenda momo lie ci ka tu kuatisila?

² Yesu wa eca alungulo amue a kuete esilivilo lialua pocakati calusapo atatu ndeci, luolomeme lolohombo, luafeko vosombo aveke lava va lunguka kuenda wolotalendo. Olusapo lolusapo, lu ka tu kuatisa oku kuata elomboloko ndomo ekalo kuenda ovilinga viomunu umue, vi ka situlula onjila ndomo eye a ka sombisiwa. Poku ivaluka alusapo aco, tu ka limbuka eci o-o a tu longisa kuenda ndomo tu a kapako. Olusapo tu konomuisa tete, luolomeme lolohombo.

OLOMEME KUENDA OLOHOMBO

3. Otembo yipi Yesu a ka sombisa omanu?

³ Volusapo luolomeme kuenda olohombo, Yesu wa lombolola eci catiamẽla kesombiso liomanu va kuete epuluvi lioku yeva olondaka viwa, oku nõla nda va tava, ale ka va tava kuenda oku kuatisa vamanjaye olombuavekua. (Mat. 25:31-46) Yesu o  ka sombisa omanu va sokisiwa ndolomeme kuenda ndolohombo vokuenda ‘kuohali ya piãla,’ kuenda koku panda kuo Harmagedo. (Mat. 24:21) Ndeci ungombo umue a tepisa olomeme lolohombo, Yesu o ka tepisa omanu vana va kasi oku kuatisa vamanjaye olombuavekua pokati ka vana ka kasi oku ci linga.

4. Ndomo ca sonehiwa ku Isaya 11:3, 4 momo lie tu kolelela okuti Yesu o ka sombisa omanu lesunga? (Talavo koñoño.)

⁴ Yehova wa nõla Yesu oco a kale onganji kuenda ovitumasuku Viembimbiliya vi lekisa okuti, Yesu o ka lekisa esunga lialua poku sombisa. (Tanga Isaya 11:3, 4.) Yesu o lavulula eci omunu lomunu a linga, a popia, ale ceci a sima oku kongelamo ndomo ovo va tata vamanjaye olombuavekua. (Mat. 12:36, 37; 25:40) Lonjila eyi Yesu o ka kũlĩha helie wa kuatisa vamanjaye olombuavekua kuenda upange ovo va siata oku linga. a Onjila yimue ya velapo omanu vana va sokisiwa ndolomeme va kuama poku kuatisa vamanji a Kristu, oku panga onepa kupange woku kunda. Omanu vaco va ka sombisiwa ‘ndavakuesunga’ kuenda va ka kuata elavoko lioku tambula “omuenyo kopui” palo posi. (Mat. 25:46; Esit. 7:16, 17) Eyi yi ka kala onima yiwa ku vana vamamako oku lekisa ekolelo! Poku amamako lekolelo vokuenda kuohali ya piãla, olonduko viavo vi kamamako oku sonehiwa “velivulu liomuenyo.”—Esit. 20:15.

5. Nye tua lilongisila kolusapo luolomeme lolohombo kuenda helie o pondola oku kuatisiwa lawo?

⁵ Lekisa okuti wa koleliwa kuenda ukuacili. Olusapo lua Yesu luolomeme kuenda olohombo lu tiamisiwila calua ku vana va kuete elavoko lioku kala palo posi. Omanu vaco va lekisa ekolelo liavo poku kuatisa vamanji va Kristu kupange woku kunda kuenda poku kala vakuacili kukuenje wa kolelua haeye wa lunguka, vana Yesu a nõla. (Mat. 24:45) Pole, nye ci popiwa ku vana va kuete elavoko lioku enda kilu? Ovo va sukilavo oku kapako elungulo li sangiwa volusapo luaco. Momo lie? Momo Yesu o lavululavo lutate ovilinga viavo, ovituwa kuenda ovina va popia. Ovo va sukila oku lekisa okuti vakuekolelo. Eli olio esunga lieci Yesu a tukuila alusapo akuavo avali, a eca elungulo kolombuavekua. Tu sangavo alusapo aco kevanjeliu lia Mateo, ocipama 25. Cilo tu konomuisa olusapo luafeko vosombo va lunguka kuenda aveke.

AFEKO VOSOMBO VA LUNGUKA KUENDA AVEKE

6. Afeko vatãlo vosombo va lekisa ndati okuti va lunguka? (Mat. 25:6-10)

⁶ Volusapo luafeko vosombo, Yesu wa lombolola eci catiamẽla kafeko ekũi, va tunda oku ka li ñualehela la sandombua. (Mat. 25:1-4) Vosi yavo va yonguile oku kuama sandombua toke kocipito cuvala. Yesu wa popia okuti, vatãlo pokati kavo va “lunguka” va kuavo vatãlo “aveke.” Afeko vosombo va lunguka, va li pongiyile ciwa kuenda va kala oku lavulula. Ovo va liangiliyile oku talamẽla sandombua, ndaño wa laikele oku cilua. Ovo va nena ulela oco olondiyelo viavo viamameko oku taima vuteke waco. Va nenavo olombutika vikuavo viulela okuti, via ponduile oku va kuatisa nda sandombua wa cilua. Kuenje va li pongiyile oco olondiyelo viavo ka vi kaime. (Tanga Mateo 25:6-10.) Eci sandombua a pitĩla, afeko va lunguka va enda laye kocipito cuvala. Cimuamue haico okuti, Akristão olombuavekua vana va liangiliya poku amamako oku lavulula  lekolelo toke koku tukuluka kua Kristu, va ka likongela ku sandombua Yesu, vusoma waye kilu. b (Esit. 7:1-3) Pole, nye ca li pita lafeko vatãlo aveke?

7. Nye ca li pita lafeko aveke kuenda momo lie?

⁷ Ca litepa lafeko va lunguka ceci okuti, afeko vatãlo aveke, ka va lipongiyile eci sandombua a pitĩla. Olondiyelo viavo via kala okuima, kuenda ka va nenele ulela ukuavo. Eci va limbuka okuti sandombua ndopo o pitĩla, va tunda oku ka landa ulela. Eci sandombua eya ovo handi ka va pitĩlile. Eli olio esunga liokuti, “afeko vosombo vana va li pongiya ale va iñila laye kocipito cuvala kuenje epito lia yikiwa.” (Mat. 25:10) Noke eci afeko aveke va tiuka kuenda va seteka oku iñila, sandombua wa va tambulula hati: “sio kũlĩhĩli.” (Mat. 25:11, 12) Afeko vaco ka va lipongiyilile oku talamẽla sandombua otembo ya sukiliwile. Nye olombuavekua vi lilongisila kolusapo olu?

8-9. Ulandu upi olombuavekua va lilongisila kolusapo luafeko vosombo? (Talavo ociluvialuvia.)

⁸ Lekisa okuti wa lipongiya loku lavulula. Yesu ka kaile oku popia hati kua laikele oku kala ovimunga vivali violombuavekua okuti ocimunga cimue ca laikele oku talamẽla toke kesulilo lioluali lulo pole, ocimunga cikuavo sio. Eye wa kala oku lombolola eci ca laikele oku pita lolombuavekua nda ovo ka va lipongiyile oco va pandikise lekolelo toke kesulilo. Lonjila eyi ovo nda va pumba onima yavo. (Yoa. 14:3, 4) Owu ulandu umue u kuete esilivilo lialua! Ci kaile okuti tu kuete elavoko lioku kala kilu ale posi, vosi yetu tu sukila oku patekela ciwa elungulo liolusapo luafeko vosombo. Omunu lomunu pokati ketu, o sukila oku lavulula kuenda oku liangiliyila oku pandikisa, toke kesulilo. —Mat. 24:13.

⁹ Yesu noke lioku lombolola olusapo luafeko vosombo oco a situlule esilivilo lioku li pongiya kuenda oku lavulula, wa lombolola olusapo luolotalendo. Olusapo olu lulekisa  okuti ci kuete esilivilo oku kala olondingupange viwa kuenda oku likolisilako.

OLOTALENDO

10. Apika vavali va lekisa ndati okuti va kuacili? (Mateo 25:​19-23)

¹⁰ Volusapo luolotalendo, Yesu wa tukula apika vavali va lekisa okuti va kala vakuacili la cime cavo kuenda umue ka kaile ukuacili. (Mat. 25:14-18) Apika vavali va lekisa okuti va koleliwile momo va likolisilako calua oku vokiya ukuasi wa cime cavo. Osimbu eye ka lingile ungende wa eca kapika vaye olotalendo vimue ale olombongo vialua. Apika vavali va koleliwile, va likolisilako oku talavaya calua kuenda oku talavaya lolombongo lolondunge. Onima yipi yeyililako? Eci cime a tiuka, wa sanga okuti olombongo a ecele kokuavo via livokiya. Cime wa va pandiya kuenda ‘va sanjukila kumue la cime cavo.’ (Tanga Mateo 25:19-23.) Nye ca pita lupika watatu? Nye eye a linga lolombongo cime caye o wĩhile?

11. Nye ca pita lupika “ocisiãi” kuenda momo lie?

¹¹ Upika watatu una wa tambula otalendo yimosi, wa lekisa okuti “ocisiãi.” Cime caye wa yonguile okuti eye o talavaya lolondunge lotalendo vo wĩha. Pole, eye ka ci lingile, wa yi lembikila posi. Eci cime a tiuka, upika waco ka kuatele vali lacimue coku eca ku cime caye. Upika ka lekisile olondunge. Eye ka pingile ongecelo omo ka setekele oku vokiya ukuasi wa cime caye, pole, lekambo liesunga wa tukula cime caye okuti, ‘ulume umue wa kãla.’ Ocina upika waco a linga ka ca sanjuisile cime. Omo liaco, otalendo vo wĩhile vo yi tambula, kuenje wa tundisiwa konjo ya cime caye.—Mat. 25:24, 26-30.

12. Apika vavali va koleliwa va lomboloka nye koloneke vilo?

¹² Apika vavali va koleliwa, va lomboloka Akristão olombuavekua vakuekolelo. Ñala Yesu wa va laleka oku “sanjukila kumue la cime [cavo.]” Ale va tambula onima yavo kilu okuti epinduko liatete. (Mat. 25:21, 23; Esit. 20:5b) Handi vali, ongangu yĩvi yupika ocisiãi yeca elungulo kolombuavekua. Ndamupi?

13-14. Nye olombuavekua vi lilongisila kolusapo luolotalendo? (Tala ociluvialuvia.)

 ¹³ Lekisa okuti wundingupange yiwa haiyo yi likolisilako. Volusapo luolotalendo kuenda luafeko vosombo, Yesu ka kaile oku popia okuti olombuavekua vimue vi ka kala ovisiãi. Eye wa kala oku lombolola eci ca laikele oku pita nda ovo va tepuluile ombili yavo. Ovo nda ka va tẽlele oku “kakatela kesumũlũho lioku [kovongiwa]” kuenda nda ka va taviwile oku iñila Vusoma wo kilu.—2 Pet. 1:10.

¹⁴ Alusapo a Yesu atiamẽla kafeko vosombo kuenda kolotalendo, a situlula ciwa okuti Akristão vosi olombuavekua va sukila oku lipongiya, oku lavulula kuenda oku lekisa okuti, olondingupange viwa haivo va likolisilako. Anga hẽ Yesu wa vangula vali cimue ca kala ndelungulo kolombuavekua? Oco! Eci Yesu a tukula ku Mateo 24:40, 41, ci tiamisiwilavo kesombiso lia sulako liolombuavekua.

HELIE “O KA AMBATIWA?”

15-16. Elivulu lia Mateo 24:​40, 41 li kuatisa ndati olombuavekua oku limbuka esilivilo lioku amamako oku lavulula?

¹⁵ Osimbu Yesu ka tukuile alusapo atatu, eye wa lombolola esombiso lia sulako, oco ku limbukiwe olombuavekua via laikele oku taviwa. Eye wa vangula eci catiamẽla kalume vavali va kala vepia kuenda akãi vavali va kala pohanda oku fula. Olonepa viaco vivali, via lekisa okuti vosi yavo va kala oku linga upange umuamue, pole, Yesu wa popia hati “umue o ka ambatiwa kuenje ukuavo o ka siala.” (Tanga Mateo 24:40, 41.) Noke Yesu wa vetiya olondonge viaye hati: “Amamiko oku lavulula, momo ka wa kũlĩhĩli eteke Ñala yene eya.” (Mat. 24:42) Yesu wa vangula olondaka vimuamue eci a lombolola olusapo luafeko vosombo. (Mat. 25:13) Omo liaco, olombuavekua vina via lekisa okuti vakuacili kuenda va pandikisa lekolelo, ovo lika va laikele oku “ambatiwa” ale oku tambuiwa la Yesu Vusoma wo kilu.—Yoa. 14:3.

¹⁶ Lekisa okuti o kasi oku lavulula. Ombuavekua yosi ka yamamako oku lavulula konepa yespiritu, ka yi ka kongeliwa la “vana va nõliwa.” (Mat. 24:31) Ocili okuti, vosi vana va kuete elavoko lioku ka kala palo posi lomuenyo otembo ka yi pui, va sukilavo oku amamako oku lavulula loku lekisa okuti vakuacili.

17. Momo lie ka tu sukilila oku li sakalaisa nda Yehova o nõla Akristão vamue, oco va kale olombuavekua koloneke vilo?

¹⁷ Etu tua kũlĩha ciwa Yehova kuenda tua kũlĩhavo okuti, onjila yaye yoku sombisa yesunga. Ka tu sukila oku li sakalaisa nda Yehova wa nõla olombuavekua vimue vakuekolelo koloneke vietu. c Tu ivaluki olusapo Yesu a tukula luatiamẽla kalume va fetika oku talavaya vocumbo cayuva kowola yekũi lamosi. (Mat. 20:1-16) Vana va lalekiwa oku talavaya kelivala lia sulako lieteke, va tambula onima yimuamue la vana va fetika selo upange. Cimuamue haico okuti, ka ca tambele kotembo olombuavekua vi nõliwa, ovo va ka tambula onima yomuenyo kilu nda vamamako lekolelo.

KAPIKO ALUNGULO

18-19. Ovolandu api elungulo tua lilongisa?

¹⁸ Nye tua konomuisa? Ku vana va kuete elavoko lioku kala otembo ka yi pui palo posi, olusapo luolomeme kuenda luolohombo, lu lekisa esilivilo lioku amamako lekolelo loku kala vakuacili ku Yehova ci kale cilo ale vokuenda kuohali ya piãla yi kasi ocipepi. Kovaso yoloneke, Yesu o ka sombisa vana vamamako  lekolelo okuti va sesamẽla “omuenyo ko pui.”—Mat. 25:46.

¹⁹ Tua lilongisavo alusapo avali a eca elungulo kolombuavekua. Kolusapo lua Yesu, luafeko vosombo va lunguka kuenda aveke, vatãlo pokati kavo va lekisa olondunge. Ovo va lipongiyile kuenda va kala oku lavulula oco va talamẽle sandombua votembo a laikele oku pitĩla. Pole, afeko aveke ka va lipongiyile. Kuenje sandombua ka va iñisile kocipito cuvala. Etu tu sukilavo oku lipongiya kuenda oku talamẽla otembo yi sukiliwa toke eci Yesu a ka nena esulilo lioluali lulo. Handi vali, volusapo lua Yesu luolotalendo, tua mola okuti apika vavali va koleliwile va likolisilako oku talavaya kuenda oku lekisa olondunge. Ovo va likolisilako calua oku talavayela cime cavo kuenje eye wa va sanjukila. Pole, upika ocisiãi vo likala. Nye tu lilongisilako? Tu sukila oku likolisilako oku linga upange wa Yehova toke kesulilo. Oku sulako, tua konomuisa esukila liolombuavekua oku amamako oku lavulula oco “vambatiwe” la Yesu oku tambula onima yavo kilu. Olombuavekua vi lavoka calua oku “ongoluiwa” la Yesu kilu. Noke liuyaki wo Harmagedo, ovo va ka linga ondombua ya Yesu kuvala wa Kameme.—2 Va Tes. 2:1; Esit. 19:9.

20. Nye Yehova a ka lingila ku vana va kapako alungulo aye?

²⁰ Otembo Yesu a ka sombisa omanu yi kasi calua ocipepi, pole, etu ka tu kuete usumba. Nda tuamamako lekolelo, Isietu wokilu ukuacisola o ka tu ĩha “unene wa piãla” oco tu tẽle “oku talama kovaso a Mõlomunu.” (2 Va Kor. 4:7; Luka 21:36) Ci kaile okuti elavoko lietu lioku enda kilu ale lioku kala palo posi, tu sanjuisa Isietu Yehova nda tua kapako alungulo a sangiwa valusapo a Yesu. Kuenje omo okuti Yehova ukuahenda ya piãla, olonduko vietu vi ka “sonehiwa velivulu” liomuenyo.—Dan. 12:1; Esit. 3:5.