1. Ombanjaile yipi Yesu a tu ĩha?

 YESU eye omunu wa velapo koku kuatisa vakuavo. Eci a kala palo posi, wa linga ovikomo vialua oco a kuatise omanu. (Luka 9:12-17) Eye wa tu ĩha ombanjaile ya velapo okuti, omuenyo waye. (Yoa. 15:13) Ndaño muẽle noke lioku pinduiwa, eye wamamako oku kuatisa omanu. Yesu wa likuminyile okuti, wa laikele oku pinga ku Yehova oco a tume espiritu sandu okuti, li tu longisa kuenda oku tu lembeleka. Eci oco eye a linga. (Yoa. 14:16, 17, etosi; 16:13) Kuenje pocakati colohongele, Yesu o kasi oku amamako oku tu ĩha epindiso, oco tu tẽle oku longisa omanu koluali luosi catiamẽla Kembimbiliya kuenda oku linga olondonge.—Mat. 28:18-20.

2. Velie “alume ndolombanjaile” va tukuiwa ku Va Efeso 4:7, 8?

² Kũlĩhĩsa ombanjaile yikuavo Yesu a tu ĩha. Upostolo Paulu wa soneha okuti, noke lia Yesu oku enda kilu, “eye wa eca alume ndolombanjaile.” (Tanga Va Efeso 4:7, 8.) Paulu wa lombolola okuti, Yesu wa eca olombanjaile viaco oco va kuatise akongelo volonjila via liyekala. (Va Efe. 1:22, 23; 4:11-13) Koloneke vilo ‘alume vaco ndolombanjaile,’ oloñuatisi viekongelo, akulu vekongelo kuenda vamanji va nyula akongelo. a Ocili okuti, alume vaco ka va lipuile kuenda va lueya. (Tia. 3:2) Pole, Yesu Kristu, o talavaya lalume vaco oco va tu kuatise. Ovo olombanjaile eye a tu ĩha.

3. Lombolola ndomo omunu lomunu pokati ketu a eca ekuatiso ‘kalume va nõliwa ndolombanjaile.’

³ Yesu wa nõla “alume ndolombanjaile” oco va kolise ale oku pamisa ekongelo. (Va Efe. 4:12) Pole, omunu lomunu pokati ketu, o  sukila oku linga onepa yaye oco a kuatise vamanji vaco oku tẽlisa ovikele viavo. Oco tu kuate elomboloko liaco, sokolola kocindekaise eci: Vamue pokati ketu tua siata oku panga onepa koku tungiwa Kuonjango yimue Yusoma. Vakuavo va kuatisa kovopange ndeci, oku pongiya ovikulia kuenda oku tuta omanu va linga upange waco ale oku tuta ovimalẽho viupange. Cimuamue haico okuti, kolondaka vietu lo kovilinga, vosi yetu tu pondola oku kuatisa oloñuatisi viekongelo, akulu vekongelo kuenda vamanji va nyula akongelo kupange ovo va linga. Omo liaco, tu konomuisa ndomo upange wavo u tu kuatisa kuenda ndomo tu lekisa olopandu kokuavo kuenda ku Yesu una wa tu ĩha ‘alume vaco ndolombanjaile.’

OLOÑUATISI VIEKONGELO VI LINGA “OVOPANGE OKU KUATISA”

4. Ovopange api oloñuatisi viekongelo vo kocita catete va enda oku linga?

⁴ Koloneke viovapostolo, vamanji vamue va enda oku nõliwa oco va kale oloñuatisi viekongelo. (1 Tim. 3:8) Citava okuti, Paulu wa kala oku vangula oloñuatisi viekongelo via tukuiwa kukanda 1 Va Korindo 12:28 eci a soneha eci catiamẽla ‘kovopange oku kuatisa.’ Eci ci lekisa okuti, oloñuatisi viekongelo via enda oku linga ovopange a kuete esilivilo lialua oco akulu vekongelo va tiamisile utima koku pamisa vamanji kuenda kupange woku kunda. Ndeci, citava okuti oloñuatisi viekongelo via kuatisa koku soneha olokopia Viembimbiliya, ale pamue oku landa ovina via sukiliwile oco ku pangiwe olokopia viaco.

5. Koloneke vilo ovopange api oloñuatisi viekongelo via siata oku linga?

⁵ Sokolola kovopange amue oloñuatisi viekongelo va siata oku linga vekongelo liove. (1 Pet. 4:10) Ovo pamue, va nõliwa oco va linge ovopange oku sokiya olokonda, ale ovikanjo viekongelo kuenda oku pinga alivulu ekongelo. Vamue va talavaya kovileñi kolohongele, kupange wonjiliki ale kupange woku semũlũla Onjango Yusoma. Ovopange aco osi, a kuete esilivilo oco ekongelo liendisiwe ciwa. (1 Va Kor. 14:40) Handi vali, oloñuatisi vimue viekongelo vi linga olonepa Kekalo Lietu Tuakristão Kuenda Oku Kunda loku linga olohundo viowiñi. Oñuatisi yimue yekongelo yi pondola oku nõliwa oco olonjanja vimue yi kuatise mitavaso yocimunga cupange woku kunda. Oloñuatisi viekongelo via siatavo oku lalekiwa lakulu vekongelo, kupange woku pasuisa vamanji.

6. Momo lie tu sukilila oku sanjukila upange oloñuatisi viekongelo via siata oku linga?

⁶ Kũlĩhĩsa eci omanu vamue va popia catiamẽla kekuatiso oloñuatisi viekongelo via siata oku eca. Manji umue ukãi o tukuiwa Beberly b wo ko Bolivia wa popia hati: “Ame nda siata oku upa esilivilo lialua kolohongele omo liekuatiso lioloñuatisi viekongelo. Omo liupange wavo, mondola oku imba ovisungo, oku eca atambululo, oku yeva olohundo kuenda oku lilongisila kolovideo loko viluvialuvia vi lekisiwa vokuenda kuohongele. Ovo va siata oku kuatisa koku teyuila Onjango Yusoma kuenda oku kuatisa vana ka va pondola oku iya kolohongele, oku yi talela kolonjo viavo. Noke liohongele ovo va siata oku kuatisa koku yelisa Onjango Yusoma, oku tata olokonda viekongelo kuenda oku tu ĩha alivulu tu sukila. Ndi pandula calua upange ovo va siata oku linga.” Manji Leslie okuti ukãi wukulu umue wekongelo ko Kolombia wa popia hati: “Ulume wange wa siata oku kuatisiwa calua loloñuatisi viekongelo. Nda ka ca kaile lekuaso liavo, eye nda wa kuata ovina vialua vioku linga. Omo liaco, ngeca olopandu vialua omo liekuatiso liavo.” Citava okuti ove o kuetevo ocisimĩlo cimuamue loloñuatisi viekongelo liove.—1 Tim. 3:13.

7. Tu lekisa ndati olopandu koloñuatisi viekongelo? (Talavo ociluvialuvia.)

⁷ Pole oku yeva lika esanju omo liovina oloñuatisi viekongelo via siata oku linga, ka ci tẽla. Embimbiliya li tu vetiya hati: “Olonjanja viosi eci olopandu.” (Va Kol. 3:15) Manji Krzysztof okuti  ukulu umue wekongelo ko Finlândia, wa lombolola ndomo eye a siata oku lekisa olopandu hati: “Ame ndi soneha okokanda kamue ale ndi tuma esapulo locisonehua cimue Cembimbiliya kuenda ndi lombolola ndomo oñuatisi yimue yekongelo ya ndi pamisa ale ndi tukula ndomo nda kapako calua ovina eye a siata oku linga.” Manji Pascal kuenda Jael, okuti va kasi ko Nova Caledônia va siata oku likutililako oloñuatisi viekongelo. Manji Pascal hati: “Koloneke viasulako tua siata oku likutililako calua oloñuatisi vietu viekongelo oku eca olopandu ku Yehova omo liavo kuenda oku pinga okuti eye o kala lavo loku va kuatisa.” Tua kolela okuti Yehova o yevelela olohutililo viaco kuenje vosi vekongelo va kuatisiwa.—2 Va Kor. 1:11.

AKULU VEKONGELO “VA TALAVAYA CALUA”

8. Momo lie Paulu a popela okuti akulu vekongelo vokocita catete va kala oku “talavaya calua”? (1 Va Tesalonike 5:12, 13)

⁸ Koloneke viovapostolo akulu vekongelo va talavaya calua oco va kuatise ekongelo. (Tanga 1 Va Tesalonike 5:12, 13; 1 Tim. 5:17) Ovo va enda oku ‘songuila’ ekongelo ale oku sokiya olohongele kuenda oku nõla olonjila vi kuamiwa kumosi lakulu vakuavo. Ovo va endavo oku “lungula” vamanji lonjila yimue yi teta onimbu, pole, va ci lingaile locisola oco va teyuile ekongelo. (1 Va Tes. 2:11, 12; 2 Tim. 4:2) Handi vali, alume vaco, va sukilile oku talavaya oco va tekule apata avo, loku amamako lekolelo lia pama kuenda oku pamisa ukamba wavo la Yehova.—1 Tim. 3:2, 4; Tito 1:6-9.

9. Ovina vipi akulu vekongelo vo koloneke vilo va siata oku linga?

⁹ Akulu vekongelo koloneke vilo, va kuetevo upange walua. Ovo va talavaya calua kupange woku kunda. (2 Tim. 4:5) Akulu vekongelo va siata oku eca ongangu yiwa koku panga onepa kupange woku kunda. Ovo va siatavo oku sokiya upange woku kunda vocikanjo cekongelo, oku tu pindisa oco tu kale alongisi vawa kuenda akundi. Akulu vekongelo va siatavo oku talavaya ndolonganji viesunga haivo vakuahenda. Eci umue a linga ekandu linene, akulu vekongelo va likolisilako oku u kuatisa oku tumbulula ukamba waye la Yehova. Vepuluvi limuamue, va likolisilakovo oku lekisa utate oco ekongelo liamameko oku yelisiwa. (1 Va Kor. 5:12, 13; Va Gal. 6:1) Ca velapo vali ceci okuti, akulu vekongelo va kũlĩhĩwa okuti angombo. (1 Pet. 5:1-3) Ovo va pongiya ciwa olohundo viavo via kunamela Vembimbiliya. Va siatavo oku likolisilako oku kũlĩha omunu lomunu vekongelo kuenda oku linga apasu ku vamanji. Akulu vamue vekongelo va kuatisavo kupange woku tunga, loku semulula olonjango viusoma, oku sokiya olohongele viofeka, olohongele vimbo, oku kuatisa Koseketa Yoku Tetulula Ocitangi Coku Yuvula Oku Sakuiwa Losonde, ale Locimunga ci Nyũla Umue o Vela kuenda kovikele vikuavo. Ocili okuti, akulu vekongelo va talavaya calua!

10. Momo lie tu sukilila oku sanjukila ovina akulu vekongelo va siata oku linga?

¹⁰ Yehova wa likuminya kafendeli vaye angombo va laikele oku va tata ciwa, okuti ka va “kuata vali usumba ale ohele.” (Yer. 23:4) Manji umue ukãi woko Finlândia o tukuiwa Johanna wa situlula ocili colondaka evi eci inaye a liyaka luvei umue wa kãla calua. Eye wa lombolola ndoco: “Ame sisole calua oku lombolola ndomo ndi liyevite komanu vakuavo, pole, ukulu umue wekongelo okuti sio kũlĩhĩle ciwa, wa njevelela lepandi, wa likutilila lame loku ndekisa okuti Yehova o ndi sole calua. Si ivaluka cosi eye a popia, pole, ndi ivaluka okuti, nda kuata ombembua yalua. Nda kolela okuti Yehova eye wo tuma kokuange oco a ndi kuatise vepuluvi nda sukilile.” Konepa yipi akulu vekongelo liove va ku kuatisa ale?

11. Tu lekisa ndati olopandu kakulu vekongelo? (Talavo ociluvialuvia.)

¹¹ Yehova o sanjuka calua eci tu lekisa olopandu lutima wosi kakulu vekongelo omo lioku  “talavaya calua.” (1 Va Tes. 5:12, 13) Manji Henrietta okuti o kasivo ko Finlândia, wa popia hati: “Akulu vekongelo olonjanja viosi va likapelako oku kuatisa, pole, eci ka ci lekisa okuti, va kuete otembo, longusu yalua kuenda ka va kuete ovitangi. Olonjanja vimue ngenda kukulu umue wekongelo loku u sapuila siti: Njongola okuti ove o kũlĩha cimue. ‘Ove ukulu umue uwa wekongelo.’” Manji umue woko Turquia c o tukuiwa Sara, wa popia hati: “Akulu vekongelo va sukila ‘elembeleko’ oco vamamako oku tẽlisa ovina va kasi oku linga. Tu pondola oku ci linga poku va sonehela okokanda kamue kolopandu, oku va laleka o kulila kumosi, ale oku kundila kumosi.” Wa kũlĩha hẽ ukulu umue wekongelo okuti, wo sanjukila omo lioku talavaya calua oco a kuatise ekongelo? Lekisa kokuaye okuti wa sanjukila calua ovina a siata oku linga.—1 Va Kor. 16:18.

VAMANJI VA NYULA AKONGELO VA PAMISA EKONGELO

12. Velie Yesu a nõlele oco va pamise akongelo kocita catete? (1 Va Tesalonike 2:7, 8)

¹² Alume vamue Yesu wa nõla “ndolombanjaile” va kuatisa ekongelo volonjila vikuavo. Eye wa vetiya akulu ko Yerusalãi oco va nõle Paulu la Barnaba kuenda vakuavo, kupange woku nyula akongelo. (Ovil. 11:22) Momo lie? Oco va pamise loku kolisa ekongelo, ndeci, ca siata oku linga oloñuatisi viekongelo kuenda akulu vekongelo. (Ovil. 15:40, 41) Alume vaco va siata oku likolisilako calua poku siapo ovina va sole, loku kapa kohele ovimuenyo viavo olonjanja vimue, oco va longise loku pamisa vakuavo.—Tanga 1 Va Tesalonike 2:7, 8.

13. Ovikele vipi vamanji vanyula akongelo va kuete?

¹³ Vamanji va nyula akongolo va siata oku linga ovongende alua. Vakuavo va sukila oku enda ovinala vialua kekongelo lekongelo. Osemana  losemana vamanji vaco va linga olohundo vialua, va linga apasu ku vamanji, va linga ohongele yakundi votembo yosi, ohongele lakulu vekongelo kuenda olohongele viupange woku kunda. Eye o pongiya olohundo, o sokiya olohongele vimbo, levi viofeka. Anyamo osi o kala ulongisi yosikola yakundi votembo yosi, o sokiya ohongele yimue yi likasi lakundi votembo yosi vovocikanjo caye. Handi vali eye o sukila oku tẽlisa ovopange akuavo a kuete esilivilo kuenda olonjanja vimue a sukila oku lingiwa onjanga.

14. Momo lie tu popela okuti vamanji vanyula akongelo va kasi ndesumũlũho?

¹⁴ Momo lie tu popela okuti vamanji va nyula akongelo va kasi ndombanjaile? Manji umue woko Turquia wa popia hati: “Epasu lepasu tu kuata, ci ndi vetiya vali calua oku kuatisa vamanji vekongelo. Nda kũlĩha vamanji valua va nyula akongelo, pole, lomue pokati kavo wa enda oku lekisa ndu okuti o kuete vialua vioku linga, ale ka kuete otembo yoku sapela.” Manji Johanna wa tukuiwa ale ivaluka okuti, eci a kundila kumosi la manji o nyula akongelo, ka va tẽlele oku sapela lomunu laumue kolonjo va kundila. Pole, eye wa popia hati: “Ndaño ndoco sia la ivalako eteke liaco. Vamanjange vavali va ilukilile konepa yimue ya kala ocipãla kuenje nda va kuatelele ongeva yalua. Manji onyula akongelo wa ndi pamisa loku ndi sapuila hati, upãla waco wokatembo kamue ño. Cilo, pamue ka cecelela oku kala ocipepi lepata kuenda akamba, pole, voluali luokaliye tu ka kuata epuluvi liosi lioku ka kala kumosi lavo.” Ovolandu a-a, a lekisa ndomo vamanji vanyula akongelo va kasi ndesumũlũho ku vana va siata oku nyula.—Ovil. 20:37–21:1.

15. (a) Ndomo ca lomboluiwa kukanda 3 Yoano 5-8, tu lekisa ndati olopandu ku vamanji va nyula akongelo? (Talavo ociluvialuvia.) (b) Momo lie tu sukilila oku kapako akãi va vamanji va talavaya calua vekongelo kuenda tu ci linga ndati? (Tala okakasia losapi hati “ Ivaluki Akãi Vavo.”)

¹⁵ Upostolo Yoano wa vetiya Gaio oku yekisa vamanji vanyula akongelo veyile oku pamisa  ekongelo. Eye wa soneha ndoco: “Va tuma vonjila yavo ndomo ci sanjuisa Suku.” (Tanga 3 Yoano 5-8.) Tu kuama ndati onjila yimuamue? Onjila yimue yoku ci linga oku poka manji o nyula akongelo. Onjila yikuavo oku panga onepa kupange woku kunda vosemana yepasu. Manji Leslie, wa siata oku lekisa olopandu ku vamanji va nyula akongelo volonjila vikuavo. Eye wa popia hati: “Nda siata oku likutilila ku Yehova oco a ece kokuavo ovina va sukila. Ame lulume wange tua va sonehela ale ovikanda violopandu, omo liepasu liavo kuenda oku va sapuila ndomo ovo va siata oku tu kuatisa.” Ivaluka okuti vamanji va nyula akongelo va siatavo oku liyaka lovitangi kuenda oku kava, ndeci etu. Olonjanja vimue va liyakavo loku vela, lesakalalo kuenda lesumuo. Omo liaco, pocakati colondaka vietu vi lembeleka, ale poku va ĩha ombanjaile yimue, Yehova o pondola oku tu vetiya oco ku tambuluiwe olohutililo via vamanji va nyula akongelo!—Olosap. 12:25.

TU SUKILA VALI CALUA “ALUME NDOLOMBANJAILE”

16. Ndomo ca lekisiwa Kolosapo 3:​27, apulilo api vamanji alume va sukila oku lipula ovo muẽle?

¹⁶ Voluali luosi kuli esukila lialua lia vamanji alume oco va kale “ndolombanjaile.” Nda okuti u manji umue wa papatisiwa anga hẽ o pondola “oku kuatisa?” (Tanga Olosapo 3:27.) Ove hẽ o kasi oku likolisilako oku kala oñuatisi yekongelo? Nda okuti wuñuatisi ale yekongelo, o kuete hẽ onjongole yoku kala ukulu wekongelo kuenda oku likolisilako oku tata vamanji vekongelo? d Anga hẽ o pondola oku linga apongoloko amue komuenyo wove, oco o pindisiwe kosikola Yakundi Vusoma? Osikola yaco yi ka ku pindisa loku ku kuatisa oku kala omunu Yesu a nõla ndolombanjaile. Omo liaco, nda osima okuti ku pondola oku tẽlisa ovikele viaco, likutilila ku Yehova. Pinga kokuaye espiritu sandu oco li ku kuatise oku tẽlisa ocikele cosi o tambula.—Luka 11:13; Ovil. 20:28.

17. ‘Alume va kasi ndolombanjaile’ va tu longisa nye catiamẽla Kosoma yetu Yesu Kristu?

¹⁷ Vamanji Yesu a nõla oco va kale “alume ndolombanjaile” uvangi wokuti, eye o kasi oku amamako oku tu tata koloneke vilo via sulako. (Mat. 28:20) Soma yetu Yesu ukuacisola, o tu ĩha ovina tu sukila kuenda wa siata oku tu ĩha vamanji va lipongiya ciwa oco va tu kuatise. Oku sokolola kovina viaco, ka ci ku vetiya hẽ oku eca olopandu? Nda oco, sanda apuluvi oku lekisa okuti, wa kapako alume vaco va siata oku likolisilako calua. Omo liaco, lalimue eteke ku ka ivaleko oku eca olopandu ku Yehova, momo eye wa siata oku tu ĩha “ongavelo yosi yiwa lombanjaile yosi ya lipua.”—Tia. 1:17.