OCIPAMA CELILONGISO 43
OCISUNGO 90 Tu Livetiyi Pokati
Yuvula Oku Kuata Atatahãi
“Kũlĩhĩsi ovina viosi.”—1 VA TES. 5:21
OCIMÃHO CELILONGISO
Tu konomuisa ndomo tu yuvula atatahãi ana a pondola oku tu tateka kupange wa Yehova.
1-2. (a) Atatahãi api pamue afendele vamue va Yehova va pondola oku kuata? (b) Nye tu konomuisa vocipama cilo?
OLONJANJA vimue a omanu vosi va kuata atatahãi. Ndeci, sokolola kumalẽhe umue o lipula nda Yehova wo kapako muẽle. Kuenje omo liatatahãi aco, eye pamue o sima okuti ka pondola oku papatisiwa. Sokololavo kumanji umue okuti, kosimbu wa nõlelepo oku litumbika vali calua kupange wa Yehova okuti, oku nganyala olombongo vialua ci sule. Pole, cilo wa kuka kuenda o kuete lika olombongo vitito vioku tekula epata liaye kuenje o lipula nda wa nõlele onjila yiwa eci a kala umalẽhe. Sokolola kumanji umue ukãi wa kuka okuti ka kuete ongusu yalua ndeyi a kuatele kosimbu. Citava okuti, o yeva esumuo, momo ka tẽla vali oku linga ovina a lingaile. Pamue ove wa kuatele ale atatahãi amue ndeci: ‘Anga hẽ Yehova wa ndi kapako muẽle? ‘Anga hẽ nda nõlele onjila yiwa poku litumbika vali calua kupange wa Yehova? Anga hẽ cilo handi ñuete esilivilo ku Yehova?’
2 Nda ka tua yuvuile atatahãi ndava, tu ka honguisa ekolelo lietu kuenda tu pondola oku liwekapo oku fendela Yehova. Vocipama cilo, tu lilongisa ndomo olonumbi Viembimbiliya vi pondola oku tu kuatisa nda tu kuete atatahãi ndeci: (1) ‘Anga hẽ Yehova wa ndi kapako muẽle?’ (2) ‘Anga hẽ onjila nda nõlele kosimbu ya sunguluka?’ (3) ‘Anga hẽ cilo handi ñuete esilivilo ku Yehova?’
NYE CI PONDOLA OKU TU KUATISA ECI TU KUATA ATATAHÃI?
3. Yipi onjila yimue yoku imũla atatahãi?
3 Onjila yimue yoku imũla atatahãi oku sanda atambululo Vembimbiliya. Nda tua ci linga, ukamba tu kuetele Yehova, u ka livokiya calua kuenda tu ka ‘pama kekolelo.’—1 Va Kor. 16:13.
4. Tu pondola oku ‘kũlĩhĩsa ndati ovina viosi?’ (1 Va Tesalonike 5:21)
4 Tanga 1 Va Tesalonike 5:21. Embimbiliya li tu vetiya oku ‘kũlĩhĩsa ovina viosi.’ Eci ci lomboloka nye? Eci ci lomboloka okuti, eci tu kuata atatahãi ocina cimue, tu sukila oku konomuisa ondaka yaco Vembimbiliya. Ndeci, kũlĩhĩsa ocindekaise cumalẽhe una o kuate atatahãi nda Yehova wo kapako muẽle. Anga hẽ eye o sukila oku tava lika kocisimĩlo caco loku ci kolela? Sio. Eye o sukila oku ‘kũlĩhĩsa ovina viosi’ loku limbuka ocisimĩlo ca Yehova.
5. Tu pondola oku “yevelela” ndati atambululo a Yehova atiamẽla katatahãi tu kuete?
5 Oku tanga Embimbiliya ci kasi ndoku “yevelela” Yehova. Pole, oco tu kuate elomboloko liocisimĩlo ca Yehova catiamẽla katatahãi tu kuete, tu sukila oku likolisilako. Poku fetika, tu sukila oku tanga olonepa Viembimbiliya viatiamẽla katatahãi tu kuete. Tu sukilavo oku talavaya lovimalẽho vialua vielilongiso ocisoko ca Yehova ca siata oku tu ĩha oco tu linge akonumuiso atiamẽla kondaka yaco. (Olosap. 2:3-6) Handi vali, tu sukila oku likutilila oco Yehova a sumũlũise akonomuiso tu kasi oku linga kuenda oku limbuka ocisimĩlo caye. Noke tu pondola oku sandiliya olonumbi Viembimbiliya kuenda ovolandu a likuata lekalo lietu. Ocina cikuavo ci pondola oku tu kuatisa, o tanga ovolandu Embimbiliya atiamẽla komanu va kuatele ovisimĩlo kuenda ekalo ndeli lietu.
6. Olohongele vi tu kuatisa ndati oku yimula atatahãi?
6 Onjila yikuavo yoku “yevelela” Yehova, pocakati colohongele viekongelo. Eci tu enda kolohongele, tu kuete epuluvi lioku yevelela ohundo ale etambululo limue tua sukilile oco tu imule etatahãi limue tu kuete. (Olosap. 27:17) Cilo, tu konomuisa eci ci pondola oku tu kuatisa oku yula atatahãi.
ANGA HẼ YEHOVA WA NDI KAPAKO MUẼLE?
7. Atatahãi api omanu vamue va kuete?
7 Anga hẽ wa lipulile ale nda Yehova waku kapako muẽle? Eci omunu umue a liyeva okuti ka kuete esilivilo, eye pamue o sima okuti, ka pondola oku kala ekamba Liululiki Wovina viosi. Ci tava okuti Soma Daviti wa li yevelevo ndoco. Eye wa komõha calua poku limbuka okuti Yehova wa kapako omanu. Kuenje eye wa pula hati: “A Yehova, omunu hẽ nye okuti u wivaluka, omõla womunu hẽ nye okuti o sakalala laye?” (Osa. 144:3) Pi o pondola oku sanga etambululo liepulilo eli?
8. Ndomo ca lekisiwa ku 1 Samuele 16:6, 7, 10-12, nye Yehova a pondola oku vanja komanu umue?
8 Embimbiliya li tu longisa okuti Yehova o lete omanu vana molẽha ndu okuti, ka va kuete esilivilo. Ndeci Yehova wa tumile Samuele oku enda toke konjo ya Jese loku waveka umue pokati komãla vaye, oco a ka kale osoma yo Isareli. Vepuluvi liaco Jese wa vilikiyapo epanduvali, pokati komãla ecelãla. Pole, eye ka kovongele Daviti, okuti kuasula. b Ndaño ndoco, Yehova wa nõla Daviti. (Tanga 1 Samuele 16:6, 7, 10-12.) Yehova wa kũlĩhĩle ciwa Daviti kuenda wa kũlĩhĩle ndomo a tuwa vutima okuti wa kala umalẽhe umue wa solele Yehova.
9. Momo lie wa kolelela okuti Yehova wa ku kapako? (Tavo ociluvialuvia.)
9 Sokolola ndomo Yehova a siata oku lekisa okuti wa ku kapako. Ndeci eye eca alungulo a likuata ciwa leci ove o sukila. (Osa. 32:8) Eci ci lekisa okuti Yehova wa ku kũlĩha ciwa kuenda wa kũlĩhavo eci o sukila. (Osa. 139:1) Eci o kapako alungulo a Yehova kuenda oku a limbuka okuti awa, o ka kuata ekolelo lialua liokuti, Yehova wa ku kapako. (1 Asa. 28:9; Ovil. 17:26, 27) Yehova wa kapako alikolisilo o linga oku u vumba. Eye wa kũlĩha ovituwa viove, omo liaco o yongola oku kala ocipepi love. (Yer. 17:10) Yehova o yongola okuti ove o kala ekamba liaye.—1 Yoa. 4:19.
“Nda o sanda, [Yehova], eye ecelela okuti ove u sanga.”—1 Asa. 28:9. (Tala ocinimbu 9) c
ANGA HẼ OLONJILA NDA NÕLELE KOSIMBU VIA SUNGULUKA?
10. Atatahãi api tu pondola oku kuata atiamẽla koku nõla olonjila vimue kosimbu?
10 Pamue, omunu umue o kuata atatahãi nda olonjila a nõlele kosimbu via velelepo. Ndeci, umue pamue wa siapo upange umue uwa, ale epuluvi lioku linga olomĩlu vimue viwa, oco a linge vali calua kupange wa Yehova. Pole, cilo kua pita ale otembo yalua, ale pamue anyamo alua. Omunu waco, pamue o luluvalela ku vana va nõla olonjila via litepa kuenje cilo va molẽha ndu okuti va kuete olombongo vialua kuenda ekalo liwa. Omo liaco, omunu waco pamue o kala latatahãi loku lipula ndoco: Alikolisilo nda linga kupange wa Yehova a kuata muẽle esilivilo? Anga hẽ da sukilile oku talavaya vali calua, oco ndi kuate olombongo vialua cilo?
11. Nye ca kala oku sakalaisa usonehi Wosamo 73?
11 Nda ove o kuete atatahãi ndava, sokolola ndomo usonehi Wosamo 73 a liyeva. Eye wa mola okuti omanu vana ka va vumbile Yehova, va molẽhele okuti va kala olohuasi, va kuata uhayele uwa, kuenda omuenyo umue ka u kuete asakalalo. (Osa. 73:3-5, 12) Ca kala ndu okuti omanu vaco va kala oku litunda ciwa kovina viosi. Ukualosamo poku mola ovina viaco, wa yeva esumuo, loku sima okuti alikolisilo a kala oku linga kupange wa Yehova, ka a kuatele esilivilo. Eye wa liyeva okuti wa “kuatele ovitangi eteke liosi.” (Osa. 73:13, 14) Nye eye a linga oco a yuvule ovisimĩlo ka via sungulukile?
12. Ndeci ca lekisiwa Kosamo 73:16-18, nye ca kuatisa Ukualosamo oku kuata ombembua?
12 Tanga Osamo 73:16-18. Ukualosamo wa enda toke vonembele ya Yehova. Vocitumãlo caco pokati kafendeli va Yehova, eye wa tẽla oku sokolola ciwa. Kuenje wa kuata elomboloko liokuti, ndaño omanu vaco va kuatele ekalo liomuenyo uwa, ovo ka va kuatele elavoko lio kovaso yoloneke. Eci ukualosamo a kuata elomboloko liaco, eye wa kuata ombembua kuenje wa limbuka okuti, oku pitisa Yehova kovaso oco ocina ca velapo. Kuenje wa nõlapo oku amamako oku vumba Yehova.—Osa. 73:23-28.
13. Nda ove o kuete atatahãi omo lionjila wa nõlele kosimbu, nye ci ka ku kuatisa oku kuata ombembua yovutima? (Talavo ociluvialuvia.)
13 Embimbiliya li pondola oku ku kuatisavo oku kuata ombembua. Ndamupi? Sokolola kovina viwa ove o kuete, oku kongelamo ukamba o kuete la Yehova. Ivaluka okuti, vana ka va sole Yehova, va kuete lika eci oluali lueca, ka kuli vali cikuavo. Omanu valua va velisapo lika eci ovo vakuete okuti, upange uwa kuenda omuenyo uwa. Pole, kokuove ca litepa. Momo cilo, wa siata oku tambula olombanjaile vialua ku Yehova kuenda kovaso yoloneke o ka kuata omuenyo ka u pui, loku tambula asumũlũho ka a sokisiwa. (Osa. 145:16) Handi vali sokololavo ndoco: O tẽla hẽ oku kũlĩha ciwa ndomo omuenyo wove nda wa kala cilo nda okuti wa nõlele onjila yikuavo? Pole, ocili ceci okuti: Omunu wosi o nõla onjila yimue omo liocisola a kuetele Suku kuenda vakuavo, ka kasi oku pumba lacimue, olonjanja viosi o ka kuata ovina a sukila oco a kuate esanju.
Sokolola kasumũlũho Yehova a likuminya oku ku ĩha kovaso yoloneke (Tala ocinimbu 13) d
ANGA HẼ CILO HANDI NDI KUETE ESILIVILO KU YEHOVA?
14. Atatahãi api vamue va kuete kuenda momo lie?
14 Omo lioku kuka, liuhayele utito, ale pamue liulema umue, afendeli vamue va Yehova pamue, ka va tẽla oku linga vali calua kupange wa Yehova ndeci va lingaile kosimbu. Vamue handi va kuata atatahãi nda Yehova wa kapako eci va siata oku linga. Ovo pamue va lipula ndoco: ‘Anga hẽ handi ndi kuete esilivilo ku Yehova?’
15. Ekolelo lipi usonehi Wosamo 71 a kuata?
15 Usonehi Wosamo 71 wa kuatavo esakalalo limuamue kuenje eye wa likutilila ku Yehova hati: “Ku ka ndi yanduluke eci ongusu yange yi tepuluka.” (Osa. 71:9, 18) Ndaño okuti ongusu yaye ya tepulukile, eye wamamako oku kolela okuti, nda wa pandikisa Yehova wa laikele oku u kuatisa kuenda oku u songuila. Vokuenda kuotembo wa lilongisa okuti, Yehova o sajuka calua eci afendeli vaye va likolisilako oku u vumba, ndaño okuti ka va ci lingi ndomo ovo va yonguile omo lioku hongua.—Osa. 37:23-25.
16. Nye vamanji va kuka va pondola oku lingila Yehova kuenda omanu vakuavo? (Osamo 92:12-15)
16 Nda ove wa kuka, ivaluka ndomo Yehova a liyeva eci a vanja kokuove. Ndaño okuti o kasi oku liyaka lehonguo limue, eye o pondola oku ku kuatisa oku amamako oku pama konepa yespiritu. (Tanga Osamo 92:12-15.) Omo liaco, ku ka tiamisile utima kovina ku tẽla oku linga, pole, tiamisila utima kueci o tẽla oku linga. Ndeci, ove o pondola oku kuatisa vakuene pocakati congangu yove kuenda poku lekisa onjongole yocili komanu vana o lisungue lavo. Ove o pondolavo oku vangula ndomo Yehova a ku kuatisa ale vokuenda kuanyamo alua kuenda kelavoko o kuete lio kovaso yoloneke. Handi vali, ku ka ivaleko okuti olohutililo viove vi pondola oku kuatisa vakuene. (1 Pet. 3:12) Ocili ceci okuti, vekalo liosi tu sangiwa, vosi yetu tu pondola oku eca cimue ku Yehova kuenda ku vakuetu.
17. Momo lie tu sukilila oku yuvula ocisimĩlo coku lisokisa la vakuetu?
17 Nda okuti ove wa sumua omo ku pondola oku linga vali calua kupange wa Yehova, kolela okuti, cosi ove o tẽla oku linga, ci kuete esilivilo ku Yehova. Ove pamue o kuata ocisimĩlo coku lisokisa la vakuene. Yuvula oku kuata ovisimĩlo viaco! Momo lie? Momo Yehova ka lingi ovina viaco. (Va Gal. 6:4) Ndeci, Maria wa eca ku Yesu ulela welemba liwa wa tĩla calua. (Yoa. 12:3-5) Pole, ocimbumba cimue osuke, ca kapa vonembele ovingangu vivali via kuata esilivilo litito. (Luka 21:1-4) Yesu ka sokisile akãi vaco vavali, pole, eye wa mola ovilinga viekolelo viakãi vaco. Cimuamue haico okuti, Yehova wa kapako ovina viosi o linga oco o lekise ekolelo kuenda ocisola cove, ndaño o sima okuti citito calua.
18. Nye ci ka tu kuatisa oku imũla atatahãi etu? (Talavo okakasia losapi hati, “ Ondaka ya Yehova yi Pondola Oku ku Kuatisa Oku Imũla Atatahãi.”)
18 Vosi yetu olonjanja vimue tua siata oku kuata atatahãi. Pole, ndomo tua ci konomuisa, ondaka yocili okuti, Embimbiliya yi pondola oku tu kuatisa oku imũla atatahãi. Omo liaco, tu sukila oku likolisilako oco tu sange atambululo atatahãi etu. Ka kuli atatahãi okuti Yehova oku lete kuenda wa ku kapako. Eye wa kapako alikosilo ove oku pitisa kovaso Usoma kuenda wa likapelako oku ku sumũlũisa. Omo liaco, kolela okuti ku Yehova afendeli vaye vosi vakuekolelo va sesamẽla ocisola caye kuenda eteyuilo.
OCISUNGO 111 Esunga Liesanju Lietu
a OLONDAKA VIA LOMBOLUIWA: Embimbiliya li lombolola atatahãi amue a situlula ekambo liekolelo ku Yehova kuenda kolohuminyo viaye. Pole, vocipama cilo, ka tu kasi oku lombolola catiamẽla katatahãi aco. Tu kasi oku konomuisa atatahãi a tu kokela oku lipula nda tu kuete muẽle esilivilo ku Yehova, ale nda tua nõla olonjila via sunguluka kosimbu.
b Embimbiliya ka li lombolola anyamo Daviti a kuata, eci Yehova o nõla, pole, citava okuti wa kala umalẽhe.—Tala Utala Wondavululi 1 Wenyenye Linene, wo 2011 kem. 29, oci. 2.
