Longisa Omãla Vove

Marko ka Liwekelepo

MARKO wa soneha limue pokati kalivulu akuãla Embimbiliya a lombolola ulandu wa Yesu. Elivulu liaye, litito hailio lia leluka oku li tanga. Helie wa kala Marko? O sima hẽ okuti eye wa kũlĩhile Yesu?​—⁠ * Tu konomuisi alambalalo Marko a liyaka lao, kuenda eci tu lilongisila kesunga lieci eye ka liwekelelepo oku kala Ukristão.

Eci Soma Herode Agripa a kapa upostolo Petulu vokayike, Marko eye wa tukuiwa tete Vembimbiliya. Eteke limue luteke eci ungelo a yovola Petulu vokayike, Petulu wa enda toke konjo ya Maria, ina ya Marko wa kala ko Yerusalãi. Eci Petulu a yovuiwa vokayike, pa pitile ale ekũi lianyamo noke liolofa via Yesu ko Paskoa ya 33 O.K.​—⁠Ovilinga 12:​1-5, 11-17.

Wa kũlĩha esunga lieci Petulu a endelele konjo ya ina ya Marko?​—⁠ Citava okuti eye wa kũlĩhĩle ciwa epata lia Marko kuenda konjo yaye oko olondonge via Yesu via enda oku liongoluila. Barnaba epalume lia Marko, wa kala ale ondonge okupisa Kocipito co Pendekoste ya 33 O.K. Embimbiliya li lekisa okuti Pocipito co Pendekoste, Barnaba wa ecele olombanjaile vioku kuatisa olondonge viokaliye. Citava okuti Yesu wa kũlĩhĩle Barnaba kuenda pahãyi yaye Maria kuenda omõlaye Marko.​—⁠Ovilinga 4:​36, 37; Va Kolosai 4:⁠10.

Vevanjeliu Marko a soneha, wa lekisa okuti vuteke Yesu a kuatiwa, pa kala ukuenje umue wa lisikilila ño “onanga.” Marko wa soneha okuti eci asualali va kuata Yesu, ukuenje waco wa tila. Helie wa kala ukuenje waco?​—⁠ Citava okuti Marko eye wa kala ukuenje waco! Eci Yesu kuenda ovapostolo vaye va tunda vuteke waco, Marko wa walele lika onanga kuenje wo kuama.​—⁠Marko 14:​51, 52.

Marko wa mola ovolandu awa atiamẽla kocipango ca Suku. Eci espiritu sandu lia lokila olondonge ko Pendekoste ya 33 O.K., eye opo a kala, kuenda wa kuata ukamba lafendeli va Suku, ndeci Petulu. Eye wa kuama epalume liaye Barnaba, una wa endele oku ka lekisa Saulu ku Petulu noke yanyamo  atatu tunde eci Saulu a mola Yesu vocinjonde. Noke yanyamo amue, Barnaba wa tumiwa ko Tarsu oku ka sandiliya Saulu.​—⁠Ovilinga 9:​1-15, 27; 11:​22-26; 12:25; Va Galatia 1:​18, 19.

Kunyamo wa 47 O.K., Barnaba kuenda Saulu va nõliwa kupange wumisionaliu. Ovo va ambatele Marko, pole weya oku litepa lavo kuenje wa tiukila ko Yerusalãi, ndaño ka tua kũlĩhĩle esunga lieci a tiukilile ko Yerusalãi. Saulu, una weya oku tukuiwa hati Paulu, wa kala lonyeño yalua. Eye wa pisa ocituwa Marko a lekisa.​—⁠Ovilinga 13:​1-3, 9, 13.

Eci Paulu la Barnaba va tiuka kupange wumisionaliu, va lombolola ovolandu awa. (Ovilinga 14:​24-​28) Noke yolosãi vimue, va sokiya oku ka nyula vana va tavele kueci va va kundila. Barnaba wa yonguile oku ambata Marko. Ove hẽ wa kũlĩha eci Paulu a linga?​—⁠ Paulu “ka tavele” oku ambata Marko, momo wa litepele ale lavo. Noke, Marko wa sumuile calua!

Onyeño ya Paulu ya wenguka, kuenje wa litepa la Barnaba. Barnaba wambata Marko oku ka kundila ko Kupro, kuenda Paulu wambata Siluano oku ka nyula olondonge viokaliye ndomo va ci sokiyile. Marko weya oku sumua calua omo liovitangi a kokela Paulu la Barnaba!​—⁠Ovilinga 15:​36-41.

Ka tua kũlĩhĩle eci Marko a tiukilila konjo. Pamue eye wa kuata esunga lioku ci linga. Barnaba wa kolelele okuti eci ka cika pita vali, momo Marko  ka liwekelepo! Noke eye wa endele kumue la Petulu kupange wumisionaliu ko Bavulono. Eli olio esunga lieci Petulu poku tuma ovilamo a popela hati: “Omõlange Marko.”​—⁠1 Petulu 5:⁠13.

Hukambakuowo wa kala pokati ka Petulu la Marko! Eci tu ci limbukila poku tanga Evanjeliu lia Marko. Marko wa pitiya ovolandu Petulu a mola. Ndocindekaise, sokisa ulandu wehunguhungu wa pita Kokalunga ko Galilea. Marko wa tukula apa Yesu a kala oku pekela vowato kuenda oku eye a kunamẽlele, pole ovina viaco, Petulu eye wa vi mola. Momo lie ka tu konomuisila etu muẽle ovolandu aco poku sokisa elivulu lia Mateo 8:24; Marko 4:​37, 38; kuenda Luka 8:⁠23?

Eci Paulu a kapiwa vokayike ko Roma, eye wa pandiya ekuatiso Marko a ecele kokuaye. (Va Kolosai 4:​10, 11) Onjanja yikuavo eci Paulu a kala vokayike, wa sonehela Timoteo oku nena Marko, poku popia hati: “O ñuatisa ca lua kupange wange.” (2 Timoteo 4:​11) Marko wa kuata asumũlũho alua omo ka liwekelepo oku vumba Suku!

[Atosi pombuelo yamẽla]

Apulilo:

○ Onjo ya Marko ya kala pi, kuenda momo lie o popela okuti eye wa kũlĩhĩle Yesu?

○ Helie wa kuatisa Marko?

○ Nye ca kokelele Marko oku liwekapo?

○ Tua kũlĩha ndati okuti Paulu wa sanjukilile Marko?

[Elitalatu kemẽla 31]

Umalẽhe u helie? Nye ci kasi oku pita laye, kuenda momo lie?

[Elitalatu kemẽla 32]

Asumũlũho api Marko a tambula omo lioku yuvula oku liwekapo?