O Pondola Oku Kuata Esanju Ndaño Lesumuo

HELIE ka la yeva esumuo? Ndaño muẽle Yehova Suku, Isietu wokilu wa siatavo oku yeva esumuo. Eye wa yovola va Isareli kupika kofeka Yegito kuenda wa va sumũluisa calua. Pole, Embimbiliya li popia hati: “Vo nyika nyika olonjanja [vialua], kuenje va valula U o kola wa Isareli.” (Osamo 78:​41) Ndaño loku nyikiwa, Yehova lopo eye ‘Suku yesanju’.​—⁠1 Timoteo 1:⁠11.

Ocili okuti, kuli ovina vialua vi koka esumuo. Tu yuvula ndati ovina vi koka esumuo? Kuenda nye tu lilongisila kongangu ya Yehova yoku yula esumuo?

Ovina vi Koka Esumuo

Ondaka ya Suku yi lekisa okuti “cosi ciya ño ci veta ño” komanu. (Ukundi 9:​11) Ovina vi koka esumuo ndeci, ungangala, ovovei, kuenda ovilunga, viya ño ocipikipiki. Embimbiliya li popiavo hati: “Elavoko liosimbu li tepuluisa utima.” (Olosapo 13:​12) Eci tu lavoka ocina cimue ciwa kuenje ci tẽlisiwa tu sanjuka calua, pole nda ka ci tẽlisiwa, tu sumua. Dunkan, * wa yonguile oku amamako lupange wumisionaliu, pole, noke yotembo yimue eye lukãi waye va tiukila konjo. Noke wa popia hati: “Kotembo yaco ca kala ndu okuti sia kuatele ocimãho. Sia yonguile oku linga upange umue. Momo kokuange ovina viosi ka via kuatele vali esilivilo.” Pamue tu kala otembo yalua lesumuo, ndeci ca pita la Clara. Eye wa popia hati: “Eci nda pulumula oñaña yange nda pita olosãi epanduvali lesumuo. Ndaño pa pita ale anyamo alua, eci ndi vanja omõla umue o sapela la inaye, ndi sima siti, ‘Nda sia pulumuile, omõlange cilo nda wa kula.’”

Tu yevavo esumuo lialua eci tu pita lovitangi vimue ndeci, oku li siapo lomunu tua kala oku namũlala laye, eci volohuela mu pita ovitangi, pamue oku tekula omõla wa huka, kuenda akamba vakualutukãi. Omo  okuti ka tua lipuile, kuenda tu kasi kotembo yimue ya tĩla, ka tu tẽla oku yuvula esumuo.

Oku lueya kuetu kua siatavo oku tu sumuisa. Olonjanja vimue tu sumua calua nda tu pia koloseteko vio kosikola, ka tu sangi upange, kuenda eci omunu tu yongola oku namũlala laye ka tava. Tu sumuavo nda ngandietu ka kasi oku kula konepa yespiritu. Maria wa popia hati: “Nda lavokaile okuti omõlange wukãi amamako konepa yespiritu. Nda simĩle okuti nda kala oku eca ongangu yiwa kokuaye. Pole eci a liwekapo oku vumba Yehova Suku loku siapo olonumbi viepata, nda li vetela evelo. Lacimue ca ponduile oku ndi lembeleka. Eci ca ndi sumuisile calua.”

Tu pondola oku yula ndati esumuo liaco? Oco o sange etambululo, kũlĩhĩsa ndomo Yehova a siata oku yula esumuo.

Luluvalela Kovina Viwa

Yehova Suku wa pongiyila omanu vatete ocitumãlo ciwa oco va kalemo, pole ovo vo sinila kuenda ka va lekisile olopandu. (Efetikilo, ocipama 2 kuenda 3) Omõlavo Kaini wa fetika oku kuata ovituwa vĩvi. Kaini omo lioku pembula olonumbi via Yehova wa ponda manjaye. (Efetikilo 4:​1-8) O tẽla hẽ oku sokolola esumuo Yehova a yeva?

Anga hẽ esumuo liaco lia tateka esanju lia Suku? Eye wa yonguile okuti kilu lieve ku tunga omanu va lipua kuenda vamamako oku tẽlisa ocipango caco. (Yoano 5:​17) Oco a tẽlise ocipango caco, eye wa sokiya ocilumba cocisembi kuenda Usoma waye. (Mateo 6:​9, 10; Va Roma 5:​18, 19) Yehova Suku ka luluvalele kocitangi, pole wa luluvalela konjila yoku ci potolola.

Ondaka ya Suku yi tu vetiya oku sokolola ovina viwa ndaño lovitangi vietu muẽle ale vievi vakuetu va tu kokela. Oyo yi popia hati: “Cosi cocili, cosi ca sumbiwa, cosi cesunga, cosi ca pua evĩho, cosi ca posoka, cosi ci sivayaiwa, nda kuli esunga, kuenda nda kuli eci ci sesamela oku sivayiwa, sokololi ovina evi.”​—⁠Va Filipoi 4:⁠8.

Tenda Ovina Viosi Lesanju

Ovina vi pita letu vi pondola oku pongolola ekalo liomuenyo wetu. Pamue tu tundisiwa kupange, ale tu litepa lohueli yetu, kuenda tu pumba ovikele tua kuatele. Citava okuti tu kuatiwa luvei umue, tu tundisiwa vonjo yetu, ale tu tepa ukamba wetu. Tu pandikisa ndati kovitangi viaco?

Vamue va limbuka okuti oku pitisa kovaso ovina via velapo ci kuatisa oku yuvula esumuo. Dunkan, wa tukuiwa kefetikilo, wa popia hati: “Eci ame lukãi wange tua limbuka okuti ka tu pondola oku tiukila vali kupange wumisionaliu, tua sumuile calua. Pole, tua li kapela ocimãho coku tata Mãi kuenda oku amamako kupange wotembo yosi. Eci tu pita locitangi cimue, tete tu sukila oku kũlĩhĩsa nda onjila tua nõla yika tateka ovimãho vietu ale sio. Kuenje tua kuatisiwa oku leluisa omuenyo wetu.”

Valua pokati ketu tu kuete ocituwa coku vokiya ocitangi eci tu liyaka lesumuo. Pamue alikolisilo etu oku tata omõla, oku sanda upange, ale oku kunda olondaka viwa kofeka yikuavo ka a kuata onima yiwa. Noke tu sima ndoco, ‘Ame si tẽla oku linga cimue.’ Oku lueya kua Adama la Eva kaku lomboloka okuti Suku ka lulikile ciwa ovina. Omo liaco, eci tu lueya, ka ci lomboloka okuti ka tu tẽla oku linga cimue.​—⁠Esinumuĩlo 32:​4, 5.

 Ca leluka oku kuata ocikumbiti eci vakuetu va tu lueyela. Yehova ka kuete ocituwa caco. Yehova wa sumuile calua eci Soma Daviti a linga ukahokolo lukãi umue loku pondisa ulume waye. Yehova wa limbuka okuti Daviti wa likekembela kuenda wa tava okuti eye amamako oku kala ufendeli waye. Eci ca pitavo la Soma Yehosafata. Eye wa lueyele poku linga ukamba lovanyali va Suku. Uprofeto wa Yehova wo sapuila hati: “Oco onyeño ya Yehova ya ku wengukilila. Haimo lumue kokuove kua sangiwa vimue viwa.” (2 Asapulo 19:​2, 3) Yehova ka tendele Yehosafata ndondingaĩvi omo liekandu liaco. Etu tu yuvulavo ocikumbiti eci akamba vetu va tu lueyela. Momo ndaño ovo va tu lueyela, va kuetevo ovituwa viwa.​—⁠Va Kolosai 3:⁠13.

Ocili okuti eci ka tu tẽla oku linga eci tu yongola, ale oku kuata eci tua lavokaile, tu sumua calua. Tu pondola oku sumua eci tu linga ekandu limue. Pole, nda tu likekembela kuenda tu linga ovina vikuavo via sunguluka, tu tẽla oku yula esumuo liaco. Soma Daviti eci a sumuile omo liekandu liaye, wa soneha  hati: “Etimba liange lia hongua, omo nda liyula ño-o eteke liosi. . . . Ongole yange sia yi limbikile. . . . kuenje [Yehova] wa njupa evĩho liekandu liange.” (Osamo 32:​3-5) Nda tua limbuka okuti tua lueyela Suku, tu sukila oku pinga ongecelo kuenda oku amamako oku pokola kolonumbi via Suku.​—⁠1 Yoano 2:​1, 2.

Li Pongiyila Oku Yula Esumuo

Ocili okuti, vosi yetu tuka liyaka lesumuo kovaso yoloneke. Oco hẽ, nye tu sukila oku linga oco tu yule esumuo liaco? Ukristão umue wa kuka ale o tukuiwa hati Bruno, noke yoku liyaka lesumuo lialua, wa popia hati: “Eci ca ñuatisa oku yula esumuo, oku linga ovina ndaenda oku linga ale kosimbu, okuti via enda oku ndi pamisa konepa yespiritu. Nda limbuka esunga lieci Suku a ecelela oluali lulo lũvi oku amamako. Vokuenda kuanyamo nda likolisilako oku pamisa ukamba wange la Yehova. Eci ci ndi sanjuisa calua. Eci ca ndi pamisa vali, oku kũlĩha ndomo Yehova a kala oku ndi kuatisa oku yula esumuo liaco.”

Osimbu tu lavoka oloneke viya, tu sukila oku kolela okuti: Ndaño akulueya etu lakulueya a vakuetu a tu kokela esumuo, Suku lalimue eteke aka tu sumuisa. Suku wa popia okuti onduko yaye, Yehova, yi lomboloka “ame muẽle ame.” (Etundilo 3:​14) Onduko yaco yi tu ĩha ekolelo liokuti eye oka tẽlisa olohuminyo viaye. Eye wa likuminya oku tẽlisa ocipango caye palo “posi ndeci ci lingiwa kilu,” vonduko Yusoma waye. Eli olio esunga lieci upostolo Paulu a sonehela hati: “Nda kolela okuti ndaño okufa, ndaño omuenyo, ndaño ovangelo, ndaño olombiali, . . . ndaño ociluvo cikuavo, lacimue ci tela oku tu tepa kocisola ca Suku ci kasi vu Kristu Yesu, Ñala yetu.”​—⁠Mateo 6:10; Va Roma 8:​38, 39.

Tu lavoka oku tẽlisiwa kuohuminyo Suku a linga vonduko yuprofeto Isaya eci a popia hati: “Ndulika ilu liokaliye kuenda ongongo yokaliye; ovina viale ka vi ivalukiwa, ka vi sokoluiwa.” (Isaya 65:​17) Tu kasi oku lavoka lekolelo lialua otembo voluali luosi ka muka kala vali esumuo!

[Etosi pombuelo yemẽla]

[Elitalatu kemẽla 13]

Eci tu lueya, ka ci lomboloka okuti ka tu tẽla oku linga cimue

[Elitalatu kemẽla 14]

Ondaka ya Suku yi tu vetiya oku luluvalela kovina tu tẽla oku linga, kovina ka tu tẽla hakoko

[Elitalatu kemẽla 15]

Suku ukuesanju, kuenda wa kũlĩha okuti ocipango caye cika tẽlisiwa, ndaño lakulueya kuomanu

[Elitalatu kemẽla 16]

Oku pitisa kovaso ovina viespiritu ci tu kuatisa oku liyaka lesumuo