Lekisa Esumbilo Kolonjali vi Tekula Omãla Likaliavo

KOLONEKE vilo, ka valuile va siata oku pesila otembo yavo longusu yavo koku tekula omãla likaliavo. Momo va liyaka lovitangi vialua. Ovo va sukilaoku tẽlise ovikele vioku tata omãla. Ndaño va talavaya kupange woku sanda eteku, pole, va sukila oku landa ovikulia pocitanda, oku teleka, oku sukula uwalo, kuenda oku pindisa omãla. Va sukilavo oku tata uhayele womãla, oku linga lavo ovitalukilo, kuenda oku sokiya otembo yoku sapela lavo pokolika.

Ndaño olonjali vi tekula omãla likaliavo via livokiya voluali luosi, pole, tu sukila oku lekisa esumbilo kokuavo. Onjali yimue yukãi ya popia hati: “Nda fetika lika oku kapako vana va tekula omãla likaliavo, eci nda fetikavo oku tekula omãla likaliange.” Nye o sukila oku linga oco o lekise esumbilo ku vana va kasi oku tekula omãla likaliavo? Anga hẽ, o sukila oku va kapako? Tu konomuisi atosi atatu a lekisa esunga lieci tu sukilila oku va kuatisa.

Esunga Lieci tu Sukilila Oku Lekisa Esumbilo

Olonjali vialua vi tekula omãla likaliavo, vi sukila ekuatiso. Ukãi umue ocimbumba o kuete 41 kanyamo, haeye o kasi oku tekula omãla vavali likaliaye wa popia hati: “Olonjanja vimue, nda siata oku kuata atatahãi lovina ndi yongola oku linga, kuenda ndi sakalala calua omo liovikele vialua ndi kuete.” Oku kala ocimbumba, kuenda ulika, ale ovitangi vikuavo, ca siata oku sumuisa olonjali vimue vi kasi oku tekula omãla likaliavo, ndeci onjali yimue yukãi ya popia hati: “Tu yongola okuti, ovitangi viosi vi tetuluiwa, kuenda ka vikalako vali!”

Ekuatiso eca li ku nenela esanju. Anga hẽ, eteke limue wa kuatisile omunu oku ambata ocitele cimue cilema? Nda wa ecele ekuatiso liove, wa kuata esanju poku kũlĩha okuti, wa eca ekuatiso li sukiliwa. Cimuamue haico ca siata oku pita la vana va kasi oku tekula omãla likaliavo. Momo olonjanja vimue ka ca lelukile oku ci linga. Nda wa eca kokuavo ovina va sukila, o limbuka esilivilo liolondaka Viosamo 41:1, li popia hati: “U ivaloka olohukũi wa sumũlũha. Yehova u popela veteke liohali.”

Suku o kuata esanju lialua. Elivulu lia Tiago 1:27, li popia hati: “Etavo liocili, hailio lia pua evĩho kovaso a Suku haeye Isia, lieli okuti, oku pasula ovimbumba lolosiwe kolohali viavo.” Voku ci linga, ka mua kongelele lika oku kuatisa ovimbumba vi kasi oku tekula omãla likaliavo. a Elivulu lia Va Heveru 13:16, li popia hati:  “Ko ka ivaliko oku lingainga ciwa, loku liavela pokati, momo Suku o sanjukila ovilumba ndevi.”

Noke yoku konomuisa atosi atatu atiamẽla koku kapako olonjali vi tekula omãla likaliavo, tu kũlĩhĩsi ovina tu sukila oku linga oco tu va kuatise. Kuenda tu konomuisi ndomo tu eca ekuatiso va sukila.

Limbuka Ekuatiso va Sukila

Omanu vamue va siata oku sima okuti, ca sunguluka oku pula onjali yi tekula omãla likaliaye ndoco: “Ekuatiso lipi ndi pondola oku eca?” Oku pula ndoco, pamue ka ci kuatisa omunu oku lombolola ekuatiso a sukila. Ndomo tua ci konomuisa, Osamo 41:1, yi tu vetiya oku “ivaluka olohukũi.” Elivulu limue li lombolola okuti, ondaka yo Heveru ya tukuiwa vocinimbu eci, yi lomboloka “oku sokolola lutate ondaka yimue yatatama okuti, nda ya tetuluiwa lutate, yeca onima yiwa.”

Oco o kuatise olonjali vi tekula omãla likaliavo, sokolola lutate ovina va sukila. Kũlĩhĩsa lutate ovitangi va liyaka lavio, oco o limbuke ekuatiso va sukila. Lipula ndoco: ‘Nda ame ndi kasi oku liyala locitangi caco, ekuatiso lipi ndi sukila oku tambula?’ Olonjali vialua, vi pondola oku ku sapuila olondaka via tukuiwa ndeti. Ndaño wa seteka oku vi kuatisa, pole, ku kuata elomboloko liovina vi sukila. O kuata lika elomboloko liaco, nda o kasi oku liyakavo lovitangi viaco. Nda wa lavulula lutate, ci ku kuatisa oku “ivaluka” olonjali vi tekula omãla likaliavo oco vi tambule ekuatiso vi sukila.

Kuama Ongangu Yalipua ya Suku

Yehova Suku eye lika wavelapo koku eca ekuatiso kolonjali vi tekula omãla likaliavo okuti, omanu vakuavo cisule. Ovinimbu vialua Viembimbiliya, vi lekisa ndomo Yehova Suku a siata oku kapako ovimbumba, olosiwe, kuenda olonjali vi tekula omãla likaliavo. Poku konomuisa ndomo Suku a siata oku kuatisa olohukũi, ci tu kuatisa oku limbuka ndomo tu eca ekuatiso va sukila. Omo liaco, tu konomuisi atosi akuãla a kuãimo.

Yevelela lutate

Vocihandeleko Yehova a ecele ku va Isareli, wa popia hati, o ‘yevelela lutate’ olohukũi vi sukila ekuatiso. (Etundilo 22:22, 23) O pondola ndati oku kuama ongangu yaco? Olonjali vi tekula omãla likaliavo, pamue vi liyaka locitangi coku kala ulika, momo ka vi kuete umue vi sapela laye. Onjali yimue yukãi yi tekula omãla likaliaye ya popia hati: “Olonjanja vimue eci omãla va ka pekela, ndi lila calua omo lioku kala ulika. Momo ka ca lelukile oku kala likaliange.” Citava hẽ okuti o linga eliangiliyo ‘lioku yevelela manji umue wa sumua’ o tekula omãla likaliaye okuti, o yongola oku lombolola ovisimĩlo viaye? Poku sapela la manji umue ukãi o tekula omãla likaliaye, yuvula oku enda likaliove. Nda wa ci linga, cu kuatisa oku liyaka lovitangi vioku tata omãla.

Popia olondaka vi lembeleka

Yehova wa tuma oku soneha olosamo vina va Isareli va enda oku imba kefendelo. Va Isareli ovimbumba kuenda omãla olosiwe va enda oku lembelekiwa poku imba ovisungo viaco. Momo via enda oku va ivaluisa okuti, Yehova eye “isia,” haeye “onganji” yavo, kuenda o pondola oku va lembeleka. (Osamo 68:5; 146:9) Tu pondolavo oku lembeleka onjali yi tekula omãla likaliaye poku sapela layo olondaka vina okuti, o ka vi ivaluka voku enda kuanyamo alua. Ndaño papita ale 20 kanyamo, Ruth ivaluka olondaka vionjali yimue yulume wo sapuila hati: “Ove o kasi oku linga upange umue uwa poku tata ciwa omãla vove vavali. Amamako oku ci linga.” Ruth wa popia hati: “Oku yevelela olondaka viaco, ca ndi kuatisa calua.” Ocili okuti, ‘olondaka viwa ovio uti womuenyo,’ kuenda vi kuatisa calua onjali yi tekula omãla likaliaye. (Olosapo 15:4) Anga hẽ, o pondola oku eca epandiyo konjali yimue yi tekula omãla likaliaye?

Eca ekuatiso li sukiliwa

Vocihandeleko Yehova a ecele ku va Isareli, mua kongelele eliangiliyo lioku kuatisa  ovimbumba kuenda omãla olosiwe, oco va kuate okulia va sukila. Eliangiliyo liaco, lia enda oku kuatisa olohukũi okuti, ‘vilia kuenda vikuta.’ (Esinumuĩlo 24:19-21; 26:12, 13) Tu pondolavo oku eca ekuatiso kolonjali vi tekula omãla likaliavo, pole, tu sukila oku ci linga lesumbilo. Anga hẽ, o pondola oku landa ovikulia oco o vi tuale konjo yavo? O kuete hẽ, uwalo umue okuti, o pondola oku weca konjali yi tekula omãla likaliaye, ale komãla olosiwe? O pondola hẽ oku eca olombongo vimue konjali yaco oco yi lande ovina vi sukiliwa?

Sokiya otembo yoku kala lavo

Yehova wa yonguile okuti, ovimbumba kuenda omãla olosiwe va kongeliwa vocipito ca enda oku lingiwa onjanja yimosi vunyamo, oco va kuate ukamba la va Isareli. Kuenje, wa va sapuila hati: ‘U sukila oku sanjuka.’ (Esinumuĩlo 16:10-15) Koloneke vilo, Akristão va vetiyiwavo ‘oku poka vakuavo’ poku va laleka oco va lingile kumosi ovitalukilo vi nena esanju. (1 Petulu 4:9) Momo lie ku lalekela onjali yimue yi tekula omãla likaliaye oco ulile kumosi konjo yove? Ka ci sukila oku pongiya ovina vialua. Eci Yesu a endele konjo yakamba vaye, wa tukula lika ‘ovina vimue vi sukiliwa.’—Luka 10:42.

Esumbilo Liove li ka Soliwa Calua

Ukãi umue o tukuiwa hati, Kathleen, okuti wa tekula omãla vatatu likaliaye, wa popia hati, ka ivalako elungulo lia popia hati: “Ku ka pembule ombanjaile va ku avela, pole, sanjukila ovina viosi.” Olonjali vialua vi tekula omãla likaliavo, via limbuka ocikele vi kuete coku tata omãla ndeci Kathleen a linga. Ovio ka vi kevelela okuti, vakuavo va va lingila ovina ovo va tẽla oku linga. Pole, vi sanjukila ekuatiso liosi vi tambula. Omo liaco, o pondola oku linga ovina vi va kuatisa okuti, vi ku nenelavo esanju poku kapako olonjali vina vi tekula omãla likaliavo. Nda wa ci linga, Yehova Suku ‘o ka ku ĩha onima omo liovina viwa wa lingila vakuene.’—Olosapo 19:17.

[Atosi pombuelo yamẽla]

[Elitalatu kemẽla 23]

Otembo yipi wa lisula oku laleka onjali yimue yi tekula omãla likaliaye oco valie konjo yove? Momo lie ku va lalekela vali?