Lembeleka Omanu Va Sumua, Ndeci Yesu a Linga

LASARU wa kala ko Betania, kuenje wa vela calua. Vamanjaye Maria la Marta, va tuma omunga kekamba liavo Yesu. Pole, noke Lasaru wa fa. Eci Yesu a pitila peyambo, wa sanga akamba kumue lomanu vana va lisunguile laye, veya oku nyula Marta la Maria kuenda oku va ‘lembeleka.’ (Yoano 11:19) Eci Yesu a pitila ko Betania, wa nyula akamba vaye. Poku kũlĩhĩsa ovina Yesu a popia levi a linga, ci tu kuatisa oku lilongisa ndomo tu lembeleka vana va sumua.

Eci o Nyula Umue wa Sumua ci Lekisa Okuti wo Kapako

Oco Yesu a pitile ko Betania, wa sukilile oku linga ungende woloneke vivali loku yoka Olui Yordão, kuenda oku lamana olomunda poku tunda ko Yeriko. Noke, Marta wa endele oku ñualehela la Yesu eci a kala ocipepi limbo. Eci Maria a yeva okuti Yesu wa pitila, wa endelevo oku ka ñualehela laye. (Yoano 10:40-42; 11:6, 17-20, 28, 29) Oku iya kua Yesu, kua lembeleka calua vamanji ya Lasaru va sumuile.

 Koloneke vilo, tu pondolavo oku lembeleka vana va sumua. Ulume umue o tukuiwa hati Scott lukãi waye Lydia, eci va fisa omõla wavo wa tusuiwa lekãlu o tukuiwa hati Theo, o kuete anyamo epandu, va popia hati: “Tua sukilile ekuatiso liepata kuenda liakamba. Ovo va tu sanga kosipitali vokati kuteke.” Nye akamba vaco va popia? Olohueli viaco via amisako hati: “Ka tua sukilile olondaka, pole, oku iya kuavo kosipitali, kua tu lembeleka calua.”

Embimbiliya li lekisa okuti, eci Yesu a mola omanu va kala oku lila omo lia Lasaru wa fa, eye ‘wa yeva esumuo lialua,’ kuenje ‘wa lilavo.’ (Yoano 11:33-35, 38) Yesu wa kũlĩhĩle okuti, ca sunguluka oku lila kovaso yomanu. Eye wa limbukile esumuo liavo, kuenje, wa lekisavo esumuo. Ulandu owu u tu longisa nye? Eci tu nyula omanu va sumua, ka tu ka kuati atatahãi loku sokolola nda tu lila la vana va lila, ale sio. (Va Roma 12:15) Handi vali, tu yuvuli oku linga ovina vi vetiya omunu wa sumua oco alile. Vamue va siata oku lilila pokolika.

Yevelela Locikembe

Ndaño Yesu wa kuatele olondaka vioku lembeleka Marta la Maria, pole wa ecelela okuti ovo va vangula tete. (Yoano 11:20, 21, 32) Eci a sapela la Marta, wa linga epulilo, kuenje wa yevelela lutate.—Yoano 11:25-27.

Oku yevelela lutate, ci lekisa okuti tua kapako vakuetu. Tu sukila oku yevelela lutate vana va sumua, oco tu va lembeleke. Tu pondola oku kala vakuakuyevelela lutate, poku linga apulilo a vetiya una wa sumua oco a situlule ovisimĩlo viaye. Ku ka kisike oku vangula la vana va sumua, nda ka va yongola oku sapela. Citava okuti va kava, kuenda va sukila oku puyuka.

Omanu vana va sumua pamue va yeva ehonguo, kuenje poku sapela lavo va pitolola ovina vimuamue. Vamue va situlula ovisimĩlo viavo. Maria la Marta va sapuila Yesu hati: “A Ñala, nda wa kaile kulo, nda mume [wetu] ka file.” (Yoano 11:21, 32) Nye Yesu a linga? Eye wa va yevelela lepandi, kuenda lohenda. Kuenje, wa yuvula oku va pula catiamẽla kesumuo liavo. Momo wa kũlĩhĩle okuti, esumuo liaco li pondola oku li vokiya.

Nda kua kũlĩhĩle ovina o yongola oku popia poku nyula umue wa sumua, o pondola oku fetika ombangula poku pula ndoco: “O yongola hẽ oku sapela catiamẽla kondaka yaco?” Noke, yevelela lutate etambululo, kuenda kapako ovina va kasi oku ku lomboluila. Luluvala kocipala caye, kuenda kuata elomboloko liovisimĩlo viaye.

Ka ca lelukile oku kuata elomboloko liovisimĩlo viomunu wa sumua. Ukãi umue o tukuiwa hati Lydia, wa popia hati: “Ovisimĩlo vietu via pongoloka. Olonjanja vimue ka tu kũlĩha ndomo tu pondola oku kuatisiwa, pole tu lilila kumosi lomanu veya oku tu pasuisa. Tu yongola okuti, vakuetu va kuata ovisimĩlo via sunguluka. Akamba vetu va likolisilako oku kuata elomboloko liesumuo lietu.”

Yesu wa eca ekuatiso liaye lonjila yimue yalipua. Momo wa kũlĩhĩle okuti, omunu lomunu, o kuete ‘ovitangi viaye, kuenda esumuo.’ (2 Asapulo 6:29) Yesu wa eca atambululo a litepa poku lama Marta la Maria. Osimbu Marta a kala oku vangula, Yesu wo yevelela lutate. Omo okuti Maria wa kala oku lila, Yesu ka vanguile laye otembo yalua. (Yoano 11:20-28, 32-35)  Nye tu lilongisa kulandu waye? Ca sunguluka oku ecelela okuti, omunu wa fisa ngandiaye, eye o fetika ombangulo. Onjongole yove yoku va yevelela lutate osimbu va situlula ovina vayevite vutima yi pondola oku va lembeleka.

Olondaka vi Lembeleka

Eci Maria la Marta va sapuila Yesu hati: “Nda wa kaile kulo,” eye ka va vetelele evelo, ale oku va pisa omo liolondaka viavo. Pole, wa lembeleka Marta loku u sapuila hati: “Mume wove o [ka] pinduka.” (Yoano 11:23) Lolondaka evi, Yesu wa kuatisa Marta oku ivaluka okuti, kuli elavoko liepinduko.

Poku sapela la vana va sumua ivaluka okuti, olondaka viwa o va sapuila ndaño ka vialuile, vi pondola oku va lembeleka. Olondaka vielembeleko citava oku vi popia, ale oku vi soneha. Ocili okuti ovikanda citava oku vi tanga olonjanja vialua, momo vi pondola oku eca elembeleko vokuenda kuotembo yalua. Noke liolosãi ecea tunde eci Kath a fisa ulume waye Bob, eye wa pitulula oku tanga ovikanda a tambuile. Omo liaco, wa popia hati: “Ovikanda viaco via ndi kuatisa olonjanja vialua, kuenda via ndi lembeleka calua.”

Olondaka vipi o pondola oku soneha vukanda woku lembeleka umue wa fisa ukuepata liaye? O pondola oku soneha catiamẽla komunu wa fa, ulandu umue weca elembeleko kokuaye, ale oku tukula ovituwa viwa viomunu wa fa. Kath wa popia hati: “Olondaka viwa viatiamẽla kulume wange Bob lovituwa viaye viwa, vi ndi vetiya oku yola kuenda oku lila vepuluvi limuamue. Olondaka viovinjembe viatiamẽla kokuaye, via ndi vetiya calua, kuenda vi ndi kuatisa oku ivaluka esanju tua kuata eci a kala komuenyo. Ovikanda vialua ndi kuete, mu sangiwa ovinimbu Viembimbiliya.”

Eca Ekuatiso li Sukiliwa

Oco Yesu a kuatise epata lia Lasaru, wa linga ovina okuti, etu ka tu tẽla oku vi linga. Momo wa pindula Lasaru. (Yoano 11:43, 44) Pole, tu pondola oku eca ekuatiso kovina vimue ndeci: Oku teleka okulia, oku yekisa akombe veya konambi, oku sukula uwalo, oku tata omãla, oku landa ovikulia pocitanda, ale oku eca ekuatiso locendelo cetu. Oku linga ovina viaco locisola, ci lembeleka omunu wa fisa ngandiaye.

Omanu vana va fisa ngandiavo, pamue va sukila otembo yoku kala likaliavo. Pole, o sukila oku sokiya otembo yoku va pasuisa. Ukãi umue wa fisa ngandiaye wa popia hati: “Nda umue wa fisa ngandiaye, o pita otembo yalua lesumuo.” Omanu vamue poku nyula una wa fisa ohueli yaye, va siata oku va ivaluisa eteke liolohuela viavo, ale eteke liolofa. Nda wa sokiya oku va nyula, o linga ekamba liwa kotembo yovitangi.—Olosapo 17:17.

Volondaka vielembeleko Yesu a sapela lolondonge viaye, wa kongelamo olondaka vielavoko a va sapuila hati: “Ukuetu Lasaru wa pekela, puãi ngenda ho pasula kotulo.” (Yoano 11:11) Yesu wa sapuila olondonge viaye hati, omanu va fa va ka pinduka. Noke, wa pula Marta hati: “Eci hẽ, o ci kolela? Eye wa tambulula hati: “A Ñala, nda [ci] kolela.”—Yoano 11:24-27.

Ove hẽ, o tava okuti Yesu o ka pindula omanu va fa? Nda o tava, sapela ovina viaco la vana va fisa va ngandiavo. Eca ekuatiso va sukila. Omo liaco, ovina viosi o linga oco o va kuatise, vi pondola oku va lembeleka.—1 Yoano 3:18.

[Omapa kemẽla 18]

(Tala velivulu omapa yaco)

KO SAMARIA

KO PEREA

Ko Yeriko

Ko Yerusalãi

Ko Betania

Olui Yordão

Okalunga Komongua