Ceci Tu Lilongisa Ku Yesu

Ndomo Ovangelo va tu Kuatisa

Yesu wa kala kilu la Isiaye “osimbu oluali ka lua lulikiwile.” (Yoano 17:5) Omo liaco, eye o kuete epondolo lioku tambulula apulilo akuaimo.

Anga hẽ ovangelo va tu kapako?

▪ Lekuatiso lia Yesu, tu lilongisa okuti, ovangelo va kapako omanu. Eye wa popia hati: “Pokati kovangelo va Suku pa kala onjolela eci [umue ukuakandu] a likekembela akandu aye.” (Luka 15:10)

Yesu wa lekisa okuti, ovangelo va kuete ocikele coku kuatisa afendeli va Suku, oco va amameko oku pamisa ukamba wavo laye. Eci a lungula olondonge viaye catiamẽla koku kapela vakuetu ocilondokua, wa popia hati: “Kali lutate okuti ka vu sepuisa [umue pokati] kava vatito, momo mopia lene siti, Kilu ovangelo vavo va vanja ño-o hũ kocipala ca Tate o kasi kilu.” (Mateo 18:10) Olondaka evi via Yesu, ka vi lomboloka okuti, omunu lomunu pokati kolondonge viaye o kuete ungelo umue ulava. Pole, Yesu wa lekisa okuti, ovangelo vosi va talavaya kumosi la Suku, va kuete ocikele coku kuatisa Akristão va sangiwa vekongelo.

 Eliapu li tu Yonja ndati?

▪ Yesu wa lungula hati, Satana o yongola oku tateka omanu oco ka va ka lilongise ocili catiamẽla ku Suku.Eye wa popia hati: “Nda umue o yeva ondaka yusoma kuenje ka [yu lomboloka], . . . Eliapu liya ha liu nyeha eci ca kũliwa vutima waye.”—Mateo 13:19.

Yesu wa situlula onjila Satana a siata oku kuama oco a yapuise omanu, poku ta olusapo luatiamẽla kulume wa kũla ombuto vepia liaye. Ulume wa kũla ombuto, o lomboloka Yesu, ombuto yiwa ya kuliwa, yi lombloka Akristão olombuavekua va ka viala kumue la Yesu kilu. Pole, Yesu wa popia hati, eci unyãli eya, “wa imba ombuto yosoka votiliku.” Osoka yaco, yi lomboloka Akristão vesanda. Pole, “Unyali wa imbamo osoka, Eliapu.” (Mateo 13:25, 39) Omo okuti ombuto ya kũliwa yi sokisiwa Lakristão, oyo yi lomboloka afendeli vocili. Atavo esanda a siata oku longisa ovina vi vetiya omanu oku tomba olonumbi via Suku. Lekuatiso liatavo aco, Satana wa siata oku vetiya omanu oco va tepe ukamba wavo la Yehova.

Nye tu sukila oku linga oco ka tu ka yapuisiwe la Satana?

▪ Yesu wa popia hati, Satana eye “ombiali yoluali.” (Yoano 14:30) Vohutililo Yesu a linga ku Suku, wa lombolola ndomo tu pondola oku li teyuila ku Satana. Poku likutilila ku Isiaye catiamẽla kolondonge viaye, wa popia hati: “Va teyuila kevĩho. Ovo havakualualiko ndeci ame siukualualiko. Va kolisila vocili cove, ondaka yove oyo ocili.” (Yoano 17:15-17) Ukũlĩhĩso Wondaka ya Suku, u pondola oku tu teyuila oco ka tu ka yapuisiwe loluali lua vialiwa la Satana.

Ovangelo va tu kuatisa ndati koloneke vilo?

▪ Yesu wa popia hati: “Kesulilo lioluali, ovangelo va [ka] tunda kuenje va [ka] tepa vakuevĩho la vakuesunga.” (Mateo 13:49) Cilo tu kasi ‘kesulilo lioluali,’ kuenje, omanu valua va kasi oku tava kolondaka viwa Viusoma wa Suku.—Mateo 24:3, 14.

Pole, havosiko va lilongisa Ondaka ya Suku va taviwa laye. Ovangelo va kasi oku songuila upange wafendeli va Yehova, kuenje, omanu vana va sole Suku, va kasi oku tepiwa la vana ka va yongola oku pokola kovina va lilongisa. Yesu poku lombolola catiamẽla ku vana va ka taviwa la Suku wa popia hati: “Ava [ovo] okuti, eci va yeva ondaka va yi seleka vovitima vie lipua haivio via sunguluka, kuenje va pandikisa loku ima apako.”—Luka 8:15.

[Elitalatu kemẽla 17]

Oco o kuate elomboloko lia suapo liatiamẽla kondaka yaco, tala elivulu lia sandekiwa Lolombangi Via Yehova losapi hati:

[Elitalatu kemẽla 17]

EMBIMBILIYA LI Longisa NYE?

[Elitalatu kemẽla 16]

Ovangelo va kuete ocikele coku kongela vakuavitima via sunguluka, oco veye vocisoko ca Yehova