Anga hẽ Suku o Yevelela Kuenda o Tambulula

7 Olohutililo?

EPULILO eli, lia siata oku vetiya omanu valua oku sokolola ondaka yaco. Embimbiliya li lekisa okuti, Yehova wa siata oku yevelela olohutililo loku vi tambulula. Ovituwa vietu ovio vi eca uvangi nda Suku o yevelela olohutililo vietu, ale ka vi yevelela.

Yesu wa pisa asongui vakuetavo vo koloneke viaye, omo lioku likutilila lombambe. Ovo va enda oku lilekisa ndu okuti efendelo liavo olio lika liavelapo. Eye wa popia hati, asongui vaco va ‘tambula ale onima yavo’ yoku muiwa lomanu. Pole, ka va tambuile onima va sukilile yoku muiwa la Suku. (Mateo 6:5)Koloneke vilo, omanu vamue poku likutilila va siatavo oku pitisa kovaso olonjongole viavo okuti via Suku ci sule. Omo okuti ka va kapeleko olonumbi Viembimbiliya tua konomuisa ndeti, Suku ka siatele oku yevelela olohutililo viavo.

Nye ci popiwa catiamẽla kokuove? Anga hẽ, Suku wa siatavo oku yevelela olohutililo viove loku vi tambulula? Etambululo liaco, ka lia tiamẽlele kekova liove, ofeka wa citiwila, ale kekalo liomuenyo wove. Momo Embimbiliya li tu sapuila okuti: “Suku ka kuete ocame, puãi, volofeka viosi, wosi u sumbila loku linga esunga, u sungulukila.” (Ovilinga 10:34, 35) Anga hẽ, olondaka evi vi tiamisiwilavo kokuove? Nda wa pokola ku Suku, o lekisa esumbilo kokuaye, kuenda ku lingi ovina viu sumuisa. Nda wa linga ovina via sunguluka, o likolisilako oku linga ovina Suku a tenda okuti via sunguluka. Kuenje, o linga ocipango ca Suku okuti cove muẽle ale comanu hacoko. Ove hẽ, o yongola okuti, Suku o yevelela olohutililo viove? Embimbiliya li pondola oku ku kuatisa oku ci linga. a

Omanu valua, va yongola okuti, Suku o tambulula olohutililo viavo locikomo. Tunde kosimbu, Suku hacoko a enda oku linga. Olonjanja vimue, noke yoku linga ocikomo cimue, kua enda oku pita otembo yalua oco ku lingiwe cikuavo. Embimbiliya li lekisa okuti, oku linga ovikomo kua sulila noke yolofa viovapostolo. (1 Va Korindo 13:8-10) Anga hẽ, eci ci lekisa okuti, Suku ka tambulula olohutililo vietu koloneke vilo? Sio, hacoko! Tu konomuisi ovolandu amue a lekisa olohutililo vi tambuluiwa la Suku.

Suku eca olondunge. Yehova eye Ono yolondunge viavelapo. Olondunge viaco o vi eca ocali komanu vana va pokola kolonumbi viaye, kuenda ku vana va likolisilako oku vi kuama.—Tiago 1:5.

Suku eca espiritu sandu liaye. Espiritu sandu, ongusu ya pama ya Suku. Ka kuli ongusu yikuavo yi sokisiwa lespiritu sandu. Olio, li pondola oku tu kuatisa oku pandikisa kovitangi. Li tu kuatisavo oku kuata ombembua poku liyaka lasakalalo akuavo. Handi vali, li tu kuatisa oku lekisa ovituwa viwa. (Va Galatia 5:22, 23) Yesu wa sapuila olondonge viaye hati, Suku eca espiritu liaye komanu vana vo pinga.—Luka 11:13.

Suku olongisa vana vo sanda lutima wosi. (Ovilinga 17:26, 27) Voluali luosi, mu sangiwa omanu vakuavitima via sunguluka va siata oku sandiliya ocili. Ovo va yongola oku kũlĩha ovina viatiamẽla ku Suku ndeci: Onduko yaye, ocipango caye catiamẽla koluali, komanu, kuenda ndomo va pondola oku kuata ukamba laye. (Tiago 4:8) Olonjanja vimue, eci Olombangi Via Yehova vi sanga omanu va kuete onjongole, via siata oku lekisa kokuavo eci Embimbiliya li popia catiamẽla katosi a tukuiwa ndeti.

Anga hẽ, eli olio esunga lieci wa tambuila orevista eyi? Ove hẽ, o yongola oku kũlĩha Suku? Citava okuti eli olio etambululo lia Suku kolohutililo viove.

[Atosi pombuelo yamẽla]