6 Ohutililo

Yi tu kuatisa?

ANGA HẼ, ohutililo yi tu kuatisa muẽle? Embimbiliya li lekisa okuti, olohutililo viafendeli va Suku vakuekolelo, vi tu kuatisa. (Luka 22:40; Tiago 5:13) Oku likutilila ci tu kuatisa konepa yespiritu, kuenda ketimba. Ndamupi?

Tu konomuisi ndeci okuti, o kuete omõla wa tambula ombanjaile yimue. Anga hẽ, u longisa lika oku sanjukila ombanjaile yaco? Ale u longisavo oku eca olopandu? Nda tua situlula ovisimĩlo vietu volondaka, tu tiamisila utima kovisimĩlo viaco, kuenda ci kuatisa omõla. Anga hẽ, cimuamue haico ci pita letu eci tu vangula la Suku? Oco muẽle! Tu konomuisi ovolandu amue.

Olohutililo vioku eca olopandu. Poku eca olopandu ku Isietu omo liovina viwa tua siata oku tambula kokuaye, tu sokolola lika asumũlũho a siata oku tu ĩha. Omo liaco, esanju tu kuete li tu vetiya oku eca olopandu, kuenda tu kuata ovisimĩlo via sunguluka.—Va Filipoi 4:6.

Ulandu: Yesu wa lekisa olopandu ku Isiaye, momo wa yevelela olohutililo viaye, kuenda wa vi tambulula.—Yoano 11:41.

Olohutililo vioku pinga ongecelo. Eci tu pinga ongecelo ku Suku, tu pamisiwa, tu lekisa onjongole yoku likekembela, kuenda tu limbuka ekandu tua linga. Nda tua ci linga, tu yeva ekavuluko.

Ulandu: Daviti wa likutilila oco a lekise oku likekembela kuaye, omo liesumuo liekandu a linga.—Osamo 51.

Olohutililo vioku pinga ekuatiso kuenda olondunge. Oku pinga ekuatiso ku Yehova ale olondunge oco tu nõle ciwa ovina tu yongola oku linga, ci tu kuatisa oku kala ambombe. Ci tu kuatisavo oku limbuka ahonguo etu, kuenda oku kolela ku Isietu wokilu.—Olosapo 3:5, 6.

Ulandu: Salomone wa lekisa umbombe poku pinga ekuatiso kuenda olondunge poku viala va Isareli.—1 Olosoma 3:5-12.

Olohutililo vioku liyaka lovitangi. Nda tua situluila ku Suku ovina vi kasi vutima wetu poku liyaka lovitangi, tu yeva ekavuluko, kuenda tu kolela ku Yehova okuti kokuetu cisule.—Osamo 62:8.

Ulandu: Soma Asa wa likutilila poku liyaka lunyali waye.—2 Asapulo 14:11.

Oku likutililako vakuetu oco va kuate ekalo liwa. Olohutililo viaco, vi tu kuatisa oku yuvula ocipululu, kuenje, tu lekisa ohenda loku kapako vakuetu.

Ulandu: Yesu wa likutililako olondonge viaye.—Yoano 17:9-17.

Olohutililo viesivayo. Eci tu eca esivayo ku Yehova omo liovopange aye a komohisa, kuenda ovituwa viaye viwa, esumbilo lietu kokuaye, kuenda kovina a lulika li livokiya. Olohutililo viaco, vi tu kuatisavo oku vokiya ukamba wetu la Suku yetu haeye Isia.

Ulandu: Daviti wa eca esivayo ku Suku omo liovina a lulika.—Osamo 8.

Esumũlũho likuavo li tunda koku likutilila, “ombembua ya Suku, yina ya piãla olondunge viosi.” (Va Filipoi 4:7) Ka ca lelukile oku kuata ombembua voluali lulo lue yuka ovitangi. Ombembua yaco, yi tu kuatisa oku kuata uhayele. (Olosapo 14:30) Anga hẽ, ombembua tu kuete yi tunda kelikolisilo lietu? Ale mua kongela ovina vikuavo vi kuete esilivilo lia velapo?

[Etosi Liavelapo kemẽla 10]

Olohutililo vi nena onima yiwa ndeci: Ekalo liwa ketimba, ovisimĩlo via sunguluka, kuenda ekalo liwa kespiritu