Embimbiliya li Pisa hẽ oku Imba Ocela Cosande?

KOLONEKE vilo, olofilme kuenda o Televisãu, via siata oku lekisa omanu va imba ocela cosande, volonjo vioku lingila ovitalukilo. Vakuakutala olomapalo viaco vo televisãu, va sima okuti ovina viaco, vioku luvikiya ño, ale viesanda.

Oku imba ototolotu, ombatota kuenda oku yekela ovikuata, ca siata oku vetiya omanu valua oku imba ocela cosande. Elivulu Jogatina na Internet, li popia ndoco: “Ocituwa coku imba ocela cosande, ca lisanduila kolonepa viosi nduvei umue u sambuka.” Kaliye omapalo yoku imba ovikanda, ya siata oku lekisiwa calua vo Televisãu kuenda vo Internet. Ndomo ca lekisiwa vukanda umue wasapulo kofeka yo Estados Unidos, etendelo liomanu va litumbika komapalo yaco vokuenda kuolosãi 18 via sulako, lia li vokiya calua.

Oku imba ocela cosande ci lomboloka, oku lavoka oku nganyala olombongo vina omunu ka talavayele. Omanu valua va sima okuti nda umue ukuakuimba o tambula olombongo, pole ka kuata ocinja, kacĩviko oku imba ocela cosande. Toke muẽle velivulu Nova Enciclopédia Católica, mua sonehiwa okuti, oku imba ocela cosande, “hekanduko, te lika nda oku ci linga ci tateka omunu oku tẽlisa ovikele viaye.” Pole, ka kuli Ocisonehua lacimue citava kocisimĩlo eci. Oco hẽ, Ukristão o tenda ndati ondaka eyi? Embimbiliya li pisa hẽ oku imba ocela cosande, ale sio?

Ocili okuti Ovisonehua vi Kola ka vi tukula ondaka ya suapo yatiamẽla ko jogatina, ale oku imba ocela cosande. Pole, eci ka ci lomboloka okuti ka mu sangiwa olonumbi viatiamẽla kondaka yaco. Embimbiliya ka li tumbika olonumbi viatiamẽla kovina viosi viomuenyo, pole li tu lungula hati, “limbuki ocipango ca [Yehova].” (Va Efeso 5:17) Onoño E. W. Bullinger, wa lombolola okuti, kelimi lio Helasi ondaka ya tukuiwa palo okuti, “limbuki,” yi lomboloka oku kongela pamosi olondaka poku “kapa vutima ocisimĩlo cimue, oku kuata ukũlĩhĩso poku sokolola lutate ondaka yimue.” Ukristão o pondola oku sokolola ocipango ca Suku poku tokekisa ovisimĩlo viaye lolonumbi Viembimbiliya viatiamẽla koku imba ocela cosande. Poku tanga ovisonehua via tukuiwa vocipama cilo, lipula ndoco: ‘Oku imba ocela cosande ci li kuata hẽ locisonehua eci? Nye Ondaka ya Suku yi popia catiamẽla komapalo yaco?’

Yula Eyonjo Lioku Imba Ocela Cosande

Voku linga omapalo yoku nganyala olombongo, mua kongela oku tava okuti kuli ongusu yimue ka yi letiwe yeca osande komunu una o yula omapalo. Ndeci, omanu valua  osimbu ka va nõlele ovikanda vioku linga omapalo yaco, va tukula upopi wovihilahila, ndeci, mah-jongg, kuenda va pepelela kovikanda viaco. Momo lie va ci lingila? Ovo va sima okuti oku ci linga, ceca osoloti komunu.

Omunu o lingainga ocela cosande pi a kapa ekolelo liaye? Kosimbu, va Isareli va kuatele ocisimĩlo cokuti oku imba ocela caco, ci nena osoloti. Yehova Suku wa tendele ndati ovina viaco? Vonduko yuprofeto Isaya, Suku wa va sapuila hati: “Ene wa si Yehova, kuenje wa ivali omunda yange yi kola, haene wa angiliyili Esanju omesa, kuenje wa itilili Sande ovinyu.” (Isaya 65:11) Kovaso a Suku oku kolela kosande, ku sokisiwa loku fendela oviteka kuenda ka ci litava lefendelo liocili. Oku ci linga ci lekisa okuti omunu wa kolela kongusu yimue ka yi letiwe, okuti ku Suku hakoko. Ka ca sungulukile oku sima okuti Suku wa pongolola ovisimĩlo viaye viatiamẽla kondaka eyi.

Ndomo Vamue va Nganyala

Ci kale okuti ocela cosande ci lingiwila vo Internet, ale poku landa ovikanda viototolotu volonjo violomapalo, vakuakulinga olomapalo viaco, va sokolola lika oku nganyala olombongo vialua. Ocela cosande ca litepa loku linga omĩlu yiwa, momo omunu una imba ocela caco o livela oku nganyala olombongo viukuavo. * Usongui wo Centro do Vício e da Saúde Mental kofeka yo Kanada wa popia hati: “Olohuasi viosi via sovola olonjo vioku imba ocela cosande, vi nganyala olombongo vialua vina vakuavo va pesela.” Onumbi yipi Yembimbiliya yi pondola oku kuatisa Ukristão oku limbuka ocisimĩlo ca Suku catiamẽla kondaka eyi?

Ocihandeleko ca sulako ca eciwile ku va Isareli, ci popia hati: “Ku ka livele ukãi wokuẽle, pamue upika waye ulume, pamue upika waye ukãi, pamue ongombe yaye, pamue ocimbulu caye. Cosi cokuẽle ku ka ci livele.” (Etundilo 20:17) Oku livela ovina viamãle ndeci, ovikuata, pamue ukuasi wavo, kuenda olombongo, ekandu liaco li sokisiwa loku livela ukãi wamãle. Vokuenda kuotembo, upostolo Paulu wa pitulula ocihandeleko eci, poku lungula Akristão  hati: “Ku ka livele.” (Va Roma 7:7) Nda Ukristão o sandiliya oku nganyala ocikuata cimue camãle, ka kuata hẽ ekandu lioku livela?

Usonehi J. Phillip Vogel, wa popia hati: “Vakuakuimba ocela cosande, ci kale okuti va tava ale sio, osimbu ka va fetikile oku imba, vutima wavo va sokolola lika oku nganyala olombongo vialua.” Omanu vaco, va yongola oku linga olohuasi lonjila yimue ya leluka. Pole, eci ca litepa lelungulo Liembimbiliya liokuti, Ukristão o sukila oku linga “upange wocili lovaka aye okuti o sanga coku kuatisa laco olosuke.” (Va Efeso 4:28) Handi vali, upostolo Paulu, wa popiavo hati: “Umue nda ka yongola oku linga upange ka ka lie.” Eye wa lekisa okuti, omanu vaco va sukila oku lia “ombolo yavo muele.” (2 Va Tesalonike 3:10, 12) Anga hẽ oku imba ocela cosande ci tendiwa ndupange umue wa sunguluka?

Ndaño okuti oku imba ocela cosande ci vetiya calua omanu, pole olombongo vi eciwa poku ci linga, ka vi kasi ndevi omunu a nganyala omo lioku linga upange umue uwa. Poku imba ocela cosande, omunu o yekela olombongo lelavoko liokuti, pamue o ka nganyala olombongo vialua. Poku ci linga, omunu o sandiliya oku tambula ocina cimue ka ca tundile kesalamiho liaye. Pole, Akristão vocili va vetiyiwa oku nganyala olombongo lonjila ya sunguluka. Soma Salomone wa soneha ndoco: “[Ocina] ciwa komunu ceci, oku lia loku nyua loku sanjukila upange waye, ca velapo ka kuli.” Noke wa amisako hati: “Leci le nda limbuka okuti ca tunda ku Suku.” (Ukundi 2:24) Afendeli va Suku ka va sandiliya oku nganyala olombongo lonjila ya leluka, ndaño oku sokolola kelavoko liesanda, pole va imba lika ovaso ku Suku yesanju, haeye ukuesumũlũho.

“Onjanjo” tu Sukila oku Yuvula

Ndaño okuti ukuakuimba o lavoka oku nganyala calua, pole o sukila oku sokolola ovitangi a ka kuata vokuenda kuotembo omo lioku litumbika koku imba ocela cosande. Kelivulu Liolosapo 20:21, tu tangako ndoco: “Ocipiñalo coku tambula ño longusu kefetikilo, kefulilo liaco ka ci sumũlũha.” (Olosapo 20:21) Omanu valua va nganyala olombongo koku imba ocela cosande, veya oku limbuka okuti, ukuasi una va nganyala, ka wa va nenelele esanju va lavokaile kefetikilo. Ca velapo oku kapako elungulo Liembimbiliya lioku yuvula oku kolela “ukuasi u pua pua, puãi [tu koleli] Suku u o tu ihaiha ovina viosi ha tu sanjuka lavio.”—1 Timoteo 6:17.

Ndaño omunu o yula ale o pumba, kuli ohele yikuavo yi tunda koku imba ocela cosande. Ondaka ya Suku yi popia hati: “Ava va yongola oku linga olohuasi va kupukila vayonjo, va fa vonjanjo kuenje va kuatiwa lalivelo uveke, hao a nyõla, kuenje a kokela omanu oku vombisua loku nyõleha.” (1 Timoteo 6:9) Onjanjo yi petuiwila oku kuata ocinyama cimue. Olonjanja vimue, omanu va seteka oku imba ocela cosande, lelavoko lioku nganyala lika okalombongo kamue, ale va sima okuti va ci linga ño vokuenda kuotembo yitito, pole ci tĩlila oku imbapo ocituwa caco. Oku sulako va nyõla upange wavo, ocisola la vangandiavo, kuenda va talisa ohali epata liavo.

Poku kũlĩhĩsa ovisonehua vi tiamisiwila koku imba ocela cosande, wa limbuka hẽ ndomo Suku a tenda ocituwa caco? Upostolo Paulu, wa lungula vamanjaye Akristão hati: “Ko ka lisetahaisi loluali lulo, puãi kuati ovitima viokaliye okuti ovimuenyo vi pongoluiwa, kuenje vu limbuka ndeci ci kasi ocipango ca Suku, okuti ciwa, ca sunguluka, ca pua eko.” (Va Roma 12:2) Akristão ka va vetiyiwa lovisimĩlo viomanu, momo va nõlapo oku songuiwa locipango ca Suku. Omo Yehova eye ‘Suku yesanju,’ o yongola okuti tu sanjukavo, kuenda tu puluka kovitangi vi tunda koku imba ocela cosande.—1 Timoteo 1:11.

[Atosi pombuelo yamẽla]

[Olondaka vielitalatu kemẽla 23]

Afendeli va Suku va sandiliya oku nganyala olombongo poku linga upange wa sunguluka

[Olondaka vielitalatu kemẽla 22]

Esanju Lioku Nganyala

Anga hẽ omunu ukuakuimba ocela cosande, ci leluka oku imbapo ocituwa caco? Ndotolo Hans Breiter, ukuakukonomuisa vakuakuimba, wa popia hati: “Esanju li tunda kolombongo vi nganyaliwa poku imba ocela cosande, li vetiya owoño womunu oku kuata ocituwa cĩvi, ndekuanyu liyeva omunu ukuakunyua olodroga.”

[Elitalatu kemẽla 22]

Olombongo vielie vakuakuimba va lavoka oku nganyala?