Lilongisila Kondaka Ya Suku

Suku Helie?

Ocipama cilo, ci konomuisa apulilo wa siata oku lilinga kuenda ci lekisa apa o pondola oku sanga atambululo poku tanga Vembimbiliya liove. Olombangi Via Yehova, vi ka sanjuka poku konomuisila kumue love atambululo aco.

1. Suku helie?

Suku yocili, eye Ululiki wovina viosi. Embimbiliya liu tukula okuti, ‘Soma yonahulũlua,’ ci lomboloka okuti, Suku ka kuatele efetikilo kuenda ka ka kuata esulilo. (Esituluilo 15:3) Omo okuti Suku eye Ono yomuenyo, eye lika tu sukila oku fendela.—Tanga Esituluilo 4:11.

2. Suku wa tuwa ndati?

Ka kuli omunu laumue wa muile Suku, momo eye Espiritu, ci lomboloka okuti, o kuete omuenyo wa velapo, woviluvo vi kasi kilu lieve. (Yoano 1:18; 4:24) Unu wa Suku wa situluiwa kovina eye a lulika. Eci tu vanja eposo liovina a lulika, apako alua, kuenda olonelẽho via fina, tu limbuka olondunge locisola ca Suku. Oku tanda kuoluali, ku eca uvangi wunene wa Suku.—Tanga Va Roma 1:20.

Lekuatiso Liembimbiliya, tu pondola oku lilongisa ovina vialua viatiamẽla kunu wa Suku. Olio li tu sapuila ovina Suku a sole levi a nyãle, ndomo a tata omanu vaye kosimbu, kuenda ndomo a enda oku liyeva vakalo a litepa.—Tanga Osamo 103:7-10.

3. Anga Suku o kuete onduko?

Yesu wa popia hati: “Oco li kutilili ndeci, hoti, A Isietu o kasi kilu. Onduko yove yi sumbiwe.” (Mateo 6:9) Ndaño okuti Suku o kuete olonduko vialua viesumbilo, pole o kuete lika onduko yimosi. Elimi lelimi li kuete ndomo va yi tukula. Kelimi liumbundu onduko yaco yi tukuiwa hati, “Yehova.”—Tanga Osamo 83:18.

Vambimbiliya alua onduko ya Suku yopiwamo kuenda ya piñanyiwa londuko yesumbilo okuti, Ñala, ale Suku. Pole eci Embimbiliya lia sonehiwa, onduko ya Suku ya tukuiwa eci ci soka 7.000 kolonjanja. Yesu wa tukula onduko ya Suku poku longisa omanu Embimbiliya. Eye wa va kuatisa oku kũlĩha Suku.—Tanga Yoano 17:26.

  4. Anga Suku wa tu kapako muẽle?

Yehova o lekisa okuti wa tu kapako, poku yevelela olohutililo vietu. (Osamo 65:2) Ohali yalua tu kasi oku tala, anga yi lekisa okuti Suku ka kuete ocikembe letu? Vamue va siata oku popia okuti Suku o tu seteka lohali, pole eci, haciliko, momo Embimbiliya li popia hati: “Ci kale kupãla la Tõlo oku limba kakandu.”—Yovi 34:10; tanga Tiago 1:13.

Suku wa tu ĩha elianjo lioku linõlela eci tu linga. Anga hẽ ka tua sanjukilile elianjo lioku nõla oku vumba Suku? (Yehosua 24:15) Olonjanja vimue omanu va tala ohali, omo lioku nõla oku linga ovina vĩvi. Eci Yehova a mola ũvi wa siata oku lingiwa, o sumua calua.—Tanga Efetikilo 6:5, 6.

Ndopo, Yehova vonduko ya Yesu o ka malako ohali yosi, kuenda vana va siata oku yi koka. Yehova o kuete esunga lioku ecelela ohali vokuenda kuotembo yimue. Vosapi yonepa yilo, olonjanja vikuavo tu ka lombolola esunga lieci Suku a kasilili oku ecelela ohali.—Tanga Isaya 11:4.

5. Nye Suku a yongola okuti oco tu linga?

Yehova wa tu lulika lepondolo lioku u kũlĩha kuenda oku lekisa ocisola kokuaye. Eye o yongola okuti tu kũlĩha ocili catiamẽla kokuaye. (1 Timoteo 2:4) Nda tu lilongisa Embimbiliya, tu pondola oku kũlĩha Suku Ndekamba limue.—Tanga Olosapo 2:4, 5.

Omo okuti Yehova wa tu ĩha omuenyo, tu sukila oku u sola ca piãla okuti omunu umue ci sule. Tu lekisa okuti tu sole Suku poku vangula laye volohutililo, kuenda oku linga eci a tu tuma. (Olosapo 15:8) Yehova o tu handeleka oku tata vakuetu locisola.—Tanga Marko 12:29, 30; 1 Yoano 5:3.

Oco o sange alomboluilo akuavo tanga ocipama 4, velivulu eli, lia sandekiwa Lolombangi Via Yehova. Embimbiliya li Longisa Nye?

[Elitalatu kemẽla 17]

Anga hẽ kuli esunga lieci ku kasilili oku tala ohali vokuenda kuotembo yimue?