Ndomo Omãla va Longisiwa Ovina Viatiamẽla ku Suku Vipi Olonjila vi Kuamiwa?

“Olondaka evi ñasi loku ku sapuila etaili vi kale vutima wove; o longa lavio omãla vove loku vi pitolola, o vi vangula eci o tumãla vonjo yove, leci wenda vonjila, lo poku pekela, lo poku pasuka.”​—ESINUMUĨLO 6:6, 7.

OLONJANJA vimue, olonjali vi yeva ekavo omo liocikele cavo coku pindisa omãla. Eci va sandiliya olonumbi, va sanga alungulo alua kuenje ka va kũlĩha ndomo va tepisa olonumbi va sukila oku kuama. Epata kuenda akamba olonjanja vimue va ecavo olonumbi viavo. Handi vali, alivulu, olorevista, kuenda ovipama vio Internet, via siatavo oku eca kolonjali olonumbi via litepa.

Embimbiliya ka li sapuila lika olonjali eci vi sukila oku longisa komãla vavo, pole li eca olonumbi vi lekisa ndomo vi pondola oku va longisa. Ndomo ca lekisiwa vocisonehua ca tukuiwa konano, olonjali vi sukila oku sanda onjila yoku sapela lomãla vavo eteke leteke ovina viatiamẽla ku Suku. Kũlĩhĩsa olonumbi vimue vikuãla Viembimbiliya via siata oku kuatisa olonjali vialua ndomo vi longisa omãla vavo ovina viatiamẽla ku Suku.

1. Longisa lekuatiso liovina via lulikiwa. Upostolo Paulu wa popia hati: “Tunde kokululikiwa kuoluali, unu [wa Suku] una ko muiwa muiwa lovaso, okuti unene waye ko pui, kuenda okukola kuaye, u molehẽla ciwa vovina a lulika.” (Va Roma 1:20) Olonjali vi sukila oku kuatisa omãla vavo oku kũlĩha okuti, va pondola lika oku kuata ukamba la Suku poku limbuka ovina a lulika, kuenda oku va kuatisa oku limbuka ndomo ovina viaco vi situlula ovituwa Viaye.

Yesu wa kuama onjila yaco poku longisa olondonge viaye. Eye wa popia hati: “Sokololi olonjila okuti ka vi limi, ka vi lombola, ka vi unguila volosila, haimo Isiene ukuailu o vi tekola. Ene hẽ, ka wa velelipo ca lua okuti ovio vi sule?” (Mateo 6:26) Yesu vocinimbu eci wa situlula ovituwa via Yehova ndeci, ocisola kuenda ohenda. Pole hacoko lika a linga. Eye wa kuatisavo olondonge viaye oku limbuka ndomo Suku a siata oku lekisa ovituwa viaco komãla vaye.

Soma Salomone wa tukulavo olondunge Suku a eca kolonjinji kuenda wa lombolola eci tu lilongisa koviluvo viaco. Eye wa popia hati: “Kuende kolunjinji acisiãi. Sokolola ovituwa vialuo hu lunguka. Ka lu kuete osoma, pamue ocime, ndaño ombiali, haimo lu vanjiliya ohuta yaluo yokondombo, kuenda lu  ungola ovilia vialuo poku lombola.” (Olosapo 6:6-8) Hanjilakuoyo yiwa yoku longisa esilivilo lioku tumbika ovimãho via sunguluka loku likolisilako oku talavaya lolohõlo tua tambula ku Suku oco tu tẽlise ovimãho viaco!

Olonjali vi pondola lika oku setukula ongangu yiwa ya Yesu kuenda ya Salomone yoku longisa poku linga ovina vimue ndeci: (1) Oku pula omãla vavo catiamẽla kovikũla kuenda ovinyama va sole vali calua. (2) Oku lilongisa ovina vikuavo viatiamẽla kovikũla viaco kuenda kovinyama. (3) Oku va longisa catiamẽla ku Suku lekuatiso liovina viaco.

2. Setukula ocituwa ca Yesu catiamẽla komanu vana a longisa. Pokati komanu vosi va kala ale komuenyo, Yesu eye lika wa kuata ovina via velapo vioku popia. Pole, wa pesela otembo yalua koku linga apulilo. Eye wa kapeleko ovisimĩlo viomanu kuenda olonjongole via vana a longisa. (Mateo 17:24, 25; Marko 8:27-29) Cimuamue haico kolonjali okuti, vi kuete ovina vialua vioku longisa komãla vavo. Oco va kuate onima yiwa, va sukila oku setukula Yesu kuenda oku vetiya omãla vavo oku lianja oco va situlule ovisimĩlo viavo.

Oco hẽ nye ci lingiwa nda omãla va lekisa ovituwa vĩvi ale ka va kuata lonjanga elomboloko liovina va longisiwa? Kũlĩhĩsa eci Yesu a linga lolondonge viaye. Ovo olonjanja vimue va enda oku li tatamisa pokati kuenda ka va kuatele lonjanga elomboloko liesilivilo lioku liketisa. Pole, Yesu wa lekisa epandi kokuavo kuenda olonjanja vialua wa va sapuila esilivilo lioku lekisa umbombe. (Marko 9:33, 34; Luka 9:46-48; 22:24, 25) Olonjali vina vi kuama ongangu ya Yesu vi lekisa epandi koku longisa omãla vavo, kuenda olonjanja vimue nda ci sukiliwa, vonumbi yimuamue vi pitololamo olonjanja vialua toke eci omãla va kuata elomboloko liaco. *

3. Longisa poku eca ongangu. Olonjali vi sukila oku pokola kelungulo upostolo Paulu a ecele Kakristão vo ko Roma. Eye wa va sonehela hati: “Ove o longisa ukuele, ove muele ku lilongisa? Osimbu o kunda huti, Ku ka ive, ove muele wiva?”​—Va Roma 2:21.

Elungulo eli li kuete esilivilo momo omãla va kapako calua ovilinga violonjali okuti ovina va popia ci sule. Omo liaco, olonjali vina vi lekisa ovituwa vi likuata lovina va kunda, ca leluka oku kuata omãla va pokola kelongiso liavo.

4. Fetika osimbu va kasi vutila. Timoteo una wa kala ekamba liupostolo Paulu kupange wumisionariu, wa kuata ekemãlo liwa pocitumãlo caye. (Ovilinga 16:1, 2) Esunga limue lieli okuti, “tunde kuñaña” wa longisiwa “ovisonehua vi kola.”​—2 Timoteo 1:5; 3:14, 15.

Koku o Pondola Oku Sanga Ekuatiso

Olombangi Via Yehova via siata oku sandeka alivulu alua oku kuatisa olonjali ndomo va longisa omãla vavo ocili catiamẽla ku Suku. Alivulu amue a sandekiwila omãla. Vakuavo va kuatisa olonjali kuenda omãla oku kuata ocituwa coku sapela ciwa vepata. *

Ocili okuti, osimbu olonjali ka via longisile omãla vavo ovina viatiamẽla ku Suku, va sukila oku kũlĩha atambululo atiamẽla kapulilo amue omãla va siata oku linga. O pondola oku tambulula ndati apulilo amue akuãimo ndeci: Momo lie Suku a ecelela ohali? Cipi ocipango ca Suku catiamẽla koluali? Ava va fa va kasi pi? Olombangi Via Yehova vi pondola oku ku kuatisa oku sanga atambululo kapulilo ava kuenda kapulilo akuavo oco ove kumue lepata liove u kuati ukamba la Suku.​—Tiago 4:8.

[Atosi pombuelo yamẽla]