Vakuakutanga Va Pula . . .

Anga hẽ ongongo yi nyõliwa kunyamo wo 2012?

▪ Ukanda umue wasapulo u tukuiwa hati, BBC News, wa lombolola hati: “Vimbo limue liofeka yo França mueya omanu valua va popia hati ku kasi oku iya enyõleho. . . . Ovo va simĩle okuti esulilo lioluali liya keteke 21 ya Cembanima wo 2012, kesulilo lianyamo 5.125 ndomo a tendiwa vokalendaliu ka va Maya.”

Ndaño okuti ovitunda vietavo, la vana va litukula hati olonoño, kuenda vakuavo vakuakupilula kocita cilo 21 va sapuila omanu okuti ongongo yi nyõleha, pole, oyo yi ka kala otembo ka yi pui. Ka yi nyolẽha kunyamo wo 2012. Ongongo ka yi ka popeliwa ño kunyamo waco, pole yi ka kala otembo ka yi pui.

Embimbiliya li tu sapuila hati: “Ocitumbulukila eci cenda, ocitumbulukila cikuavo ciya, puãi ongongo yi kala ño-o hũ, ka yi pui.” (Ukundi 1:4) Kũlĩhĩsavo elomboloko liolondaka vi sangiwa kelivulu lia Isaya 45:18, vi popia hati: “Yehova, . . . wa lulika ongongo kuenje wa yi panga. Eye wa yi tumalĩsa. Ka yi sowilile ekalasoko, te yoku tungamo, eye muẽle wa popia, hati, Ame ndi Yehova, ka ku li wiñi.”

Anga hẽ isia umue ukuacisola nda wa pesela otembo yaye yoku tungila omõlaye ukuenje owato oco o sanjuise ale o tungila omõlaye ufeko okanjo kamue kolomapalo oco o sanjuise kuenje o nyõla vonjanja yimosi ovina viaco noke yoku va cĩha? Elinga liaco nda ka lia sungulukile! Cimuamue haico okuti, Suku wa lulika ongongo locimãho coku sanjuisa omanu. Eye wa sapuila Adama la Heva olohueli viatete hati: “Liciti, siati, yukisi oluali, lu yuli.” Noke “Suku yu wa ci mola okuti ovina viosi a lulika via posoka.” (Efetikilo 1:27, 28, 31) Suku ka ivaleleko ocipango caye catiamẽla kongongo kuenda eye lalimue eteke a ka ecelela okuti ilu lieve li nyõliwa. Catiamẽla kolohuminyo viaye viosi, Yehova wa popia hati: “Ondaka yange yi tunda vomẽla wange; ka yi tiukila ño kokuange, puãi yi linga ndeci nda panga oku tẽlĩsa, leci nda yi tumĩla.”—Isaya 55:11.

Ocili okuti, ocipango ca Yehova oku “nyõla ava va nyõla ilu lieve.” (Esituluilo 11:18) “Vakuesunga va tunga vofeka, Vakuacili va tumalamo. Vakuakandu puãi va tundisua vofeka, kuenda vakuosuanji va veyuiwamo.”—Olosapo 2:21, 22.

Otembo yipi ci ka lingiwa? Lomue wa ci kũlĩha. Yesu wa popia hati: “Eteke liaco [lowola] yaco, lomue wa yi kũlĩha, ndaño ovangelo vokilu, ndaño Mõla, te Isia lika.” (Marko 13:32) Olombangi via Yehova ka vi tukula otembo Suku a ka nyõla oluali lulo lũvi. Ndaño va limbuka “ondimbukiso” yesulilo lioluali kuenda va kolela okuti omanu va kasi “koloneke via sulako,” pole, ka va kũlĩhĩle otembo “esulilo” liya. (Marko 13:4-8, 33; 2 Timoteo 3:1) Ovo va kolela Isiavo wo kilu kuenda Omõlaye, vana okuti ovo lika va kũlĩha eteke liaco.

Osimbu eteke liaco ka lieyile, Olombangi Via Yehova vi kunda olondaka viwa Viusoma wa Suku, loku kolela okuti uviali waco u ka viala kuenda u ka pongolola Oluali oco lu linge ofeka yelau muna okuti, ‘olondingesunga vi tungamo oloneke ka vi pui.’—Osamo 37:29.

[Elomboluilo lielitalatu kemẽla 12]

Image Science and Analysis Laboratory, NASA-Johnson Space Center